য়ুনিয়ন ইজুকেসন মিনিস্তর অমসুং কেন্দ্রিয়া বিদ্যালয় সঙ্গথনগী চিয়রমেন শ্রী রমেস পোখ্রিয়াল ‘নিশঙ্ক’না লৈবাক শীনবা থুংনা লৈরিবা কেন্দ্রিয়া বিদ্যালয়শিংগী মহৈরোয়শিংগা ভর্চুএল ওইনা ৱারি শানখ্রে। নিউ দিল্লিদা লৈবা কে.ভি এন্দ্রিয়ুজগঞ্জতগী মিনিস্তরনা থৌরম শরুক য়াখি অমসুং মহৈরোয়শিংগী ৱাহংশিংগী পাউখুমশিং পীখি।

থৌরম অদুদা মহৈরোয়শিংনা তোঙান-তোঙানবা হিরমশিং অমসুং সবজেকশিংগা মরী লৈনবা ৱাহংশিং হংখি। কেন্দ্রিয়া বিদ্যালয় গুরুগ্রামগী মহৈরোয় অমগী ৱাহংগী পাউখুম পীরদুনা শ্রী পোখ্রিয়ালনা হায়খি কোবিদ-১৯না মরম ওইদুনা চহি অসিগী ওইনা করিকুলম চাদা ৩০ ককথরে অমসুং মরম অদুনা চহি অসিগী জি.ই.ই অমসুং নিত পরিখাশিংদা মহৈরোয়শিংনা ৱাহংশিংগী পাউখুমশিং পীনবা খুদোংচাবা হেন্না ফংলগনি।

বরানসীগী মহৈরোয় অমগী ৱাহংগী পাউখুমদা শ্রী পোখ্রিয়ালনা হায়খি স্কুলশিং অমুক হন্না হাংদোক্লবা মতুংদশু ওনলাইন ইজুকেসনগী খুদোংচাবশিং মখা তানা লৈখিগনি। মতম খরগী ওইনা মহৈরোয়শিং ওনলাইন অমসুং ওফলাইন য়ানশিন্নবা মওংদা লাইরিক তাকখিগনি।

অনৌবা ইজুকেসন পোলিসি-২০২০গী মতাংদা কে.ভি এন্দ্রিয়ুজগঞ্জগী মহৈরোয় অমনা হংলকপা ৱাহংগী পাউখুমদা মিনিস্তরনা হায়খি ভারতকী তুংগী য়েংলগা অনৌবা ইজুকেসন পোলিসি শেম্বনি। লাইরিক্কী লৌশিং খক নত্তনা থবক ওইনা পাংথোক্লগা ফংলকপা লৌশিংগী মতাংদা অহেনবা মিৎয়েং চঙলে। ক্লাস ৬তগী হৌরগা মহৈরোয়শিংদা ভোকেসনেল ত্রেনিংগী খুদোংচাবা পীগনি অমসুং মসি ইন্তর্নশিপশু য়াওগনি। স্কুল থাক্তগী হৌনা আর্তিফিসিএল ইন্তিলিজেন্স তম্বীগনি। মসিগা লোয়ন্না ভারতকী অফবা গুনশিং অমসুং কলচরশিংশু য়োকখৎকনি। মসিগী থৌশিল অসিনা “অত্মানির্ভর ভারত”কী মঙলান মঙফাওনবা ঙমহনগনি।

মহাক্কী সাহিত্যগী হৈশিংবগা মরী লৈন্না ৱাহং অমা হংলকপদা মিনিস্তরনা মহাক্না পামজবা শৈরেং পাথোকখি।

মসিগী মমাঙদা, শ্রী পোখ্রিয়ালনা কে.ভি এন্দ্রিয়ুজগঞ্জগী লম্পাক্তা উ চারা অমা থাখি। ফিত ইন্দিয়া কেম্পেন কনখৎহন্নবা মহাক্না স্কুল অসিদা ওপন জিম অমা হাংদোকখি। মসিগী মথক্তা মিনিস্তরনা স্কুল অসিদা ঈশৈগী লৈকোল অমসু শঙ্গাখি।

কে.ভি.এসকী কম্মিসন্নর নিধি পান্দেনা তরাম্না ওকখি অমসুং কে.ভি.এসকী এদিসনেল কম্মিসন্নর ভি বিজয়লক্সমীনা থাগৎ ৱাহৈ পীখি। থৌরম অদুদা মিনিস্ত্রিগী সেনিয়র ওফিসিএলশিং শরুক য়াখি।

******