ঙসি ভারতকী উপ-রাস্ত্রপতি শ্রী এম.ভেনকিয়া নাইদুনা হায়খ্রে সাইন্সকী অমতা ঙাইরবা পান্দমদি মীয়ামগী পুন্সি নুংঙাইহনবা অমসুং হরাওহনবনি অমসুং সাইন্সকী লমদা থবক তৌরিবা ইন্সতিতুৎশিংনা অনৌবা পুথোক্নবা অমসুং তেক্নোলোজিগী খুমাঙচাউশিনবা ঙম্নবা মফম অমা পীগদবনি।

ইন্দিয়ান ইন্সতিতুৎ ওফ বেঙ্গালুরুগী সেন্তর ফোর রিছর্স এন্দ ইজুকেসন ইন সাইন্স এন্দ তেক্নোলোজি(ক্রেস্ত)গী ওজাশিং অমসুং মহৈরোয়শিংদা ৱা ঙাংবদা মহাক্না হায়খি সাইন্সনা খুন্নাই অমা চাউখৎনবগী য়ুম্ফমনি। নহারোলশিংদা সাইন্সকী ওইবা ৱাখল্লোল অমসুং থৌনা লৈহনবা দরকার ওই। নুপী সাইন্তিস্তশিংদসু চপ মান্নবা খুদোংচাবশিং অমসুং পুক্নিং থৌগৎপা ফংহনগদবনি।

মহাক্কী খোঙচৎ মনুংদা উপ-রাস্ত্রপতিনা অনৌবা মফম অনি হাংদোকখি- মিতর ৩০গী তেলিস্কোপকী অচৌবা মিংশেল নানহন্নবা মফম অমা অমসুং এম.জি.কে মেনন লেবোরেতোরি ফোর স্পেস সাইন্সেসকী শরুক অমা ওইনা, অপীকপা পেলোদশিংগী ইনভাইরোনমেন্তেল তেস্ত ফেসিলিতি অমা য়াওরি।

মহাক্না এম.জি.কে মেনন লেবোরেতোরি ফোর স্পেস সাইন্সেস মনুংদা স্পেস পেলোদশিং পুনশিনবা অমসুং মিতর ২গী হিমালয়ান চন্দ্র তেলিস্কোপগী রিমোত ওপরেসন য়েংখি।

উপ-রাস্ত্রপতিনা হায়খি থায়না মমাঙঙৈদগী হৌনা এস্ত্রোনোমি অমসুং অঙ্কগী লমদা ভারতকী ইনাকখুল্লবা পুখৈ-লনগৈ অমা লৈরমখি। ঙসি হাংদোক্লিবা খুদোংচাবশিং অসিনা প্রধান মন্ত্রীনা হৌদোক্লিবা অত্মানির্ভর ভারত মিসন্দা ভারতকী মতেং পাংগনি।

ইনভাইরোনমেন্ত তেস্ত ফেসিলিতিনা লাক্লিবা চহিশিংদা স্পেস সেক্তরগী মতেং পাংগনি।

নোথদর্ন হেমিস্ফিয়ারদা খ্বাইদগী চাউবা লৈমায়গী এস্ত্রোনোমি প্রোজেক থার্তি মিতর তেলিস্কোপ(তি এম তি) শানবা অমসুং মথৌ পাংথোক্নবা লৈবাক মঙা হায়বদি ইন্দিয়া, জপান, চাইনা, কানাদা অমসুং য়ু.এস.এগী অপুনবা মালেমগী রিছর্স ওর্গনাইজেসন অমসুং সাইন্স ইন্সতিতুৎশিংদা ভারত য়াওরে। হৱাইগী মৌনা কিয়া মথক্তা শানবা থৌরাং তৌরিবা য়ু.এস দোল্লর বিল্লিয়ন(বিল্লিয়ন ৩) কয়াগী প্রোজেক অসিদা ভারতনা চাদা ১০ শরুক য়ারি। প্রোজেক অসি ২০৩০গী অঙনবা শরুকশিংদা লোইশিনগনি হায়না থাজনরি।

তি.এম.তিদা ‘মিতর ৩০’ হায়রিবা অসি প্রাইমারি মিররগী মিতর ৩০গী দাইমেতর অদুনি। এস্ত্রোনোমিগী ওইনা মিতর ৩০গী গ্লাস মপাক অমা শেম্বা অসি ঙমদবা মরম্না, মসি মিতর ১.৪৫ পাক-চাউবা মচেৎ ৪৯২না শেম্বনি। অরুবা প্রোজেক অসিদা মচেৎ ৪৯২ অসিনা মিতর ৩০গী দাইমেতর ওইবা মিংশেল মপাক অমা শেম্বদুনা তেলিস্কোপনা অতিয়াদা থিজিনগনি। গ্লাস মচেৎ ৪৯২ অসি মিংশেল মপুম অমা ওইনা শেমগৎনবা সোফৱায়ার, ইলেকত্রোনিক্স অমসুং হার্দৱায়রগী লমদা ভারতনা মতেং পাংলি। হায়রিবা অরুবা থবকশিং অসি পাংথোক্নবা ইন্দস্ত্রি ১২ হেন্না শরুক য়ারি।

প্রোজেক অসিদা ভারতনা মরুওইনা মতেং পাংবা অসিদা সেগমেন্ত ৯০ পীবা য়াওরি। মিংশেলশিং অদু ক্রেস্ততা লৈবা ইন্দিয়া তি.এম.তি ওপ্তিক্স ফেব্রিকেসন ফেসিলিতিদা পানখৎকনি অমসুং মসিদা মহৌশাদগী লৈরক্লবা তেক্নোলোজিদগী তোঙানবা স্ত্রেস মিরর পোলিসিং তেক্নোলোজি শীজিন্নগনি। এস.এম.পি তেক্নোলোজিনা থা অমদা সেগমেন্ত অনি পীগনি,মসি মমাঙঙৈগী পোলিসিংগী থবক্তা থা ১২-১৮ চঙবা অদুগা চাংদম্নবদনি।

মালেম থাক্কী ওপ্তিক্সকী খুদোংচাবশিং লিংখৎতুনা লৈবাক অসিগী অমসুং মালেমগী পান্দমশিং ফংনবা মখোয়না হোৎনরিবশিং অসিগীদমক উপ-রাস্ত্রপতিনা সাইন্তিস্তশিং অমসুং ইঞ্জিনিয়ারশিং থাগৎখি। সাইন্তিফিক প্রোজেকশিং মতেং পাংনবা মখোয়গী পান্দম অদুগীদমক মহাক দি.এস.তি অমসুং দি.এ.ইসু থাগৎখি। মহাক্না হায়খি ভারতকী চহি কয়া শুরবা “ভসুধাইবা কুতুমবাম”(মালেম অসি ইমুং অমনি) হায়বা চৎনবগী শরুক অমা ঐখোয়না প্রোজেক অসিদা শরুক য়াবনি। ঐখোয়গী হৌরকফম অমসুং য়ুনিভর্স অসিগী ইভোলুসন খঙনবা মীওইবা খুন্নাইগী য়াইফনবা সাইন্সকী থবক অসিগী শরুক য়াবা অসি ঐখোয়গী চাউথোকপা অমনি।

শ্রী নাইদুনা হায়খি ভারতকী মতম কয়াগী মমাঙদগী লৈরক্লবা এস্ত্রোনোমিগী চৎনবী অসি মালেম্না খঙনরে। থায়না মমাঙঙৈদগী হৌরগা হৌজিক্কী মতম ফাওবদা এস্ত্রোনোমিগীদমক ভারতনা মালেমগী পাংবা য়াবা মতেংশিং পাংখ্রে। অসিগুম্বা অচৌবা মেগা সাইন্স প্রোজেকশিংদা শরুক য়াবা অসিনা ভারতকী সাইন্তিস্তশিং মাইপাকপা অমা পুরক্কনি অমসুং অৱাংবা থাক্কী তেক্নোলোজিগী লমদা ইন্দস্ত্রিশিংগী হৈশিংবা হেনগৎহনবা ঙমগনি।

মহাক্না হায়খি ইসরোগী স্পেস মিসন “মঙ্গালয়ান” অমসুং অতিয়াদা এক্স-রে অমসুং য়ু.ভি থিজিন্নবা ভারতকী এস্ত্রোনোমি ওজার্বেতোরি “এস্ত্রোসেত(এস্ত্রোনোমিকেল সেতিলাইত)অমসুং নুমিৎকী মরমদা থিজিন্নবা অথুবদা থাগৎনবা থৌরাং তৌরিবা অদিত্যা এল-১ অসি খুদম খরনি। লৈবাক অসিদা অখঙ-অহৈশিং মরাংকাইনা লৈবা অমসুং মালেমগী থাক্তা শেন-থুম অমসুং রাজনিতিগী শক্তি অমা ওইরকপদগী মালেমগী অমসুং মালেম থাক্কী লৈবাক অসিগী সাইন্সকী অচৌবা থবকশিংদা ভারত শরুক য়াবা অসি মশানা তাবা অমা ওইরে।

উপ-রাস্ত্রপতিনা হায়খি কনাগুম্বা অমনা মতম চুপ্পদা কনাগুম্বা অমগী মমা, মমালৈবাক, মমালোন অমসুং ওজা ইকায়খুম্নগদবনি। মখোয়না লৈরিবা মফমগী খেন্নবা লৈতনা মখোয়গী লৈবাক চাউখৎনবা মহৈরোয়শিংনা থবক তৌগদবনি। মখোয়না তমগদবনি, তানগদবনি অমসুং মখোয়গী হৌরকফমদা হল্লক্কদবনি অমসুং খুন্নাইগী য়াইফনবা থবক তৌগদবনি।

শ্রী নাইদুনা হায়খি কোবিদ-১৯ লাইচৎ লাকশিনবা চাউখৎলবা লৈবাকশিংগী ভারতনা হেন্না ফিবম ফরে। ভারতকী খুঙ্গংগী মীয়ামগী অফবা চীঞ্জাক চাবগী হৈনবীশিং অমসুং মহৌশাগা লোয়ন্না হিংবা পুন্সি মহিংনা মরম ওইদুনা মসি পাংথোকপা ঙম্বনি। কান্নদবা চীঞ্জাক চাবা তোক্তুনা, য়োগা শান্নদুনা অমসুং মহৌশাগা লোয়ন্না হিংমন্নদুনা হকচাং ফবা পুন্সি মহিং অমদা লৈনবা মহাক্না নহারোলশিংদা পাউতাক পীখি।

থৌরম অদুদা কর্নাতক্কী হোম মিনিস্তর শ্রী বাসাবারাজ বোম্মাই, আই.আই.এগী দিরেক্তর প্রোফেসার অন্নাপুর্নি সুব্রামনিয়ম, আই.আই.এগী দিন প্রোফেসার জি.সি অন্নপুরনা অমসুং আই.তি.এম.তি প্রোজেক্কী প্রোগ্রাম দিরেক্তর প্রোফেসার বি ইশ্বর রেদ্দি শরুক য়াখি।

মখাগী অসি মপুংফাবা ৱারোলনি-

 “ইচলশিং অমসুং ইনাওশিং’

ইন্দিয়ান ইন্সতিতুৎ ওফ এস্ত্রোফিজিক্স,বেঙ্গালুরুগী সেন্তর ফোর রিছর্স এন্দ ইজুকেসন ইন সাইন্স এন্দ তেক্নোলোজি(ক্রেস্ত)গী কেম্পসতা লাকপা অসি য়াম্না হরাওই।

সাইন্স অমসুং তেক্নোলোজি দিপার্তমেন্ত অমসুং ইন্দিয়ান ইন্সতিতুৎ ওফ এস্ত্রোফিজিক্সনা লৈবাক্কীদমক থবক তৌরকপা চহি ৫০ শুরকপা অসি য়াম্না চাউথোকচনিংঙাই ওইবা অমনি। মীয়ামগী য়াইফনবা লৌশিং পুথোক্নবা মখোয়না মখা তানা থবক তৌনবা ঐনা য়াইফ-পাউজেল পীজরি।

ইন্দিয়ান ইন্সতিতুৎ ওফ এস্ত্রোফিজিক্সনা এস্ত্রোনোমিগী লমদা মতম শাংনা থিজিন্দুনা লাকপগী পুৱারি অমা লৈরে। মরুওইবা পুথোকখিবশিংগী মনুংদা নুমিৎতা অমসুং উরানস গ্রহগী রিংগী অকোয়বদা হেলিয়ম য়াওবা থেংনখিবা অসিনি। ১৭৮৬দা লিংখৎখিবা মাদ্রাস ওবজার্বেতোরিগী শরুক অমা ওইনা ইন্সতিতুৎ অসিনা কোদাইকানালদা সোলার ওবজার্বেতোরি অমা শেন্নরি। কোদাইকানালদা সোলার ওবজার্বেতোরিদা নুমিৎকী মরমদা চহি ১২০ চুপ্না লেপতনা থিজিন্দুনা লাকপগী  দেতা থম্লি। সমুদ্রা ইমায়দগী মিতর ৪৫০০ ৱাংবা মফমদা লৈদুনা মালেমদা খ্বাইদগী ৱাংবা ওবজার্বেতোরিশিংগী মনুংদা অমা ওইদুনা, লাদাখকী হানলেদা ইন্দিয়ান ইন্সতিতুৎ ওফ এস্ত্রোফিজিক্সনা ইন্দিয়ান এস্ত্রোনোমিকেল ওবজার্বেতোরি অমা থবক তৌরি।

সাইন্সনা খুন্নাই অমগী য়ুম্ফমনি অমসুং খুন্নাইগী মীয়াম মরক্তা সাইন্সকী ৱাখল্লোন লৈহনবা অসিনা খুন্নাইশিং অমসুং মীওইবা খুন্নাই চাউখৎনবা মরুওইবা অমনি। ভারতকী মতম কয়াগী মমাঙদগী লৈরক্লবা এস্ত্রোনোমিগী চৎনবী অসি মালেম্না খঙনরে। থায়না মমাঙঙৈদগী হৌরগা হৌজিক্কী মতম ফাওবদা এস্ত্রোনোমিগীদমক ভারতনা মালেমগী পাংবা য়াবা মতেংশিং পাংখ্রে। ৫সুবা সেঞ্চুরিগী মমিং লৈরিবা মেথেমেতিসিয়ান অমসুং এস্ত্রোনোমর অর্য়াভাতনা পৃথিবীনা উংবা অমসুং গ্রহশিংনা নুমিৎকী অকোয়বদা চৎপগী মতাংদা থিজিনবগী মাংজিল থাবা থবক কয়া পায়খৎলমখি।

 অনৌবা মতমগী এস্ত্রোনোমিদা ভারতনা পাংথোকখিবা থবকশিং তশেংনা মশক থোক্লে। তোঙান-তোঙানবা ইলিমেন্তশিংগী স্পেকত্রা লাইনশিং শীজিন্নদুনা তোঙান-তোঙানবা মখলগী থৱান্মিচাকশিংগী শাবগী চাং ওনবা ঙম্বা মীয়াম্না খঙনরবা সাহা ইক্বেসন পুথোকপগীদমক মমিং লৈরিবা এস্ত্রোফিজিসিস্ত, মেঘনাদ সাহা মমিং চৎলি। মসি হৌজিক ফাওবগী ওইনা থৱান্মিচাকশিংগী নুংশিৎকী লৈরোল থিজিন্নবা মরুওইবা থবকশিংগী মনুংদা অমা ওইরি। অতোপ্পা মমিং লৈরিবা এস্ত্রোফিজিসিস্ত সুব্রামনয়ান চন্দ্রসেখরনা স্তেল্লার স্ত্রকচরগী মতাংদা থিজিনবদা ১৯৮৮দা নোবেল প্রাইজ ফংখি।  এস্ত্রোনোমি অমসুং এস্ত্রোফিজিক্সকী লমদা মহাক্না পাংথোকখিবা থবকশিং শকখঙবা অমসুং ইকায়খুম্নবা উৎপা ওইনা, নাসানা মসিগী লেমজনিঙাই ওইরবা অমসুং দোল্লর বিল্লিয়ন কয়াগী স্পেস তেলিস্কোপ অমা চন্দ্র এক্স-রে তেলিস্কোপ হায়না মমিং থোল্লে।

মতম অদুদা মালেমদা খ্বাইদগী চাউবগী মনুংদা অমা ওইখিবা অমসুং এসিয়াদা খ্বাইদগী চাউবা ওইখিবা মিতর ২.৩গী তেলিস্কোপ অমা শানবা থৌদাং লৌখিবা লৈবাক অসিগী মোদর্ন ওপ্তিকেল অমসুং ইনফ্রারেদ এস্ত্রোনোমিগী মপা হায়না খঙনবা প্রোফেসার বাইনু বাপ্পুগুম্বা শক্নাইরবশিং নিংশিংবা অসি ইকায়খুম্নবা অমনি। হৌজিক লৈবাক অসিদা খ্বাইদগী চাউবা ওপ্তিকেল তেলিস্কোপ ওইনা, ২০১৫দা ভারতনা মিতর ৩.৬ দেবাস্থাল ওপ্তিকেল তেলিস্কোপ থবক হৌখ্রে।

অদুবু, অতৈ লৈবাকশিংনা মিতর ১০গী তেলিস্কোপ শীজিন্নবা হৌখিবা চহি ২০ হেল্লে অমসুং অনৌবা ওবজার্বেতোরিশিং শানবা থৌরাং তৌরি। মসিদা য়াম্লবা শেনফম অমসুং মীওইবগী হোৎনবা অমসুং মালেমগী ওইনা মতেং পীনবা দরকার ওই। য়ু.এস.এগী হৱাইদা মিতর ৩০গী তেলিস্কোপ অমা শানবা জপান, চাইনা, কানাদা অমসুং য়ু.এস.এদা ভারত শরুক য়াবগী অয়াবা ২০১৪দা প্রধান মন্ত্রী শ্রী নরেন্দ্র মোদীনা লুচিংবা কেন্দ্রগী মন্ত্রীমন্দলনা অয়াবা পীখি। মালেমগী অপুনবা থবকশিং পাংথোক্নবা ওপ্তিক্সশিং শানবা সেন্তর অসি শঙ্গাবা অসিদা ঐহাক অপেনবা পোকই।

অচৌবা সাইন্তিফিক প্রোজেকশিং শরুক য়াবা অসিনা ভারতকী সাইন্তিস্তশিং চপ মান্নবা খুদোংচাবশিং ফংগনি অমসুং ইন্দস্ত্রিশিং অৱাংবা থাক্কী তেক্নোলোজিগী হৈশিংবা হেনগৎহনগনি।

তেক্নোলোজিগী লমদা ভারত য়াম্না য়াংনা চঙশিল্লি। ইসরোগী স্পেস মিসন “মঙ্গালয়ান” অমসুং অতিয়াদা এক্স-রে অমসুং য়ু.ভি থিজিন্নবা ভারতকী এস্ত্রোনোমি ওজার্বেতোরি “এস্ত্রোসেত(এস্ত্রোনোমিকেল সেতিলাইত)অমসুং নুমিৎকী মরমদা থিজিন্নবা অথুবদা থাগৎনবা থৌরাং তৌরিবা অদিত্যা এল-১ অসি খুদম খরনি। অদিত্যা মিসন্না পৃথিবীদগী কিলোমিতর লাখ ১৫ লাপ্পা স্পেসতা লৈদুনা মমাঙদা অমুক্তা ওইখিদ্রিবা মওংদা নুমিৎকী মরমদা থিজিনবা ঙমহনগনি। 

ঙসি হাংদোক্লিবা ইনভাইরোনমেন্তেল তেস্ত ফেসিলিতি অসিনা অপীকপা পেলোদশিংকী মরমদা থিজিনবা ঙমহল্লগনি। মসি য়ুনিভর্সিতিশিং অমসুং ইন্দস্ত্রিশিংনা অপীকপা পেলোদশিং পুথোক্নবা শীজিন্নবা য়াগনি। হায়রিবা খুদোংচাবশিং অসিনা তুংদা স্পেস সেক্তর চাউখৎহনবদা মতেং পাংগনি।

লৈবাক অসিদা অখঙ-অহৈশিং মরাংকাইনা লৈবা অমসুং মালেমগী থাক্তা শেন-থুম অমসুং রাজনিতিগী শক্তি অমা ওইরকপদগী মালেমগী অমসুং মালেম থাক্কী লৈবাক অসিগী সাইন্সকী অচৌবা থবকশিংদা ভারত শরুক য়াবা অসি মশানা তাবা অমা ওইরে। তুংগী মীরোলদা সাইন্তিফিক ওইবা ৱাখল্লোন চেনহলনবা অসি মরুওইবা অমনি। অসিগুম্বা ইন্সতিতুৎ অসিনা অনৌবা পুথোকপা অমসুং তেক্নোলোজিগী খুমাং চাউশিনবা ঙম্নবা মফম অমা পীবা ঙমগনি।

অচৌবা সাইন্স প্রোজেকশিংদা ভারতনা শরুক য়াবা অসিনা অসিগুম্বা অরুবা প্রোজেকশিংদা চাউখৎলবা লৈবাকশিংগা পুন্না থবক তৌমিন্নবগী খুদোংচাবা ফংলে। হায়রিবা থবকশিং অসিনা সাইন্সকী থবকশিং অমসুং ইন্দস্ত্রি পুন্না থবক তৌমিন্নবা ঙমহল্লে। মসিনা লৈবাক অসিদা লৌশিং হেনগৎহনবা অমসুং তেক্নোলোজি পীথোক-পীশিন তৌবা ঙমহল্লে।

নুংশিরবা মরুপশিং,

ঐনা মতম চুপ্পা হায়রি মদুদি সাইন্সকী অমতা ঙাইরবা পান্দমদি মীয়ামগী পুন্সি নুংঙাইহনবনি। হিরম কয়াদা এস্ত্রোনোমিনা খুন্নাইদা কান্নবা পীবদা ঐ হরাওই। এস্ত্রোনোমিদগী ইন্দস্ত্রি, এরোস্পেস অমসুং ইনর্জি সেক্তর য়াম্লবা তেক্নোলোজি পীরে। ঙসি ঐখোয়না ফংলিবা এক্স-রে মেছিনশিং, ঘরিশিং, সুপর কম্পুতরশিং, সেতিলাইত কম্মুনিকেসন, জি.পি.এস অসি এস্ত্রোনোমিনা থিজিনবগী ফলশিংনি।

এস্ত্রোনোমিগী মরমদা থিজিনবনা ইভোলুসন অমসুং পৃথিবীগী নুংশিৎকী লৈরোলদা য়াওরিবা মচলশিংগী মরমদা খঙবদা ঐখোয়দা মতেং পাংলি। অইং-অশাগী খল কাইরকপা অমসুং মসি থেংন্নবা পায়খৎকদবা দরকার ওইবা থবকশিংগী মতাংদা মরুওইবা লৌশিং কয়া এস্ত্রোনোমিনা ঐখোয়দা পীরি। মালেমগী তোঙান-তোঙানবা প্রোজেকশিংগী মখাদা এস্ত্রোনোমিনা মীয়াম অমসুং লৈবাকশিং অমতা ওইনা পুনশিল্লে।

য়ুনিভর্স অসি মীওইবগী অঙকপা অমা ওইরি। এস্ত্রোনোমিনা মীওইবগী লৌশিং হেনগৎহনবা খক নত্তনা ঐখোয়না য়ুনিভর্সকী মরমদা খঙবা ঙমহল্লে। স্পেসতগী য়েংলকপা মতমদা ঐখোয়গী মালেম অসি ঐখোয়না ‘হিগোক মচুগী বিন্দু’ অমা ওইনা উরি। মসিনা ঐখোয়দা ঐখোয়না হিংবা অমসুং পুন্সিগী ৱাহন্থোক করিনো হায়বা খলহল্লে। মসিনা ঐখোয়দা নোল্লুকপা ফাওহল্লে।

ঙসি ঐনা কেম্পস অসিদা উরিবা অসি অত্মানির্ভর ভারত অমগী য়ুম্ফম থোন্নবা, ঐখোয়গী তুংগী মীরোলশিংগী রিছর্স অমসুং তেক্নোলোজি চাউখৎনবা খ্বাইদগী ফরবা খুদমশিংনি। অঙাংশিং অমসুং মীয়ামদা সাইন্সকী মরমদা খঙহন্নবা সাইন্স সেন্তর অমা কেম্পস অসিদা লিংখৎনবা থৌরাং লৈরে হায়বা দিরেক্তরদগী ঐ খঙলে। মসিনা মীয়ামদা সাইন্সকী মরমদা খঙহন্নবা মরুওইবা খোঙথাং অমা ওইগনি হায়না ঐনা খল্লি।

অরোইবদা, অসিগুম্বা অচৌবা সাইন্সকী  প্রোজেকশিং পায়খৎপগীদমক ঐনা সাইন্তিস্তশিং অমসুং ইঞ্জিনিয়ারশিং অমসুং সাইন্স অমসুং তেক্নোলোজি দিপার্তমেন্ত, এতোমিক ইনর্জি দিপার্তমেন্ত অমসুং ইসরো থাগৎলি।

আই.আই.এগী কাংবুদা ঐনা অনৌবা চহিগী য়াইফ-পাউজেল পীজরি।

জয় হিন্দ!”

****