জনুৱারি ১৪, ২০২১দা গুজরাতকী দাংস জিলাদা ক্বাকশিংগী মরক্তা মখা তানা এভিয়ান ইনফ্লুয়েঞ্জা শন্দোরকপা থেংনরে। মাইপাক্না উচেকশিং হাৎপগী থবক পাংথোক্লবা মতুংদা, মহারাস্ত্রা অমসুং মৈধ্য প্রদেসতা লু-নানহনবগী থবকশিং মপুংফানা পাংথোক্লে।

হরিয়ানাদা য়েনগী ফার্ম মরিদগী লৌরকপা সেম্পলশিংদা এভিয়ান ইনফ্লুয়েঞ্জা(ঐচ৫এন৫) পোজিতিপ ওইবা থেংনরে। ফার্মশিং অদুদি: খাতৌলিদা মহারাজা পোলত্রি ফার্ম; বাতৌরদা তারা পোলত্রি ফার্ম অমসুং হরিয়ানাগী পঞ্চকুলা জিলাগী মৌলি খুঙ্গংগী শিঙ্গলা পোলত্রি ফার্মনি।

শোকহল্লবা মফমশিং য়েংশিন্নবা শেমখিবা কেন্দ্রগী কাংবুনা লাইচৎ শন্দোকলিবা মফমশিংদা চৎখ্রে অমসুং লাইচৎ অসিগী ফিবমশিং য়েংশিনখ্রে। অখন্নবা লেবোরেতোরিশিংদা অথুবদা এভিয়ান ইনফ্লুয়েঞ্জা চাংয়েং তৌবা য়ানবা অপনবা পীদনবা সেম্পলশিং পুবা য়াহন্নবা দিপার্তমেন্তনা ভারত সরকারগী সিবিল এভিএসন মিনিস্ত্রিদা হায়জখ্রে।

রাজ্য কয়ানা অতোপ্পা রাজ্যশিংদগী য়েন অমসুং য়েরুম পুশিল্লকপা থিংবগী পাউ ফংবদগী, মসিনা য়েন লোইবগী ইন্দস্ত্রিদা চাউনা চৈথেং পীগদবা মরম্না, অসিগুম্বা ৱারেপ অসি অমুক হন্না খন্ননবা রাজ্যশিংদা হায়জখ্রে। শেম-শারবা য়েনগী পোৎথোকশিংদগী এভিয়ান ইনফ্লুয়েঞ্জা ভাইরস শন্দোকপগী সাইন্তিফিক ওইবা পাউ অমতা লৈতে। নিংথিনা থোঙলবা য়েন অমসুং য়েরুমশিং চাবদা মীওইবগী হকচাং শোকপগী ৱাফম লৈতে। 

দিল্লিগী ঘজিপুর মন্দিদগী লৌরকপা য়েনগী সেম্পলশিংগী লেবোরেতোরি রিপোর্তশিংদা এভিয়ান ইনফ্লুয়েঞ্জা নেগেতিপ ওইরে হায়বা খঙলে, মরম অদুনা ঙসি দিপুতি চীফ মিনিস্তর মনিস সিসোদিয়া অমসুং এম.সি.দি দিল্লিগী মেয়োরশিংগা লোয়ন্না পাংথোকখিবা ভর্চুএল মীফম অমদা য়েন অমসুং য়েরুম য়োনবদা থম্লিবা অথিংবশিং লৌথোক্নবা এফ.এ.ঐচ.দি মিনিস্তর শ্রী গিরিরাজ সিংহনা তকশিনখ্রে। হায়রিবা অথিংবা অদু দিল্লিগী এন.সি.তি সরকারনা খুদক্তগী লৌথোকখ্রে।  

দিপার্তমেন্তনা চেকশিনৱাশিং পীরকপগী মতুংইন্না, পাউ-চেগী এদভর্তাইজমেন্তশিং, সোসিএল মেদিয়াগী প্লেতফোর্মশিংগী খুৎথাংদা মীয়াম ৱাখল তাহন্নবা থবকশিং রাজ্যশিংনা পাংথোক্লি। তুইতর অমসুং ফেসবুকগুম্বা সোসিএল মেদিয়া প্লেতফোর্মশিং য়াওনা তোঙান-তোঙানবা মেদিয়া প্লেতফোর্মশিংগী খুৎথাংদা এভিয়ান ইনফ্লুয়েঞ্জাগী মরমদা ৱাখল তাহন্নবা অমসুং ফিবম অসি কমদৌনা লাকশিনগনি হায়বগী মতাংদা লেপ্তনা মীয়ামদা খঙহল্লি।

*****