খুরুমজরি!

কেন্দ্রগী কেবিনেত্তা লৈরিবা ঐগী মরুপশিং। শ্রী হর্দীপ সিংহ পুরীজি; ত্রিপুরাগী মুখ্য মন্ত্রী, শ্রী বিপ্লব কুমার দেবজী; ঝারখন্দগী মুখ্য মন্ত্রী, ভাই হেমন্ত সোরেনজী; উত্তর প্রদেশকী মুখ্য মন্ত্রী, শ্রী য়োগী অদিত্যনাথজী; মধ্য প্রদেশকী মুখ্য মন্ত্রী, শ্রী শিবরাজ সিংহ চাউহানজী; গুজরাৎকী মুখ্য মন্ত্রী, শ্রী বিজয় রুপানীজী; তমিল নাদুগী মুখ্য মন্ত্রী, থীরু ই.কে. পালানিস্বামীজী; আন্ধ্র প্রদেশকী মুখ্য মন্ত্রী, শ্রী ৱাই.এস. জগনমোহন রেদ্দী; থৌরম অসিদা শরুক য়ারিবা ইকায় খুম্ননীংঙাই ওইরবা রাজ্যপাল পুম্নমক, অতোপ্পা মীথুংলেনশিং, ইচিল ইনাওশিং। নখোয় অমসুং লৈবাক মচা খুদিংমক্তা অনৌবা চহি, ২০২১গী য়াইফ পাউজেল পীজরি।

ঙসিগী নুমিৎ অসি অনৌবা ইনর্জীগা লোয়ননা য়াঙলবা খোঙজেল অমদা অনৌবা খোঙথাং কয়া পায়খৎনবা ৱারেপ লৌবগী নুংঙাইরবা নুমিৎ অমনি। ঙসি, লৈবাক অসিনা লায়রবা অমসুং মিদ্দল ক্লাসকী মীওইশিংগী য়ুম শাবগী অনৌবা তেক্নোলোকী অমা ফংলগনি। তেক্নিকেলগী ওইবা ৱারোলদা হায়রগদি, নখোয়না মসিবু লাইৎ হাউস প্রোজেক্ত হায়না কৌনরি। মসিগী প্রোজেক্ত ৬ অসি অয়াংবা তাৱরগা মান্নৈ হায়না ঐহাক্না থাজৈ। মসিগী লাইৎ হাউস প্রোজেক্ত ৬ অসিনা লৈবাক অসিদা য়ুম শাবগী অনৌবা মাইকৈ অমা পীরগনি। নোংপোক্তগী নোংচুপ্তা লৈবা, খাদগী অৱাংদা লৈবা রাজ্যশিং অমসুং লৈবাক অসিগী মফম খুদিংমক্না অমত্তা ওইনা পুনলকপা অসিনা ঐখোয়গী কো-ওপরেতিব ফেদেরেলিজমগী ৱাখল্লোন অসিবু মপাঙ্গল হেন্না কনখৎহল্লে।

মরুপশিং,

মসিগী লাইৎ হাউস প্রোজেক্ত অসিনা হৌজিক্তি ঐখোয়গী লৈবাক্কী থবক তৌবগী মওংগী খ্বাইদগী চুনবা খুদম অমা ওইরে। ঐখোয়না মসিগা লোয়নরিবা অচৌবা মঙলান অদু খঙবা তাবনি। মতম অমদদি, হাউসিং প্রোজেক্তশিং অসিদা কেন্দ্র সরকারনা খ্বাইদগী অহানবদা পাংথোক্কদবা হায়না মিৎয়েং চঙফম থোকপা অদু চঙলমদে। সরকারনা য়ুম শাবগী মগুনগী অমসুং কান্নবগী মতাংদা করি অমত্তা খন্নরমদে। অদুবু মসিগী অহোংবশিং অসি থবক চাউথোকপগী থৌওংদা লৈরমদ্রবদি মসিনা কয়াদা অরুবা থবক অমা ওইরমগদগে হায়বা ঐখোয়না ঙসিদি খঙলে। ঙসিদি, লৈবাক অসিনা অনৌবা থৌওংগা লোয়নবা অনৌবা লম্বী অমা খল্লে।

মরুপশিং,

ঐখোয়গী লৈবাক অসিদা হৌজিক থবক থৌওংগী মরক্তা অহোংবা অমত্তা লৈতনা লেপ্তনা থবক তৌবা পথাপ কয়া অমা লৈ। হাউসিংগী হীরম অসিসু মসিগা চপ মান্ননা লৈরি। ঐখোয়না মসিদা অহোংবা পুরকপা হায়না লেপ্লে। ঐখোয়গী লৈবাক্না করিগীদমক্তা অফবা তেক্নোলোজী ফংলোইদৌরিবনো? ঐখোয়গী লায়রবশিংনা মতম কুইনা চৎকদবা য়ুম করিগীদমক্তা  ফংলোইদৌরিবনো? য়ুমশিং অসি থুনা শাবা করিগীদমক্তা ঙমদ্রিবনো? ঐখোয়গী সরকারগী মন্ত্রালয়শিং অসিনা পংচাউদা চাউবা অমসুং মওং-মরিল নাইদবা স্ত্রকচর লৈতদুনা স্তার্ত-অপকুম্না মতিক চাবা অমসুং মওং তাবা অমা লৈবা অসি য়াম্না মরু ওইবনি। মরম অসিনা, ঐখোয়না গ্লোবেল হাউসিং তেক্নোলোজী চেলেঞ্জ অমা শিন্দুনা মালেমগী খ্বাইদগী মাংজিল থাবা কম্পেনীশিংবু ভারত্তা কৌরিবনি। থৌরম অসিদা মালেম শিনবা থুংবদগী য়ুম শাবগী অনৌবা তেক্নোলোজী ৫০দগী হেনবনা শরুক য়ারকপা অসিদা ঐহাক্না নুংঙাইবা পোকই। মসিগী মালেমগী চাংয়েংনবা অসিগা লোয়ননা, ঐখোয়না অনৌবা তেক্নোলোজী শিজিন্নদুনা অনৌবা থৌওং পাংথোকপগী ওইথোকপা লৈরে। মান্নবা থৌওং অসিগী মথংগী তাঙ্কক্তা, ঙসিদগী হৌদুনা তোঙান-তোঙানবা মফমশিংদা লাইৎ হাউস প্রোজেক্ত ৬ হৌরে। মসিগী লাইৎ হাউস প্রোজেক্তশিং অসি মতমগা চানবা তেক্নোলোজী অমসুং অনৌবা থৌওংশিংগী খুত্থাংদা শাগনি। মসিনা য়ুম শাবগী মতম হন্থহনগনি অমসুং লায়রবশিংগী কুইনা চৎকদবা, শেল য়াম্না চঙলোইদবা অমসুং নুংঙাইনা লৈবা য়াবা য়ুম কয়া শেম-শাগনি। অখঙ-অহৈশিংনা মসিগী মতাংদা নীংথিনা খঙই, অদুবু লৈবাক মীয়াম্নসু মসিগী মরমদা খঙফম থোকই। মসিগী তেক্নোলোজী অসি ঙসি শহর অমদা শিজিন্নরি অমসুং মতুং তারকপদসু মসিবু লৈবাক্কী মফম শিনবা থুংনা শিজিন্নরকপা য়াগনি।

মরুপশিং,

ইন্দোরদা শারিবা য়ুমশিং অসিদা চেক অমসুং মোর্তারগী ফক্লাংশিং শিজিন্নরোই, তৌবতবু মসিদা হান্নদগী শেম-শারবা সেন্দৱিচ পেনেল সীস্তেম ওইনা শিজিন্নগনি। শুরুং শিজিন্নদুনা মোনোলিথিক কঙ্কৃৎ কন্সত্রক্সন তেক্নোলোজী অসি রাজকোত্তা শিজিন্নগনি। মসিগী ফ্রেঞ্চ তেক্নোলোজী অসিনা য়ুম শাবদা মতম য়াম্না চঙদবগা লোয়ননা য়ুমশিং অসিবু অকায়-অতোই কয়া খাঙবা ঙমহনগনি। চেন্নৈদা শাগদৌরিবা য়ুমশিং অসিদনা শাবদা থুহনবা অমসুং হোঙহনগদবা য়ু.এস. অমসুং ফিনলেন্দগী প্রীকাস্ত কঙ্কৃৎ তেক্নোলোজী শিজিন্নদুনা শাগনি। রাঞ্চীদা শাগদৌরিবা য়ুমশিং অসিনা জর্মনীগী ৩.দি. কন্সত্রক্সন তেক্নোলোজী শিজিন্নদুনা শাগনি। কা খুদিংমক তোঙান্না শাগনি অমসুং মখোয়শিং অসিবু লেগো ব্লোক্কী শান্নপোৎকুম্না অকোনবদা মথং-মথং শম্নহনগনি। আগর্তলাদনা য়ুমশিং অসিবু ন্যু জিলেন্দগী স্তীল ফ্রেম তেক্নোলোজী শিজিন্নদুনা শাগনি। মসিগী য়ুম মখলশিং অসি য়ুহা য়াম্না হাগনবা মফমশিংগী ওইনদি য়াম্না ফৈ হায়না লৌনৈ। লখনৌগী য়ুমশিং অসিনা প্লাস্তর তৌবা অমসুং মচু শঙবগী থৌওং য়াওদবা হান্নদগী শেম-শাদুনা লৈরবা ফক্লাং শিজিন্নবা কেনাদাগী তেক্নোলোজী শিজিন্নদুনা শাগনি। মসিনা য়ুমশিং অসিবু অথুবা মতমদা শাবা ঙমহনবদা তেংবাংগনি। মফম খুদিংদা থা ১২গী মনুংদা য়ুম লিশিং অমমম শাগনি। মসিনা হায়বদি, নুমিৎ খুদিংগী চাংচত্তা য়ুম অনি শাবা লোইগনি। থা অমদা, চাউরাক্না য়ুম ৯০-১০০ শাগনি অমসুং মতৌ অসিগুম্না, চহি অমদা য়ুম লিশিং অমা শাবা ঙম্বা হায়না ঐখোয়না পান্দম থম্লি। ঐখোয়না মসিগী থৌওং অসি মথংগী জনুৱারি ২৬ ফাওবগী মনুংদা মাই পাক্না শাবা ঙম্নবা ঐখোয়না হোৎনরি।

মরুপশিং,

মসিগী প্রোজেক্তশিং অসিনা মওং অমদা ইঙ্ক্যুবেসন সেন্তর অমা ওইগনি অমসুং ঐখোয়গী প্লান্নর, আর্কিতেক, ইঞ্জিন্যার অমসুং মহৈরোইশিংনা অনৌবা তেক্নোলোজীশিং তম্বা অমসুং থবক তৌদুনা মসিগী মওং-মতৌ খঙবা ঙমগনি। ঐহাক্না লৈবাক শিনবা থুংনা লৈরিবা অসিগুম্লবা ইঞ্জিন্যারিং কোলেজ খুদিংমক্তা হায়নিংবদি, মসিগী হীরম অসিগা মরী লৈনবা প্রোফেসর, ফেকলতী অমসুং মহৈরোইশিংনা মীওই ১০-১৫গী কাঙলুপ শেমদুনা মসিগী য়ুম শাফম অসিদা চয়োল অমগী ওইনা চত্তুনা থৌওংশিং অসিবু মমুৎ তানা নৈনদুনা তমহন্নিংই। মফমদুগী সরকারনসু মখোয়গী মতেং পাংগদবনি। ঐখোয়গী লৈবাক শিনবা থুংনা লৈরিবা য়ুনিভর্সিতীগী মীওইশিংনসু মসিগী ইঙ্ক্যুবেতর ওইরিবা পাইলোৎ প্রোজেক্তশিং অসিদা চত্তুনা তেক্নোলোজী অসিগী মরমদা তমহন্নিংই। তেক্নোলোজী অমবু মমুৎ তানা খঙদনা শিজিন্নবগী তঙাই ফদবা করিমত্তা লৈতে। ঐখোয়না মসিবু নৈনদুনা মসিবু ঐখোয়গী লৈবাক্কী তঙাই ফদবা অমসুং লৈজরিবা রিসোর্শিং অসিগী মতুং ইন্না তেক্নোলোজী অসিগী মওংশিং অসিবু শেমদোকপা য়াগদরা হায়না য়েংগদবনি। ঐখোয়না মসিগী থৌওংশিং অসি শেমদোকপা য়াগদরা? ঐখোয়না মসিগী থবক তৌবগী থাক অসি হোংদোকপা য়াগদরা? ঐহাক্না ঐখোয়গী নহাশিং অসিনা মসিদা শোইদনা ভেল্যু অমসুং অখন্নবা খরা হাপ্পা ঙমগনি হায়না থাজৈ অমসুং মসিবু ওইথোক্লবদি, ঐখোয়গী লৈবাক অসিনা অনৌবা মাইকৈ অমদা খোঙজেল থুনা চৎপা ঙমগনি হায়নসু থাজৈ। মসিদা নত্তনা, য়ুমশিং অসি শাবদা য়াওরিবা মীশিংগীসু মখোয়না অনৌবা তেক্নোলোজী অসিগা মরী লৈনবা স্কিল হেন্না ফগৎহন্নবা হায়দুনা সর্তিফিকেৎ কোর্স অমসু হৌদোক্লে। মসি য়াম্না শিংননীংঙাই ওইবা থবক্নি। ঐখোয়না মসিগী নাকল অমত্তদা, হ্যুমেন রিসোর্স দিভেলপমেন্ত অমসুং স্কিল দিভেলপমেন্তসু মসিগা লোয়ননা হৌদোক্লে। নখোয়না মসিগী তেক্নোলোজী অসিগী মরমদা ওনলাইন্দা পাদুনা ভাব তাবা য়াগনি। নখোয়না মসিগী পরিখা থাদুনা সর্তিফিকেৎ ফংবসু য়ারগনি। ঐখোয়না ঐখোয়গী লৈবাক মীয়াম্না মালেমগী খ্বাইদগী ফবা তেক্নোলোজীশিং অমসুং পোত্থোকশিং অসিবু ইশাগী য়ুম শাবদা শিজিন্নবা য়ানবা হায়দুনা শিল্লিবনি।

মরুপশিং,

আশা-ইন্দিয়া প্রোগ্রাম অসি লৈবাক অসিদা মতমগা চানবা য়ুম শাবগী তেক্নোলোজীগা মরী লৈনবা রিসর্চ অমসুং স্তার্ত-অপশিংবু খুমাং চাউশিলহন্নবা হায়দুনা চলায়রি। মসিগী খুত্থাংদা, ২১শুবা চহি-চাগী য়ুম শাবগী অনৌবা অমসুং শেল য়াম্না চঙদবা তেক্নোলোজীশিং অসি ভারত্তা ফংলগনি। কেম্পেন অসিগী মখাদা খ্বাইদগী ফবা থৌওং মঙাসু খনগৎলে। ঐহাক্না লাইরিক অমা ফোঙবা অমসুং নবরিতি কৌবা য়ুম শাবগী খ্বাইদগী ফবা তেক্নোলোজীদা য়ুম্ফম ওইবা ওনলাইনগী সর্তিফিকেৎ কোর্স অমা হৌদোকপগী খুদোংচাবসু ফংজখ্রে। ঐহাক্না মসিগী থৌওং অসিদা অপুনবা ৱাখল্লোনগা লোয়ননা মনুং চল্লিবা মরুপশিংবু থাগৎলি।

মরুপশিং,

শহরদা লৈরিবা লায়রবা নত্ত্রগা মিদ্দল ক্লাস মীওইশিংগী খ্বাইদগী চাউবা মঙলান অসি করিনো? মীওই অমা হেক্তদা হংবীয়ু অমসুং মহাক্কী ৱাখলদা লৈরিবা অদু য়ুম অমা শাবা ওইগনি। মখোয়গী অঙাংশিংগী পুন্সি অদু নীংথিনা লেনগনি। মখোয়গী অৱাবা, নুংঙাইবা অমসুং অঙাং য়োকপগী থৌওংসিংগা মরী লৈনরিবা য়ুম অসিদি মখোয়গী খুদোংচাদবা কয়া লৈরবসু, লেংদনা অদুমক লৈগনি। অদুবু, মীয়াম্না মখোয়গী য়ুমদা থাজবা লৈরিবশিং অসি চহিগী মতুং ইন্না হন্থরক্লে। মখোয়না মখোয়গী পুন্সিগী শেন তাল্লিবশিং অদু য়ুমদুদা থাদরবসু, মদু মখোয়গী ওইগনি হায়বগী থাজবা হন্থরক্লে। য়ুমশিং অসি চেদা খক্তা লৈরে। মখোয়না তাল্লিবা শেল অদুনা মখোয়গী অপাম্বা য়ুম লৈবা ঙমগনি হায়বগী থাজবা অদু মাংশিল্লক্লে। মসিগী মরমদি, য়ুমগী মমল অসি অদুক্কী মতিক ফংনা ৱাংলে। আইননা মখোয়গী তেংবাং পীরক্কদরা হায়বগী থাজবা অসিসু হন্থরক্লে। য়ুম শারিবা মীওইশিংগা করিগুম্বা য়ানদবা খরা লৈরবদি, মদুনা খুদোংচাদবা অমা অদুমক ওইহল্লি। অচম্বা মীওইশিংনা করিগুম্বা খুদোংচাদবা অমা লৈবা মতমদা আইন্না মখোয়গী মতেং পাংলক্কদরা হায়বগী থাজবা ৱাৎপগী ফিভমশিং অসি হাউসিং সেক্তরদা লৈরে।

মরুপশিং,

করিগুম্বা অসিগুম্বা খুদোংচাদবা কয়া অসি থেংনদুনা মহাক্না মাং থানা চৎপা পাম্লবসু, মহাক্কী মঙলান অসি বেঙ্ককী শেন্দোয় ৱাংবা অমসুং লোন ফংবদা লৈরিবা অৱাবা কয়া অসিনা অমুক্কা হন্না কায়হল্লি। ঙসিদি, হৌখিবা চহি ৬তা লৈবাক অসিদা পায়খৎখিবা খোঙথাংশিং অসিনা মখোয়গী, মরু ওইনা মিদ্দল ক্লাসকী মীওইশিংনা থাজবশিং অদু অমুক্কা হন্না পুরকপা অসিদা ঐহাক্না অপেনবা ফাওরে। হৌজিক্তি মহাক্না মশাগী ময়ুম অমা লৈজবা য়ারগনি। মহাক্না য়ুম অদুগী অশেংবা মপু ওইবা য়ারগনি। লৈবাক অসিনা হৌজিক মিৎয়েং চঙলিবা অসিদি লায়রবা অমসুং মিদ্দল ক্লাসকী মীওইশিংগী তঙাই ফদবশিং অসিদনি। ঙসিদি, লৈবাক অসিনা শহরদা লৈরিবা মীওইশিংগী অপাম্বশিংগীদমক্তা থবক তৌবা অসিনা হান্না পায়খৎকদবা থবক্নি হায়না লেপ্লে। প্রধান মন্ত্রী অৱস য়োজনাগী মখাদা অতেনবা মতমগী মনুংদা শহরগী মফমশিংদা য়ুম লাখ কয়া অমা শাবা ঙমখ্রে। য়ুম লাখ কয়া অমা শাবগী থবকসু হৌজিক চত্থরি।

মরুপশিং,

করিগুম্বা ঐখোয়না য়োজনা অসিগী মখাদা শারিবা য়ুমশিং অসিদা য়েংলুবা মতমদা, অনৌবা থৌওং পাংথোকপা অসিদা মিৎয়েং চঙবা অসি ঐখোয়না উবা ফংগনি। লোকেলগী তঙাই ফদবা অমসুং য়ুম্বুগী অপাম্বগী মতুং ইন্না য়ুম শাবগী পোৎ চৈদসু অনৌবা থৌওং শিজিন্নবা ঊবা ফংগনি। অতোপ্পা স্কিম কয়া অমসু য়ুম অসিদা পেকেজ অমা ওইনা হাপ্লি। ঈশিং, মৈ অমসুং গ্যাসকী খুদোংচাবশিংসু য়ুম অসিবু ফংলিবা লায়রবা মীওইশিংদা শোইদনা ফংহন্নবা হোৎনরি। মসিদা নত্তনা, থৌওংশিং অসিবু মনুং-মপান ফাওনা উবা ওইহন্নবা য়ুম্থোং খুদিংসু জিও-তেগ তৌরে। জিও-তেগিংগী থৌওং অসিগী খুত্থাংদা হীরম খুদিংমক য়েংশিনবা য়ারগনি। তেক্নোলোজী অসি নীংথিজনা শিজিন্নরে। য়ুম শাবগী তাঙ্কক খুদিংগী ফোতোশিংসু ৱেবসাইত্তা হাপ্লি। সরকারনা য়ুম শাবগী তেংবাং পীরিবা অসি বেনেফিশরীগী বেঙ্ক একাউন্ততা হকথেংননা থারি। ঐহাক্না রাজ্যসিংবুসু মখোয়না থৌওংসিং অসিদা থৱাই য়াওনা শরুক য়াবগীদমক্তা থাগৎপা ফোংদোক্লি। ঙসিদি, ঐহাক্না মসিগীদমক্তা রাজ্য কয়াবু ইকায় খুম্নবগী তাঞ্জা অমা ফংলে। মথৌ নীংথিজনা পাংথোকখিবা রাজ্যশিংদা ঐহাক্না মরু ওইনা থাগৎলি।

মরুপশিং,

সরকারনা পায়খৎলিবা থৌওংশিং অসিনা মরম ওইদুনা শহরদা লৈরিবা মিদ্দল ক্লাসকী মীওইশিংদা খুদোংচাবা কয়া ফংহল্লে। মখোয়শিং অসিদা য়ুমগী লোনগী শেন্দোয়দা তাবীবগী খুদোংচাবা অমা অহানবা ওইনা পীরে। কোরোনাগী মতমদসু, সরকারনা মখোয়গী য়ুমগী লোনশিংগী শেন্দোই তাবীনবা অখন্নবা স্কিম অমসু হৌদোকখি। চহি কয়াদগী লোইশিনবা ঙমদনা লৈবা ময়ুমশিংবু লোইশিনবা ঙম্নবগীদমক্তা মিদ্দল ক্লাসকী মীওইশিংগীদমক্তা লুপা করোর ২৫০০০গী অখন্নবা শেন্থং অমসু শেমখ্রে।

মরুপশিং,

মসিগী ৱারেপশিং অসিগা লোয়ননা, আর.ই.আর.এ.গুম্বা আইন্না পীবা শক্তিসু মীয়ামদা হৌজিক লৈরে। মসিনা মীয়ামদা মখোয়না শেল থাদরিবা প্রোজেক্তশিং অসি লোইশিল্লগনি অমসুং থেংথবা তৌররোই হায়বগী থাজবা লৈহল্লে। লৈবাক অসিগী রীএল ইস্তেৎ প্রোজেক্ত চাউরাক্না ৬০০০০ অসি ঙসিদি রেরাগী মখাদা রেজিস্তর তৌরে। আইন অসিগী মখাদা ৱাকৎ লিশিং কয়া অমগী ৱারোইশিন পীখ্রে, হায়বদি মীওই লিশিং কয়াদা মখোয়গী ময়ুম পীখ্রে।

মরুপশিং,

মীওই খুদিংগী ময়ুম লৈহনবগী পান্দম অসি ফংনবা মতম খুদিংদা চত্থরিবা থবকশিং অসিনা লায়রবা অমসুং মিদ্দল ক্লাসকী ইমুং করোর কয়াদা অচৌবা অহোংবা অমা পুরক্লে। য়ুমশিং অসিনা লায়রবশিংগী মশাদা থাজজবগী চাং হেনগৎহল্লে। মসিগী য়ুমশিং অসিনা লৈবাক অসিগী নহাশিংগী তৌবা ঙম্বগী মতিকশিংসু হেনগৎহল্লে। য়ুম অসিগী শোগা লোয়ননা অতোপ্পা খুদোংচাবা কয়া অমগী থোংসু হাংলে। মীওই অমনা য়ুম অমগী থোঙগী শো ফংবা মতমদা, মদু য়ুম অদুগী ফক্লাং মরি খক্তগী নত্তে। মখোয়গী মখুত্তা শো পায়রকপা মতমদা, মদুনা চাউথোকচনা হিংবা পুন্সি অমসুং তংদু লৈতাবা হয়েং অমসু লৈহল্লবনি। লন-থুমগী হক অসিনা মীওই অমগী পুন্সিদা শেল তুংশিনবা অমসুং শাহৌ লৌবগী থোঙ অমসু হাংবীরে। মসিনা খুন্নাইগী মীওই ৫-২৫গী মনুংদা অনৌবা শক্তাক অমগী থোঙসু হাংবীরে। ইকায় খুম্নবগী ৱাখল্লোন অসি নৌহৌননা অমুক লৈহল্লে। মশাবু থাজবগী মওংসু মরাং কায়না লৈরে। মসিনা শোশিং অসিনা চাউখৎপা অমসুং তুং লমচৎকী থোঙ অমসু হাংবীরে। মসিদা নত্তনা, শো অসি থোঙগী শো ওইবতা নত্তনা মীওই অদুনা মপুন্সিদা অনৌবা মঙলান অমা মঙদুনা তুং লমচৎকীদমক্তা চৎপা ঙমগনি হায়বা ৱাখল্লোনগী থোঙসু হাংবীরিবনি।

মরুপশিং,

মমাংগী চহিগী কোরোনাগী ইরাংগী মরক্তা অচৌবা খোঙথাং অমসু পায়খৎখি। মদুদি এফোর্দেবল রেন্তেল হাউসিং কমপ্লেক্স স্কিম্নি। মসিগী স্কিম অসিনা পান্দম থম্লিবদি রাজ্য অমদগী নত্ত্রগা খুঙ্গং অমদগী শহরদা থবক থীবা লাক্লিবা মীওইশিংনি। কোরোনাগী লাইচৎকী মমাংদা, মখোয়না লাক্লিবা লমদম, রাজ্য নত্ত্রগা খুঙ্গংগী মতাংদা তাবা নুংঙাইতবা ৱাহৈ কয়া হায়বগী ফিভম কয়া অমা ঐখোয়না উবা ফংখি। মখোয় য়াম্না ইকায়নখি। অদুবু কোরোনাগী ইরাং অসিদা শিন্মী খুদিংমক ময়ূমদা হন্নখিবা মতমদা, মখোয় য়াওদনা হিংবা, কারবার অমা চলায়বা, ইন্দস্ত্রী অমা চলায়বা অসি কয়া য়াম্না ৱাবগে হায়বা ৱাফম খঙনরকখি অমসুং মখোয়বু খুৎ লোন্নদুনা অমুক্কা হন্না থবক শুবীনবা লাক্নবা হায়জবা হৌনরকখি। কোরোনাগী ইরাং অসিনা শিন্মীশিংগী মতিক খঙলম্লরোইদবা অদু খঙহন্দুনা মখোয়বু ইকায় খুম্নহনখি। ঐখোয়গী শিন্মী মরুপশিং অসিনা শহরগী মফমদা শেল য়াম্না তাঙদবা য়ুম ফংবদা অৱাবা কয়া থেংনবা অসি উরে। মসিনা মরম ওইদুনা, শিন্মী মশিং য়াম্বনা অপিকপা কা অমদা নমশিন্দুনা লৈনরি। অসিগুম্বা তাঞ্জা অসিদা, মৈ, ঈশিং, অমাংশঙ অমসুং লু-নানবগী মতাংদা খুদোংচাদবা কয়া থেংনরি। লৈবাক্কী শেবাগীদমক্তা থবক শুরিবা ঐখোয়গী খোঙলোইশিং অসিসু ইকায় খুম্নবা পুন্সি মহিং অমা হিংহনবসি ঐখোয়গীসু থৌদাংনি। মসিগী ৱাখল্লোন অসিগা লোয়ননা, সরকারনা ইন্দস্ত্রী অমসুং অতোপ্পা পার্ত্নরশিংগা খুৎশম্নদুনা মখোয়গীদমক্তা শেল চংদনা লৈবা য়াগদবা য়ুম শানবা থবক্তা হান্না তৌগদবনি হায়বা ৱাখল্লোনগা লোয়ননা মিৎয়েং চঙলি। মখোয়গী থবক তৌফমশিংগী মনাক্তা হায়রিবা য়ুমশিং অসি শানবা হায়নসু থবক কয়া পাঙথোক্নবা হোৎনরি।

মরুপশিং,

রীএল স্তেক্তরবুসু নৌহৌননা হিঙ্গৎহন্নবা ৱারেপ কয়া অমসু মথং-মথং লৌখ্রে। য়ুম লৈবা মীওইশিংগী পুক্নিং থৌগৎনবা হায়দুনা হাউস তেক্সসু য়াম্না তাথহনখ্রে। অহোঙবা য়ুমদা ৮% চাংদা লৈরম্বা তেক্স অদুসু হৌজিক্তি ১% খক্তমক ওইরে। মসিগা মান্ননা, চৎনবা য়াবা য়ুম অমদা ১২%গী জি.এস.তি. তেক্স লৈরম্বা অদু হৌজিক্তি ৫% খক্তমক ওইরে। সরকারনা সেক্তর অসিগী ইনফ্রাস্ত্রকচরবু শকখঙদুনা অহোংবা মমলদা লোন ফংহন্নবসু হোৎনরি।

মরুপশিং,

চহি খরা অসিদা শেমদোকপগী থৌওং কয়া চত্থরকপা অসিনা মরম ওইদুনা ঐখোয়না য়ুম শাবগী অয়াবা পীবগী থাক অসি হৌখিবা চহি ৩দা য়াম্না ৱাংবা ওইনা ১৮৫দা লৈরম্বা অদুদগী হৌজিক্তি ২৭তা তাথরে। য়ুম শাবগা মরী লৈনবা অয়াবা পীবগী পথাপ অমসু শহর ২০০০ হেনবদা চাউথোক্তুনা লৈরে। হৌজিক্তি, ঐখোয় খুদিংমক্না মসিগী থৌওংসিং অসিবু লৈবাক অসিগী শহর খুদিংদা হন্দক্কী অনৌবা চহি অসিদা থবক ওইনা পাংথোকমিন্নরসি।

মরুপশিং,

ইনফ্রাস্ত্রকচর অমসুং য়ুম-শাবদা, মরু ওইনা হাউসিং সেক্তরদা চাদিং তৌবদা শেল থাদবা অসিনা শেন্মিৎলোনগী শাফু হেনগৎহন্নবা থৌওং অমা ওইহল্লি। য়াম্লবা স্তীল, সীমেন্ত অমসুং য়ুম শাবগী পোৎ-চৈগী চাং শিজিন্নবা অসিনা অপুনবা সেক্তর অসিগী খোঙজেল য়াঙহল্লি। মসিনা অপাম্বা হেনগৎপগা লোয়ননা অনৌবা থবক কয়া অমসু লৈহল্লি। সরকারনা লৈবাক অসিগী রীএল ইস্তেৎকী সেক্তর অসিবু মপাঙ্গল লৈহন্নবা হায়দুনা কন্না হোৎনরি। মীওই খুদিংগী য়ুম লৈবা হায়বগী মঙলান অসি মঙফাওনরগনি হায়না ঐহাক্না থাজবা থম্লি। চহি খরা অসিদা খুঙ্গংশিংদা য়ুম করোর ২সু শাখ্রে। হন্দক্কী চহিসিদা, খুঙ্গংদা য়ুম শাবগী থবক চত্থরিবশিং অসিগী খোঙজেল থুগৎহনগদবনি। মসিগী অনৌবা তেক্নোলোজী অসিনা চাউখৎলক্লিবা অসিনা য়ুম শাবা য়াম্না থুনা লোইশিনবা ঙমহনগনি। লৈবাক অসিনা খোঙজেল য়াঙনা চৎহনগে হায়রবদি, ঐখোয় খুদিংমকসু অয়াঙবা খোঙজেলদা চৎপা তাবনি। ঐখোয় খুদিংমক্না য়াৎথোক্তুনা থম্লিবা মাইকৈ অসিদা চৎকদবনি। ঐখোয়না ঐখোয়গী পান্দম থাদোক্তুনা চৎকদবা নত্তে। ঐখোয়না খোঙজেল য়াঙনা চত্তুনা ৱারেপ লৌবদসু খোঙজেল য়াঙগদবনি। মসিগী পান্দম অসিগা লোয়ননা, ঐহাক্না মসিগী লাইৎ হাউস ৬ অসিনা ঐখোয়গী অনৌবা চারোন শুরোন, তেক্নোলোজী অমসুং ইঞ্জিন্যারিংগী মহৈরোইশিংদা য়াম্না কান্নবা ওইসনু হায়বা অসি ঐহাক্কী অপাম্বনি।

ঐহাক্না য়ুনিভর্সিতী অমসুং কোলেজ খুদিংনা মসিগুম্বা মরু ওইবা প্রোজেক্ত অসিগী মতাংদা তমহন্নিংই। নখোয়না মফমশিং অসিদা চত্তুনা করি তৌরিবগে হায়বা অসি য়েংশিনগদবনি। তেক্নোলোজী অসি মতৌ করম্না শিজিন্নরিবগে? একাউন্তিং অসিনা করম্না পাংথোকই? মসিনা এজুকেসনগী ওইনসু অচৌবা স্কোপ অমা ওইরক্কনি অমসুং ঐহাক্না লৈবাক অসিগী নহা ওইরিবা ইঞ্জিন্যার অমসুং তেক্নিসিয়ান খুদিংনা মসিগী লাইৎ হাউস প্রোজেক্ত অসিদগী মঙাল কয়া য়ারিবমখৈ লৌশিন্নবা পাউজেল পীরি। অনৌবা চহি অসিগী নখোয় খুদিংদা য়াইফ-পাউজেল পীরি। মসিগী লাইৎ হাউস তরুক অসিসু মাই পাকপা ওইসনু।

হন্না হন্না থাগৎচরি।

দিস্ক্লেমরঃ পীরিবা অসি প্রধান মন্ত্রীগী ৱারোলগী চাউরাকপা ৱাহন্থোক্নি। অশেনবা ৱারোলদি হিন্দিদা পীবিখিবনি।

***