উপ-রাস্ত্রপতি, শ্রী এম. ভেঙ্কয়া নায়দুনা ভারতকী শাহৌ লৌবগী ৱারী ইনবগীদমক্তা নহাশিংনা মাংদা থোক্লক্তুনা লৈনবা ঙসি হায়খ্রে।

মহাক্না হান্নগী রাস্ত্রপতি ওইবীরম্বা দাঃ এ.পি.জে. অব্দুল কলাম অজাদকী তমিল লোলদা ইবা পুন্সি ৱারীগী লাইরিক অমা চেন্নৈগী রাজ ভবন্দা ফোঙখিবনি। “অব্দুল কলাম-নিনাইভুগালুক্কুমরানামিল্লাই” হায়না মিংথোনবা লাইরিক অসি দাঃ কলাম অজাদকী নীস, দাঃ এ.পি.জে.এম. নাজেমা মারাইকায়র অমসুং শক্নাইরবা স্পেস সাইন্তিস্ত, দাঃ ৱাই.এস. রাজন্না ইবনি। অইবশিং অসিনা লাইরিক অসিবু তমিল লোলদা ইদুনা পুথোকপগীদমক্তা থাগৎলদুনা, মহাক্না মমারোলদা ইবা অসিনা য়াম্লবা মীওই কয়াদা য়ৌবা ঙম্নবা খ্বাইদগী ফবা থৌওং অমনি হায়খি।

ভারতকী খ্বাইদগী মপাঙ্গল কনবা অসি দেমোগ্রাফিক্কী খেৎনবা লৈবা অসিনি হায়না হায়রদুনা, শ্রী নায়দুনা মসিগী মতিক অসিবু শিজিন্নদুনা লৌউ-শিংউদগী হৌদুনা পোত্থোক পুথোকপগী সেক্তরশিংগী চাউখৎপগী ফিভম অসিবু অয়াঙবা খোঙজেলদা খঙদোকপা ঙমদুনা লাক্লিবা চহিশিংদা তুং কোইনা চৎপা চাউখৎপগী ফিভম অমা লৈহনবা ঙম্নবা হোৎনবগী মতাংদা মহাক্না মিৎয়েং চঙখি। লৈবাক অসিগী অপুনবা মীশিংগী চাউরাক্না চাদা ৬৫দি চহি ৩৫গী মখাদা লৈবা অমসুং চাদা ৫০না চহি ২৫গী মখাদা লৈবা মীওইশিংনি হায়না তাক্লদুনা, মহাক্না লৈবাক অসিগী চাউখৎপগী খোঙজেল অসিবু থুগৎহন্নবা লৈবাক অসিগী নহাশিংনা মাং থানা থোক্লকপগী মতম লাক্লবনি হায়খি।

হান্নগী রাস্ত্রপতিদা ইকায় খুম্নবা উৎলদুনা, শ্রী নায়দুনা নহাশিংনা দাঃ কলামগী লাইরিক অসিদগী চেনা অমা লৌথোক্তুনা মশাদা থাজবা হৌনবসু হায়খি। “মখোয়না থবক থিবা মীওই ওইবগী মহুত্তা থবক পীবা মীওই ওইনবা হোৎনগদবনি”, হায়না মহাক্না মখা তানা হায়খি।

প্রাইমরী এজুকেসন্দগী হৌদুনা মহৈ তম্বগী থৌওং অসিবু হেন্না নুংঙাইহন্নবা, ঐখোয়গী লৈজরিবা এজুকেসনগী পথাপ অসিবু মচা খায়না থুগায়দুনা য়েংবগী তঙাই ফদবগী মতাংদা মিৎয়েং চঙলদুনা, উপ-রাস্ত্রপ্তিনা মহৈরোয়শিংনা ৱাহং হংবা ঙম্নবা অমসুং অচুম্বা ৱাখল্লোন খন্নবা পুক্নিং থৌগৎকদবনি হায়খি। “অনৌবা এজুকেসন পোলিসী অসি হায়রিবা হীরম অসিগী মতাংদদি য়াম্না কান্নবা অমনি। মসিনা করিক্যুলার অমসুং এক্সত্রা-করিক্যুলারগী মরক্তা খেৎনবা থম্বা অসিবু লৌথোক্তুনা অঙাং অমগী মপুং ওইবা চাউখৎপগী মওংদা পান্দম থম্মি”, হায়না মহাক্না মখা তাখি।

দাঃ কলামনা নহাশিংগী ৱাখল্লোনশিংবু মৈ চুনবা হোৎনরম্বা অদুবু নীংশিংলদুনা, উপ-রাস্ত্রপতিনা মহাক্না স্কুলশিংদা চত্তুনা মহৈরোয়শিংগা ৱারী-ৱাতাই শাবগী থৌওং কয়া পাংথোক্লম্মি হায়খি। “মহাক্কী কাওররোইদবা ৱাহৈ, পুক্নিং চীংশিংনিংঙাই ওইবা থৌওং অমসুং মোমোম মীনোক্কী খুত্থাংদা মহাক্না মহৈরোয় কয়া অমদা ইথিল পীরম্মি”, হায়না মহাক্না হায়খি।

হান্নগী রাস্ত্রপতি অসিনা খুন্নাইগী কান্ননবা অমসুং য়াইফ-য়ুম্বালগীদমক্তা তেক্নোলোজী শিজিন্নদুনা থবক পাংথোকপদা থাজবা থম্লম্মি হায়রদুনা, উপ-রাস্ত্রপতিনা হায়খি, “তসেংবদি, ঐখোয়গী দিফেন্স অমসুং স্পেস সেক্তরদা ‘আত্মানির্ভরতা’ লৈহন্নবা অচেৎপা য়ুম্ফম থোল্লমবা অসি দা” কলাম্ননি হায়বা য়াই অমসুং মসিদা য়ুম্ফম ওইদিনা ঐখোয়গী সাইন্তিস্ত অমসুং ইঞ্জিন্যারশিংনা ঙসি শাগৎপা ঙম্লিবনি”।

মহাক্না থম্বীরম্বা ইশাদা থাজবগী চৎনবী অসিনা ইথিল পীদুনা ঐখোয়গী সাইন্তিস্তশিংনা ঙসি ভেক্সিন পুথোকপা ঙম্লিবনি। “মেদিকেলগী খুৎলায়গী মতাংদসু, ঐখোয়না চম্না হৌরক্তুনা, ঙসিদি ঐখোয়না পি.পি.ই. কিৎ, এন.৯৫ মাস্ক অমসুং ভেন্তিলেতরশিংবু অতোপ্পা লৈবাকশিংদা থাদোকপা ঙম্লে”, হায়না মহাক্না হায়রদুনা সরকার অমসুং সাইন্তিস্তশিংবু কোবিদ-১৯গী ভেক্সিন পুথোক্নবা ৱাবা খঙদনা হোৎনখিবগীদমক্তা থাগৎপা ফোংদোকখি।

অতেনবা মতম অসিদা অমসুং শেল য়াম্না চঙদনা ভেক্সিন পুথোকপা ঙমখিবা অসি “য়াম্না মশক থোকপা মাই পাকপা” অমনি হায়না মহাক্না হায়খি।

শ্রী নাইদুনা দাঃ কলাম্বু মহাক্কী নম্থবা য়াদবা ৱাখল্লোন অমসুং খুদোংথিবা কয়া থেংনরবসু হনবা লৈতবগী ৱাখল্লোন চেনবগীদমক্তা মতম পুম্বা নীংশিংনরগনি হায়খি। মহাক্না অচুম্বা লিচত-শাজৎ, হোৎনবা কনবা অমসুং মশাদা থাজবা থম্বগা লোয়ননা তুং লমচৎকিদমক্তা চৎখি হায়না মহাক্না মখা তানা হায়খি।

অব্দুল কলাম ইন্তর্নেস্নেল ফাউন্দেসন (এ.আই.কে.এফ.)কী মেনেজিং ত্রস্তী অমসুং লাইরিক ইমিন্নবা, দাঃ এ.পি.জে.এম. নাজেমা মারাইকায়র, দাঃ মাহালিঙ্গম কোলেজ ওফ ইঞ্জিন্যারিং অমসুং তেক্নোলোজী (এম.সি.ই.তি.)গী চেয়রমেন, দাঃ মানিক্কম, অইবা, দাঃ বালাসুব্রমনিয়ম অমসুং শৈরেং ইবা, শ্রী এ.পি.জে.এম.জে. শৈক সলীম, এ.কে.আই.এফ.কী কো-ফাউন্দরসু থৌরম অদুদা শরুক য়াখি।

মখাদা পীরিবা অসি মহাক্কী অপুনবা ৱারোল অদুনি-

“ইচিল ইনাওশিং,

ঐহাক্না নখোয় ময়াম মরক্তা ঙসি পুন্দুনা “অব্দুল কলাম-নিনাইভুগালুক্কুমরানামিল্লাই” হায়না মিংথোনবা লাইরিক অসি ফোঙবা অসিদা য়াম্না নুংঙাইবা ফাওই।

লাইরিক অসি তমিল লোলদা দাঃ কলাম অজাদকী নীস, দাঃ এ.পি.জে.এম. নাজেমা মারাইকায়র অমসুং শক্নাইরবা স্পেস সাইন্তিস্ত অমসুং ঐহাক্কী নক্নবা মরুপ অমসু ওইরিবা, দাঃ ৱাই.এস. রাজন্না পুন্না ইমিন্নবনি। ঐহাক্না অইবশিং অসিবু মখোয়গী হোৎনবা কনবা অসিগীদমক্তা থাগৎপা ফোংদোকই।

লাইরিক অসি “নিনাইভুগালুক্কুমরানামিল্লাই” হায়না মিংথোনবনি অমসুং মসিগী ৱাহন্থোক্তি ‘শিবা নাইদ্রবা নীংশিংবা’ হায়বনি। শক্লোন য়াম্বা, শক্নাইরবা সাইন্তিস, লৈবাক নীংবা, এজুকেতর অমসুং লৈঙাক্লোই ওইবীরম্বা, মীয়ামগী রাস্ত্রপতি হায়রগসু খঙনবা ঐখোয়গী হান্নগী রাস্ত্রপতিবু নীংশিংবগী ওইনা মতিক চানা মিংথোনবা লাইরিক অমনি। মহাক্না ভারতকী ঙাক-শেল অমসুং স্পেসকী মতাংদা পাংথোক্লম্বা থবকশিং অসিগী লম্বা লৈরোই। মাই-পাকপা কয়া অসি ফংলবসু, মহাক্না অচম্বা অমসুং পুকচেল শেংবা পুন্সি মহিং অমা লেন্দুনা হীংলমখি।

ঐহাক্না দাঃ কলাম্না দি.আর.দি.ও.দা লৈরিঙৈদা অমসুং ভারতকী রাস্ত্রপতি ওইরিঙৈদা কয়ারম হন্না থেংনজবগী লাইবক ফরবা খুদোংচাবা কয়া ফংজখি। ঐহাক্না মহাক্কা উন্নবা খুদিংদা, মহাক্কী চম্লবা মওং, লৌশিং লৈবা অমসুং অচম্বা মীয়ামগী পুন্সিদা অহোংবা কয়া পুরক্নিংবগী অপাম্বা লৈবা ৱাখল্লোন অদুনা ঐহাকপু অঙকপা ফাওহনখি।

মরুপশিং, মহাত্মা গান্ধীনা হায়বীরম্মি, “ঐহাক্কী পুন্সি অসি ঐহাক্কী ৱারোলনি”। মসিগী ৱাফম অসি দাঃ কলামদসু পানবা য়াই, মরমদি মহাক্তি মহাক্না হায়বা ৱাফমশিংবু থবক ওইনা পাংথোকপা মীওইনি। দাঃ কলামগী ইথিল পীনিংঙাই ওইবা ৱাফম কয়া মীয়াম্না পন্নৈ অমসুং মহাকপু নীংথিনা খঙগে হায়রবদি মহাক্কী ৱাখল্লোন অমসুং থবকশিংবু ওইথোকহল্লিবা পুন্সি অদুদা নীংথিনা নৈনবগী তঙাই ফদবা লৈ। তোঙানবা থৌওং অমা ওইনা, ঐহাক্না দাঃ কলাম্না হায়রমখিবা ৱারোলশিংদা নত্তবিদা মহাক্না মহাক্কী পুন্সিদা করি তৌরম্মি হায়বা অদুদা মিৎয়েং চঙনিংই। মহাক্না মহাক্কী পুন্সি থেংখাঙ কয়া মতৌ করম্না থেংনখিবগে হায়বসিংদা য়েংদুনা মহাক্কী অফবা থৌওং কয়াগী মতৌ তম্বা য়াম্না য়াই।

লায়রবা ইমুংদা পোকপনা মরম ওইদুনা, মহাক্কী ইমুং মনুংগী শেন্দানবদা তেংবাংনবা হায়দুনা অঙাং ওইরিঙৈদা মহাক্না খবর য়োনবা চৎলম্মি। মহাক অসি স্কুলদা ময়াই ওইরপ্না লৈবা মহৈরোয় অমা ওইরকই, অদুবু মহাক্কী হোৎনবা কনবা, হৈ-শিংবা অমসুং লৌশিং তানবা পাম্বগী মওংগীদমক্তা মহাকপু ময়াম্না খঙনরম্মি। মহাক্না পুন্সিবু অফবা মিৎয়েংদা অদুমক য়েংদুনা লাকখি অমসুং খুদোংচাদবা খুদিংমক্কী ৱারোইশিন লৈ হায়না খল্লম্মি। মীওই অমনা মশক থোকপা পুন্সি অমা হিংগে হায়রবদি মসিগী ৱাখল্লোন অসি য়াম্না তঙাই ফদবনি।

ইচিল ইনাওশিং,

ভারতকী খ্বাইদগী মপাঙ্গল কনবা অসি দেমোগ্রাফিক্কী খেৎনবা লৈবা অসিসু অমনি। মসিগী মতিক অসিবু শিজিন্নদুনা লৌউ-শিংউদগী হৌদুনা পোত্থোক পুথোকপগী সেক্তরশিংগী চাউখৎপগী ফিভম অসিবু অয়াঙবা খোঙজেলদা খঙদোকপা ঙমদুনা লাক্লিবা চহিশিংদা তুং কোইনা চৎপা চাউখৎপগী ফিভম অমা লৈহনবা ঙম্নবা হোৎনবা ঐখোয়না হোৎনগদবনি। লৈবাক অসিগী চাউখৎপগী খোঙজেল অসিবু থুগৎহন্নবা লৈবাক অসিগী নহাশিংনা মাং থানা থোক্লকপগী মতম লাক্লবনি।

ঐহাক্না নহাশিংনা দাঃ কলামগী লাইরিক অসিদগী চেনা অমা লৌথোক্তুনা মশাদা থাজবা হৌনবা হায়রি। নখোয়না থবক থিবা মীওই ওইবগী মহুত্তা থবক পীবা মীওই ওইনবা হোৎনগদবনি। দাঃ কলাম্না হায়রম্মি, “মঙলান হায়রগদি নখোয়না তুম্লিঙৈদা মঙবা অদু নত্তে। মসিদি নখোয়বু তুমহনবা য়াদবা ৱাখল অদুবুনি”। মহাক্না নহাশিংদা অসুম্না পাউতাক কয়াসু পীরম্মি, “মাই পাকপগী ৱারী পাগনু, নখোয়না পাউজেল অমখক্তং ফংগনি। মাইথিবগী ৱারী পাউ, নখোয়না করম্না মাই পাক্কদগে হায়বগী ৱাখল্লোন ফংগনি”।

দাঃ কলাম্না অঙাংশিং অসিনা হীরম খুদিংদা “করিগীনো’ হায়বা ৱাহং অসি য়াম্না তোয়না হংবগী মরম্না মখোয় অসিনা খ্বাইদগী অহানবা সাইন্তিস্তশিংনি হায়না খল্লম্মি। মসিগী খঙনিংবগী ইথিল অসিনা অঙাং খুদিংগী মনুংদা য়াওজবা অনৌবা থৌওং পাংথোকপা ঙম্বগী মতিক অসি হাংদোকপগী পাম্বৈ অমনি হায়না ঐহাক্না থাজৈ। প্রাইমরী এজুকেসন্দগী হৌরগা মহৈ তম্বগী থৌওং অসিবু হেন্না নুংঙাইবা অমা ওইহন্নবা এজুকেসনগী পথাপ অসিবু মচা খায়না খায়দোক্তুনা নৈনবগী তঙাই ফদবগী মতাংদা ঐহাক্না মিৎয়েং চঙদুনা লাক্লি। মহৈরোয়শিং অসিদা ৱাহং হঙনিংনবা অমসুং মমুৎ তানা ৱাখল খনবা ঙম্নবা পুক্নিং থৌগৎকদবনি। অনৌবা এজুকেস্ন পোলিসী অসি হীরম অসিগী ওইনদি য়াম্না কান্নবা অমা ওইগনি। মসিনা করিক্যুলার অমসুং এক্সত্রা-করিক্যুলারগী মরক্তা খেৎনবা থম্বা অসিবু লৌথোক্তুনা অঙাং অমগী মপুং ওইবা চাউখৎপগী মওংদা পান্দম থম্মি।

দাঃ কলাম্না অঙাং অমগী মনুংদা য়াওবা তৌবা ঙম্বগী মতিক্তা মতম পুম্বদা থাজদুনা লাকখি। মহাক্না নোংমা অসুম্না হায়বীরম্মি, “লৈবাক অসিগী খ্বাইদগী ফবা ৱাখল্লোন্দি ক্লাসরুম অমগী খ্বাইদগী মনিঙ থংবা বেঞ্চতা ফংগনি”। মসিদা মহাক্না হায়নীংলিবা ৱাফমদি অঙাং অমত্তবু হন্থনা লৌগনু হায়বনি।

মনিং থংবা বেঞ্চতগী নোঙমদি তুংগী সাইন্তিস্ত অমা নত্ত্রগা রাস্ত্রপতি অমা থোক্লকপা য়াই। কনা মসিবু খঙবগে।

দাঃ কলামগী তোপ-তোপ্পা মগুন অমদি মহাক্না ভারতকী নহা ওইরিবশিংদা ইথিল পীবা পাম্বা অসিনি। সাইতিস্ত অমা, রাস্ত্রপতি অমা নত্ত্রগা হান্নগী রাস্ত্রপতি অমা ওইগেরা, মহাক্না মতম খুদিংদা স্কুলশিংদা চত্তুনা মহৈরোয়শিংগা ৱারী-ৱাতাই শান্নখি। মহাক্না থবক্তগী পোত্থারবা ফাওবদা মহাক্না মহৈরোয়শিংগা ৱারী শান্ননিংবা পাম্বগী থৌওং অসিদগী মহাক্না তোঙান-তোঙানবা আই.আই.এম. অমসুং তেক্নিকেল ইন্সতিত্যুৎ কয়াগী ভিজিতিং প্রোফেসর ওইরকখি। মহাক্কী কাওররোইদবা ৱাহৈ, পুক্নিং চীংশিংনিংঙাই ওইবা থৌওং অমসুং মোমোম মীনোক্কী খুত্থাংদা মহাক্না মহৈরোয় কয়া অমদা ইথিল পীরম্মি।

হান্নগী রাস্ত্রপতি অসিনা খুন্নাইগী কান্ননবা অমসুং য়াইফ-য়ুম্বালগীদমক্তা তেক্নোলোজী শিজিন্নদুনা থবক পাংথোকপদা থাজবা থম্লম্মি।

দাঃ কলাম্বু মহাক্কী নম্থবা য়াদবা ৱাখল্লোন অমসুং খুদোংথিবা কয়া থেংনরবসু হনবা লৈতবগী ৱাখল্লোন চেনবগীদমক্তা মতম পুম্বা নীংশিংনরগনি হায়খি। মহাক্না অচুম্বা লিচত-শাজৎ, হোৎনবা কনবা অমসুং মশাদা থাজবা থম্বগা লোয়ননা তুং লমচৎকিদমক্তা চৎখি। ভারতকী মশানা শাজবা সেতিলাইৎ লোঞ্চ ভেহিকল শেম্বগীদমক্তা খঙনবগা লোয়ননা, মহাকপু ভারতকী খ্বাইদগী ইহান হানবা ইন্তিগ্রেতেদ গাইদেদ মিসাইল দিভেলপমেন্ত প্রোগ্রাম (আই.জি.এম.দি.পি.) হৌদোকখিবগী ওইনসু মহাকপু নীংশিংনরি। তসেংবদি, ঐখোয়গী দিফেন্স অমসুং স্পেস সেক্তরদা ‘আত্মানির্ভরতা’ লৈহন্নবা অচেৎপা য়ুম্ফম থোল্লমবা অসি দা” কলাম্ননি হায়বা য়াই অমসুং মসিদা য়ুম্ফম ওইদিনা ঐখোয়গী সাইন্তিস্ত অমসুং ইঞ্জিন্যারশিংনা ঙসি শাগৎপা ঙম্লিবনি।

মহাক্না থম্বীরম্বা ইশাদা থাজবগী চৎনবী অসিনা ইথিল পীদুনা ঐখোয়গী সাইন্তিস্তশিংনা ঙসি ভেক্সিন পুথোকপা ঙম্লিবনি। মেদিকেলগী খুৎলায়গী মতাংদসু, ঐখোয়না চম্না হৌরক্তুনা, ঙসিদি ঐখোয়না পি.পি.ই. কিৎ, এন.৯৫ মাস্ক অমসুং ভেন্তিলেতরশিংবু অতোপ্পা লৈবাকশিংদা থাদোকপা ঙম্লে। অমসুং, মসিগা লোয়ননা ঐহাক্না সরকার অমসুং সাইন্তিস্তশিংবু কোবিদ-১৯গী ভেক্সিন পুথোক্নবা ৱাবা খঙদনা হোৎনখিবগীদমক্তা থাগৎলি। ঙরাংদগী হৌখিবা পুৱারী ওইরবা তীকা থাবগী খোঙজঙ অদুগীদমক্তসু থাগৎপা ফোংদোক্লি।

দাঃ কলাম্না রাস্ত্রপতি ওইরম্বা মতম অদু মহাক্কী পুন্সিগী খ্বাইদগী থাক ৱাংবা মতম্নি অমসুং মসিনা মহাক্কী তোপ-তোপ্পা ৱাখল্লোন কয়াবু অচম্বা মীওইশিংদা য়ৌহনবদা তেংবাংখি। মহাক্না অয়াম্বা মতমদা মীয়ামগা লোয়নখি অমসুং য়াম্না চম্বা লিচত-শাজৎ উৎখি। মহাক্না নোংমা কেরলাদা চৎখিবা মতমদা, মহাক্না মহাক্কী খোঙউপ ফোৎখিবা মুজি অমসুং মহাক্না তোয়না অচা-অথক চারম্বা চা য়োনবা মীওই অদুবু রাজ ভবন্দা কৌখি। মহাক্কী অসিগুম্বা ইচম-চম্বগী মওং অসিনা মহাকপু মীয়াম্না নুংশিরিবনো হায়বা তাক্লি। লাইরিক অসিনা হায়বগী মতুং ইন্না, মহাক্কী নীংশিং ৱারীশিং অসি তসেংনা মতম নাইদ্রবা ৱারীনি হায়বা তাক্লি।

মহাকপু মীয়াম্না য়াম্না পাম্লিবগী মরমদি মহাক্না ভারতকী তোঙান-তোঙানবা চৎনবীশিংগা চান্ননা অমসুং ইন্দুনা চৎপা ঙম্বা অসিনি। লৈবাক অসিগী খ্বাইদগী মকোক থোংবা সাইন্তিস্ত অমা ওইনা, মহাক্না তমিলগী শৈরেং ইবা অমসুং পাবা, ভীনা খোঙবা অমসুং লাইনিং-লাইশোনগী কার্নাতিকী ঈশৈ-নোঙমাই তাবা য়াম্না পামজখি। মহাক্না আই.আই.এম. অমসুং আই.আই.তি.গুম্বা খ্বাইদগী থাক ৱাংবা ইন্সতিত্যুসনশিংদা ৱা কয়া ঙাংখি অমসুং খুঙ্গংগী স্কুলশিংদসু চপ-মান্নবা অপাম্বা লৈদুনা চৎপসু য়াম্না পামজখি।

ইচিল ইনাওশিং,

ঐহাক্না লৈবাক শিনবা থুংনা চৎখিবা মতমদা, ঐহাক্না তোঙান-তোঙানবা ইন্সতিত্যুসনশিংগী মহৈরোয়শিংগা চাং নাইনা উন্নদুনা লাক্লি। অসিগুম্বা ৱারী শাবগী তাঞ্জা ফংবা অসিনা মখোয়দা ঐহাক্কী ৱাখল্লোন খঙহনবা অমসুং মখোয়গী অপাম-পামদ কয়া খঙবা ঙম্বগী খুদোংচাবা কয়া অমা ফংই হায়না ঐহাক্না থাজৈ।

দাঃ কলাম্না মতম পুম্বদা অকোয়ববু ঙাক শেন্নিংবা ফাওখি। রাস্ত্রপতি ভবনগী লৈকোলদসু, মহাক্না হিদাক পাম্বী থাদুনা হর্বেল অমসুং ‘স্পিরিচুএল গার্দেন’ অমা শেমখি অমসুং মসিনা মীথুং কয়া অমগী, মরু ওইনা স্কুলগী মহৈরোয়শিংগী পুক্নিং চীংশিনখি। “ক্রীএতিং এ লিভেবল প্লআনেৎ আর্থ” হায়না মিংথোনবা আই.আই.এম. শিল্লোংদা পাংথোকখিবা মহাক্কী ইকোন কোনবা ৱা ঙাংবগী থৌরম অদুদা ঐখোয়না চাউখৎপা পাম্বদগী ঐখোয়গী পৃথীবিগী ইকোসীস্তেম অসি কায়হল্লে হায়না মহাক্না চেকশিনৱা অমা হায়বীরমখি।

মরুপশিং, ঐখোয়না মতম পুম্বদা নীংশিংগদবা অসিদি চাউখৎপা অমসুং অকোয়ববু ঙাক-শেনবা অসি খুৎশমন্দুনা চৎমিন্নগদবনি হায়বসিনি। ঐখোয়না মহৌশাগা নুংশি-চান্ননা লৈগদবনি অমসুং মহৌশাগী ইকোসীস্তেমদা শোকহনবগী ঐখোয়দা হক লৈতে। অব্দুল কলাম ইন্তর্নেস্নেল ফাউন্দেসন অসিনা সোসিএল ফোরেস্ত্রীগুম্বা প্রোজেক্তকী খুত্থাংদা অসিগুম্বা অফবা থবক অসি মখা তানা চত্থরি হায়বা খঙবদা য়াম্না নুংঙাইবা ফাওই।

ইচিল ইনাওশিং,

দাঃ কলামগী লাইরিকশিং অসি নহা অমসুং অহলশিংনা চপ মান্ননা পাম্নদুনা লাক্লি।

মহাক্কী পুন্সি ৱারীগী লাইরিক অসিনা মহাক্কী ইমুং মনুংগী অকুপ্পা ৱারোলশিংগা লোয়ননা মহাক্কী মহৈরোয়গী পুন্সিদগী হৌদুনা মহাক্কী পুন্সিগী খোঙচৎ খুদিংমক য়াওই হায়না ঐঙোন্দা পাউদম্বীরে। মহাক্কী ইমুং মনুংগী মিৎয়েংদগী য়েংবা থৌদোক কয়া অমসু য়াওরে। দাঃ ৱাই.এস. রাজন্না তেংবাংবদগী ফাওরবা মীওই অসিগী নীংথিরবা মগুন কয়া অমা পুথোকপীরক্লে। ঐহাক্না লাইরিক অসিগী অইবশিং অসিবু লাইরিক অসি পুথোকপীরক্তুনা দাঃ কলাম্বু হেন্না নীংথিনা খঙবা ঙমহনবগীদমক্তা থাগৎপা ফোংদোক্লি।

ঐহাক্না লাইরিক অসিবু ফোঙবা অসিদা অমুক্কা হন্নসু হরাওবা ফোংদোকচরি।

অইবশিং, অব্দুল কলাম ইন্তর্নেস্নেল ফাউন্দেসন অমসুং দাঃ কলামগী ইমুং মনুংদা ঐহাক্না য়াইফ-পাউজেল পীজরি।

জয় হিন্দ!”

*****