তুরিজম অমসুং কলচরগী রাজ্য মন্ত্রী (আই./সি.) শ্রী প্রহলাদ সিংহ পতেলনা ঙসি নই-দিল্লীদা “হেরিতেজ অমা য়োকখৎসিঃ ঐখোয়গী হেরিতেজ, ঐখোয়গী শক্তাক” প্রোজেক্তকী হঙ্গৎনা য়েংশিনবগী মীফম পাংথোকখ্রে। তুরিজমগী সেক্রেতরী, শ্রী য়োগেন্দ্র ত্রিপাথী; তুরিজমগী দি.জি., মিস মিনাক্সী শর্মা; জে.এস. কলচর, মিস সঞ্জুক্তা মুদগল; তুরিজমগী এ.দি.জি., মিস রুপিন্দর ব্রার অমসুং ভারতকী আর্ক্যোলোজিকেল সর্ভেগী মীহুৎশিংসু মীফম অদুদা শরুক য়াখি।

তোঙান-তোঙানবা অরিবা নীংশিং-খুভম কয়াগী হৌজিক্কী ওইরিবা ফিভম অমসুং মসিগী মতাংদা পাংথোকপা থবকশিংগী অকুপ্পা প্রজেন্তেসন অমসু পীখি। শ্রী প্রহলাদ সিংহ পতেলনা মতম চানা প্রোজেক্ত লোইশিনবদা মিৎয়েং চঙলদুনা এম.ও.য়ু.গী মখাদা হৌদোকখিবা ৱারোল কয়াসু মরী লৈনবা নোদেল বিভাগশিংগা মতম-মতমগী ওইনা খন্ন-নৈনদুনা য়েংশিন্নবা ওফিসিএলশিংদা হায়খি।

শ্রী প্রহলাদনা অসুম্না হায়খিবদা ‘হেরিতেজ অমা য়োকখৎসি’ হায়রিবা থৌওং অসি নীংথিনা খন্ন-নৈনরবা তুংদা লৌখৎপা খোঙথাংনি অমসুং সি.এস.আর.গী কান্নবা লৌদুনা মসিগী প্রোজেক্ত অসিনা মমিং কয়া চত্তবা অরিবা নীংশিং-খুভমশিংবু লু-নান্না থম্বা, অফবা থক্নবা ঈশিং লৈহনবা, মৈঙাল অমসুং সাউন্দগুম্বা তঙাই ফদ্রবা পোৎলম কয়া পীবদা তেংবাংগনি হায়খি।

ভারত সরকারগী তুরিজম মন্ত্রালয়না তুরিজম মন্ত্রালয়, কলচর মন্ত্রালয়, আর্ক্যোলোজিকেল সর্ভে ওফ ইন্দিয়া অমসুং রাজ্য/য়ু.তি. সরকারশিংনা ভারতকী মফম খুদিংদা শন্দোক্তুনা লৈরিবা হেরিতেজ/নেচরেল/লমকোয়বগী মফমশিংবু লম-কোয়বশিংনা লাকপদা নুংঙাইহন্নবা হায়দুনা পুন্না পাংথোকমিন্নরিবা ‘হেরিতেজ অমা য়োকখৎসিঃ ঐখোয়গী হেরিতেজ, ঐখোয়গী শক্তাক’ প্রোজেক্ত অসি নীংথিনা থৌরাং য়াত্তুনা অমসুং তাঙ্কক নাইনা শেন্নদুনা চলায়রি। প্রোজেক্ত অসিনা পব্লিক সেক্তর অমসুং প্রাইভেৎ সেক্তরগী কম্পেনীশিং, ত্রস্ত, এন.জি.ও., লন্নাইগী মীওইশিং অমসুং অতোপ্পা স্তেকহোল্দরশিংবু “মোন্যুমেন্ত মিত্র” ওইনবা অমসুং সি.এস.আর.গী মখাদা লৈবা সস্তেনেবল ইনভেস্তমেন্ত মোদেলগী মতুং ইন্না মখোয়গী অপাম্বা অমসুং কান্নবগী মতুং ইন্না হায়রিবা লম কোয়বগী মফমশিং অসিদা লৈরিবা লম কোয়বশিংদা পীগদবা তঙাই ফদবা অমসুং খুমাং চাউশিনবা খুদোংচাবা কয়া শেমগৎপা অমসুং ফগৎহন্নবা থৌদাং লৌখৎনবা পুক্নিং থৌগৎলি। মখোয়না মফমশিং অসিবু চলাইবা অমসুং শেন্নবগী থৌওংশিংসু পাংথোক্কনি।

প্রোজেক্ত অসিগী মখাদা ভারত শিনবা থুংবদা লৈবা মফম ২৫ অমসুং তেক্নোলোজী শিজিন্নদুনা শেমগৎফম ২গীদমক্তা মোন্যুমেন্ত মিত্র ১২গা লোয়ননা মেমোরেন্দম ওফ অন্দরস্তেন্দিং (এম.ও.য়ু.) ২৭কী খুৎয়েক পীনখ্রবনি।

তঙাইফদবা পোৎলমশিংগী খুদোংচাবা পীবগী এম.ও.য়ু.গী মনুং চনবশিং অদুদা য়াওরিবশিং অদুদি দস্তবিন, মীয়ামগী নুংঙাইনবা শিনবা, অশেংবা থক্নবা ঈশিং ফংহনবা, মৈ-থানবা, চত্থোক-চৎশিন তৌবদা নুংঙাইহনবা, মফম অদুগী মওং-মতৌ ফজহনবা অমসুং লু-নালহনবা, ফম্ফম থম্বা, ফত্ত-হৌদি শেন্নবা, এপ্তা য়ুম্ফম ওইবা লোল য়াম্বা গাইদ, দিজি-কাইওস্ক অমসুং তিকেত্তিং কাইওস্ক খিনবা, মাইকৈ অমসুং অকুপ্পা মরোল তাকপা সাইনেজ অমসুং ৱাই-ফাইনি।

মসিগী মনুং চনবা হেন্না খুমাং চাউশিনবা খুদোংচাবশিং অদুদিঃ ভিজিতর ফেসিলিতী সেন্তর; মখোল অমসুং মৈঙালগী শো – ৩.দি. প্রোজেক্সন মেপ্পিং (মনুং অমসুং মপানগী); চাফম-থকফম অমসুং সৌভেনিয়রগী দুকান; ওগমেন্তেদ রিএলিতী এক্সপেরিএন্স অমসুং ভর্চুএল রিএলিতী (৩৬০^০ এক্সপেরিএন্স)নি।

******