প্রধানমন্ত্রী শ্রী নৰেন্দ্র মোদীয়ে ভিয়েটনামৰ প্রধানমন্ত্রী শ্ৰীযুত নিগুয়েন জুৱান ফুকৰ সৈতে ভাৰ্চুৱেলী এক সন্মিলনত অংশগ্ৰহণ কৰে৷

দুয়োগৰাকী প্রধানমন্ত্রীয়ে বিভিন্ন দ্বিপাক্ষিক সহযোগিতাৰ প্ৰচেষ্টাৰ সন্দৰ্ভত পর্যালোচনা কৰে৷ নেতা দুগৰাকীয়ে আঞ্চলিক আৰু আন্তঃৰাষ্ট্ৰীয় বিভিন্ন বিষয়ক লৈও আলোচনা কৰে৷ ভাৰত-ভিয়েটনাম সৰ্বাংগীণ কৌশলগত অংশীদাৰিত্বক আগুৱাই নিয়াৰ বাবে সন্মিলনত এক 'শান্তি, সমৃদ্ধি আৰু জনসাধাৰণৰ বাবে যুটীয়া প্রস্তাৱ’ গ্রহণ কৰা হয়৷ যৌথ প্রস্তাৱ ৰূপায়ণৰ লক্ষ্যৰে ২০২১ৰ পৰা ২০২৩ চনৰ মাজত কর্মপৰিকল্পনাৰ বিষয়ত চুক্তি স্বাক্ষৰ কৰা হৈছে৷

সকলো ক্ষেত্রত দ্বিপাক্ষিক সহযোগিতা বৃদ্ধিৰ ক্ষেত্ৰত গুৰুত্বক লৈ দুয়োগৰাকী নেতা ঐক্যমতত উপনীত হৈছে৷ ইখন দেশে সিখনৰ ৰাষ্ট্ৰীয় উন্নয়নৰ ক্ষেত্রত গুৰুত্বপূর্ণ বিষয়সমূহত সহায় কৰা আৰু ভাৰত-প্রশান্ত মহাসাগৰীয় অঞ্চলত শান্তিপূর্ণ, সুস্থিতি, নিৰাপদ, মুক্ত, সমন্বিত আৰু আইনৰ শাসন মানি অভিন্ন লক্ষ্যত উপনীত হোৱাৰ বাবে একেলগে কাম কৰাৰ সিদ্ধান্ত লৈছে।

তেওঁলোকে ক’ভিড-১৯ মহামাৰীকে ধৰি অভিন্ন আন্তঃৰাষ্ট্ৰীয় বিভিন্ন প্ৰত্যাহ্বান মোকাবিলা কৰাত পাৰস্পৰিক সহযোগিতা বৃদ্ধিৰ ওপৰত নিজৰ প্ৰতিশ্ৰুতি ব্যক্ত কৰে। মহামাৰীৰ বিৰুদ্ধে টিকা উদ্ভাৱনত সক্রিয় সহযোগিতা বজাই ৰখাৰ লগতে বিভিন্ন আন্তঃৰাষ্ট্ৰীয় আৰু আঞ্চলিক ক্ষেত্রত অভিন্ন চিন্তাধাৰাৰ কাৰণে দুয়োগৰাকী নেতাই সিদ্ধান্ত লয়৷ ভাৰত আৰু ভিয়েটনামে ৰাষ্ট্রসংঘৰ নিৰাপত্তা পৰিষদকে ধৰি বিভিন্ন বহুস্তৰীয় ফ’ৰামত ঘনিষ্ঠভাৱে কাম কৰাৰ সহমত প্ৰকাশ কৰে৷ ২০২১ চনত ৰাষ্ট্রসংঘৰ নিৰাপত্তা পৰিষদত ভাৰত আৰু ভিয়েটনামে যুটীয়াভাৱে কাম কৰিব৷

ভাৰতৰ ভাৰত-প্রশান্ত মহাসাগৰীয় উদ্যোগ আৰু আছিয়ান গোটৰ আউটলুক অন ইণ্ডো-পেচিফিকৰ চিন্তাধাৰাৰ প্ৰতি সাদৃশ্য থকাৰ বাবে দুয়োগৰাকী প্রধানমন্ত্রীয়ে সামুদ্রিক ক্ষেত্রত নতুন আৰু বাস্তৱসম্মত সহযোগিতাক আৰু অধিক আগুৱাই নিয়াৰ পোষকতা কৰে৷

তাৎক্ষণিক প্ৰভাৱিত প্ৰকল্প, আইটিইচি, ই-আইটিইচি, পিএইচডি ফেল’শ্বিপৰ দৰে বিভিন্ন উদ্যোগৰ জৰিয়তে ভাৰত ভিয়েটনামৰ উন্নয়ন আৰু দক্ষতা বৃদ্ধিৰ প্ৰতি প্ৰতিশ্ৰুতিবদ্ধ। ইয়াৰ জৰিয়তে ভিয়েটনামৰ বহনক্ষণ উন্নয়ন লক্ষ্য, ডিজিটেল যোগাযোগ ব্যৱস্থা আৰু ঐতিহ্য সংৰক্ষণৰ দৰে প্রকল্পসমূহত সহায় কৰা হ’ব৷

ভাৰত চৰকাৰে ভিয়েটনামক ১০ কোটি মার্কিন ডলাৰৰ প্রতিৰক্ষা ক্ষেত্রত অনুদান প্রকল্পটো সফলতাৰে ৰূপায়িত কৰাত দুয়োগৰাকী প্রধানমন্ত্রীয়ে সন্তোষ প্রকাশ কৰে। তদুপৰি, ভিয়েটনামৰ নিম থুয়ান প্রদেশত ভাৰতৰ সহায়ত সাতটা উন্নয়ন প্রকল্পৰ কাম সম্পূৰ্ণ হৈছে।

প্রধানমন্ত্রীয়ে ভিয়েটনামৰ মাই চন মন্দিৰ চৌহদত ভাৰতীয় প্রত্নতাত্ত্বিক সর্বেক্ষণৰ সংৰক্ষণমূলক কামৰ বিষয়ত বিশেষভাৱে সন্তোষ প্রকাশ কৰে। ভাৰতীয় প্রত্নতাত্ত্বিক সর্বেক্ষণে ভিয়েটনামত এই ধৰণৰ আৰু অধিক প্রকল্পত কাম কৰিবলৈ আগ্রহ প্রকাশ কৰিছে।

***

DS/SH/DB