ന്യൂഡൽഹി, ജനുവരി 29, 2021

സാമ്പത്തിക വളർച്ച സൂചികകൾ ആയ വിമാന യാത്രക്കാരുടെ എണ്ണം, തീവണ്ടി വഴിയുള്ള ചരക്കുനീക്കം, തുറമുഖങ്ങളിലെ തിരക്ക്, വിദേശ വിനോദ സഞ്ചാരികളുടെ എണ്ണം, വിദേശ നാണ്യ വിനിമയം എന്നിവയെല്ലാം 'വി' രൂപത്തിലുള്ള തിരിച്ചുവരവാണ് രാജ്യത്ത് രേഖപ്പെടുത്തുന്നത്. ധന-കോർപ്പറേറ്റ് കാര്യ മന്ത്രി ശ്രീമതി നിർമല സീതാരാമൻ ഇന്ന് പാർലമെന്റിൽ സമർപ്പിച്ച 2020-21 സാമ്പത്തിക സർവേയുടേതാണ് ഈ കണ്ടെത്തൽ.

2020-21 സാമ്പത്തിക വർഷത്തിന്റെ ആദ്യ പകുതിയിൽ രാജ്യത്തെ സേവനമേഖല 16%ഓളം ചുരുങ്ങിയതായും സർവ്വേ പറയുന്നു.

മുൻ വർഷത്തെ അപേക്ഷിച്ച് ഏപ്രിൽ മുതൽ സെപ്റ്റംബർ വരെയുള്ള കാലയളവിൽ രാജ്യത്തെ സേവന മേഖലയിലേക്കുള്ള നേരിട്ടുള്ള വിദേശ നിക്ഷേപം 34 ശതമാനം വർധിച്ച് 23.6 ബില്യൺ അമേരിക്കൻ ഡോളറിൽ എത്തി. കമ്പ്യൂട്ടർ സോഫ്റ്റ്‌വെയർ-ഹാർഡ്‌വെയർ ഉപ മേഖല, റീട്ടെയിൽ വ്യാപാര രംഗം, കാർഷിക സേവനങ്ങൾ, വിദ്യാഭ്യാസം എന്നിവയിലേക്കുള്ള ഉയർന്ന വിദേശ നിക്ഷേപമാണ് ഈ വളർച്ചയ്ക്ക് പിന്നിൽ.

2020-ലെ ആഗോള നിക്ഷേപക റിപ്പോർട്ട് പ്രകാരം ലോകത്തെ ഏറ്റവും വലിയ നേരിട്ടുള്ള വിദേശ നിക്ഷേപ സ്വീകർത്താക്കളുടെ പട്ടികയിൽ ഇന്ത്യ പുരോഗതി സ്വന്തമാക്കിയിട്ടുണ്ട്. 2018 ൽ പന്ത്രണ്ടാം സ്ഥാനത്തായിരുന്ന രാജ്യം 2019 ൽ ഒമ്പതായി നില മെച്ചപ്പെടുത്തി.

ഇ-ടൂറിസ്റ്റ് വിസ സൗകര്യങ്ങൾ ലഭ്യമാക്കിയിട്ടുള്ള രാജ്യങ്ങളുടെ എണ്ണം 2014 ൽ 46 ആയിരുന്നത് നിലവിൽ 169 ആയി വർദ്ധിപ്പിച്ചിട്ടുണ്ട്. 2015 ൽ 4.45 ലക്ഷം വിദേശ വിനോദസഞ്ചാരികളാണ് ഇ-വിസ സൗകര്യം പ്രയോജനപ്പെടുത്തി രാജ്യം സന്ദർശിച്ചത് എങ്കിൽ, 2019 ൽ അത് 29.28 ലക്ഷമായി ഉയർന്നു.

തുറമുഖങ്ങളിലെ ചരക്ക് നീക്കത്തിന് ആവശ്യമായ ശരാശരി സമയത്തിൽ വലിയതോതിലുള്ള കുറവ് ഉണ്ടായിട്ടുള്ളതായി സർവ്വേ ചൂണ്ടിക്കാട്ടുന്നു. 2010-11 കാലയളവിൽ 4.67 ദിവസമായിരുന്ന ഇത് 2019-20 ൽ 2.62 ആയി കുറഞ്ഞിട്ടുണ്ട്. എന്നാൽ ആഗോള തലത്തിൽ ഇത് 0.97 ദിവസമാണെന്ന് UNCTAD ഡാറ്റ വ്യക്തമാക്കുന്നു. ഈ മേഖലയിൽ ഇനിയും മുന്നേറാൻ ഉണ്ട്.

2019- 20 കാലയളവിൽ 1.8 ബില്യൺ അമേരിക്കൻ ഡോളർ ആണ് ബഹിരാകാശ സംബന്ധിയായ പദ്ധതികൾക്കായി ഇന്ത്യ ചിലവഴിച്ചത്. ഈ മേഖലയിൽ യുഎസ്, ചൈന, റഷ്യ പോലെയുള്ള രാഷ്ട്രങ്ങൾ ഇതിന്റെ 6 ഇരട്ടിയോളം ആണ് ചിലവിടുന്നത്.