মোদী সরকারনা লৌমীশিংগী য়াইফনবা মপুং ফানা কত্থোক্লি হায়না ফোঙদোক্লদুনা জল শক্তি, সোসিএল জস্তিস এন্দ কোর্পোরেসন এন্দ এম্পাৱরমেন্তগী রাজ্য মন্ত্রী শ্রী রত্তন লাল কতারিয়ানা হায়খি সরকারনা হৌজিক লৈরিবা অথিংবশিং অমসুং অরিবা অপনবশিং লৌথোক্তুনা লৌমীশিংগী ইনকম শরুক অনি হেনগৎহন্নবা পান্দম থমখিবা অদুগা ইরোইননা পার্লিয়ামেন্তনা লৌমীশিংগী অপুনবা শেন্মীৎলোনগী ফীভম ফগৎহন্নবা ফার্ম বিল অহুম পাস তৌখ্রে। ঙসি থোকখিবা ৱারোল অমদা শ্রী কতারিয়ানা হায়খি বিলশিং অসিনা অনৌবা হকশিং অমসুং লৌমীশিংদা খুদোংচাবশিং পীরগনি অমসুং মখা তানা মখোয়বু মতম শাংনা থৌনা হাপলগনি। মহাক্না হিরম অসিদা পোলিরিক্স তৌরিবা ওপোজিসন পার্তীশিংবু অকনবা মওংদা য়ানিংদবা ফোঙদোকখি অমদি মখোয়বু খুদোংচাবা মীওইশিংনি হায়না ফোঙদোকখি।

শ্রী কতারিয়ানা হায় প্রধান মন্ত্রী শ্রী নরেন্দ্র মোদীনা পি.এম. কিসান সম্মান নিধি য়োজনাগী মখাদা লৈবাক অসিদা লৈরিবা লৌমী করোর ৯কী বেঙ্ক একাউন্তশিংদা হকথেংননা লুপা করোর ১৮,০০০ ত্রান্সফর তৌদুনা অফবা লৈঙাক্কী নুমিৎ পাঙথোক্কনি। মহাক্না হায়খি পি.এম.না লৈখিদ্রবা ভারত রত্না ফংখিবা শ্রী অতল বিহারি বাজপয়ীগী মপোক কুমওন নুমিৎ ওইরিবা দিসেম্বর ২৫, লৈবাক শিনবা থুংনা অফবা লৈঙাক্কী নুমিৎ হায়না পাঙথোক্লিবা অসিগী নুমিৎ য়ুংবা পুং ১২দা লৌমীশিংদা ৱা ঙাংগনি। শ্রী কতারিয়ানা বাজপয়ী জিগা থবক তৌমিন্নখিবা হৌখ্রবা মতমশিং নীংশিংখি, মহাকপু লৌশিং লৈবা অমদি ভারতকী রাজনিতীদা খ্বাইদগী ৱাখল লৈবা লৈঙাকপা অমনি হায়খি।

লৌমীশিংদা অকিবা পোকহল্লিবা অমসুং এম.এস.পি. লেপ্পগী মতাংদা অরানবা পাউশিং শন্দোক্লিবা অসি অকনবা মওংদা য়ানিংদবা ফোঙদোক্লদুনা শ্রী কতারিয়ানা হায়খি সরকারনা লেপ্পা লৈতনা মহৈ মরোংশিং লৈশিনবগী মিনিমম সপ্পোর্ত প্রাইস অসি হেনগৎহনখি। ২০১৩-১৪গা চাংদম্নবদা ২০১৯-২০গী চহিদা কেন্দ্র সরকারনা এম.এস.পি. অসি শরুক ২.৫ হেনগৎহনখি। তশেংবদি, ২০১৮-১৮গী চহিদগী হৌদুনা পুথোক্লিবা মহৈ মরোংগী চংখিবা শেলগী শরুক ১.৫তা এম.এস.পি. ওইহন্নবা ৱারেপ অমা লৌখি।

শ্রী কতারিয়ানা হায়খি মোদী সরকারনা লৌমীশিংগী য়াইফনবা চোকথবা লৈতনা হোৎনদুনা লাকখি। অকুপ্পা মরোলশিং থম্লদুনা রাজ্য মন্ত্রীনা হায়খি মোদী সরকারনা লৌউ-শিংউগী সেক্তরগী বজেৎকী আউৎলে অসি ২০১৩-১৪দা লুপা করোর ২১,৯৩৩ ওইরম্বদগী শরুক ৬রোম হেনগৎহনদুনা ২০২০-২১দা লুপা করোর ১,৩৪,৩৯৯ ওইহনখি। পি.এম. কিসান সম্মান নিধি য়োজনাগী মখাদা লৈবাক অসিগী লৌমী করোর ১০.৫৯দা ঙসি ফাওবদা লুপা করোর ৯৫,৭৭৯ ত্রান্সফর তৌদুনা কান্নবা ফংহনখ্রে। ক্রোপ ইন্সুরেন্সকী মতাংদা ৱা ঙাংলদুনা মহাক্না হায়খি প্রধান মন্ত্রী ফসল বিমা য়োজনাগী মখাদা লৌমী করোর ৬.৬রোমদা কান্নবা ফংহনখ্রে। স্কীম অসিগী মখাদা শেনফম লুপা করোর ৮৭,০০০গী অপুনবা ক্লেম প্রোসেস তৌখ্রে।

এম.ও.এস.না মখা তারদুনা হায় মথক্তা হায়খ্রিবশিং অসিগী মথক্তা নীম কোতেদ য়ুরিয়া, সোইল হেল্থ কার্দশিং, পি.এম. ক্রিশি সিঞ্চাই য়োজনা, জিসান রেলস, এফ.পি.ও. ১০,০০০দা লুপা করোর লাখ ১ ফাওবগী ক্রেদিৎ ফংহন্নবা প্রোবিজন অসিগুম্বা লৌমীশিংগী য়াইফনবা থৌরাং, স্কীম অমসুং পোলিসী মশিং কয়া মোদী সরকারনা পাইখৎখি।

শ্রী কতারিয়ানা সরকার অসিনা লৌমীশিংগী য়াইফনবা থবক পাঙথোক্কনি হায়খিবা অদু নৌহৌনা ফোঙদোক্লদুনা লৌমীশিংদা “অন্নাদতাশিং” হায়না মখোয়বু কৌদুনা মখোয়দা ওপ্পোজিসন পার্তীশিংগী নুংগী ওইবা ৱাখল্লোন অদু উবা ঙম্নবা অপীল তৌখি। সরকার অসিনা মতম পুম্বদা লৌমীশিংগী য়াইফনবা তৌদুনা লাকখি অমসুং এক্ত ৩ অসিনসু মসিগা চপ মান্নবা পান্দম থম্লি। মহাক্না হায়খি সরকার অসিনা ফার্ম লোশিংদা খন্ন-ন্নৈনবা থোং হাংদুনা থম্লি অমসুং অন্নাদতাশিংগী সমস্যাশিং কোকহনগনি। শ্রী কতারিয়ানা অনৌবা চহি অসিনা ঐখোয়বু ঙাইরি লৌউ-শিংউগী সেক্তরদা মথৌ তাবা চাউখৎ থৌরাং পুরক্নবা অমসুং ঐখোয়গী অন্নাদতাশিংগী পুন্সিদা অওনবা পুরক্নবা হোৎনবা তাই হায়না ফোঙদোকখি।

*****