কেন্দ্রগী রাজ্য মন্ত্রী (ইন্দিপেন্দেন্ত চার্জ), দিভেলপমেন্ত ওফ নোর্থ ইস্তর্ন রিজন (দি.ও.এন.ই.আর.), এম.ও.এস. পি.এম.ও., পর্সোন্নেল, পব্লিক গ্রাইবেন্সস, পেন্সন, এতোমিক ইনর্জী অমসুং স্পেসকী কেন্দ্র মন্ত্রী দাঃ জিতেন্দ্র সিংহনা ভাভা এতোমিক রিসর্চ সেন্তর (বি.এ.আর.সি.), মুম্বাইনা ওক্যুলার ত্যুমর লায়েংবদা চঙবা অহানবা ইন্দিজেনিয়স রুথেনিয়ম ১০৬ প্লেক্কী মওংদা মিৎকী কেন্সর লায়েংবগী থৌওং পুথোকখিবা অদুবু থাগৎপা ফোংদোকখ্রে। প্লেক অসিবু শিজিন্নবগী মওং অসি সর্জনশিংদা য়াম্না নুংঙাইবা ওই অমসুং মসিবু মালেমগী থাক্তা লৈ হায়না শকখঙনরবনি।

মতাং অসিদা পনবা য়াবদি, মমাংগী চহিগী ওক্তোবরদা, এতোমিক ইনর্জী বিভাগ (দি.এ.ই.)কী চেয়রমেন অমসুং সেক্রেতরী, দাঃ কে.এন. ভ্যাসনা এতোমিক ইনর্জীগী এম.ও.এস.কী ইন-চার্জ দাঃ জিতেন্দ্র সিংহগা এতোমিক ইনর্জী বিভাগনা মসিগী ওপথালমিক পেৎচ মখল অসি শিজিন্নদুনা লায়েংবা য়াবা য়াদবগী মতাংদা কুপ্না খন্ন-নৈনখিবসু লৈখ্রবনি। মসিগী মখা তারকপা ওইনা, দাঃ জিতেন্দ্র সিংহনা থৱাই য়াওশিল্লকপদগী এতোমিক ইনর্জীগী বিভাগসু দাঃ রাজেন্দ্র প্রসাদ সেন্তর ফোর ওপথালমিক সাইন্স, এমস, নই-দিল্লীগা খুৎশম্নদুনা থবক তৌমিন্নখি। মতুং তারকপদা, নই-দিল্লীগী এমসনা ভাভা এতোমিক রিসর্চনা পুথোকখিবা প্লেক অসি মিৎকী কেন্সর লায়েংবদা শিজিন্নরসি হায়বা য়ারকখি অমসুং সেপ্তেম্বর ২০২০দা কোরোইদেল হেমানজ্যোমা নাবা অনাবা অমদা মসিগী লায়েংবগী থৌওং অসি শিজিন্নখি অমসুং মদুগী মহৈ অদু য়াম্না অপেনবা ওইখি।

নই-দিল্লীগী এমসকী দাঃ রাজেন্দ্র প্রসাদ সেন্তর ফোর ওপথালমিক সাইন্সকী প্রোফেসর অমসুং মকোক ওইরিবা দাঃ অতুল কুমারগী মতুং ইন্না এতোমিক ইনর্জী বিভাগকী খুত্থাংদা ভারত্তা শাবা বি.এ.আর.সি. প্লেক অসি অক্যুলার কেন্সরগী মতাংদা হৌজিক ফাওবদা শিজিন্নদুনা লাক্লি অমসুং মসিগী মনুংদগী অনিদি রেতিনোব্লাস্তোমা, অনিনা কোরোইদেল মেলানোমা, অনিনা ওক্যুলার সর্ফেস স্ক্বামস নিওপ্লাসিয়া (ও.এস.এস.এন.) অমসুং কেস অমনা কোরোইদেল হেমানজ্যোমানি। প্লেক শিজিন্নবগী থৌওং অসি সর্জনশিংনা শিজিন্নবদা য়াম্না নুংঙাইবা ওই অমসুং মসিগী মহৈশিং অসি য়াম্না পেন্নিংঙাই ওই হায়না মহাক্না ফোংদোকখি।

মাই-পাকপা অসিগী মতাংদা ৱাফম কয়া থম্বা ওইনা দাঃ জিতেন্দ্র সিংহনা হৌখিবা চহি ৫দগী এতোমিক ইনর্জীগী বিভাগনা মখোয়গী থবক-থৌরমশিং অসি মীয়ামগী কান্নবা পীনবা হায়দুনা তোঙান-তোঙানবা হীরমশিংদা শন্দোক্তুনা লাক্লি হায়খি। মহাক্না হায়খিবদা মিৎ কেন্সর নাবা মীওইশিংগী ওইনা অসিগুম্বা ইরমদম অসিদা শাজবা প্লেক ব্রেকীথেরাপী অমা পুথোকপা অসিসু মেদিকেল মেনেজমেন্তকী হীরমদা পাংথোকপা অসিগুম্বা খোঙথাং অমনি হায়খি। মসিগী লায়েংবগী থৌওং অসিনা অনাবশিংদা য়াম্না চম্বা অমসুং শেল-য়াম্না চঙদবা পাম্বৈ অমা পীরে হায়না মহাক্না হায়খি।

মসিগা লোয়ননা অসমগী গুৱাহাতিদা লৈবা বোরোৱা কেন্সর হোস্পিতালসু এতোমিক ইনর্জী বিভাগকী মখাদা চলায়বা মুম্বাইগী তাতা মেমোরিএল কেন্সর হোস্পিতালগা খুৎশম্ননা থবক তৌমিন্নবগী য়ানবসু লৈখ্রে হায়না মহাক্না ফোংদোকখি। অৱাং-নোংপোক লমদমগী খ্বাইদগী ইহান-হানবা ওনকোলোজী/কেন্সরগী দি.এম. অমসুং এম.সি.ঐচ. সুপর স্পেসিএলিতী কোর্স অসিসু ইন্সতিত্যুৎ অসিদা হৌদোকখ্রে হায়না মহাক্না মখা তানা হায়খি।

ভাভা এতোমিক রিসর্চ সেন্তর (বি.এ.আর.সি.)না সেক্যুরিতীগী মীওইশিংগীদমক্তা নোংমৈ মরু চঙদবা জেকেৎ শারিবা অমসুং লৌউ-শিংউবগী সেক্তরদা মনা-মশিং অমসুং উহৈশিংবু কুইনা লীদুনা থম্বা য়ানবগীদমক্তা রেদিএসন তেক্নিক শিজিন্নরিবা অসিগুম্বা হীরম কয়া অমদসু এতোমিক ইনর্জী বিভাগনা তেংবাংবগী খোঙথাং কয়া অমা পায়খৎলি।

<><><><><><>