ভারতকী তরেৎশুবা ত্রেদ পোলিসী রিভিউ (তি.পি.আর.) জিনেভাদা লৈবা ৱর্ল্দ ত্রেদ ওর্গনাইজেসন্দা য়ুমশকৈশ নুমিৎ, জনুৱারী ৬, ২০২১দা হৌখ্রে‍। তি.পি.আর. অসি দব্লিউ.তি.ও.গী মোনিতরিং ফংসনগী মখাদা পায়খৎপা মরুওইবা মেকানিজম অমনি অদুগা মেম্বরশিংগী নেসনেল ত্রেদ পোলিসীশিংগা নৈনদুনা মপুং ফানা য়েংশিনবগী থৌওং য়াওরি‍। ভারতকী ইকোন কোনবা তি.পি.আর. ২০১৫দা পাঙথোকখিবনি‍।

তি.পি.আর.গী ভারতকী ওফিসিএল খোঙবু অদু কম্মর্স সেক্রেতরী দোক্তর অনুপ ৱাধৱান্না লুচিংলি‍। থৌরমদুদা দব্লি.তি.ও. মেম্বরসিপশিংগী মফমদা পীখিবা মহাক্কী হৌদোকপগী ৱারোলদা কম্মর্স সেক্রেতরীনা তি.পি.আর. অসি মালেম অসিনা হকশেল অমসুং শেন্মিৎলোনগী হান্না খন্নরুদবা লাংফম অমা নংলিঙৈ চৈরকসিদা পাঙথোক্লি হায়বা ৱাফম থমখি‍। আত্ম নিরভর ভারতকী থৌরাং য়াওনা কোবিদ-১৯ লাইচৎনা পীরিবা হকশেলগী অমসুং শেন্মিৎলোনগী শিংনবশিং নিংথিনা থেংননবা ভারতনা কাচিন কোয়া য়ৌবা থৌরাং কয়া পায়খৎলি হায়না মহাক্না হায়খি‍।

দোক্তর অনুপ ৱাধৱান্না মীপুম খুদিংদা কোবিদগী ভেক্সিন অমসুং কোবিদ লাইয়েং চপ মান্ননা অমদি অহোংবা মমলদা ফংহন্নবা ভারতকী ফীরেপ নৌহৌননা পল্লদুনা হীরমসিগী মতাংদা মল্তিলেতরেল ত্রেদিং সিস্তেম্না লৌবা য়াবা মরুওইবা থৌদাংগী মতাঙদা ৱাফমশিং থমখি‍। কোবিদ- ১৯ লাইচৎনা পীরিবা হকথেংনবা চৈথেং অসি থেংননবগীদমক ভারতনা কোবিদ-১৯গী অনৌবা দাইগ্নোস্তিক্স, লাইয়েং অমসুং তিকা মতম চানা পুথোক্নবা অমদি অহোংবা মমলদা ফংহন্নবা মেনুফেকচরিংগী কেপাসিতী হেনগৎহন্নবা অকক্নবা তি.আর.আই.পি.এস. প্রোভিজনশিং মতম খরগী ওইনা কোকপিবা; চীঞ্জাক ৱাৎহন্দনবা থৌরাংগী মখাদা ফুদ সিক্যুরিতীগী পব্লিক স্তোকহোল্দিং (পি.এস.ঐচ.)কী মতম চুপ্পগী ওইবা পাম্বৈ; অমসুং হেল্থকেয়র প্রোফেসনেলশিং ঙমখৈ লান্না চত্থোক চৎশিন তৌবদা লায়হন্নবা মোদ-৪গী মখাদা মেদিকেল সর্ভিস লায়না ফংহন্নবা মল্তিরেতরেল থৌরাংশিং য়াওনা দব্লিউ.তি.ও.দা অতেনবা মতমগী ওইবা কান্নরবা থৌরাংশিংগী পেকেজ হৌদোক্লি হায়না মহাক্না ফোঙদোকখি‍।

হৌখিবা চহী ৫সিদা, ভারতকী মমাঙগী তি.পিই.আর.দগী হৌরগা, লৈঙাক অসিনা ভারত মচা বিলিয়ন অমা হেনবগী খুন্নাই-শেন্মিৎলোনগী অপাম্বা ফীভম ফংহন্নবগীদমক শেন্মিৎলোনগী ইকো-সিস্তেম পুম্বদা অহোংবা অমদি অওনবা পুরক্নবা পুক্নিং চঙনা থবক পায়খৎলি হায়বা ৱাফম কম্মর্স সেক্রেতরীনা ফোঙদোকখি‍। গুদ্স অমসুং সর্ভিস তেক্স হৌদোকখিবা, ইন্সোল্ভেন্সী অমসুং বেঙ্করপ্তসী কোদ, হান্নগী পরিংদগী তোপ তোপ্পা লেবর সেক্তর, মতিং লৈবা অমদি শেল থাদবা নুংঙাইবা এফ.দি.আই. পোলিসী অমসুং ঐখোয়গী মেনুফেকচরিং সেক্তরদ থুনা অওনবা পুরক্ননবা পায়খৎখিবা মেক ইন ইন্দিয়া, দিজিতেল ইন্দিয়া, স্তার্তঅপ ইন্দিয়া অমসুং স্কিল ইন্দিয়ানচিংবা তোঙান তোঙানবা নেসনেল প্রোগ্রামশিং অসি হীরম অসিগীদমক্তনি‍। শেন্মিৎলোন অমসুং লল্লোন ইতিক্কী এনভাইরনমেন্তা পাক চাউনা পুরকখিবা অহোংবগী ইহৌ অসিনা মালেমগী ইজ ওফ দুইং বিজিনেস রেঙ্কিংদা ভারতকী মফম ২০১৫দা ১৪২শুবদা লৈরমবদগী ২০১৯দা ৬৩ শুবদা পুখৎলকপা ঙমখিবনি‍। ফীভম ফগৎলক্লিবা অসি লাইচৎ মনুংসিদা ফাওবা ভারতবু শেল থাদবগী পাম্নবা মফম ওইনা উদুনা, এফ.দি.আই. চঙলকপা চাদা ১০ ইয়র-ওন-ইয়র হেনগৎহন্দুনা ২০২০-২১গী অহানবা থা তরুক্তা য়ু.এস.দি. বিলিয়ন ৪০ য়ৌহন্দুনা শৌগৎখি‍। ২০১৯-২০দা ভারতনা হৌজিক ফাওবগী ওইনা খ্বাইদগী ৱাংবা এফ.দি.আই. চঙলকপা য়ু.এস.দি. বিলিয়ন ৭৪.৩৯ ফংখি‍।

থৌরমদুদা ভারতনা হৌখিবা চহী মঙাসিদা পায়খৎখিবা অচৌবা লল্লোন ইতিক অমসুং শেন্মিৎলোনগী থৌরাং পুম্নমক য়াওরবা দব্লিউ.তি.ও. সেক্রেতরিএতনা থোকখিবা শুপচিল্লবা রিপোর্ত অমদা নৈনরিবা মতমসিদা ভারতনা চাদা ৭.৪গী মপাঙ্গল কল্লবা শেন্মিৎলোনগী চাউখৎপা পুরকখিববু পল্লি অমদি হায়রিবা মতমসিদা ভারতনা পুরকখিবা অহোংবশিংবু শিংথাখি‍। রিপোর্ত অদুদা শেন্মিৎলোন মপাঙ্গল কনখৎলকপনা ভারতকী পর-কেপিতা ইনকম অমসুং পুন্সি নুংশাংবগী চাংনচিংবা খুন্নাই-শেন্মিৎলোনগী ইন্দিকেতরশিংগী ফীভম ফগৎলকখি হায়না পনখি‍। সেক্রেতরিএতকী রিপোর্ত অদুনা নৈনখিবা মতমসিগী মনুংদা এফ.দি.আই. পোলিসী মনীং তমহনবা, ত্রেদ ফেসিলিতেসন এগ্রীমেন্ত রেতিফাই তৌবা অমদি মশিং য়াম্লবা ত্রেদ-ফেসিলিতেসন থৌরাংশিং পায়ৎখিবগীদমক ভারতপু থাগৎখি‍।

মহাক্কী হৌদোকপগী ৱারোলদা দব্লিউ.তি.ও.গী তি.পি.আর. বোদীগী চেয়র আইসলেন্দগী এম্বেসেদর মিস্তর হেরল্দ এস্পেলন্দনা নৈনখিবা মতমসিদা ভারতকী শেন্মিৎলোন মপাঙ্গল কনখৎলকখিবদা নুংঙাইবা ফোঙদোকখি‍। মহাক্না ভারতপু লল্লোন ইতিক তৌবা নুংঙাইনবা হোৎনখিবশিং অমদি ভারতকী শেন্মিৎলোন্দা নুপীসু শরুক য়াহন্নবা তোঙান তোঙানবা থৌরম অমসুং চৎন-কাঙলোনশিং চৎনহনখিবগীদমক্তা থাগৎখি‍। ভারতকী তি.পি.আর.গী মাঙওইননা দব্লিউ.তি.ও. মেম্বরশিংদগী ফংখিবা ৱাহং ৭০০ হেনবগী পাউখুম মতম চানা অমদি মচা খায়না পীরকখিবগীদমক্তসু মহাক্না ভারতপু থাগৎখি‍।

ভারতকী তি.পি.আর. খন্নবদা য়াওখিবা থাইলেন্দকী এম্বেসেদর (মিস) সুনন্ত কংবালকুলকিজনা তি.পি.আর. অসি দব্লিউ.তি.ও.গী মরুওইবা অমদি মমল নাইদ্রবা থৌদাংসু লৌরিবা খ্বাইদগী মরুওইবা মেম্বরশিংগী মরক্তা অমনি হায়বা ৱাফম থমখি‍। নৈনখিবা মতমদুগী মনুংদা ভারতনা চাউনা শেন্মিৎলোনগী মপাঙ্গল কনখৎহনখিবা অমদি শেন্মিৎলোন অমসুং স্ত্রকচরগী ওইবা অহোংবা পাক চাউনা পুরকখিবগীদমক্তা মহাক্না ভারতবু থাগৎখি‍। অহোংবা পুরকখিবশিং অসিনা ভারতকী শেন্মিৎলোনগী মতিং অমদি মচল শুবা হেনগৎহনখি অমদি ভারতনা ২০১৯দা ৫শুব খ্বাইদগী চাউবা শেন্মিৎলোন ওইরকখি‍ হায়বা ৱাফম মহাক্না ফোঙদোকখি‍। মহাক্না ভারতপু এফ.দি.আই. রেজিম মনীং তমহনবা অমদি লৌউ শিংউগী লমদা মশক থোকপা অহোংবা পুরকখিবগীদমক্তসু থাগৎখি‍।

থৌরমদুদা ৱারোল পীখিবা দব্লি.তি.ও. মেম্বর ৫০ হেনবনা মপাঙ্গল কন্না অমদি তুং কোইগদবা মওংদা শেন্মিৎলোন চাউখৎলকখিবা অমদি ৱর্ল্দ বেঙ্কনা শকখঙলিবা লল্লোন ইতিক তৌবদা নুংঙাইবা ফীভম হেনগৎহন্নবা লৌখৎখিবা থৌরাংশিংগীদমক্তা ভারতপু শিংথানখি‍। ভারতনা লল্লোন ইতিক অমসুং শেন্মিৎলোনগী খুজিন থৌরাং হেন্না মচল শুবা অমদি তুং কোইগদবা মওংদা ফগৎহন্নবা ভারতনা লৌখৎখিবা খোঙথাঙশিংবু মেম্বরশিংনা পন্নখি‍। মেম্বর কয়া অমনা ‘মালেমগী ফার্মাসী’ হায়না খংনবা ভারতকী মফমবু শকখঙলদুনা কোবিদ-১৯ লাইচৎকী মায়োক্তা মালেম্না লৌখৎখিবা থৌরাংশিংদা ভারতনা লুচিংবগী থৌদাং লৌখিবগীদমক্তসু থাগৎখি‍। ভারতকী এফ.দি.আই. রেজিম মনিং তমহনখিবা, ত্রেদ ফেসিলিতেসন থৌরাং কয়া চৎনহনখিবা অমদি ভারতকী নেসনেল ইন্তেলেকচুএল প্রোপর্তী রাইতস (আই.পি.আর.) পোলিসী চৎনহনখিবা হায়রিবশিং অসিগীদমক দব্লিউ.তি.ও. মেম্বরশিংনা থাগৎনখি‍। মেম্বর কয়া অমনা দব্লিউ.তি.ও.দা লৈরিবা ভারতকী মওং চুম্বা নোতিফিকেসন অমসুং ত্রান্সপেরেন্সী রেকোর্দপুসু থাগৎনখি‍।

ভারতকী খোঙজেল য়াঙনা চাউথোরক্লিবা কৈথেলদা মীৎয়েঙ থমদুনা মাঙজিল থারিবা ইন্দস্ত্রিএলাইজ অমসুং চাউখৎলবা লৈবাকশিংনা ভারতকী ত্রেদ পোলিসীবু, মরুওইনা লৌউ-শিংউগী লমদা, হেন্না মনিং তমহন্দুনা ভারতকী স্তেন্দর্দ রেজিমবু মালেমগী স্তেন্দর্দকা মান্নহন্নবা অমদি এন্তি-দম্পিং হন্থহন্নবা অমসুং অতৌ লল্লোন ইতিক্কী থৌরাংশিং লৌখৎনবা ৱাফম থম্নরকখি‍। মেম্বর কয়া অমনসু মখোয়গী মফমদা ভারতপু স্ত্রেতেজিক অমসুং ত্রেদিং পার্তনর ওইবগী মরুওইবা ৱাফমশিং পল্লদুনা ভারতকা লোয়ননা নাকল অনিগী ওইবা নৎত্রগা রিজনেল ফ্রী ত্রেদকী য়ানচে খুমাঙ চাওশিলহন্নিংবগী অপাম্বা ফোঙদোক্নরকখি‍। মেম্বর কয়ানা দব্লিউ.তি.ও.দা ভারতকী লুচিংবগী থৌদাংবু থাগৎনখি অমদি ভারতপু লীস্ত দেভেলেপ কন্ত্রীশিং (এল.দি.সি.) য়াওনা চাউখৎলক্লিবা লৈবাকশিংগী ইন্তরেস্ত মাঙহন্দবগীদমক্তা শিংথানখি‍।

তি.পি.আর. মীফম অসি জনুৱারী ৮, ২০২১দা মাগী অনিসুবা নুমিৎকী ওইনা মখা চত্থদুনা মেম্বরশিংগী মরক্তা ভারতকী লল্লোন ইতিক অমসুং শেন্মিৎলোনগী খুজিন থৌরাংশিং নৈনগনি‍।

****