মালেমগী ওইনা ভারতনা পুক্নিং চিংশিনবা ঙম্বগী শক্তি হেনগৎহন্নবা তুরিজমগী খুদোংচাবশিং মপুংফানা শীজিন্ননবা ঙসি ভারতকী উপ-রাস্ত্রপতি শ্রী এম.ভেনকিয়া নাইদুনা তকশিনখ্রে। ‘অতিথি দেবো ভাবা’ হায়বা ভারতকী ৱাখল্লোল পল্লদুনা উপ-রাস্ত্রপতিনা হায়খি ঐখোয়গী কলচর, ঐখোয়গী মথেল-লুকোই অমসুং মপান লৈবাক্কী মীওইশিংদা ঐখোয়না উৎলিবা তরাম্না ওকপগী মওং অসিনা ভারত্তা লমকোয়বশিং মশিং য়াম্না লাকহনবদা মতেং পাংগনি।

জাতিগী নহারোলগী নুমিত্তা শ্বামী বিবেকানন্দগী মফমদা ইকায়খুম্নবা উৎলদুনা, উপ-রাস্ত্রপতিনা হায়খি নহারোলশিংনা মহাক্কী গুনশিং চেন্নবা অমসুং মহাক্কী লম্বী মতুংইন্না হোৎনগদবনি।

ইন্সতিতুৎ ওফ হোতেল মেনেজমেন্ত, গৱাদা ৱা ঙাংবদা শ্রী নাইদুনা হায়খি ত্রাবেল অমসুং তুরিজম সেক্তরনা মীওই মিল্লিয়ন ৮৭.৫ রোম থবক পীরি অমসুং মসি ২০১৮-১৯দা থবক পীখিবগী চাদা ১২.৭৫গা মান্নৈ। মালেমগী ওইনা লমকোয়বা লাকপা মশিং হন্থরক্তুনা অমসুং থবক ফংদবদগী লাইচৎ অসিনা সেক্তর অসিদা খ্বাইদগী য়াম্না শোকহল্লে। শোকহল্লিবা অসি মতম খরগী ওইগনি অমসুং হোস্পিতিলিতি ইন্দস্ত্রি অসি অমুক হিঙ্গৎলক্লগনি।

উপ-রাস্ত্রপতিনা হায়খি মহৌশাগী ফিবমদা হেক হল্লকপগা নুংঙাইনবা মীয়াম লমকোয়বা চৎনবগী লাংতক্নবা লৈগনি। মালেমগী লমকোয়বশিংগী মখা পোনবা লৈবাকশিংগা চাংদম্নবদা ঐখোয়গী লৈবাক মনুংগী অফবা তুরিজমগী কৈথেল অসিনা লাইচৎকী চৈথেং হন্থহনবদা মতেং পাংগনি। কোবিদ-১৯ মতুংদা খুদক্তা লৈবাক মনুংগী মফমশিং য়েংনবগী লাংতক্নবা লৈবা মীয়াম্না অচৌবা খুদোংচাবা অমা পীগনি অমসুং শ্বাদেস দর্সন অমসুং প্রাসাদ স্কিমশিংগী মতেংগা লোয়ন্না পাকথোক-চাউথোরক্লিবা কৈথেল অসিগী খুদোংচাবা ইন্দস্ত্রিনা লৌগদবনি।

উপ-রাস্ত্রপতিনা হায়খি মখোয়গা য়ুম্লোন্নবা রাজ্যশিংদগী হৌরগা মীয়াম্না অনকপা মফমশিংদা লমকোয়বা চৎকদবনি। নহারোলশিংনা কন্যাকুমারিদা লৈবা বিবেকানন্দা রোক মেমোরিয়েল, অন্দমানদা লৈবা সেল্লুলার জেল অমসুং গুজরাত্তা লৈবা স্তেচু ওফ য়ুনিতি য়েংগদবনি। লৈবাক মনুংগী তুরিজম য়োকখৎনবা কেন্দ্র সরকারনা “বাহর জানে সে পেহলে, দেখো অপ্না দেস” থৌরম পায়খৎলে।

তুরিজমগী থবক অমুক হৌনবগী মতাংদা শ্রী নাইদুনা হায়খি দাইত্ব লৈবা হোতেল অমা ওইনা হোতেল অমগী মিংচৎ হেনগৎহনবগী মথক্তা লমকোয়বশিংগী থাজবা হঞ্জিহন্নবা অমসুং অশোই-অঙাম থোকহন্দনবা থবকশিং পাংথোক্নবা পায়খৎলিবা থবকশিংদা সাথিনা মতেং পাংগনি। হোস্পিতিলিতি সেক্তরদা ফজবা লমচৎ-শাজৎ অমসুং মোমোন নোকপা মাইথোঙ অমনা মাইপাকপদা মতেং পাংগনি। মখোয়গী মমালোল কাউথোক্তনা সেক্তর অসিদা মাইপাক্না থবক তৌনবা মহৈরোয়শিংনা লোল কয়া তমগদবনি।

শ্রী নাইদুনা হায়খি মাইপাক্নবা হোৎনবদা অফবা থবক তৌনিংবগী ৱাখল, থবক কন্না শুনিংবগী ৱাখল অমসুং থকশি-খাসি অসি য়াম্না মরুওই। তকশিল্লগা থবক শুবগী মহুত্তা নুংঙাইনা থবক শুনবা মহৈরোয়শিংনা হোৎনগদবনি।

উপ-রাস্ত্রপতিনা হায়খি গৱা অসি মালেমগী ওইনা মরুওইবা লমকোয়ফম অমনি। গৱাগী মহৌশাগী ফজবা অসিগী মথক্তা, কলা অমসুং আর্কিতেকচরদগী হৌরগা ফেস্তিবেল কয়া লমকোয়বশিংনা য়েংনিংবশিং গৱাদা লৈরি। মালেম অমসুং লৈবাক মনুংগী লমকোয়বশিংগী থম্মোয়দা গৱানা অখন্নবা মফম অমা কল্লে।

গৱা অমসুং ঝারখান্দগী মরক্তা লৈনবা কলচরগী মরীশিং ইন্সতিতুৎ অসিনা উৎপগীদমক শ্র্রী নাইদুনা এক ভারত শ্রেস্থা ভারতকী থবক থাগৎখি। মহাক্না হায়খি মসিগী অনৌবা থবক অসিনা রাজ্যশিংগী মরক্তা লৈনবা মরী কনখৎহল্লগনি অমসুং ভারতকী অপুনবগী শক্তম অমসুং অপুনবা মপাঙ্গল কনখৎহল্লগনি।

থৌরম অদুদা গৱাগী প্রোতোগোল মিনিস্তর শ্রী মৌবিন গোদিনহো, ভারত সরকারগী তুরিজম মিনিস্ত্রীগী দিরেক্তর জেনেরেল শ্রীমতি মিনাক্সি শর্মা, তুরিজম মিনিস্ত্রীগী ইকোনোমিক এদভাইজর শ্রী গ্যান ভুসন, ইন্সিতিতুৎ ওফ হোতেল মেনেজমেন্ত,গৱাগী চিয়রমেন শ্রী জে অশোক কুমার শরুক য়াখি।

মপুংফাবা ৱারোল মখাদা লৈরে:

 “ইনাকখুল্লবা কলচর, হেরিতেচ, ফজরবা লম অমসুং মহৌশাগী অকোয়বগী ফিবমনা লৈতেংলবা গৱাদা লাকপদা ঐ হরাওই। রাজ্য অসি মসিগী সমুদ্র মপানশিং, চর্চশিং, তিন্নবা নুংঙাইবা মীওইশিংগী মমিং চৎলি, গৱা অসি মালেমগী ওইনা মরুওইবা অচৌবা লমকোয়ফম অমনি অমসুং লমকোয়বা লাকপশিংদা অঙকপা ভারতকী মহাও অমা পীরি।

ফজরবা রাজ্য অসিদা ঈশিংচাইবীশিং, শুরুংশিং, অশঙবা উমঙশিং, অরীবা ফুরা-দলালশিং, অতাঙবা লম্লক্কী শা-উচেকশিং অমসুং হক্তুনা শাবা লাইশঙশিং লৈরি। তশেংনা গৱানা লমকোয়বশিংদা কলা অমসুং আর্কিতেকচরদগী হৌরগা মেলাশিং অমসুং ফেস্তিবেলশিং ফাওবা য়েংনবগী খুদোংচাবশিং ফংহল্লি। মালেমগী অমসুং লৈবাক মনুংগী লমকোয়বা মীওইশিংগী থম্মোয়দা গৱানা অখন্নবা মফম অমা কল্লে।

ঙসি জনুৱারি ১২ অসি ভারতকী অচৌবা মপারি শ্বামী বিবেকানন্দগী মপোক নুমিৎনি। মহাক ১৮৬৩দা পোকখি, মহাক নোংচুপলোমদা বেদান্তা অমসুং য়োগাগী ভারতকী ফিলোসোফিশিং শন্দোকখিবা মরুওইবা মীওই অমনি। শ্বামীজিনা হায়খিবা অমা লৈ মদুদি, “পুন্সিগী পান্দম অমা খক লৈ-লাইরিক-লাইশু তম্বা”।মহাক্কী মতুংইন্না লাইরিক তম্বা অসি ফজবগী গুনশিং নৈনবা নত্রগা লাইয়েকপা তম্বা য়াওদ্রবদি মপুংফাদে হায়রি।

তুরিজম অমসুং হোস্পিতিলিতিগী লমদা ইন্সতিতুৎ ওফ হোতেল মেনেজমেন্তনা মগুন লৈবা ত্রেনিং পীবদা ঐ হরাওই। হায়রিবা ইন্সতিতুৎশিং অসিনা ত্রাবেল অমসুং তুরিজম সেক্তরদা নহারোলশিং থবক ফংহনবা খক নত্তনা, হৌজিক মালেম শীনবা থুংনা পাম্নরবা ভারতকী মথেল-লুকোইশিং য়োকখৎতুনা ভারতকী কলচরগী ফিরাল পায়নবা মখোয়দা শক্তি পীরে।

মখল কয়াগী ভারতকী মথেল-লুকোইশিং য়োকখৎতুনা মালেমদা পুক্নিং চিংশিন্নবা শক্তি অমা ওইনা ভারতকী মিংচৎ হেনগৎহনবদা ইন্সতিতুৎ অসিনা শিংথানিঙাই ওইবা থৌদাং অমা লৌগনি।

কোবিদ-১৯ লাইচৎ লাকপদা লায়না ঙাকথোকপা ঙম্বগী শক্তি হেনগৎহন্নবা ফজনা থোংলবা, মচি ওইবা চীঞ্জাক চাবগী দরকার ওইবা অদু হেনগৎহল্লে। ভারতকী মহৌশাদগী লৈরক্লবা মথেল-লুকোইশিং অসি মচল কয়া শীজিন্নবা অমসুং হিদাক ওইনা শীজিন্নবগী গুনশিং য়াওবগী মমিং চৎলিবনি। মথেলশিং অসি অইং-অশাং অমসুং লমদম লমদমগী দরকার ওইবা মতুংইন্না থৌরাং তৌবনি।

ভারত্তা ‘অতিথি দেবো ভাবা’ হায়বদি য়ুম লাকপা মীওইশিং ঈশ্বরগুম্না সেবা তৌবা অসি ঐখোয়না থাজৈ। ঐখোয়গী কলচরেল হেরিতেচ, ঐখোয়গী মথেল-লুকোইশিং অমসুং মপান লৈবাক্কী মীওইশিংনা ভারতমচাশিংনা তরাম্না ওকপগী চৎনবী অসিনা ভারত্তা লমকোয়বশিং মশিং য়াম্না লাকপদা মতেং পাংলি। ভারতকী তুরিজমগী খুদোংচাবশিং অসি ঐখোয়গী হোস্পিতিলিতি ইন্দস্ত্রিনা মপুংফানা লৌগদবনি অমসুং অসিগুম্বা ইন্সতিতুৎ অসিনা মালেমগী ওইনা ভারতনা পুক্নিং চিংশিনবা ঙম্বগী শক্তি হেনগৎহনবদা মরুওইবা থৌদাং অমা লৌরি।

তুরিজম্না ভারত অমসুং মালেমগী শেন্মীৎলোন্দা য়াম্না চাউনবা মতেং পাংলি। কোবিদ লাক্ত্রিঙৈদা, মীওই মশিং য়াম্না থবক পীবদা, ত্রাবেল অমসুং তুরিজম সেক্তর অসি মালেমদা অনিশুবা খ্বাইদগী চাউবা ইন্দস্ত্রিনি হায়না খন্নখি। মালেম শীনবা থুংনা থবক মিল্লিয়ন ৩৩০ পীদুনা, থবক ১০ পীবদা থবক অমা তুরিজম ইন্দস্ত্রীগী থবক ওইখি। হকথেংন্না নত্রগা নাকোইন্না মীওই মিল্লিয়ন ৮৭.৫ থবক পীদুনা ত্রাবেল অমসুং তুরিজম সেক্তর অসি ভারত্তা খ্বাইদগী থবক পীবা সেক্তরশিংগী মনুংদা অমা ওইরি। ২০১-১৯দা থবক চাদা ১২.৭৫ সেক্তর অসিনা পীখি।

লাইবক থিবদি, হৌজিক থেংনরিবা কোবিদ-১৯ লাইচৎনা শাথিনা শোকহনবশিংগী মরক্তা তুরিজম সেক্তরশু য়াওরে। য়ু.এন.দব্লিউ.তি.ওগী মতুংইন্না, লাইচৎ অসিনা মালেমগী তুরিজম চাদা ৭০ শোকহল্লে, মসি চহি ৩০ মনিং হলহল্লে। গৱাগী ওইনা রাজ্য অসিগী তুরিজমগী দিপার্তমেন্তগী রিপোর্ত অমগী মতুংইন্না গৱাগী তুরিজম ইন্দস্ত্রিদা থবক চাদা ৩৫-৫৮ ফাওবা মাঙলে হায়রি।

কোবিদ-১৯না মালেমগী তুরিজমদা অচৌবা চৈথেং অমা পীরে। অদুবু লাইচৎনা থোকহল্লিবা তপথবা অসি মতম খরগী ওইগনি অমসুং তুরিজম অমসুং হোস্পিতিলিতি সেক্তর অমুক হিঙ্গৎলক্কনি হায়না ঐনা থাজৈ। মতম শাংনা মখোয়গী য়ুমশিংদা লৈরুরবা মতুংদা, মহৌশাগী ফিবমদা হেক লাকপগা মীয়াম লমকোয়বা চৎনিংবগী লাংতক্নবা লৈগনি।  মসিনা ভারতকী তুরিজম ইন্দস্ত্রি মহৌশাগী লম্বীদা হল্লকপদা অচৌবা খুজদোংচাবা অমা পীরগনি অমুং তুরিজম অমসুং হোস্পিতিলিতি ইন্দস্ত্রি অমুক হিঙ্গৎলকপদা ইন্সতিতুৎ ওফ হোতেল মেনেজমেন্ত য়াওনা মরী লৈনবশিংনা মরুওইবা থৌদাং অমা লৌগনি।

ভারতকী লৈবাক মনুংগী তুরিজমগী অচৌবা কৈথেল অমা লৈবা মরম্না মালেমগী লমকোয়বশিংগী মখা পোনবা লৈবাকশিংগা চাংদম্নবদা লাইচৎকী চৈথেং হন্থহনবদা মতেং পাংগনি। লৈবাক মনুংগী তুরিজম য়োকখৎনবা সরকার অসিনা অৱাংবা থাক্তা পুক্নিং চঙলি। ঐখোয়গী প্রধান মন্ত্রী শ্রী নরেন্দ্র মোদীনা হঞ্জিন-হঞ্জিন মীয়ামদা লৈবাক অসিগী মফম কয়া কোয়বা চৎনবা হায়রি। ২০১৯গী মহাক্কী নিংতম্বা নুমিৎকী ৱারোলদা, চহি ২০২২ ফাওবগী মনুংদা মীয়াম্না লৈবাক অসিগী য়ামদ্রবদবা মফম ১৫দগী তাদনা কোয়বা চৎনবা মীয়ামদা খঙহনখি।

ভারতকী মপান্দা লমকোয়বা চৎপা মীওই মিল্লিয়ন ২৬ রোম লৈরি। কোবিদ-১৯ মতুংদা মখোয় অয়াম্বা লৈবাক মনুংদা কোয়বা চৎকনি হায়না ঐনা থাজবা থম্লি। মসিনা ভারতকী হোস্পিতিলিতি ইন্দস্ত্রিদা অচৌবা খুদোংচাবা অমা পীগনি। ভারত্তা সমুদ্রা মপান ২০০, য়ুনেস্কো ৱার্ল্দ হেরিতেচ সাইদ ৩৮ অমসুং ঙাক-শেনবা মফম ৬৬৮ লৈরিবা অসিদা লমকোয়বশিং পুক্নিং চিংশিনবা ঙমগনি।

শ্বাদেস দর্সন অমসুং প্রাসাস স্কিমশিং পায়খৎতুনা লৈবাক মনুংগী তুরিজম য়োকখৎনবা সরকারনা থবক পায়খৎলি। তেক্স কোমথোকপা অমসুং কন্সেসনশিং য়াওনা তুরিজম সেক্তর য়োকখৎনবা রাজ্য অমসুং কেন্দ্র সরকার অনিমক্না পুন্না থবক তৌমিন্নগদবনি।

নুংশিরবা ইচলশিং অমসুং ইনাওশিং,

হোস্পিতিলিতি সেক্তরগী পাক-চাউবা, মওং-মতৌ অমসুং হৌজিক লৈরিবা কেপাসিতি অসিগী চপ চাবা খঙনবা তুরিজম মিনিস্ত্রিনা নেসনেল ইন্তেগ্রেতেদ দেতাবেজ ওফ হোস্পিতিলিতি ইন্দস্ত্রি(নিধি) শেম্লে হায়বা ঐ খঙলে। মসিনা থৌশিলশিং অমসুং লাল্লোংশিং শেম্বদা হেন্না মতেং পাংগনি। পোর্তেল অসিগী মখাদা য়ুনিত ৩২,৬২৪ রেজিস্তার তৌরে হায়বা ঐ খঙলে।

তুরিজমগী থবক অমুক হৌনবা লমকোয়বশিংগী থাজবা লৈহনবা অসি য়াম্না মরুওই। মসিগী মতাংদা, হেল্থ মিনিস্ত্রি অমসুং তুরিজম মিনিস্ত্রিনা মাঙজৌন্না কোবিদ-১৯গী হকশেলগী চৎন-পথাপশিং পীখ্রে। কোবিদ-১৯গী হকশেলগী চৎন-পথাপশিং ঙাক্নবা মিনিস্ত্রিনা সিস্তেম ফোর এসেসমেন্ত, এৱারনেস এন্দ ত্রেনিং ইন হোস্পিতিলিতি ইন্দস্ত্রি(সাথি) থবক ওইনা পায়খৎলে। হোতেলশিং মখা তানা থবক তৌনবা অমসুং লমকোয়বশিংগী থাজবা লৈহন্নবা অমসুং দাইত্ব লৈবা হোতেল অমা ওইনা হোতেলগী মিংচৎ হেনগৎহন্নবা থৌরাং তৌবদা সাথিনা মতেং পাংগনি। হৌজিক ফাওবদা সাথিগী মখাদা হোতেল ৬,৩৫২ রেজিস্তার তৌরে।

লৈবাক মনুংদা মীয়াম লমকোয়বা পুক্নিং থৌগৎনবা মিনিস্ত্রিনা ৱেবিনারশিং, কুইজ, ৱাশক লৌবা অমসুং দেখো অপ্না দেস থৌরাংগী মখাদা মরী লৈনবশিংগা ৱা খন্নবা থৌরমশিং পাংথোক্লে হায়বা ঐ খঙলে। মালেমগী তুরিজম ফগৎহন্নবা লৈবাক মনুংগী তুরিজমগী থবকশিং ৱাহন্থোক লৈনা, তুংকোইনা চৎনবা য়ানবা মওংদা শেমগৎনবা ভারত্তা খুদোংচাবা কয়া লৈরে। মসিদা কন্না হোৎনবা অমসুং থাক খুদিংমক্তা মগুন লৈহনবা দরকার ওই।

ঙসি ইন্সতিতুৎ অসিদা পাংথোক্লিবা এক ভারত শ্রেস্থা ভারত ফোতো একজিবিসন অসিনা গৱা অমসুং ঝারখান্দগী মরক্তা লৈরিবা কলচরগী মরী অদু উৎলে। ওক্তোবর ৩১, ২০১৫দা সাদার ভাল্লবভাই পতেলগী ১৪০শুবা মপোক কুমওন থৌরমদা প্রধান মন্ত্রী নরেন্দ্র মোদীনা ‘এক ভারত শ্রেস্থা ভারত’ হৌদোকখি। মসিগী অনৌবা থবক অসিনা রাজ্যশিংগী মরক্তা লৈনবা মরী চেৎশিনহনগনি অমসুং অমসুং ভারতকী অপুনবগী শক্তম মপাঙ্গল কনখৎহনগনি।

এক ভারত শ্রেস্থা ভারতকী মরুওইবা পান্দমদি জুরা চৎমিন্নরিবা রাজ্যশিংগী হেরিতেচ, কলচর অমসুং চৎনবীশিং উৎপা অমসুং লৈবাক্কী খেন্নবা কয়া হেন্না মশক খঙবা ঙম্নবা হোৎনবনি।

ফোতো একজিবিসন অসি শীনবগীদমক ঐনা ইন্সতিতুৎ ওফ হোতেল মেনেজমেন্ত,গৱা, গৱা তুরিজম অমসুং ঝারখান্দ তুরিজম থাগৎলি। এক ভারত শ্রেস্থা ভারতকী মখাদা জুরা চৎমিন্নরিবা রাজ্যশিংগী মরক্তা অসিগুম্বা থৌরমশিং পাংথোকপা অসি য়াম্না মরুওই অমসুং মীগা-মীগা উনবা হেনগৎহনগনি।

অরোইবদা, হোস্পিতিলিতিগী লমদা তাকপী-তম্বীবা অমসুং লৌশিং কয়া পীবগীদমক ঐনা ইন্সতিতুৎ ওফ হোতেল মেনেজমেন্ত,গৱা থাগৎলি।

মহৈরোয়শিং, ওজাশিং, প্রিন্সিপাল অমসুং স্তাফশিংদা ঐগী য়াইফ-পাউজেল পীজরি!

জয় হিন্দ”!

*****