প্রধান মন্ত্রীনা মালেমগী খ্বাইদগী অচৌবা কোবিদ-১৯ বেক্সিনেসন দ্রাইব হৌদোকপগী মরু ওইবা নুমিৎ অসিদা কেন্দ্রগী হকশেল অমসুং য়াইফ-য়ুম্বাল মন্ত্রী দা. হর্শ বর্ধন্না নই দিল্লী এম্সকী দোক্তরশিং, নর্সশিং অমসুং অতোপ্পা হেল্থকিয়র অমসুং ফ্রন্তলাইন ৱার্করশিংগা লোইনবা পামখি।

সেনিতেসন ৱার্কর শ্রী মনিশ কুমারনা নই দিল্লী এম্সকী বেক্সিনেসন দ্রাইবকী অহানবা রিসিপিয়েন্ত ওইখিবা অসিদা মহাক্না লৈবাক অসিনা কোবিদ-১৯গী মায়ক্তা লান্থেংনবদা মখোয়না কত্থোকপগা লোইননা হোৎনখিবশিং অদুবু থাগৎখ্রে।

এক্সর্সাইস অসি চহি অমগী মমাংদা হৌখিবা লাইচৎকী মরু ওইবা তাঙ্কক্কী অহৌবনি হায়না ফোঙদোক্লদুনা দা. হর্শ বর্ধন্না হায়খি, “অহৌবদগী হৌনা প্রধান মন্ত্রী শ্রী নরেন্দ্র মোদীনা মশা য়াওনা লাইচৎ অসি লাকশিন্নবা হকথেংননা হোৎনখি। ঙসি অসি থা মঙা কনা কোবিদ বেক্সিন পুথোক্নবা কন্না হোৎনখিবা অদুগী মহৈ ফংবা নুমিৎনি।”

প্রধান মন্ত্রীনা ভিদিও কনফরেন্সকী থোংদা অয়ুক পুং ১০.৩০ তাবা মতমদা কোবিদ-১৯ বেক্সিনেসন দ্রাইভ হৌদোকখ্রে।

মন্ত্রীনা মালেমগী খ্বাইদগী চাউবা কোবিদ-১৯ বেক্সিনেসন দ্রাইভকী স্পান অমসুং স্কোপকী মতাংদা ৱা ঙাংখ্রে। “সাইৎ অমমমদা বেনিফিসরী ১০০রোম তিকা থাবগা লোইননা ঙসি রাজ্য অমসুং য়ু.তি. পুম্নমক্কী সেসন সাইৎ ৩০০৬তা অমুক্তদা থবক অসি পাঙথোকখ্রে। মীশিং করোর ১৩৮ লৈবগা লোইননা অমসুং তিকানা ঙাকথোকহনবা ঙম্বা লাইনা তরানিথোইগী মায়োক্তা বেক্সিনেসন তৌবগী পান্দম য়াওবা য়ুনিভর্সেল ইম্ম্যুনাইজেসনপ্রগ্রামগী ইতিহাস লৈবগা লোইননা ভারতনা মালেমগী লৈরিবা লৈবাকশিংদা ইতিহাস কয়া রেকোর্দ থমদুনা লম্বী উৎপা ঙমখ্রে। স্মোলপোকসকী অমসুং পোলিয়োগী মতুংদা মথং অসি কোবিদনা ওইরে। ঙসিগী এক্সর্সাইস অসিদা অরাপ্পা, য়ৌবা ঙমদবা মফমশিং, অর্বান স্লমশিং, ত্রাইবেল বেল্তশিং পুম্নমক কোনশিনখ্রে।”

দা. হর্শ বর্ধন্না অচৌবা এক্সর্সাইস অসিগীদমক্তা শেম শাখিবশিং অদু শন্দোক্না হায়রদুন হায় :- “ বেক্সিনেতর লাখ অমা হেন্না ত্রেন তৌখ্রে; মোক এক্সর্সাইস কয়া পাঙথোকখ্রে; অশোইবশিং খঙদোক্নবা পান-ইন্দিয়া নেস্নেল এক্সর্সাইস অমসু পাঙথোকখ্রে। ই.ভি.আই.এন. প্লেৎফোর্ম অসি কোৱিন (কোবিদতগী থোইবা) ওইনা রিপর্পজ তৌনবা তেক্নোলোজী শীজিন্নদুনা পর্ফোর্মেন্স তৌখ্রে, হৌখিবা নুমিৎ নিনি অসিদা (ঙসিগী সেসন অসিগীদমক) বেনিফিসরী পুম্নমক্তা এস.এম.এস. থাখিবা অসি অনিশুবা দোসকী মতমদা অমসুং সেসন পুম্নমক্তা বেনিফিসরীশিংদা অমুক থাগনি”।

হকশেল মন্ত্রীনা হায় মপুং ফাবা তীমৱার্ক অমসুং মপাঙ্গল লৈবা রাজনিতীনা অচৌবা এক্সর্সাইস অসিগী য়ুম্ফম ওইখ্রে। “প্রধান মন্ত্রী অমসুং মুখ্য মন্ত্রী পুম্নমক্না ঐগা থবক পুমিন্নরিবা হকশেল মন্ত্রীশিংগা লোইননা তীম অমা ওইনা পুন্না থবক তৌমিন্নখি অমসুং ঙসি ইতিহাস অমা শেম্বা ঙমখ্রে”, হায়না মহাক্না ফোঙদোকখ্রে।

দা. হর্শ বর্ধন্না অহানবা বেক্সিন কাপখিবা অদু য়েংখিবা

দা. হর্শ ভর্ধন্না থৌরম অদুদা মীয়াম পুম্নমক্তা হৌখিবা চহিদা কোবিদকী মাইয়োক্তা মাই পাকখিবশিংগী মরমদা পনখি। মহাক্না হায় “লাইনা অসিগী ত্রেজেক্তরী য়াম্না কুপ্না য়েংশিনবা, ইফেক্তিব ক্লিনিকেল মেনেজমেন্তগা লোইননা প্রো-এক্তিব, প্রি-এম্পতিব অমসুং গ্রেদেদ এপ্রোচনা মসিগা চাওনা মায়োক্নবা ঙম্বনি অমসুং মশিং য়াম্লবা ঐখোয়গী মীয়াম পুন্সি কনবা ঙম্বনি। ভারতনা ৯৬%গী মথক্তা খ্বাইদগী ৱাংবা ফগৎলকপগী চাং অমসুং ১.৫%দগী তাবা খ্বাইগী নেম্বা শিবগী চাং লৈখি”। ভেক্সিনশিং অসিবু ‘মাইপাকপগী লম্বেল’ হায়না কৌরদুনা মহাক্না হায় “কোবিদ-১৯ ভেক্সিন অসি কোবিদতগী মাই পাকপগী সঞ্জীবনি অমা ওইনা নিংশিংনহৌরগনি”।

দা. হর্শ ভর্ধন্না প্রাইবেৎ অমসুং পব্লিক ফেসিলিতীশিংদা লৈরিবা হেল্থ ৱার্করশিংনা মখোয়দা অহানবা ওইনা ভেক্সিন কাপ্নবগী ৱারেপ অদুবু তরাম্না ওকখিবগা লোইননা অতোপ্পগীদমক মখোয়গী পুন্সি খুদোংথীবদা থম্লিবা কোবিদ ৱারিয়রশিং অসিগী কত্থোকপা অদুবু পনখি। মহাক্না ভেক্সিন অসিগী ত্রাইএলশিংদা অকিবা লৈতনা মতেং পাংখিবা ভারতকী প্রজা মীয়াম্বুসু থাগৎপা ফোঙদোকখি।  

“মহাক্না কোবিদ-১৯ ভেক্সিনশিং শিজিন্নবগা মরী লৈননা ঙাংনরিবা অরানবা ৱাশিং অমসুং লান্না থাজনবা অসি মায়োক্নবা তঙাইফদবগী মতাংদসু ফোঙদোকখি। মহাক্না মীয়ামদা অরানবা পাউগী খুত্থাংদা লান্না লমজিংহন্দনবা অমসুং অচুম্বা অমসুং ওথেন্তিক ওইবা পাউখক্তমক থাজনবীনবা আপীল তৌখি। দা. হর্শ ভর্ধন্না হায় “লৈবাক পুম্বা হান্নগী পুন্সিদা হঞ্জিন্নবা ৱানা ঙাইরি”। মীয়াম্না মখোয়গী নুংশিরবা ইমুং মনুংশিং কাইনখ্রে। থবক থৌরম অসিগী ইন্তিগ্রিতীদা মীওই খরনা অরানবা মওংদা অতোপ্পশিংবু লান্না লমজিংলিবা অসি প্রজা মীয়াম্না কত্থোকখিবা অমসুং সমাজ অসিগী তুংগী পুন্সিদা অফবা থৌওং অমা নত্তে”।    

দা.রন্দীপ গুলেরিয়া, দিরেক্তর এম্স অমসুং দা. ভি.কে. পোল, মেম্বর (হেল্থ), নিতি আয়োগ অমসুং চিয়র্মেন, নেস্নেল এক্সপর্ত গ্রুপ ওফ ভেক্সিন এদমিনিস্ত্রেসন ফোর কোবিদ -১৯ (এন.ই.জি.ভি.এ.সি.)নসু এম্সতা ঙসি ভেক্সিন অসি কাপখি।

এম্স ন্যু দিল্লীদা চৎলুরবা মতুংদা কেন্দ্রগী হকশেল মন্ত্রীনা গঙ্গারাম হোস্পিতাল ভেক্সিনেসন সাইৎতা চত্তুনা মহাক্না হেল্থকেয়র অমসুং ফ্রন্তলাইন ৱার্করশিংগা উনখি অমসুং মখোয়না লৈবাক অসিগী শেবা তৌবা ঙম্বগী থৌনা অদুবু থাগৎপা ফোঙদোকখি। “থা কয়াগী মমাংদগী চত্থরক্লিবা অদোমগী হনবা লৈতবা অমসুং কত্থোকপগী লান অদুনা ঐখোয়বু শাফনা লৈহল্লিবনি”।

****