লৈবাক অসিগী রক্ষা মন্ত্রী শ্রী রাজনাথ সিংহজী, চীফ ওফ দিফেন্স স্তাফ জনরেল বিপিন রাৱত, আর্মী, নেভী অমসুং এয়র ফোর্সকী প্রসিদেন্ত, দিফেন্সকী সেক্রতরী, এন.সি.সি.গী দিরেক্তর জেনরেল অমসুং লৈবাক অসিগী মফমপুম্বদগী লেংবিরক্লিবা মরৈবাক নুংশিবগী থৌনা-পাঙ্গলনা য়োম্লবা এন.সি.সি.গী কেদেৎশিং ওইরিবা নহা ওইরিবা মরূপশিংগা মীৎকুপ খরা   লোয়নবগী তাঞ্জা ফংজবা অসি য়াম্না নুংঙাইবা খংজ-উজবা ফংহল্লি। হৌজিক অদোম্না মার্চ পাস্ত চৎপীখিবা, কেদেৎ খরনা পেরা সেলিংগী হৈথোই-শিংথোইবা উৎপীখিবা, নাৎকী ওইবা থৌরমশিং উৎপীখিবা অসি উরগা ঐহাক খক্তা নত্তনা ঙসি তি.ভি.গী থোংদগীসু য়েংবিরমগদৌরিবা মীপুম খুদিংগী থম্মোয়দা চাউথোকপা ফাওবীরমগনি। লৈবাক অসিগী কাচিন-কোয়াদগী লাকপীদুনা জনৱরী ২৬কী পেরদ অসিদসু নিংথিবা থৌরম ওৎপীখ্রে। অদোম্না হোৎনরিবশিং অদু লৈবাকপুম্বনা উরি। ঐখোয় য়েংসি, মালেম অসিগী লৈবাকশিংদা ময়াম্না হিংলিবা পুন্সিদা থকশি-খাশি নাইনা চৎলিবা অসিগুম্বা লৈবাক অসিগী মফম খুদিংমক্তা ঙসি মখোয়গী ফীরালনা হাইনা-হুম্না পাইরি।  অদুগা ভারত্তা ময়ামগী পুন্সিদা থকশি-খাশি নাইহনবদা এন.সি.সি.না  য়াম্না নিংথিনা থৌদাং লৌবা ঙমগনি। অদুগা অদোমদসু মসিগী হৌন-লোনচৎ অদুম্মক লৈহনগদবনি। এন.সি.সি.গী মতুংদসু থকশি-খাশি নাইবগী ৱাখল্লোন অসি অদোমদা লৈগদবনি। মসিদা নত্তনা অদোম্না অদোমগী ইনাক নকপদা লৈরিবা মীওইশিংদসু লেপ্তনা মসিগী ইথীল পীরবদি ভারতকী খুন্নাই অসি মসিনা মপাঙ্গল কনখৎহনগনি, লৈবাক অসি মপাঙ্গল কনখৎহনগনি।

মরূপশা,

মালেম  অসিগী খ্বাইদগী অচৌবা য়ুনিফোর্ম য়ুথ ওর্গানাইজেসনগী মওং ওইনা এন.সি.সি.গী ওইরিবা মহাক্কী শক্তম অসি নোংম-নোংমগী হেন্না ফৎলক্লি। অদুগা ঐহাক্না নখোয়না কন্না হোৎনজরিবশিং অদু উরুবা মতমদা ঐহাক য়াম্না নুংঙাই, অদোমদা হেন্না থাজহল্লি। মতিং লৈবা অমদি থৌগল্লোন তৌবগী ৱাখল্লোনগী ওইবা ভারতকী মমাংঙৈদগী হৌনা চৎনরকপা অসি হেন্না ফগৎহন্নবা তৌরিবা অসিদা-এন.সি.সি.গী কেদেৎশিং উবা ফংই।  সংবিধানগী মতাংদা মীয়ামদা হেন্না খং-হৈহন্নবা কেম্পেন তৌবদা ওইরো- এন.সি.সি.গী কেদেৎশিং উবা ফংই। অকোয়বগী ফীভমগী ওইরো য়াইফনবা তৌবা থবক ওইরো, ঈশিং য়োকশিনবদা ওইরো নত্রগা লু-নানবগা মরি লৈনবা থবক ওইরো মদুদা এন.সি.সি.গী কেদেৎশিং শোইদনা উবা ফংই। লুরবা তানফম অসিদা অদোম খুদিংমক্না অঙকপা মওংদা পাংথোকপা থবক্কী খুদম অসি অতৈ মফমদা য়াম্না তাংনা উবা ফংই। ঈশিং-ঈচাউ ওইরো অতৈ অমাং-অতা থোকপা ওইরো হৌখিবা চহিদা এন.সি.সি.গী কেদেৎশিংনা খুদোংথিবদা তারবা ইরৈচাশিংবু লৌথোকপদা অমদি কনবদা মতেংপাংলি। কোরোনাগী লুরবা তানফমশিংসিদা কেদেৎ লাখ কয়ানা লৈবাকপুম্বদা লৈঙাক্কা লোয়ননা, খুন্নাইগা লোয়ননা পাংথোক্লিবা থবক অসি থাগৎনিংঙাইনি।  ঐখোয়গী সংবিধান অসিদা নাগরিক্না পাংথোক্কদবা থৌদাংশিংগী মতাংদা পল্লিবা, ঐখোয়দা পাংথোকহন্নিংবা অসি পাংথোকপা হায়বসি ঐখোয় খুদিংমক্কা থৌদাংনি।

সিভিল সোসাইতী, মফমদুগী নাগরিক্না মহাক্কী মথৌদাং অদুনা হেন্না লুম্না লৌরবদা চাউরবা শিংনবা কয়াশিংবুসু মায়োক্নবা ঙম্মি হায়বসি ঐখোয় খুদিংমক্না শাক্ষীনি। ঐখোয়গী লৈবাক অসিদা মতম অমদা ফুরুপ নাইবা-মাওৱাদকী খুদোংথিবা কয়া অমা লৈরম্মী অদোম খুদিংমক্না নিংথিনা খংবিরি। লৈবাক অসিগী জিলা কয়া অমা ইথীল পীরি। অদুবু লম-লমগী নাগরিকশিংগী থৌপাংবগী ৱাখল্লোন অমদি ঐখোয়গী দিফেন্স ফোর্সশিংগী থৌনানা পুনশিন্নরক্লবা ফুরুপ নাইবশিংগী মমু থুদেকপা হৌরে। হৌজিক লৈবাক অসিগী জিলা মশিং খরদা ফুরুপ নাইবগী মওং অসি চেৎশিন্না লৈখ্রে।  হৌজিক লৈবাক অসিদা ফুরুপ নাইবগী ইরাং অসি য়াম্না হন্থহনবদা নত্তনা নহারোল কয়া অমনা হিংসাগী লম্বি থাদোক্তুনা চাউখৎপগী থবকশিংদা য়াওনরক্লি।  নাগরিক অমা ওইবগী থৌদাং অমনা মরুওইনা লৌনবগী মওং অদু ঐখোয়না কোরোনাগী মতমদসু উবা ফংলি। লৈবাক অসিগী মীয়াম্না অমত্তা ওইনা পুনশিন্নদুনা মথৌদাং পাংথোক্লবদি লৈবাক অসিনা কোরোনা অসি নিংথিনা মায়োক্নবসু ঙমগনি।

মরূপশা,

মসিগী লুরবা তানফম অসি শিংনবা থনবা ওইরগসু খুদোংচাবা কয়া অমসুং পুরক্লি। খুদোংচাবা-শিংনবশিং অসিদগী মায়োক্ননবা, মায় পাক্ননবা, খুদোংচাবা- লৈবাক অসিগীদমক্তা করিগুম্বা খরা তৌবা ঙম্নবা, খুদোংচাবা - লৈবাক অসিগী মপাঙ্গল অসি হেনগৎহন্নবা, খুদোংচাবা অসি মীপাল তাংদনা ইরোমদোম লেপচবা ঙম্বা ওইনবা, খুদোংচাবা- অচম্বদগী তোঙানবা, তোঙানবদগী খ্বাইদগী অথোইবা ওইনবগীনি। হায়রিবা পান্দমশিং অসি ফংবদা ভারতকী নহা ওইরিবশিংগী থৌনা-পাঙ্গলগী থৌদাং অমসুং নহা ওইরিবশিংগী থৌনা-পাঙ্গলগী থৌদাং অসি খ্বাইদগী মরুওইবনি। অদোম খুদিংমক্কী নুংদসু ঐহাক্না লৈবাক অসিগী থৌগল তৌবা অমগা লোয়ননা লৈবাক অসি ঙাক-শেনবা অমা ওইনসু উই। মরম অসিনা সরকারনা থোইদোক-হেন্দোক্না হোৎনরিবা অসি এন.সি.সি.গী থৌদাং অসি হেন্না পাকথোক-চাউথোক্নবনি। লৈবাক অসিগী ঙমখৈদা অমদি সমুদ্রগী তোর্ব্বানশিং ঙাক-শেন্নবা অমদি দিফেন্সকা মরি লৈনবা নেতৱর্ক অসি হেন্না কনখৎহন্নবগীদমক্তা এন.সি.সি.গী থৌদাং অসি হেন্না হেনগৎহন্নবা তৌরি।

হৌখিবা চহিগী অগস্ত ১৫দা সমুদ্র তোর্ব্বান অমদি ঙমখৈগী মফমশিংদা চাউরাক্না জিলা ২২৫মুক্তা এন.সি.সি.গী অনৌবা মথৌদাং পীরগনি হায়না লাওথোকখি। মসিগীদমক্তা চাউরাক্না এন.সি.সি. কেদেৎ লাখ ১মুক আর্মী, নেভী অমদি এয়র ফোর্সকী ত্রেনিং তৌগদৌরি। মসিদসু শরুক অহুম থোকপগী অমা, ৱান থর্দ, ঐখোয়গী কেদেৎ নুপীশিংবু ত্রেনিং পীগদৌরি। মসিগী কেদেৎশিং অসিগী সেলেক্সন অসি স্কুল অমদি কোলেজ খুদিং, সরকারগী ওইরো, লন্নাইগী ওইরো, কেন্দ্রগী ওইরো নত্রগী রাজ্য সরকারগী ওইরো পুম্নমক্তগী য়াওহনগনি। এন.সি.সি.গী ত্রেনিং কেপাসিতী অসিসু সরকারনা থুনা-য়াংনা হেনগৎহল্লক্লি।  হৌজিক ফাওবদা অদোমগীদা শুপ্নতগী ফায়রিং সিম্যুলেতর অমখক্তমক লৈরম্মী। হৌজিক্তি মসিদগী ৯৮দা হেনগৎহন্নবা তৌরি, চাউরাক্না ১০০মুক, কদায়দগী অমা অদুগা কদায়দগী ১০০। মাইক্রোলাইত ফ্লাইত সিম্যুলেতরসু ৫দগী ৪৪দা অদুগা রোৱিং সিম্যুলেতরসু ১১দগী ৬০দা হেনগৎহল্লগনি। মসিগী অনৌবা মতমগী সিম্যুলেতরশিং অসিনা এন.সি.সি.গী ত্রেনিংগী ক্বালিতী অসি হেন্না ফগৎহনবদা মতেং পাংলগনি।  

মরূপশা,

মসিগী থৌরম অসি পাংথোক্লিবা লম্পাক অসিগী মমিং অসি ফীল্দ মার্শল কে.এম. করিয়প্পাজীগী মমিংনি। মসিসু অদোমগীদমক্তদি চাউরবা ইনোৎ অমনি। করিয়প্পাজীগী পুন্সি অসি থৌনাগী ৱারী কয়ানা থল্লি। ১৯৪৭দা মহাক্কী লাল্লোং য়াৎপগী হৈথোই-শিংথোইবনা মরম ওইদুনা ভারতকী লান্দা অথোইবা মাংজিল থাবা ফংবা ঙমখি। ঙসি ফীল্দ মার্শেল কে.এম. করিয়প্পাজীগী মপোক কুমওন্নি। ঐহাক্না ইরৈচা পুম্নমক্কী মায়কৈদগী, অদোম এন.সি.সি.গী কেদেৎশিংগী মায়কৈদগী মহাক্কী মফমদা ইকাই খুম্ননা খুরুমজরি।  

অদোম ময়ামগী মরক্তগী মরূপ খরনা দিফেন্স ফোর্সশিংগী শরুক ওইবা কন্না পামজরমগনি।  অদোম খুদিংমক্তা মদু ওইবা ঙম্বগী মতিংসু লৈরি অমসুং সরকারনা অদোমগীদমক্তা খুদোংচাবসু হেনগৎহল্লি। মরুওইনা নুপী কেদেৎশিংদা হায়জগদবদি খুদোংচাবা কয়া অমনা অদোম্বু ঙাইরি হায়বসিনি। ঐহাক্না ঐহাক্কী ইমাংদা উবা ঙম্লি অমসুং মশিংসু হৌখিবা চহিশিংদা এন.সি.সি.দা নুপী কেদেৎশিংগী মশিং অসি চাউরাক্না চাদা ৩৫ হেনগৎলে হায়রি। হৌজিক ঐখোয়গী ফোর্সশিংগী ফ্রন্ত খুদিংমক্তা অসি অদোমগীদমক্তা হাংদোক্লগনি। ভারতকী থৌনা লৈরবা ইচানুপীশিংনা অকিবা লৈতনা ফ্রন্তা য়েক্নবশিংগা মায়োক্ননবা ফ্রন্ততা লেংদনা অদুম্মক লেপ্তুনা লৈরি।  অদোমগী থৌনা-লিংজেল অদু লৈবাক অসিনা মথৌ তাই অমসুং অনৌবা মায় পাকপনা অদোম্বু ঙাইদুনা লৈরি। অদুা ঐহাক্না অদোমদা ওফিসরশিং, তুংদা লাক্কদবা ওফিসরশিং ওইনসু উরি।  ঐহাক নিংশিংলি, ঐহাক্না থা অনি-অনি মখাইমুক্কী মমাংদা দিৱালীদা জৈসলমেরগী লোঙ্গেৱালা পোস্ততা চৎখি, মদুদা নহা ওইরিবা ওফিসর কয়াগা উনখি। লৈবাক অসি ঙাক্নবগীদমক্তা মখোয়গী  স্পিরিত, মখোয়গী থৌনা অদু মায়থোংদা তারিবা হোংবা নাইররোইদবা পুক্নিংগী থৌনা অদু ঐহাক কৈদৌনুংদা কাওবা ঙম্লরোই। 

মরূপশা,

লোঙ্গেৱালা পোস্তকীসু চাউথোক্নিংঙাই ওইবা পুৱারী অমা লৈ। ইং কুমজা ৭১গী লান্দা লোঙ্গেৱালাদা ঐখোয়গী থৌনা লৈরবা জৱানশিংনা অথোইবা মায় পাকপা ফংখি।  মতমদুদা পাকিস্তান্দগী লানগী মতমদা নোংপোক অমসুং নোংচুপ্তগী কিলোমিতর লিশিং কয়া শাংবা ঙমখৈদা ভারতকী লান্মীনা মখোয়গী থৌননা মায়থিবা পীখি।  মদুগী লান অদুদা পাকিস্তানগী লান্মী কয়া কয়া অমা ভারতকী লান্মীশিংদা চংজরকখি। ইং কুমজা ৭১গী লান অদুদা ভারতকী মরূপ অমসুং ঐখোয়গী য়ুম্লোন্নবা লৈবাক লৈবাক বাঙ্গলাদেশ অসি ওইহনখিবদা মতেং পীখি। কুমসি অসি, মসিগী লান অসিদা মায় পাক্লকখিবগী চহি ৫০ মপুং ফারগনি।  ভারতকী ওইরিবা ঐখোয় অসি ১৯৭১গী লান্দা  লৈবাক অসি মায় পাকহনখিবা ভারতকী অথৌবা ইচাশিংগী মরিংজেল, মখোয়গী পাঙ্গল-থৌনা অদু লৈবাক  অসিনা সেলুৎ তৌরি। মসিগী লান অসিদা লৈবাক অসিগীদমক্তা থৱায়না পোন্থা ওইখ্রবশিং অদুগী মফমদা শ্রদ্ধাঞ্জলিু কৎচরি।

মরূপশা,

অদোম খুদিংমক্না দিল্লীদা লাকপা তারবদি নেস্নেল ৱার মেমোরিএলদা চৎপা অসি য়াম্নমক মশানা তাবনি। লৈবাক অসি ঙাক-শেন্নবগীদমক্তা থৱায়না পোন্থা ওইখ্রবশিংগী মফমদা ইকাই-খুম্নবা উৎপা হায়বসি ঐখোয় পুম্নমক্কী ইথৌদাংনি। অদুগা মসিগী রিপব্লিক দে অসিদা ঐখোয়গী গেলেন্তরী এৱার্দস পোর্তেল ওইরিবা-www.gallantry awards.gov.in, অসিগী মশক-মওং অসিদা অমুক হন্না লোঞ্চ তৌখ্রে। মসিদা পরমবীর অমসুং মহাবীর চক্রগুম্বা ইকাই খুম্নবা অসি ফংখিবা ঐখোয়গী লান্মীশিংগী পুন্সিগা মরি লৈনবা ৱারোলশিং য়াওরি, মসিগী পোর্তেল অসিদা চংবিরগা মখোয়গী মথৌনা অদু খুরুমজবা য়াই। অদুগা ঐহাক্না এন.সি.সি.দা হৌজিক্কী অমদি মমাংগী কেদেৎশিংদা হায়জগদবদি অদোম্না মসিগী পোর্তেল অসিদা চংবিগদবনি, শম্নগদবনি অমদি লেপ্তনা মখোয়গা লোয়ননা এঙ্গেজ তৌগদবনি।

মরূপশা,

এন.সি.সি.গী দিজিতেল প্লৎফোর্ম শেম্লে হায়না ঐঙোন্দা খংহল্লকখিবা অসিদা হৌজিক ফাওবা কেদেৎ লিশিং ২০দগী হেনবনা শম্নখ্রে।   মসিগী কেদেৎশিং অসিনা মখোয়গী খংজ-হৈজবা, মখোয়গী ৱাখল্লোনশিং শেয়র তৌবসু হৌখ্রে। অদোম খুদিংমক্না মসিগী প্লেৎফোর্ম অসিদা অদুক্কী মতিক মশিং য়াম্না শম্নগনি হায়বা ঐহাক্না থাজৈ।

মরূপশা,

লৈবাক নুংশিবা অমসুং লৈবাক অসিগী থৌগল তৌবগী মতিক-ময়ায় অসিগা লোয়ননা হিংনবগীদমক্তা মসিগী চহি অসি য়াম্না অথোইবা চহিনি। মসিগী চহি অসি ভারতনা নিং-খা তমখিবগী ৭৫ শুবা চহিদা চংশিল্লক্কদৌরে। মসিগী চহি অসি নেতাজী সুভাশচন্দ্র বোসকী চহি ১২৫শুবা মপোক কুমওনশুনি।   রপুন্সিদা ইথীল পীবগী অসুক চাউরবা তাঞ্জা অসি অমত্তা ওইনা পুন্না লাকপা হায়বসি তাংনা থোকই। মশাগী থৌনানা মালেম অসি খ্বাইদগী অকনবা লৈঙাকপু নিকহনখিবা নেতাজী সুভাশনি। অদোম্না নেতাজীগী মতাংদা অদুক্কী মতিক পারিবমখৈ অদোমগী মাংদা লাকপা শিংনবা অমা হেক অসি অদোমগী থৌনা অদু হোংহনবা ঙম্বা অচৌবা নত্তে হায়না খনগনি।  লৈবাক অসি নিং-খা তম্নবগীদমক্তা মশাগী লৈজবপুম্বা কত্থোকখ্রবা অসিগুম্বা অথৌবা অসিনা অদোম্বু, মশানা মংলান শাগৎখিবা ভারত অদু য়েংবা পাম্লি। অদুগা অদোমগী পুন্সি অদু চহি ২৫-২৬ অসি য়াম্না অথোইবনি।   মসিগী চহি ২৫-২৬ অসি ভারতকী ওইনসু অদুক্কী মতিক অথোইবনি।  

ইং কুমজা ২০৪৭দা লৈবাক অসিনা নিং-খা তমখিবা চহি ১০০ মপুং ফারকপা মতমদা অদোম্না ঙসি হোৎনজমন অসিনা, ভারতকী খোংচৎ অসি ফগৎহল্লগনি।  হায়বদি কেদেৎ অমা ওইনা অমদি নাগরিক অমা ওইনসু অনৌবা ৱাশক অমা শক্নবগী চহিনি। লৈবাক্কীদমক্তা ৱাশক্নবগী চহিনি।  লৈবাক অসিগীদমক্তা অনৌবা মংলান পুদুনা খোং থাংজিন্নবগী চহিনি।  হৌখিবা চহিদা লুর-লুরবা অৱাবা কয়াবু অপুনবগী পাঙ্গলনা, লৈবাক অমনা, অমত্তা ওইবা থম্মোইনা মায়োক্নখিবা ৱাখল্লোন অদু অমুক্কা হেন্না ফগৎহনগদবনি। ঐখোয়না লৈবাক অসিগী শেন্মিৎলোনগী ফীভম অসিদা লায়চৎ অসিনা পীরিবা ফৎত্রবা চৈথেং অসিসু মপুং ফানা মাংহনখিগদবনি। অমদি ইরোমদোম লেপ্পা ঙম্বা ভারতকী ৱাশক অদুসু মপুং ফানবা পাংথোক্তুনা উৎকদবনি।  

মরূপশা,

হৌখিবা চহিদা ভারতনা ভাইরস ওইরো নত্রগা ঙমখৈগী শিংনবা ওইরো ভারতনা মাগী ঙাক-শেন্নবগীদমক্তা য়াম্না কন্না খোংথাং খুদিংমক লৌখৎপা ঙম্লে হায়বসি উৎখ্রে। তীকাগী ঙাকথোক্নবগী পাম্বৈ ওইরো নত্রগা ভারতপু শিংনগে খনবা কয়াগী অনিংবশিং অসি মতম অসিগী অনৌবা মিসাইলশিংনা তুম্না মাংহন্নবা, ভারতকী ফ্রন্ত খুদিংমক্তা মতিক চারবা ঙাক্তনি।  ঙসি ঐখোয়না তীকাগী মতাংদসু মীপাল তাংদবা ওইরে অমসুং ঐখোয়গী লান্মীবু অনৌবা মওংদা ওন্থোক্নবগীদমক্তা য়াম্না য়াংনা হোৎনরি। ভারতকী আর্মী খুদিংমক খ্বাইদগী অথোইবা ওইনবগীদমক্তা থৌরাং কয়া অমা পায়খৎলি।  ঙসি ভারত্তা  মালেম অসিগী অফবা ৱার মেছিনশিং লৈরে।  ঙসি অদোম্না মেদিয়াদসু উবিরম্লগনি, ঙরাংখক্তদা ভারত্তা, ফ্রাঞ্চতগী রফেল ফাইতর প্লেন অহুম অমসু লাক্লে। ভারতকী ফাইতর প্লেনশিং অসিমক মিদ-এয়র অসিমক রি-ফ্যুএল্লিং তৌরে। অদুগা মসিগী রি-ফ্যুএল্লিং অসি ভারতী মরূপ য়ুনাইতেদ অরব ইমিরেৎনা তৌবনি অমসুং মসিদা র্গীস অমসুং সাউদী অরবনা মতেং পাংখি। মসি ভারতকী গল্ফ লৈবাকশিংগা ফগৎলক্লিবা মরিশিং মমি অমসুনি।

মরূপশা,

ঐখোয়গী লান্মীশিংগী মথৌ তাবশিং অসি ভারত্তা লোইনা ফংহন্নবগীদমক্তা সরকারনা অচৌবা ৱারেপ লৌখ্রে। দিফেন্সকা মরি লৈনবা পোৎ ১০০দগী হেন্না মীরৈবাক্তগী লৈবা অসি লেপ্তুনা ভারত্তা শেম-শারি।  হৌজিক ভারতকী অয়াংবা ফাইতর প্লেন অসিসু সমুদ্রদগী হৌরগা অতিয়াফাওবা মশাগী তেজস অদু শন্দোক্লি। হন্দক্তা এয়র ফোর্সকীদমক্তা তেজস ৮০দগী হেন্না ওর্দর তৌখ্রে।  মসিদা নত্তনা Aআর্তিফিসিএল ইন্তলিজেন্সতা য়ুম্ফম ওইবা ৱারফেয়রদসু ভারত অসি কনাগীসু মনিংদা হন্থনা লৈহৌদনবগীদমক্তা মথৌ তাবা R অমসুং D খুদিংমক্তা মিৎয়েং চুংশিল্লি।  ভারত অসি দিফেন্সকী খুংৎলায়শিংগী চাউরবা কৈথেলগী মহুত্তা অচৌবা প্রদ্যুসর অমা ওইনা লৌনরগদবা নুমিৎ অদু কুইরক্ত্রে।

মরূপশা,

ইরোমদোম লেপচনবগী পান্দম কয়াশিং অদু ঙসি মপুং ফারকপা অসি উরক্লিবা অসিদা অদোমগী নুংদা চাউথোকপা ফাওবা অসি য়াম্না মশানা তাবনি। অদোমসু হৌজিক ইশানা, অদোমগী মরূপশিংগী মরক্তা লোকেলগী মায়কৈরোমদা পুক্নিং চিংশিল্লকপা অদু খংবি-উবিরি।   ব্রান্দশিংগী ওইবদা ভারতকী নহা ওইরিবশিংগী খোইদাবা অসিদা অচৌবা অহোংবা অমা লাক্লে। হৌজিক অদোম্না খাদীগী মতাংদা হেক্তা য়েংবীয়ু। খাদী অসি মতম অমদা নেতাশিংগী ফীজোলদং ওইনরম্বা অদু হৌজিক্তি ওইনিংবদা ওইরে। ঙসি মসিগী খাদী অসি নহা ওইরিবশিংনা খোইদাবা ব্রান্দ ওইরে। খাদীগী ফুরিৎ ওইরো, জেকেৎ ওইরো, অতৈ পোৎশিং ওইরো ঙসিগি মসি নহা ওইরিবশিংগী ওইনা ফেসনগী সিম্বল ওইখ্রে। মতৌ অসিগুম্না ঙসি তেক্সতাইল ওইরো ইলেক্ত্রোনিক্স ওইরো, ফেসন ওইরো নত্রগা পেসন ওইরো, কুহ্মৈ ওইরো নত্রগা লুহোংবা ওইরো লোকেলগীদমক্তা ভারতকী মীওই খুদিংমক ভোকেল ওইরক্লি। কোরোনাগী লুরবা তানফম অসিদসু ভারত্তা রেকোর্দ থম্বা য়ারবা মশিংদা স্তার্ত অপকী এপশিং শেম্লে অমদি রেকোর্দ য়ুনিকোর্ন লৈবাক্কী নহা ওইরিবশিংনা শেম-শাখ্রে।  

মরূপশা,

২১শুবা চহি চা অসিদা ইরোমদোম লেপচবা ঙম্বা ভারত ওইনবগীদমক্তা মশানা মশাবু থাজবা নহাশিংগী য়াম্না মথৌ তাই।  মসিগী মসানা মসাবু থাজবা, ফিতনেসনা হেনগৎহল্লি, এজুকেসন্দগী হেনগৎহল্লি, হৈথোই-শিংথোইবা অমদি মতিক চাবা খুদোংচাশিংনা ওইহল্লি। ঙসি সরকার অসিনা লৈবাক অসিগী নহাশিংগীদমক্তা মথৌ তাবা মতাংশিংসিদা থবক চত্থরি অমদি মসিগীদমক্তা সিস্তেমদা মথৌ তাবা রিফোর্ম খুদিংমকসু তৌরি।  অতল তিঙ্করিং লেব লিশিং কয়াদগীনা চাউর-চাউরবা অনৌবা এজুকেসন ইন্সতিত্যুৎফাওবা, স্কিল ইন্দিয়া মিশন্দগী হৌরগা মুদ্রাগুম্বা স্কীমশিংফাওবা, সরকারনা মায়কৈ খুদিংমক্তা হোৎনরি।  ঙসি ফিতনেস অমসুং শান্ন-খোৎনবদা ভারত অসিদা হান্না অমুক্তা ওইখিদ্রিবা মওংদা মরুওইনা লৌরি। ফিত ইন্দিয়া অভিয়ান অমসুং খেলো ইন্দিয়া অভিয়ান, লৈবাক অসিগী খুঙ্গং-খুঙ্গংদা অপবা ফিতনেস অমসুং অফবা তেলেন্তপু পুক্নিং থৌগৎনবগীদমক্তা  এন.সি.সি.দা অথোইবা থৌরম চত্থৈ।  

অনৌবা নেস্নেল এজুকেস পোলিসীগী থোংদা ভারতকী এজুকেসন সিস্তেম অসি প্রি নর্সরীদগী হৌরগা পি.ঐচ.-দি.ফাওবগী মহৈরোয়শিংদা মিৎয়েং থম্লি। ঐখোয়গী অঙাংশিংদা, নহা ওইরিবা মরূপশিংদা কান্নদবা প্রেসরদগী কোকহন্দুনা মশাগী অনিংবা, মশাগী অপাম্বগী মতুং ইন্না মাংজিল থানা চংশিন্নবগী ফীভম ওইহল্লক্লি।  লৌ উবদগী হৌরগা স্পেসকী সেক্তরফাওবা, থাক খুদিংদা নহাশিংগী হৈথোই-শিংথোইবগীদমক্তা, নহা ওইরিবশিং ওন্তর্প্রিন্যুরশিংগীদমক্তা খুদোংচাবা পীরি। অদোম্না মসিগী খুদোংচাবশিংসিগী কান্নবা লৌবীরিবমখৈ লৈবাক অসি খুমাং চাউশিনগদৌরিবনি। ঐখোয়না ৱয়ম রাস্ত্র জাগৃয়ামঃ অসিবু, মসিগী বেদগী ওইনা খংহনখিবা অসিদা ২১শুবা চহি চা অসিদা নহাশিংগী থৌনাগী খোল্লাউ ওইহনগদবনি। ঐখোয়না ‘ইদম্ রাস্কত্রায় ইদম্ ন মম্’ হায়বদি মসিগী পুন্সি অসি লৈবাক অসিগীদমক্তা কত্থোক্লবনি, মসিগী ৱাখল্লোন অসি লৈগদবনি।  ঐখোয়না ‘রাস্ত্র হিতায় রাস্ত্র সুখায় চ’গী ৱাশক অসি লৌদুনা ইরৈচা খুদিংগীদমক্তা থবক তৌগদবনি।  আত্মৱত সর্বভূতেশু অমদি সর্বভূতেশু হিতেরতা হায়বদি পুম্নমক্কা লোয়ননা, পুম্নমক্কী চাউখৎনবা, পুম্নমক্কী থাজবগী লাইশোন অসিগা লোয়ননা মাংলোমদা চংশিনগদবনি।

ঐখোয়না লাইশোন অসিগা লোয়ননা পুন্সি অসি হিংবা তারবদি মীপাল তাংদবা ভারতকী ৱাশক অসি মপুং ফাহনবদা মতম য়াম্না চংলরোই। অমুক্কা অদোম পুম্নমকপু রিপব্লিক দেগী পেরদকী শরুক ওইবীবগীদমক্তা হন্না-হন্না নুংঙাইবা ফোংদোকচরি অমদি তুংদা লাক্কদৌরিবা মতমদসু থৌজাল কয়া ফংবা ওইরসনু। 

হন্না-হন্না থাগৎচরি!

*****