প্রধান মন্ত্রী, শ্রী নরেন্দ্র মোদীনা রাজ্য অমসুং য়ুনিয়ন তেরিতরীশিংগী মুখ্য মন্ত্রীশিং অমসুং লৈঙাক্লোইশিংগা লোয়ননা কোবিদ-১৯গী ভেক্সিন কাপ্পগী শেম-শাবা অমসুং হৌজিক্কী ওইরিবা ফিভম য়েংশিন্নবা অৱাংবা থাক্কী মীফম অমা জনুৱারি ১১, ২০২১দা ভিদিও কনফরেন্সিংগী খুত্থাংদা ফমখ্রে।

ভাইরস অসিগী মাইয়োক্তা চুংশিন্নদুনা লান্থেংনবা

প্রধান মন্ত্রীনা হান্নগী প্রধান মন্ত্রী ওইরম্বা শ্রী লাল বহাদুর শাস্ত্রীনা লৈখিদবগী কুমওন লাকপদা মহাক্কী মফমদা ইকায় খুম্নবা উৎখ্রে। মহাক্না কেন্দ্র অমসুং রাজ্যগী মরক্তা লেপ্পা লৈতনা পাউ ফাওনদুনা ভাইরস অসিগা লান্থেংনবদা মরু ওইবা থৌদাং লৌখিবা মতম চানা ৱারেপ লৌখিবগী থৌওংশিংগীদমক্তা থাগৎপা ফোংদোকখি। মসিগী থৌওং অসিনা মরম ওইদুনা ভাইরস অসিনা শন্দোকপা অসি অতোপ্পা লৈবাকশিংগা চাংদম্নবদা ঐখোয়না হেন্না নীংথিজনা থিংবা ঙমখ্রিবনি। লাইচৎ অসিনা হৌরকপদা মীয়াম্না অকি-তুজুংবা পোক্নরম্বা অদু হৌজিক্তি য়াম্না হন্থরে অমসুং মশাদা থাজবা হেনগৎলকপা অসিনা শেন্মিৎলোনগী থবকশিংদসু য়াম্না ফবা মমি অমা তারে হায়না প্রধান মন্ত্রীনা ফোংদোকখি। মহাক্না রাজ্য সরকারশিংবুসু মসিগী লানফম অসিদা থৌনা ফনা লান্থেংনখিবগীদমক্তা থাগৎপা ফোংদোকখি।

মালেমগী খ্বাইদগী চাউবা ভেক্সিন কাপ্পগী কেম্পেন

প্রধান মন্ত্রীনা লৈবাক অসিনা মালেমগী খ্বাইদগী চাউবা ভেক্সিন কাপ্পগী কেম্পেন অমা জনুৱারি ১৬তগী হৌগদৌরিবা অসিদগী লানফম অসিগী ৱারোইশিন পুরকপা য়াবা তাঙ্কক্তা লৈরে হায়না ফোংদোকখি। অথু-অনাগী ওইনা শিজিন্নবা য়ারে হায়বগী অয়াবা পীখ্রবা ভেক্সিন অনিমক অসি ভারত্তা শাবা ঙাক্তা ওইবা অসিদা ঐখোয়না চাউথোকচবা ফাওই হায়দুনা প্রধান মন্ত্রীনা হায়খি। ভেক্সিন অনিমক অসি মালেমগী অতোপ্পা ভেক্সিনশিংগা চাংদম্নবদা মমল য়াম্না তাঙদে হায়না হায়রদুনা করিগুম্বা ভারতনা ভেক্সিনগী মতাংদা মীরমগী মপান তাংলম্বা তারগদি য়াম্না অৱাবা অমা ওইরনগনি হায়বা ৱাফমসু থমখি।

প্রধান মন্ত্রীনা হায়খিবদা ভারতনা ভেক্সিন কাপ্পগী হীরমদা লৌশিং চাউনা লৈবা অসিনা হন্দক্কী থৌওং অসিদা মতেং য়াম্না পাংগনি হায়খি। ভেক্সিন অসি কনাদা হান্না কাপকদগে হায়বগী ৱাফম অসি রাজ্যশিংগা তান্নরবা তুংদা অখঙ-অহৈ অমসুং সাইন্তিফিক কম্ম্যুনিতীশিংগী পাউতাকশিংদা য়ুম্ফম ওইদুনা ৱারেপ লৌখিবনি হায়খি। সরকার অমসুং প্রাইভেৎ সেক্তরগী হকশেলগী থৌমীশিংনা ভেক্সিন অসি খ্বাইদগী হান্না কাপকদবা কাঙলুপ্নি। মখোয়গা লোয়ননা, ফত্ত-হৌদি শেংদোক-শেংজিন তৌবা মীওই, ফ্রন্তলাইনগী অতোপ্পা থৌমীশিং, পুলিস অমসুং পেরামিলিতরী, হোম গার্দ, দিজাজতর মেনেজমেন্ত ভলন্তিয়র অমসুং মীচম ঙাক্নবা অতোপ্পা জৱানশিং অমসুং কন্তেনমেন্ত অমসুং সর্ভেলিএন্সকী থবক্কা মরী লৈনবা রেভেন্যুয় ওফিসিএলশিংসু ভেক্সিন অসিবু অহানবা তাঙ্কক্কী মনুংদা ফংগনি। অসিগুম্বা মীওইশিংগী অপুনবা মশিং অসি চাউরাক্না করোর ৩নি। মসিগীদমক্তা ওইনদি, রাজ্যশিংনা শেল অমত্তা পুথোক্লোই হায়না প্রধান মন্ত্রীনা ফোংদোকখি। মসিগী অচঙবা শেল খুদিংমক কেন্দ্রনা পুথোক্কনি হায়না মহাক্না মখা তাখি।

অনিশুবা তাঙ্কক্কী ওইনা, চহি ৫০গী মথক্তা লৈবা মীওইশিং অমসুং চহি ৫০গী মখাদা লৈবা মতম শাংনদগী নারকপা লায়না লৈবা অমসুং মহিক চঙবগী চাং য়াম্না ৱাংবা মীওইশিংদা ভেক্সিন অসি কাপকনি। ইনফ্রাস্ত্রকচর অমসুং লোজিস্তিক্সকী ওইবা শেম-শাবশিংদি রাজ্য অমসুং য়ু.তি.শিংগা লোয়ননা পাংথোকখ্রে অমসুং ভেক্সিন কাপ্পগী দ্রাই-রনসু লৈবাক শিনবা থুংনা পাংথোকখ্রে হায়না প্রধান মন্ত্রীনা মখা তাখি। ঐখোয়গী কোবিদকী মতাংদা নৌনা শেম-শাখিবশিং অমসুং এস.ও.পি.শিং অসিগা ঐখোয়ন মতম কয়াদগী লৈবাক শিনবা থুংনা য়ুনিভর্সেল ইম্ম্যুনাইজেসন প্রোগ্রাম অমসুং মীখল পাংথোক্তুনা লাকখিবগী লৌশিং ময়াম অদুগা পুন্সিনগনি হায়না প্রধান মন্ত্রীনা হায়খি। মহাক্না হায়খিবদা মীখলশিংদা শিজিন্নবা বুথ-লেভেল স্ত্রেতজী অদু হন্দক্কী মতাং অসিদসু শিজিন্নগনি হায়না হায়খি।

কো-ৱিন

হন্দক্কী ভেক্সিন কাপ্পগী থৌওং অসিদা খ্বাইদগী মরু ওইবা ৱাফমদি ভেক্সিন কাপকদবা মীওইশিংবু মশক খঙদোক্তুনা য়েংশিনবা অসিনি হায়না প্রধান মন্ত্রীনা হায়খি। মসিগীদমক্তা কো-ৱিন দিজিতেল প্লেৎফোর্ম অসি শেমখিবনি। বেনিফিশরীশিং অসি আধারনা তেংবাংদুনা মশক খঙদোক্কনি অমসুং অনিশুবা দোজ মতম চানা পীবগী থৌওংসু শোইহল্লোই। ভেক্সিনেসন অসিগা মরী লৈনবা হৌজিক্কী ওইবা দেতাশিংবু কো-ৱিন অসিদা অপলোদ শোইদনা তৌবগী তঙাই ফদবগী মতাংদা মহাক্না মিৎয়েং চঙখি।

মীওই অমনা ভেক্সিনগী অহানবা দোজ হেক ফংবগা কো-ৱিন্না দিজিতেল ভেক্সিনেসন সর্তিফিকেৎ অমা খুদক্তা পীগনি। মসিগী সর্তিফিকেৎ অসিনা অনিশুবা দোজকী মতাংদা নীংশিংহন্নবা পথাপ অমা ওইনসু মথৌ তৌগনি অমসুং অনিশুবা দোজকী মতুংদা অরোইবা সর্তিফিকেৎ অমা পীগনি।

মথংগী থা খরা অসিদা করোর ৩০গী পান্দম

ভারত্তা পাংথোক্কদৌরিবা ভেক্সিন কাপ্পগী থৌওং অসি  অতোপ্পা লৈবাকশিংনসু ঐখোয়গী মতৌ তমগদৌরিবা অসিনা মরম ওইদুনা য়াম্না মরু ওইবনি হায়না প্রধান মন্ত্রীনা হায়খি। হৌখিবা চয়োল ৩-৪দগী হৌনা চাউরাক্না লৈবাক ৫০মুক্তা কোবিদ-১৯গী ভেক্সিন কাপ্পগী থবক চত্থরি অমসুং হৌজিক ফাওবদা শুপ্নগী মীওই করোর ২.৫ খক্তদা ভেক্সিন কাপখ্রে হায়না মহাক্না ফোংদোকখি। ভারতনা মথংগী থা খরদা মীওই করোর ৩০দা ভেক্সিন কাপ্পগী পান্দম থম্লি হায়না মহাক্না মখা তানা হায়খি।

প্রধান মন্ত্রীনা হায়খিবদা ভেক্সিন অসি কাপ্লবা তুংদা করিগুম্বা মীওই অমনা মশা নুংঙাইতবা ফাওরকপগী মতাংদসু মতিক চাবা থৌরাং তৌদুনা লৈরে হায়খি অমসুং মসিগী থৌওং অসি অতোপ্পা য়ুনিভর্সেল ইম্ম্যুনাইজেসন প্রোগ্রামশিংগীসু লৈখি অমসুং হন্দক্কী মতাংগী ওইনদি, হান্নদগী হেন্না মপাঙ্গল লৈনবা শেম-শারে হায়না মহাক্না ফোংদোকখি।

মসিগী থৌওংশিং অসিদা কোবিদকা মরী লৈনবা কাঙলোন খুদিংমক ইন্দুনা চৎপগী মরু ওইবশিংগী মতাংদা প্রধান মন্ত্রীনা মিৎয়েং চঙলদুনা ভেক্সিন কাপ্লবা মীওইশিংনসু হায়রিবা কাঙলোনশিং অসি ইন্দুনা ভাইরস অসিবু মখা তানা শন্দোকপা থিংনবা হোৎনগদবনি হায়খি। রাজ্য অমসুং য়ু.তি. খুদিংমক্না ভেক্সিনগী মতাংদা তোকঙা শন্দোরকপা থেংননবা মতিক চাবা থৌরাং লৌখত্তুনা লৈরে হায়না মহাক্না হায়খি। মসিগীদমক্তা, ধর্ম অমসুং মীয়ামগী লুপ, এন.ৱাই.কে., এন.এস.এস., এস.ঐচ.জি.নচিংবা কয়াদগী মতেংসু লৌখি।

বর্দ ফ্লুগী শিংনবশিং অসি থেংনবা

প্রধান মন্ত্রীনা কেরলা, রাজস্থান, হিমাচল প্রদেশ, গুজরাৎ, হরিয়ানা, উত্তর প্রদেশ, মধ্য প্রদেশ, দিল্লী অমসুং মহারাস্ত্রাদা বর্দ ফ্লু শন্দোরকপগী মতাংদসু খন্ন-নৈনখি। মহাক্না হায়খিবদা ফিশরী, এনিমেল হসবেন্দরী অমসুং দাইরীয়িংগী মন্ত্রালয়না শিংনবা অসিবু থেংননবা থৌরাং য়াত্তুনা লৈরে অমসুং মসিদা জিলাগী মেজিস্ত্রেৎশিংনা মরু ওইবা থৌদাং য়াগনি হায়খি। মহাক্না লায়না অসিনা শোকহল্লবা রাজ্যশিংগী মুখ্য মন্ত্রীশিংদা মখোয়গী দি.এম.শিংবু থৌরাং অসিগী মতাংদা লমজিং-লমতাকপীনবা হায়খি। মহাক্না মখা তানা হায়খিবদা বর্দ ফ্লু য়ৌরক্ত্রিবা রাজ্যশিংনসু চেকশিন্না লৈগদবনি হায়খি। ফোরেস্ত, হেল্থ অমসুং এনিমেল হসবেন্দরী বিভাগশিংনা মতিক চানা পাউ ফাওনদুনা হোৎনমিন্নরগদি মসিগী শিংনবা অসি য়াম্না থুনা লোইশিনবা ঙমগনি হায়খি।

ভেক্সিনেসন তৌবগী শেম-শাদুনা লৈবা অমসুং ফীদবেক

কেন্দ্রগী গৃহ মন্ত্রীনা লৈবাক অসিনা প্রধান মন্ত্রী অমসুং মুখ্য মন্ত্রীশিংগী লুচিং মখাদা কোবিদকা লান্থেংনবদা অতোপ্পা লৈবাকশিংদগী হেন্না নীংথিজনা থবক পাংথোকখি হায়খি। মসিগী মতাং অসিদা রাজ্যশিংনা হৌজিক ফাওবদা তেংবাংদুনা পুন্না হোৎনমিন্নখিবগী মওং অদু ভেক্সিন কাপ্পগী থৌওং অসিদসু মখা তানা চত্থনবা হায়খি।

মুখ্য মন্ত্রীশিংনা ভেক্সিন থাদোকপা হৌরকপা অসিদা নুংঙাইবা ফাওনখি। মখোয়না ভেক্সিনগা মরী লৈনবা হীরম কয়া অমগী মতাংদা ৱাফম কয়া অমা পুথোরকখিবশিং অদু মীফম অসিদা খন্ন-নৈনদুনা য়াশিন্নবা পুরকখি।

কেন্দ্রগী হকশেলগী সেক্রেতরীনা ভেক্সিনেসন দ্রাইব অসিগী মতাংদা শেম-শাদুনা লৈবগী মতাংদা প্রজেন্তেসন অমা উৎখি। মহাক্না হায়খিবদা মসিগী থৌওং অসি জন ভাগীদারীদা য়ুম্ফম ওইগনি অমসুং হৌজিক লৈরিবা হেল্থ কেয়রগী সেৎ-অপশিং অসিদা অকায়বা থোকহন্দনা য়াম্না মওং-মরিল চুম্না পাংথোক্কনি হায়খি। মহাক্না থবক অসিগীদমক্তা লোজিস্তিক্কী থৌওংশিংনা শেম-শাদুনা লৈবগী মতাংদসু ৱাফম খরা থমখি।

******