গুজরাতকী মুখ্যমন্ত্রী শ্রী বিজয় রুপানীজী, উপমুখ্যমন্ত্রী শ্রী নিতিন পতেলজী, গুজরাত সরকারগী মন্ত্রীশিং, এম.পি.শিং, অমসুং ঐগী নুংশিজরবা ইচিল-ইনাওশিং, কচ্ছগী মীয়াম কমদৌবীরিবগে? কোরোনাগী মথক্তা নিংথমথাসু লাক্লে। অদুনা অদোম চেকশিন্না লৈবীয়ু। ঐনা ঙসি কচ্ছদা লাকচবা অসিদা য়াম্না নুংঙাইবা পোকচরি মরমদি কচ্ছ অসি মতম পুম্নমক্তা ঐগী থমোইদা লৈরি অমসুং অনিশুবদা, ঙসি কচ্ছদা অতোপ্পা থৱান মিচাক অমগা থোক্লি অমসুং মসি শুপ্নগী গুজরাত খক্তদা নত্তনা লৈবক অসিদা মমিং চৎলি।

মরূপশিং,

ঙসি গুজরাত অমসুং লৈবাক অসিগী অফাওবা মপারী, সরদার বল্লভ ভাই পতেলজীগী লৈখিদবা নুমিৎনি। ইমা নর্মদাগী ঈশিংনা গুজরাতকী শক্তম হোংদোক্নবগীদমক মঙলান মঙবীরম্বা সরদার সাহেবকী মঙলান খোংজেল য়াংনা মপুং ফারক্লি। কেবরিয়াদা মহাক্কী মালেমগী খ্বাইদগী ৱাংবা মীতমনা, ঐখোয়বু অহিং-নুংথিল অমত্তা ওইনা লৈবাক্কীদমক থবক তৌনবা ইথিল পীনবীরি। সরদার সাহেবপু নীংশিংজদুনা ঐখোয়না মতৌ অসুম্না লৈবাক্কী অমসুং গুজরাতকী মিংচৎ হেনগৎহন্দুনা লৈগনি।

মরূপশিং,

ঙসি কচ্ছদসু অনৌবা ইনর্জী মরাং কায়না লৈরে। খনবীয়ু, ঐখোয়গী কচ্ছদা, মালেমগী খ্বাইদগী চাউবা হাইব্রিদ রেন্যুএবল ইনর্জী পার্ক। অমসুং মসি কয়াদা চাউরিবা? সিঙ্গাপুর লৈবাক্না চাউবগুম, বহরীন্না চাউবগুম, চাউরাক্না অদুক য়াম্না চাউবা মফমদা কচ্ছগী রেন্যুএবল ইনর্জী পার্ক অসি শেমগদৌরি। হৌজিক অদোম্না খঙবীরম্লগনি মদুদি কয়াদা চাউনা পায়খৎকদৌরিবনো হায়বসে। হেক্তর লিশিং ৭০, হায়বদি ভারতকী অচৌ অচৌবা শহরশিংদগীসু হেন্না চাউরবা কচ্ছগী রেন্যুএবল পার্কনি। মসি তাবদা, ৱাহৈ অসি নাকোংনা তাবদা কয়াদা নুংঙাইবা পোক্লিবা! খল্লি মদুদি কচ্ছগী মীয়ামগী পুক্নীং কয়াদা চাউথোকচরমগদবা!

মরূপশিং,

ঙসি কচ্ছনা ন্যু এজ তেক্নোলোজী অমসুং ন্যু এজ ইকোনোমী, মায়কৈ অনিমক্তা য়াম্না চাউবা খোংথাং থাংজিল্লি। খাবরাদা রেন্যুএবল ইনর্জী পার্কপু ওইরো, মান্দবীদা দি-সোলিনেশন প্লান্তবু ওইরো, অমসুং অঞ্জারদা সরহদ দাইরীগী অনৌবা ওতোমেতিক প্লান্তকী উরেপ-উয়ুং তম্ববু ওইরো, অহুম্মক কচ্ছগী চাউখৎ-খোংথাংদা অনৌবা তাঙ্কক অমা ইগদৌরিবনি। অমসুং মসিগী য়াম্না চাউবা কান্নবা মফম অসিগী ঐগী লৌমী ইচিল-ইনাওশিংনা, শা-শন য়োকপশিংনা, মফম অসিগী মীচম মীয়াম্না অমসুং মরুওইনা ঐখোয়গী ইমা ইচে-ইচলশিংনা ফংগদৌরিবনি।

মরূপশিং,

ঐনা কচ্ছগী চাউখৎ-থৌরাংগী ৱাফম পল্লকপদা পুক্নীংদা অরিবা ৱাফম কয়া শক্তম কয়া অমুক্তদা নীংশিংলকই। মতম অমদা হায়নরম্মি কচ্ছ য়াম্না লাপ্পি, চাউখৎপগী মমি ফাওবা তাদে, কনেক্তিবিতী লৈতে। মৈ-ঈশিং-লম্বী, মসি শিংনবগী অতোপ্পা মমিং অমা ওইরম্মি। সরকারদসু অসুমনা হায়নরম্মি। মদুদি করিগুম্বা কনাগুম্ববু পনিশমেন্ত পোস্তিং পীবা তারবদি কচ্ছদা থাও অমসুং ময়াম্নসু হায়নরম্মি কলা পানীগী চৈরাক ফংলে। ঙসি ফিভম অসি অসুম্না ওইরে মদুদি মীয়াম্না মতম খরা কচ্ছদা থবক তৌবগী মতম ফংলবদি হায়না ৱানোম্নরে। মীওই খরদি মসিসু হায়নখি মদুদি লমদম অসোমদা চাউখৎপা পুরকপা ওইথোক্তবনি। অসিগুম্বা ফিভম অদুদা কচ্ছদা য়ুহা হাবগী অৱাবা থৌদোকসু থোকখি। খরা লেমহৌ-খোৎলৌবদুসু য়ুহানা পুম্নমক মাংহনখি। অদুবু অমরোমদা ইমা আশাপুরা দেবী অমসুং কোতেশ্বর মহাদেবগী থৌজাল, অদুগা অমরোমদা কচ্ছগী ঐগী থৌনা ফরবা মীয়ামগী অখাং কনবা, মখোয়গী শুবা কনবা, মখোয়গী লিংজেল। শুপ্নগী চহি খরগী মনুংদা কনাননসু খনবা ফাওবা ঙমলুদবা অদু মফম অসিগী মীয়াম্না তৌদুনা উৎখি। কচ্ছগী মীয়াম্না নীংবা কাইববু আশাদা ওন্থোকখি। ঐনা খঞ্জৈ, মসি ইমা আশাপুরা দেবীগী থৌজালনি। মফম অসিদা নীংবা কাইবগী মমিং য়াওদে, আশাগী আশা ঙাক্তনি। য়ুহানা মখোয়গী ময়ুম নীংখাইহনখ্রবসু, অদুক য়াওখ্রবা য়ুহা অদুনা কচ্ছগী মীয়ামগী পুক্নীংগী পাঙ্গলদি নীংখাইহনবা ঙমখিদে। কচ্ছ্গী ঐগী ইচিল-ইনাওশিং অমুক হন্না হৌগৎখি। অমসুং ঙসি য়েংবীয়ু, লমদম অসিবু মখোয়না কদাইদগী কদাইদা য়ৌহনখ্রবনো। 

মরূপশিং,

ঙসি কচ্ছগী শক্তাক হোংদোক্লে, ঙসি কচ্ছগী মিংচৎ হেন্না খোংজেল য়াংনা হেনগৎলক্লি। ঙসি কচ্ছ লৈবাক অসিগী খোংজেল য়াংনা চাউখৎলক্লিবা লমদমশিংগী মনুংদা মরুওইবা মফম অমা ওইরে। মফম অসিগী কনেক্তিবিতী নোংম-নোংমগী ফগৎলক্লি। ঙমখৈগী লমদম অসিদা লেপ্তনা য়ুম হোংখিবা, অমসুং অহানবদদি মী মশিং অদু য়েংবীয়ু, মাইনস গ্রোথ ওইরম্মি। অতৈ মফমদা মী মশিং হেনগৎলম্মি মফম অসিদা হন্থরম্মি মরমদি মীয়াম্না চৎনখি অমসুং অনম্বনা ঙমখৈগী মফশিং অসিদগী মীয়াম্না চৎনখি, অমসুং মসিনা মরম ঙাক-শেলদসু অৱাবা মায়োক্নবা অসি হৌনশানি। হৌজিক চৎখিবা থিংখিবদগী, হাংলম্বা খুঙ্গং অদুদা লৈনবগীদমক মী লাক্নবা হৌরে। মসিগী য়াম্না চাউবা কান্নবা শাফু অসি লৈবাক্কী ঙাক-শেলদসু পীরি।

মরূপশিং,

মতম অমদা ইচিক চিক্না লৈরম্বা কচ্ছ অদু লৈবাক অমসুং মালেমগী লমকোইফমগী মরুওইবা মফম ওইররে। কোরোনানা অৱাববুদি মায়োক্নহল্লি অদুবু কচ্ছগী অঙৌবা রন, কচ্ছগী রন কুম্মৈ মালেম অপুনবা অসিগী পু্ক্নীং চিংশিল্লি। চাংচৎতা লমকোইবা লাখ ৪দগী ৫ রন-কুম্মৈগী মনুংদা মফম অসিদা লাকই, অঙৌবা লৈঙোই লম অমসুং হিগোক মচুগী অতিয়াগী নুংঙাইবা লৌরৈ। মতৌ অসুম্না মশিং য়াম্না নাৎকী ওইবা থৌরমশিং, কচ্ছগী মফম অসিগী পোৎলমসিংগী অদুক্কী মশিং য়াম্না য়োনবা, মফম অসিগী চান-থক্নবা পোৎলমশিং পাম্নবা, মতম অমদা কনানা খনবা ঙম্লম্বগে অসুম্না তৌরক্কনি হায়বা। ঙসি ঐ থাইনগী খঙন-চান্নবা অমগা ৱারী ৱাতাই শান্নজনবগী তাঞ্জা ফংজখি। অদুনা অসুম তমজবনি। হায়খি হৌজিক্তি ঐখোয়গী অঙাংশিং ইংলিস ঙাংবা হৈরে। ঐনা হংখি করম্না, হায়রকখি হৌজিক্তি ঐখোয় হোম স্তে তৌরে। ঐখোয়গী য়ুমদা হোম স্তেগীদমক্তা মী লৈবা লাকপদগী ঐখোয়গী অঙাংশিংসু অসুম ঙাংনবদগী য়াম্না হৈরে। কচ্ছনা লৈবাক অপুনবা অসিদা তম্বীরে মদুদি ইশাগী পাম্বৈতনা, ইশাগী তৌবা ঙম্বা অদুদা থাজবা থমদুনা মতৌ করম্না আত্মনির্ভরতাগী মায়কৈদা চংশিনবা ঙম্বগে হায়বদু। ঐনা মালেমগী দিবেলপমেন্ত এক্সপর্তশিং, য়ুনিভর্সিতীশিংগী রিসর্স তৌবশিংগা মরী লৈনবা মীওইশিংদা হায়জরি মদুদি য়ুহা হাখ্রবা মতুংদা মতৌ অসুম্না কচ্ছনা মায়কৈ মরিমক্তা চাউকৎপা পুরক্লিবা অসি, ঐনা খল্লি মসি কেস স্তদী তৌফম থোকই, রিসর্স তৌফম থোকই অমসুং মসি মতৌ করম্না মোদেলগী থবক তৌরিবনো। অদুক্কী মতিক চাউখ্রবা য়ুহা হাখিবগী চহি তরাগী খুজিং অনিগী মনুংদা অসুক্কী মতিক চাউখৎ-থৌরাং মফম খুদিংদা মদুসু অনম্বা মফম লৈঙোই লম ঙাক্তা ওইরিবা। মসি নৈননীংঙাইগী মশক্নি।

মরূপশিং,

মতম অমদা গুজরাতকী মীয়াম্না তাল্লম্মি মদুদি য়ামদ্রবদা নুমিদাংগী মতমদা চাবদা ঙৈহাক্তি মৈ ঙালহনবীবা। ঙসি গুজরাত, লৈবাক অসিগী অদুগুম্বা রাজ্যশিং অদুগী মনুংদা অমা ওইরে মদুদি খুঙ্গং ওইরো শহর ওইরো, পুং ২৪ মৈ ফংলে। ঙসি চহি ২০গী নহা অমনা হান্না করি ফভম ওইরম্বগে হায়বদু খঙলরোই। মখোয়দি কয়াদা চাউনা অহোংবা পুরক্লবনো হায়বসি খঙলরোই। অহোংবা অসি গুজরাতকী মীয়ামগী চোকথবা নাইদনা হোৎনখিবশিং অদুনা ওইথোকপা ঙমলিবনি। হৌজিক্তি লৌমীশিংগীদমক্তা কিসান সুর্য়োদয় য়োজনাগী মখাদা, তোঙান্না নেতৱর্ক অপুনবসু শেম-শারি। লৌমীশিংদা নুমিদাংদা ইথৈ-লৌখোংগী অৱাবা লৈতনবগীদমক অখন্ননা লাইন তিংলি। 

ইচিল-ইনাওশিং,

গুজরাত অসি সোলর ইনর্জীদা মিৎয়েং থমদুনা পোলিসীশিং শেম্বা অমসুং ৱারেপ লৌখিবা লৈবাক অসিগী অহানবা রাজ্যনি। ঐখোয়না কেনেল ফাওবদা সোলর পেনেলশিং থমখি মসিগী মতাংদা মীরমদফাও শোন্নরি। ঐ নীংশিংলি মদুদি গুজরাতনা সোলর পাৱরদা শাফু পীবা হৌরকপা মতমদা ৱাফম অসিসু থোরকখি মদুদি অসুক তাংবা ইলেক্ত্রিক্না করি তৌনগদৌরিবনো? মরমদি গুজরাতনা অসুক চাউখ্রবা খোংথাং থাজিল্লকপা মতমদা সোলর পাৱরদগী ফংবা মৈ অদু য়ুনিৎ অমদা লুপা ১৬ নত্ত্রগা ১৭তা ফংবগী ৱাফম্নি। অদুবু তুংলমচৎকী ওইথোকপশিং অদু য়েংলদুনা গুজরাতনা মসিদা থবক তৌবা হৌখি। ঙসি মদুদী মৈ অদুমক গুজরাত খক্তদা নত্তনা লৈবাক অপুনবা অসিদা য়ুনিৎ অমদা লুপা ২, লুপা ৩দা য়োল্লি। গুজরাতনা মতম অদুদা তৌখিবা থবক অদু, মতমদুগী থৌরাং অদুনা ঙসি লৈবাক অসিদা মায়কৈ তাক্লরি। ঙসি ভারত রেন্যুএবল ইনর্জীগী পোৎথোক্কী মতাংদা মালেমগী মরিশুবা পাৱর ওইরে। হিন্দুস্তানী পুম্নমক্না চাউথোকচগনি মরূপশা, হৌখিবা চহি ৬ অসিদা ঐখোয়গী সোলর ইনর্জী, মসিগী ঐখোয়গী কেপাসিতী শরুক ১৬ হেনগৎখ্রে। হন্দক্তা ক্লীন ইনর্জী ইনভেস্তমেন্ত রেঙ্কিং অমা লাক্লে। মসিগী ক্লীন ইনর্জী ইনভেস্তমেন্ত রেঙ্কিং অসিদা লৈবাক ১০৪ য়েংশিনখি অমসুং মদুগী ফল ওইনা মালেমগী লৈবাক ১০৪গী মনুংদা অহানবগী অহুমদা ভারতনা মফম ফংলে। ক্লাইমেৎ চেঞ্জগী মায়োক্তা চংশিল্লিবা লানফমদা হৌজিক ভারত, মালেম পুম্ববু মায়কৈ তাক্লি, লুচিংলি।

মরূপশিং,

২১শুবা চহি চাগী ভারতকীদমক্তা ইনর্জী সেক্যুরিতী মথৌ তারিবা অসিগুম্না, ৱাতর সেক্যুরিতীসু মরুওইরি অমসুং অহৌবদগী ঐগী কমিৎমেন্ত ওইদুনা লাক্লি মদুদি ঈশিং ৱাৎপনা মরম ওইদুনা মীয়ামগী চাউখৎপা থিন্থহল্লোইদবনি অমসুং করিগুম্বা মফম অমত্তগী চাউখৎ-থৌরাং লেপহল্লোইদবনি। ঈশিংগী মতাংদা গুজরাতনা তৌরিবা থবকশিং অসি, ঙসি লৈবাক অসিগীদমক লম্বী তাকপা ওইরে। মতম অমদা কচ্ছদা ইমা নর্মদাগী ঈশিং য়ৌহন্নবা হায়নরকপা মতমদা, মীওই খরনা নোক্নখি। মখোয়না মসি হায়খি, মসিদি রাজনীতিগী ৱাহৈনি, করিসু ওইথোকপা য়ারোই। করি-কিরগুম্বদা মীয়াম্না হায়নৈ কিলোমীতর ৬০০-৭০০ লাপ্পা ইমা নর্মদাগী মফম অদুদগী মফম অসিদা ঈশিং কমদৌনা য়ৌরকপা ঙমগনি। মসি কৈদৌঙৈদসু ওইরোই। ঙসি কচ্ছদা নর্মদাগী ঈশিংসু য়ৌরে অমসুং ইমা নর্মদাগী থৌজালসু ফংলি। কচ্ছগী লৌমী নত্ত্রগা ঙমখৈদা লেপ্লিবা জৱান, অনিমক্কী মীওইশিংগী ঈশিংগী অৱাবা কোক্লে। ঐনা মফম অসিগী মীয়ামগী থাজবা অদুবু থাগৎপা ফোংদোকচরি মখোয়না ৱাতর কঞ্জর্বেসনবু মীয়ামগী খোংজং অমা ওইনা হোংদোকখি। খুঙ্গং-খুঙ্গংশিংদা মীয়াম্না চোংথোরকখি, ঈশিংগী কমিতীশিং শেমখি, নুপীশিংনসু খোংজং চংশিনখি, চেক দামশিং শেমখি, ঈশিংগী তেঙ্কীশিং শেমখি, খোংলমশিং তৌবদা মতেং পাংখি। ঐনা নুমিৎ অদু খক কাউবা ঙম্লরোই, নর্মদাগী ঈশিং মফম অসিদা য়ৌখিবা, নুমিৎ অদু ঐ তশেংনা নীংশিংলি, নুমিৎ অদুদা ইমা নর্মদাগী ঈশিং য়ৌখিবদা, কচ্ছগী মীয়ামগী মিৎলুদা নুংঙাইবগী পীরাং শিন্থখি। শক্তম অদু ঐনা উখি। ঈশিং অসি করিনো, মসি কচ্ছগী মীয়াম্না খঙলিবা অসিগুম্না কনানসু খঙলম্লোই। গুজরাত্তা ঈশিংগীদমক্তা শেম্লিবা অখন্নবা গ্রিদ শেমলিবা, খোংলমশিং তৌখিবা অসিগী কান্নবা হৌজিক মীওই করোর কয়ানা ফংলি। মফম অসিগী মীয়ামগী হোৎনবা অসি, লৈবাক্কী থাক্তা জল দীবন মিশনগীসু য়ুম্ফম অমা ওইরি। লৈবাক অসিদা য়ুমথোং খুদিংদা পাইপতগী ঈশিং য়ৌহন্নবগী খোংজং খোংজেল য়াংনা চৎথরি। শুপ্নগী থা ১৫ খক্কী মনুংদা খোংজং অসিগী মখাদা চাউরাক্না য়ুম করোর ৩লোমদা ঈশিংগী পাইপ য়ৌহনখ্রে। গুজরাত্তসু য়ুম চাদা ৮০রোমদা পাইপ্তা ঈশিংগী খুদোংচাবা য়ৌখ্রে। ঐঙোন্দা তমবীখি মদুদি লাক্কদৌরিবা মতম খরগী মনুংদা গুজরাতকী দিস্ত্রিক্ত খুদিংমক্তা পাইপ্তগী ঈশিংগী খুদোংচাবা ফংলগনি।

ইচিল-ইনাওশিং,

ঈশিং য়ুমথোং খুদিংদা য়ৌহনবগা লোইননা ঈশিংগী অনৌবা হৌরকফম শেম্বসু য়াম্না মরুওই। পান্দম অসিগা লোইননা সমুদ্রগী থুমহি চেনবা ঈশিংবু শেংদোক্তুনা শিজিন্ননবগী পাক-চাউরবা স্কিমদসু থবক পায়খৎলি। মান্দবীদা শেম-শারিবা দিজেলিনেসন প্লান্ত, নর্মদা গ্রিদ, সৌনী নেতৱর্ক অমসুং বেস্ত ৱাতর ত্রীৎমেন্তগুম্বা হোৎনরিবশিং অসি হেন্না চাউথোকহনগনি। ঈশিং শেংদোকপগী প্লান্ত অসি হেক লোইবগা মসিদগী মান্দবীদা নত্তনা মুন্দ্রা, নখাতরানা, লখপত অমসুং অবদাসাগী ইমুং লাখ কয়ানা কান্নবা ফংলগনি। প্লান্ত অসিদগী লমদম অসিগী চাউরাক্না মীওই লাখ ৮লোমদা নুংতিগী পুন্না অশেংবা ঈশিং লীতর করোর ১০ সপ্লাই তৌবা ঙম্লগনি। কান্নবা অমনা কিলোমীতর কয়া লাপ্পা মফমদগী লাক্লিবা নরমদাগী ঈশিং অসিসু ঐখোয়না নীংশিজনা শিজিন্নবা ঙম্লগনি। ঈশিং অসি কচ্ছগী অতৈ তালুকা, খুদম ওইনা রাপর, ভচাউ, গান্ধীনগর অমসুং অঞ্জারদসু ফংলগনি।

মরূপশিং,

অসিগুম্বা মখলগী প্রোজেক্তশিং দহেজ, দ্বারকা, ঘোঘা ভাবনগর অমসুং গীর সোমনাথতসু য়াম্না থুনা পায়খৎলগনি। ঐনা থাজবা তমলি মদুদি মন্দবী প্লান্তনা সমুদ্র মপান্দা লৈরিবা রাজ্যশিংদা ইথিল পীগনি অমসুং পুক্নীং থৌগৎকনি।

ইচিল-ইনাওশিং,

মতম অমসুং মথৌ তাবগা লোইননা অহোংবা পুরকপা, মসি কচ্ছগী, গুকাতকী পাঙ্গলনি। ঙসি গুজরাতকী লৌমী, মফম অসিগী শা-শন য়োকপা, মফম অসিগী ঐখোয়গী ঙা য়োকপা মরূপশিং, হান্নদগী হেন্না ফবা ফিভমদা লৈরে। মসিগী মরম মসিসু অমনি মদুদি মফম অসিগী লৌউ পথাপ্তা অনৌবা মওংগা পুনশিনখি, লৌরোক্কী মখল-মখাদা ফোকস থমখি। কচ্ছ য়াওনা গুজরাত্তা লৌমীশিংনা দিমান্দ য়াম্বা অমসুং মমল ৱাংবা মহৈ-মরোংশিংগী মায়কৈদা ওনশিনখিরম্মি অমসুং ঙসি মসি মাংজিল থারি। হৌজিক মসি ঐখোয়গী কচ্ছদা য়েংবীয়ু, মফম অসিগী লৌউ-শিংউগী পোৎথোকশিং মীরমদা এক্সপোর্ত তৌগনি হায়বা, কনানা করিগুম্বদা খল্লুবরা, ঙসি ওইথোক্লরে মসিগী খজুর, মসিগী কমলম অমসুং দেগ্রোন ফ্রুইৎকুম্বা পোৎথোকশিং নম্না থানরে। শুপ্নগী চহি তরাগী খুজিং তঙ্কাই অমরোমসিদা গুজরাত্তা লৌউ-শিংউগী পোৎথোক্তা শরুক অমা মখাইদগী হেন্না হেনগৎখ্রে।  

ইচিল-ইনাওশিং,

গুজরাত্তা লৌউ-শিংউগী লমদা মপাঙ্গল কনবগী অতোপ্পা মরম অমদি মফম অসিদা অতৈ ইন্দস্ত্রীশিংগুম্না লৌউ-শিংউগা মরী লৈনবা বিজিনেসতসু সরকারনা খুৎ থিংজিন্দে। সরকারনা খুৎ থিংজিনবা অসি য়াম্না অকক্নবা মওংদা তৌরি, মনীং তম্না থাদোক্লি। ঙসি ঐখোয়না উরি মদুদি দাইরী অমসুং ফিশরীজ মসিগা মরী লৈনবা সেক্তর অনি অসি লৈবাক অসিদা খোংজেল য়াংনা চাউখৎলক্লি। মীওই খরখক্তনা মসিগী স্তদী তৌই, মীওই খরখক্তনা মসিগী মরমদা ই। গুজরাত্তসু শঙ্গোমদা য়ুম্ফম ওইবা ইন্দস্ত্রশিংগী মতাংদা পাক-চাউনা শন্দোক্লিবা অসিগী মরমদি সরকারগী মায়কৈদগী অথিংবা খজিক্তমক ওইবননি। সরকারনা মথৌ তাবা ফেসিলিতী খরতমক ফংহল্লি, অতৈ থবকশিংদি কো-ওপরেতিবশিংগী সেক্তরনা তৌবা নত্ত্রগা ঐখোয়গী লৌমী ইচিল-ইনাওশিংনা তৌই। ঙসি অঞ্জারগী সরহদ দাইরী অসিসু মসিগী অচৌবা খুদম অমনি। ঐনা নীংশিংলি মদুদি কচ্ছদা দাইরী লৈহনগদবনি হায়বসিগী মতাংদা অহানবদা হৌদোক্লুবদা পুম্নমক্না ওইরোইদবা মওংদা ফোংদোক্নখি। ঐনা হায়খি পীক্লবসু পীক্না হৌসি। করি ওইবগে য়েংসি, অপীকপা থবক মচা অদুনা ঙসি কদাইদা য়ৌখ্রবনো য়েংবীয়ু। দায়রী অসিনা কচ্ছগী শা-শন য়োকপশিংগী পুন্সি হোংদোকপদা য়াম্না চাউনা থৌদাং য়ারি। চহি খরগী মমাং ফাওবদা কচ্ছদগী অমসুং মদুসু খজিক্তং ওইনা শঙ্গোম প্রোসেসিং তৌনবগীদমক গান্ধীনগরগী দাইরীদা পুনরম্মি। অদুবু প্রোসেসিং অদু অঞ্জারগী দাইরী প্লান্ততা তৌরি। মসিদগী নুংতিগী ত্রান্সপোর্তেসন মক্তদা লৌমীশিংগী লুপ লাখ কয়া কল্লি। হৌজিক সরহদ দাইরীগী ওতোমেতিক প্লান্তকী মপাঙ্গল অমুক্কা হেনগৎহনগদৌরি। লৈক্কদৌরিবা নুমিৎ খরনি অসিদা মফম অসিগী দাইরী প্লান্ত অসিনা নুমিৎ খুদিংগী শঙ্গোম লীতর লাখ ২দগী হেন্না প্রোসেসিং তৌগনি। মসিগী অকোইবগী জিলাশিংগী শা-শন য়োকশিংনা চাউনা কান্নবা ফংলগনি। মসিদা নত্তনা, অনৌবা প্লান্ত অসিদা দহী, বতর মিল্ক, লস্সী মকখন, খোৱাগুম্বা শঙ্গোমগী প্রদক্ত কয়ামরুমগী ভেল্যু এদিশনসু তৌবা য়ারগনি।

মরূপশিং,

দাইরী সেক্তরদা কান্নবা ফংলিবা শা-শন য়োকপশিং অসিগী মনুংদা অনম্বনা অপীকপা লৌমীশিংনি। কনাগুম্বগী মফমদা শা ৩-৪, কনাগুম্বগী ৫-৭, অমসুং চাউরাক্না অসিগুম্বা ফিভম অসি লৈবাক অপুনবা অসিদা ওইরি। কচ্ছগী বন্নী ইরোই অসিনা মালেমদা মাগী মিংচৎ তাল্লি। কচ্ছগী শাবগী চাং ৪৫ দিগ্রী য়ৌজরবসু নত্ত্রগা ইংবগী চাং জিরোগী মখা ওইজরবসু, বন্নী ইরোইনা পুম্নমক খাংলি অমসুং য়াম্না নুংঙাইনা লৈরি। মখোয় ঈশিংসু খজিক্তমক পাম্মি অমসুং শজিকসু লাপ্না চৎতুনা চারুবদা বন্নীগী ইরোইদা অৱাবা অমত্তা লৈতে। নোংমদা ইরোই অসিনা চাংচৎতা শঙ্গোম লীতর ১৫ থোকই অমসুং মসিদগী চহিগী লুপা লাখ ২দগী ৩ ফাওবা তানবা ঙম্মি। ঐঙোন্দা তমখি মদুদি হন্দক্তা বন্নী ইরোই অমা লুপা লাখ ৫দগী হেনবা মমলদা য়োনখি। লৈবাক অসিগী অতৈ মীয়াম্না তারগদি অঙকপা পোক্কনি, বন্নীগী ইরোই লুপা লাখ ৫দা, হায়বদি কার মচা অনি লৈবা য়াবা শেনফম অদুনা ইরোই অমখক ফংবা।

মরূপশিং,

কুমজা ২০১০দা বন্নী ইরোই অসি লৈবাক অসিগী শকখঙসু ফংখ্রবনি। নীং খা তম্লবা মতুংদা ইরোইগী মসি লৈবাক্কী থাক্তা অসিগুম্বা মখলগী শক্তাক অসি ফংবা অহানবা ব্রীদ ওইখি।

মরূপশিং,

বন্নী ইরোইগী শঙ্গোলগী বিজিনেস অমসুং মদুগীদমক্তা থৌরাং অদু কচ্ছ অসিদা চাউনা মায় পাকখি। লৈবাক অসিদা অতৈ মফমদসু শঙ্গোমগী পোৎথোক অমসুং শঙ্গোমগী বিজিনেস তৌরিবা প্রাইবেৎ অমসুং কোওপরেতিব সেক্তর, অনিমক অমগা অমগা লোইনরি অমসুং হেন্না ফবা সপ্লাই চেন মখোয়না শেমগৎলি। মতৌ অসুম্না মনা-মশিংগা মরী লৈনবা বিজিনেসতসু অনম্বনা কৈথেলশিংদা সরকারনা হকথেংননা খুৎ থিংজিন্দে। 

মরূপশিং,

খুদম অসি ঐনা পাক চাউনা পীরিবসিগী মরমদি ঙসি-ঙরাং অসি দিল্লীগী অকোইবদা লৌমীশিংবু লান্না লমজিংবগী লৌতুনবা অমা য়াম্না চাউনা চৎথরি। অনৌবা লৌউ-শিংউগী রিফোর্মশিং অসিগী মতুংদা লৌমীশিংগী লম মীগী ওইখ্রগনি হায়না মখোয়বু কিহল্লি।

ইচিল-ইনাওশিং,

ঐনা অদোমদগী খঙবা পাম্মি, কনাগুম্বা দাইরীগী মপু অমনা অদোমদগী শঙ্গোমগী কন্ত্রেক্ত তৌনবদা অদোমগী শন-ইরোইশিং অদু পুখিবরা? কনানা মনা-মশিং লৈনবগী ললোন-ইতিক তৌনবদা অদোমগী লম লৌখিবরা, অদোমগী প্রোপর্তী পুখিবরা?

মরূপশিং,

ঐখোয়গী লৈবাক অসিদা দাইরী ইন্দস্ত্রীগী থৌদাং অসি, লৌউ-শিংউগী শেন্মিৎলোন্দা অপুনবা মমল চাদা ২৫দগীসু হেন্না য়াম্মি।

থৌদাং অসি চাউরাক্না লুপা করোর লাখ নিপানমুক্নি। শঙ্গোম পুথোকপগী অপুনবা মমল, চেং অমসুং হৱাইগী অপুনবা মমলদগীসু হেন্না য়াম্মি। থৌরাং অসিদা শা-শন য়োকপশিংনা মনীং তম্বা ফংলি। ঙসি লৈবাক অসিনা হংলি মদুদি অসুম্না মনীং তম্বা অসি হৱাই-চেংৱাই পুথোক্লিবা অপীকপা অমসুং ঙমখৈ নাইবা লৌমীশিংনা করিগী ফংলোইদৌরিবনো?

মরূপশিং,

হন্দক্তা হৌখিবা লৌউ-শিংউগী রিফোর্মশিং অসি চহি কয়াদগী তান্দুনা লাক্লবনি। লৌমীগী লুপ কয়ানসু মমাংদা তান্দুনা লাকখি মদুদি মহৈ-মরোং অসি মফম অমা হেক্তদা য়োন্ননবগী ওপ্সন পীগদবনি। ঙসি ওপোজিসন্দা ফমদুনা লৌমীশিংবু লান্না লমজিংলিবা মখোয়সু, মখোয়গী সরকারগী মতমদা, হায়রিবা লৌউ-শিংউগী রিফোর্মশিং অসিগী মাইকৈদা লৈখি। অদুবু মখোয়গী সরকারগী মতমদা মখোয় ৱারেপ লৌবা ঙমখিদে, লৌমীশিংদা মীনম্বা থাজবা পীদুনা লাকখি। ঙসি লৈবাক অসিনা পুৱারী ওইরবা খোথাং অসি থাংজিল্লকপা অসিদা, মখোয়শিং অসিনা লৌমীশিংবু লান্না লমজিংনবা হোৎনরি। ঐনা ঐগী লৌমী ইচিল-ইনাওশিংদা অমুক্কা হন্না হায়জরি হন্না হননা হায়জরি মদুদি মখোয়গী চিংনবা খুদিংমক কোকহন্নবা সরকারনা পুং কুনমরি শেম-শাদুনা লৈরি। লৌমীশিংগী কান্নবা অসি, অহানবা নুমিৎতগী ঐখোয়গী সরকারগী খ্বাইদগী মরুওইবশিংগী মনুংদা অমা ওইদুনা লাক্লি। লৌউবদা লৌমীশিংগী চাদিং হন্থহন্নবা, মখোয়না অনৌ অনৌবা ওপ্সন ফংনবা, মখোয়গী ইনকম হেনগৎহন্নবা, লৌমীশিংগী অৱাবা হন্থহন্নবা, মসিগীদমক্তা ঐখোয়না লেপ্তনা থবক তৌরি। ঐনা থাজৈ মদুদি, ঐখোয়গী সরকারগী পুকচেল শেংবা ৱাখল্লোন, ঐখোয়গী সরকারগী থমোইশেংনা হোৎনবা অমসুং মসিদা লৈবাক অপুনবনা থৌজানবীরি, লৈবাক অসিগী কাচিন কোয়া খুদিংমক্কী লৌমীশিংনা থৌজানবীরি, ঐনা থাজৈ মদুদি লৈবাক অপুনবগা লৌমীশিংগী থৌজালগী পাঙ্গল অসিনা, অরানবা শন্দোক্লিবা মখোয়গী, রাজনীতি তৌবদা পুক্নীং চংলিবশিং, লৌমীশিংগী লেংজুমদা নোংমৈ থম্লিবশিং অসি, লৈবাক অসিগী মিৎকপ থোক্লবা লৌমীনা মখোয়বুসু মায়থিবা শোইদনা পীগনি।

ইচিল-ইনাওশিং,

মসিগা লোইননা, ঐনা অমুক্কা হন্না কচ্ছবু হন্না হন্না নুংঙাইবা ফোংদোকচরি। ঐহাক মতম পুম্নমক্তা কুম্মৈ পামজৈ। ঐহা কচ্ছগী নাৎকী লনবু খুরুমজবগী কুম্মৈদসু শরুক য়াজগনি। ঐনা মিৎকুপ অমা মদুদা পেন্থোক্নবা হোৎনজগনি। কচ্ছগী মালেম শিনবা থুংনা ফাওরবা হ্বাইৎ দিজর্তকী নীংশিংবা অদুসু পুদুনা দিল্লীদা হনখিনি। কচ্ছনা চাউখৎপগী মতোল অদু লোম্বা ওইরসনু। ঐনা অমুক্কা হন্না অদোম ময়াম্বু হন্না হন্না নুংঙাইবা ফোংদোকচরি। হন্না হন্না য়াইফ-পাউজেল পীজরি।

হন্না হন্না থাগৎচরি !!!

*****