কঞ্জ্যুমর এফিয়র্স, ফুদ অমসুং পব্লিক দিস্ত্রিব্যুসন, রেলৱেজ অমসুং কম্মর্স অমসুং ইন্দস্ত্রীগী কেন্দ্র মন্ত্রী, শ্রী পিয়ুশ গোয়লনা জনুৱারি ১৪, ২০২১দা এফ.সি.আই.গী ৫৭শুবা কুমওনগী থৌরমদা মৈসুরুদা লৈবা দিবিজনেল ওফিসকী নৌনা শাবা বিলদিং শঙ্গাখ্রে।

মন্ত্রীনা থৌরম অদুদা এফ.সি.আই.গী ওফিসর, স্তাফ অমসুং থৌমীশিংদা ফেসবুক লাইবকী খুত্থাংদা ৱা ঙাংখি। মহাক্না কোবিদ-১৯গী লাইচৎ মনুংদা লৈবাক অসিগী মীওই চাউরাক্না করোর ৮০দা হৱাই-চেংৱাই ফংহন্দুনা মতমদুদা মখোয়না থেংনরিবা অৱাবগী চাংবু খরদা ওইরবসু হন্থহন্নবা পায়খৎখিবা খোঙথাংশিংবু থাগৎপা ফোংদোকখি অমসুং মসিদা নত্তনা সরকারনা মীয়ামগী য়াইফ-য়ুম্বালগীদমক্তা পাঙথোক্লিবা থবকশিংসু তঙাই ফদবা মীওইশিংদা য়ৌহনখিবা অদুগীদমক্তসু থাগৎপা ফোংদোকখি। মহাক্না এফ.সি.আই.না গেহু অমসুং ফৌগী ঙসিফাওবগী ওইবা খ্বাইদগী য়াম্বা চাং লৈখিবগীসু থাগৎখি। মখা তাবা ওইনা, মন্ত্রীনা হায়খিবদা মসিগী লুপ অসি সরকারগী লুপ অমা ওইবা খক্তা নত্তনা মসিদি লৈবাক্কী মথৌ পাংথোকপা অমসুং মরু ওইবা ওইনা লৌমীশিংগী তেংবাংগীদমক্তা খোঙফম চেৎপা লুপ অমনি হায়নসু ফোংদোকখি।

শ্রী পিয়ুশ গোয়লনা মহাক্কী ৱারোলদা এফ.সি.আই.না ফৌগী এল.এম.তি. ১৪০ অমসুং গেহুগী এল.এম.তি. ৩৯০গা লোয়ননা অহেনবা হৱাই-চেংৱাইগী এল.এম.তি. ৩০৫ অসি প্রধান মন্ত্রী গরীব কল্যান অন্ন য়োজনা (পি.এম.জি.কে.এ.ৱাই.)গী মখাদা লাইচৎ অসিগী মনুংদা মীয়ামদা লেম্না য়েন্থোকখি হায়বগী ৱাফমসু পনখি। মসিগী মরক্তা খ্বাইদগী মরু ওইবা ৱাফম অমনা, পি.এম.জি.কে.এ.ৱাই.বু অতোপ্পা মপানগী কাঙবু অমনা ওদিৎ তৌবা মতমদা, মসিগী থৌওং পেন্নবগী চাং অসি ৯৪%গী চাং হেনবগী মওং খঙবা ঙমখি। প্রধান মন্ত্রী, শ্রী নরেন্দ্র মোদীগী লুচিং মখাদা, চান-থক্নবা অমসুং অতোপ্পা তঙাই ফদবা পোৎলমশিংবু লোদাউনগী মনুংদা লৈবাক্কী মীওই খুদিংদা ফংহনবা ঙমখিবা অসিসু য়াম্না মশক থোকপা থৌওং অমনি হায়না মহাক্না হায়খি।

মন্ত্রীনা পোৎ লৈফমগী মশিংদা ৫০%গী চাংদা হেনগৎখিবা অদুনা লৌউবশিংদা মখোয়গী পোত্থোকশিংবু য়াম্না নুংঙাইবা য়োনবা ঙমহন্নবা তেংবাংখিবগে হায়বগী মতাংদসু মহাক্না পনখি। লৌউবশিংনা মন্দিদা য়ৌরক্নবা শাংলবা লম্বী কয়া চৎলম্বা অদু হন্দক্কী মতাং অসিদদি চত্ত্রে, লম্বী তেনশিনখ্রে হায়নসু মহাক্না হায়খি। মসিগী থৌওং অসিনা মরম ওইদুনা লৌউবশিংগী পোত্থোকশিং হেনগৎপা অমসুং মখোয়গী মতম মাংদবা থৌওং কয়া ওইহনখি।

মন্ত্রীনা পোৎ লৈবগী থৌওংদা এফ.সি.আই.না লৌরিবা থৌদাংগী মতাংদা মিৎয়েং চঙলদুনা লৌউবশিংদা হেন্না কান্নবা পীনবগীদমক্তা এম.এস.পি.গী খুত্থাংদা পোত্থোক লৈবগী থৌওংবু মপাঙ্গল হেন্না কনখৎহনবগী মতাংদা ৱাফমসু থমখি। এফ.সি.আই.না লৌমীশিংগা লেংমান্ননা লেপ্তুনা মখোয়গী পোত্থোক হেনগৎহন্নবা পুক্নিং থৌগৎপগা লোয়ননা এম.এস.পি.গী খুত্থাংদা মতিক চানা পোত্থোক লৈবগী থাজবা পীখ্রে। তুংদা লাক্কদৌরিবা চহি অমসুং দিকেদ কয়াদা, এফ.সি.আই.না লৌমীশিংগী সেবাগীদমক্তা লেপ্তনা থবক তৌগনি। এফ.সি.আই.না লৌমীশিংবু তেংবাংবগী থৌওংবু হেন্না লাইহন্নবা অমসুং নুংঙাইহন্নবা লেপ্তনা হোৎনরি হায়না মহাক্না হায়খি। শ্রী পিয়ুশ গোয়লনা হায়খিবদা রবি মার্কেৎ সিজন ২০২০-২১গী মনুংদা গেহু লৈবগী থৌওং অদুনা লৌমী লাখ ৪০-৪৫দা কান্নবা ফংহনখি হায়না হায়খি।

এফ.সি.আই.না মনুং-মপান ফাওনা উনা অমসুং হকথেংননা থবক পাংথোকপা থৌওংগা লোয়ননা লৈরিবা পথাপশিং অসিবু লৈবাক অসিগী লৌউবশিং অমসুং মখোয়গী পোত্থোক শিজিন্নরিবশিংগী মরক্তা থোঙ অমা ওইবা ঙম্নবদীদমক্তা  শৌগৎকনি হায়বা মহাক্না হায়খি। মহাক্না এফ.সি.আই.বু এফ.সি.আই.না মালেমগী থাক্তা লৈবা চাউখৎপা তেক্নোলোজী শিজিন্নদুনা লৌউবা, কঞ্জ্যুমর অমসুং অতোপ্পা স্তেকহোলদরশিং অমসুং মরু ওইনা লৈবাক অসিগী তোখায়না তাদুনা লৈরিবা মীওইশিংদা নীংথিজবা, মনুং-মপান ফাওনা উবা ঙম্বা অমসুং থাজবা য়াবা সেবাশিং পীবা ঙমদুনা তুংদা লাক্কদবা মতমশিংদা লৈবাক্কী সেবা তৌবা ঙম্নবগীদমক্তা শেম-শাদুনা লৈনবা ৱাফমসু থমখি। অনৌবা ভারত অসিগী অপাম্ববু ফংনবগীদমক্তা অনৌবা তেক্নোলোজী অমসুং অনৌবা থৌওংশিং পাংথোকপগী মরু ওইবশিংগী মতাংদসু মন্ত্রীনা মিৎয়েং চঙখি। মহাক্না হায়খিবদা লুপ অসিনা মীওই খরনা চলায়বগী থৌওং তোক্তুনা মখোয়গী থবকশিং অসি মীয়াম মাংদা মনুং-মপান উবা ফংবগী মওংদা পুথোরক্তুনা অমসুং মগুন লৈবা থৌওং পাংথোকপদা মিৎয়েং হেন্না চঙলবদি মসিনা এফ.সি.আই.বু অনৌবা ৱাহন্থোক অমা পীগনি অমসুং মখোয়না পীরিবা খুদোংচাবশিং অসি লৌমীশিং অমসুং অতোপ্পা স্তেকহোলদরশিংনা হেন্না পাম্নবা অমসুং নুংঙাইবা ওইগনি হায়খি। এফ.সি.আই.না লৈবাক্কী শেবাগীদমক্তা মখোয় মশাগী থবক তৌবগী চাং অসিসু য়াম্না ৱাংনা থমগনি হায়বগী থাজবা লৈ হায়না মন্ত্রীনা ফোঙদোকখি। মসিগী অহোংবা পুরকপগী শেমদোকপশিং অসিনা লৌমীশিংগী থৌওংশিংবু লাইহন্নবা অমসুং মখোয়গী চাগা হেনগৎহনবদা তুং কোইনা তেংবাংলগনি। মহাক্না লৈবাক মীয়ামদা হৌজিক চত্থরিবা কুমহৈ কয়া অসিগী য়াইফ-পাউজেল পীরদুনা মহাক্কী ৱারোল লোইশিনখি।

***********