হকশেল অমসুং য়াইফ য়ুম্বালগী কেন্দ্রগী মন্ত্রী দা. হার্শ বর্ধননা ২০১৮ অমসুং ২০১৯গী চহীগী ওইনা এ.আই.আই.এম.এস. ন্যু দিল্লীদা ঙসি পাংথোকখিবা ৪৭শুবা কনবোকেসন অসিদা হকশেল অমসুং য়াইফ য়ুম্বালগী রাজ্যগী মন্ত্রী শ্রী অশৱিনি কুমার চৌবেহগা লোইননা থৌরম মপু ওইখ্রে৷ থৌরম অদুদা দবল্যু.ঐচ.ও. এস.ই.এ.আর.ও.গী রিজনেল দাইরেক্তর শ্রীমতি পূনম খেত্রপালসু অথোইবা মীথুংলেন ওইনা শরুক য়াখি৷

দা. হার্শ বর্ধননা মহাক্কী মখাথাবশিংনা ইন্সতিত্যুসন অসিগী শেম্লম্বা লম্বীশিং অদুগীদমক থাগৎপা ফোংদোকখ্রে অমসুং মশক খঙখ্রে৷ “ঙসি ফাওবদা ইন্সতিত্যুসন অমতনা মশা মশাগী তৌবা ঙম্বা কয়া লৈরবসু ইন্সতিত্যুসন অসিনা ফংলিবা মীংচৎ অসি য়ৌনা ফংবা য়াওদ্রি,” হায়না মহাক্না ফোংদোকখ্রে৷

মহৈ-মশিংগী মন্ত্রালয়গী নেস্নেল ইন্সতিত্যুত রেঙ্কিং ফ্রেমৱার্ক(এন.আই.আর.এফ.) অসিদা মমিং লৈরবা মেদিকেল ইন্সতিত্যুশিং অসিগী মরক্তা ইন্সতিত্যুসন অসিনা চহী অহুম থংননা মকোক থোংদুনা লাক্লিবা অসিগীদমক এ.আই.আই.এম.এস. কম্ম্যুনিতীবু দা. হার্শ বর্ধননা থাগৎখ্রে৷

হৌজিক চৎথরিবা কোবিদ লাইনা-লাইচৎ অসিদা ইন্সতিত্যুসন অসিনা লৌরিবা থৌদাং অদু থাগৎলদুনা “ক্রাইসিস অসিগী মনুংদা অনাবা মীওইশিং অসিদা চেকশিন্না হোৎনখিবা, রিসর্চ পাংথোকখিবা অমসুং মহৈ-মশিং তমহনবদা এ.আই.আই.এম.এস.না অচৌবা থৌদাং লৌখ্রে৷ ঐখোয়বু অশুক্কী মতিক অৱাবা চৈথেং পীরিবা লাইনা-লাইচৎ অসিদগী ফগৎলকপা ঙম্লকপা অসিদা এ.আই.আই.এম.এস. ফ্রাতর্নিতীনা নুংতি নুমিৎ খুদিংগী লৌখিবা থৌদাংশিং অদু ঐখোয়না শোইদনা নিংশিংদুনা লৈগদবনি৷ ঐখোয়গী লৈরিবা দোক্তরশিং অসি তশেং তশেংবা হেরো ঙাক্তনি৷” হায়না দা. হার্শ বর্ধননা ফোংদোকখ্রে৷

অরুবা তানফমশিংদা ইন্সতিত্যুসন অসিগীদমক মহাক্কী লৈরিবা মংলান অদু ফোংদোক্নবা মহাক্না অসুম্না মখা চৎথরম্মী:

• খ্বাইদগী ফরবা ফেকল্তী অমসুং স্তাফ চংলক্নবা ফিভম অমা শেমগৎপা৷
• হৌজিক লৈরিবা মালেম অসিদা মতম কুইনা চৎপা লৌশিং মরু ওইরকপা অসিনা মরম ওইদুনা মপুং মরৈ ফরবা লর্নরশিং অসিদা মীৎয়েং থমদুনা মহৈরোইশিং অসিদা য়ুমফম ওইবা পোলিসীশিং শেম্বা৷
• একাদেমিক এক্সিলেন্স অমসুং হোলিস্তিক লর্নিংদা মীৎয়েং থম্বা৷
• হাইয়র এদজুকেসনদা তেক্নোলোজীনা ফংহল্লিবা ইন্নোবেসনশিং নিংথীজনা শিজিন্নবা৷
• ইন্সিতিত্যুত অসিগীদমক কম্মন ওইবা মিসন, ৱাখল্লোন অমসুং স্ত্রাতিজিক প্লান অমা শেম্বা৷

ইন্সতিত্যুত অসি তুংগী পুন্সিদা হেন্না য়াইফননবগীদমক  ঐখোয় পুন্না থবক তৌমিন্নসি হায়না দা. হার্শ বর্ধননা মীয়ামদা হায়জখ্রে৷ “তুংদা পুন্সিদা অফবা ওইননবা এ.আই.আই.এম.এস.কী হান্নদগী লৈরম্লিবা থাক অসি ঐখোয়না মাংহন্দনা য়োক্তুনা থমশি৷ ঐখোয়না ঐখোয়গী অপাম্বা শোইদনা খনশি অমসুং থেংনবদা লুবা য়াবা থবকশিং পাংথোকশি৷ এ.আই.আই.এম.এস.কী মমাং মতমদগী লৈরম্লবা থাক অসিদা ঐখোয় পুন্না হোৎনদুনা অনৌবা লৈমাই অমা হাপচিনবা ঙমগনি৷” হায়না মহাক্না ফোংদোকখ্রে৷

এ.আই.আই.এম.এস. দিল্লী অসিদা য়াম্না চাওনা কন্ত্রিব্যুসন তৌরম্বা অসিগীদমক সেনিয়র ফেকল্তী তরুক লাইফতাইম এচিবমেন্ত এৱার্দ পীখ্রে৷ কনবোকেসন অসিদা মহৈরোই ১১০০ হেননা মখোয় মখোয়গী দিগ্রীশিং ফংখ্রে অমসুং মখোয়শিং অসিগী মনুংদা ৯০দা কা হেন্না হৈথোই শিন্থোইবগী মেদল পীখ্রে৷

                                                                                          ****