অৱাং-নোংপোক লমদমদা মরাংকাইনা লৈরিবা তুরিজমগী খুদোংচাবশিং লৌনবা অমসুং লমদম অসিদা মথক্তা চৎথোক-চৎশিনগী থবক ফগৎহন্নবা ঙসি ভারতকী উপ-রাস্ত্রপতি শ্রী এম.ভেনকিয়া নাইদুনা ফোঙদোকখ্রে।

মহাক্না হায়খি করিগুম্বা তুরিজমগী খুদোংচাবা মপুংফানা শীজিন্নরবদি অৱাং-নোংপোক্তা ইকো-তুরিজম অমসুং কলচরেল তুরিজম মপুং ওইনা চাউখৎকনি। কেন্দ্র অমসুং রাজ্য সরকারশিংনা চৎথোক-চৎশিন অমসুং তুরিজমগী মচাক-মথুমশিং শেমগৎনবা থবক পায়খৎলি। লমদম অসিদা মথক্তা চৎথোক-চৎশিনগী খুদোংচাবা ফগৎহল্লবদি লমকোয়বা মীওইশিং লাকপা হেনগৎলক্কনি।

উপ-রাস্ত্রপতিনা হায়খি চহি খুদিংগী ভারতমচা মিল্লিয়ন ২৬ মপান লৈবাকশিংদা লমকোয়বা চৎলি। কোবিদ-১৯ মতুংদা মখোয় অয়াম্বা লৈবাক মনুংদা লমকোয়বা পামগনি হায়না খল্লি। হায়রিবা লৈবাক অসিগী লমকোয়বা মীওইশিং অসিগীদমক অৱাং-নোংপোক রাজ্যশিংনা মখোয়গী তুরিজম ফগৎনবা অচৌবা খুদোংচাবা লৈরে।

লমদম অসিগী তুরিজমগী খুদোংচাবশিং লৌনবা রাজ্যশিং সরকারশিং অমসুং কেন্দ্র সরকারদা তকশিল্লদুনা মহাক্না হায়খি অৱাং-নোংপোক লমদমদা কোয়বা চৎপশিংদা মতেং পাংনবা মখোয়না খন্নগদবনি।

মিজোরমগী রাজ্যপাল শ্রী পি.এস শ্রীধারন পিল্লাইনা ইবা ইংলিস শৈরেংশিংগী লাইরিক ‘ওহ মিজোরম’ ভর্চুএল ওইনা  ফোঙবা থৌরমদা উপ-রাস্ত্রপতিনা হায়খি মিজোরমগী কুহ্মৈশিং, খুনুং ঈশৈ অমসুং জগোয়শিংনা মিজো খুন্নাইগী তোপ-তোপ্পা মশক অমা তাক্লে। “সোংবার্দ ওফ ইস্ত’ হায়না খঙনরিবা মিজোশিংদা মহৌশাগী পীথোরক্লবা ঈশৈ শকপা হৈবগী গুন অমা লৈরি।

উপ-রাস্ত্রপতিনা হায়খি লমদম অসিদা ফুরুপ ২২০ হেন্না লৈদুনা অমসুং মসিগা মান্নবা লোলশিং ঙাংনদুনা অৱাং-নোংপোক পুম্বা অসি খেন্নবা কয়া লৈরিবা ভারতকী কলচরগী তোখাইবা শক্তম অমা ওইরি। ‘দাইবেতিস’ হায়না মিংথোনবা শৈরেং অমা পল্লদুনা শ্রী নাইদুনা হায়খি থবক-ইনখাং শুদবা অমসুং হকচাং শোক্কদবা চীঞ্জাকশিং চাবগী হৈনবীশিংনা মরম ওইদুনা ভারতমচা কয়া পুন্সি মহিংগা মরী লৈনবা লায়নাশিং হায়বদি দাইবেতিস, হায়পরতেন্সন অমসুং হকচাং নোইবা মায়োক্নরি।

মহাক্না হায়খি, অৱাং-নোংপোক্কী মীয়াম মহৌশাগা হরাওনা লৈমিন্নরি অমসুং মহৌশাদা ফংবা চীঞ্জাকশিং চারি অমসুং হকচাং ফবা পুন্সি মহিং অমগী লম্বী ভারতকী অতৈ মীয়ামদা তাক্লি। অৱাং-নোংপোক্না ওর্গনিক ফার্মিংগী লম্বী তাক্লি অমসুং ২০১৬দা সিক্কিম্না ভারতকী অহানবা ওর্গনিক রাজ্য ওইরে।

লাইরিক ময়েক চৎপা(চাদা ৯১) অমসুং সেক্স রেসিও য়াম্না ৱাংবগীদমক উপ-রাস্ত্রপতিনা মিজোরমগী মীয়াম থাগৎখি। ২০১১গী মীকোক থিবা মতুংইন্না, মিজোরমদা চাইল্দ সেক্স রেসিও খ্বাইদগী ৱাংদুনা নুপা ১০০০গী মনুংদা নুপী ৯৭১ লৈরি হায়না মহাক্না ফোঙদোকখি।

থৌরম অদুদা শরুক য়াখিবা শক্নাইরবশিংগী মনুংদা মিজোরমগী রাজ্যপাল শ্রী পি.এস শ্রীধারন অমসুং দোনর মিনিস্ত্রিগী রাজ্য মন্ত্রী দোক্তর জিতেন্দ্র সিংহ য়াওখি।  

মখাগী অসি মপুংফাবা ৱারোলনি:

নুংশিরবা মরুপশিং,

মিজোরমগী রাজ্যপাল শ্রী পি.এস শ্রীধারন্না ইবা লাইরিক ‘ওহ মিজোরম’ ফোঙনবা ঙসি অদোমগা লোয়ন্না থৌরম শরুক য়াবদা ঐ অপেনবা পোকই । শ্রী পি.এস শ্রীধারন মাইথোঙ য়াম্বা মীওই অমনি-মহাক মাইপাক্লবা উকিল অমনি, হান্নগী রাজনিতিৱালা অমনি, অশিন-অরাং তৌবা মীওই অমনি, ৱাঙাংলোয় অমনি, অইবা অমনি, মীয়ামগী য়াইফনবা থবক তৌবা মীওই অমনি অমসুং পন্দিৎ অমনি।

মহাক থবক য়াম্না চিল্লবসু, রাজনিতি, খুন্নাই অমসুং আইনগী মতাংদা অমসুং শৈরেং য়াওনা মালায়ালম অমসুং ইংলিসতা মহাক্না লাইরিক ১২৫ ইখিবা অসিদা ঐ অঙকপা ফাওই। ঙসি ফোঙলিবা লাইরিক ‘ওহ মিজোরম’ অসি ইংলিস শৈরেংগী মহাক্কী অহানবা লাইরিক্নি।

মহাক্না মহৌশাবু নুংশিজবা অদু উৎলদুনা, শৈরেংশিং অদুদা মিজোরমগী ফজবশিং শিংথারি অমসুং শ্রী পি.এস শ্রীধারন্না তশেংনা হায়রি

“ওহ, মিজোরম, অদোম কয়াতা ফজরবা!”

তশেংনা, মিজোরম ফজৈ!

রাজ্য অসি মহৌশাগী ফজবনা পীক থনবা খক নত্তনা, মিজোরমগী কুহ্মৈশিং, খুনুং ঈশৈ অমসুং জগোয়শিংনা মিজো খুন্নাইগী তোপ-তোপ্পা মশক অমা তাক্লে। “সোংবার্দ ওফ ইস্ত’ হায়না খঙনরিবা মিজোশিংদা মহৌশাগী পীথোরক্লবা ঈশৈ শকপা হৈবগী গুন অমা লৈরি।

লাইরিক অসিদা য়াওরিবা ‘নোর্থ-ইস্ত কোলস’ কৌবা শৈরেং অমদা মেত্রো সহর অমগী পুন্সি অমসুং মহৌশাগী ফজবনা থল্লবা মিজোরমগী খেন্নবা অদু ফোঙদোক্লি। শৈরেং অসিনা হায়রি-

“মৈখুনা কোনুং য়োমশিল্লে

এয়র পোল্লসুনগী চাং ৱাংখৎলে

নিংথিরবা অৱাং-নোংপোক্তা লাকউ

অমসুং লুপা মচুগী অয়ুক অমা অদোম্না উগনি!”  

হায়রিবা ৱাহৈ পরেংশিং অসিনা ফজরবা অৱাং-নোংপোক্তা কোয়বা চৎনবা মীওই কয়া ইথিল পীগনি হায়না ঐনা থাজৈ। নুমিৎ খুদিংগী থেংনবা পুন্সিগী থৌদোকশিং শ্রী পিল্লাইনা মহাক্কী শৈরেংদা ময়েক শেংনা ফোঙদোকপা অসিদা ঐ অপেনবা পোকই। মহাক্কী শৈরেংশিংগী মনুংদা ‘দাইবেতিস’ কৌবা অমা য়াওরি। মসিদা হৈনৌ চারা অমা থাবা নুপা অমগী শক্তম উৎলি। পাম্বী অদুনা  উহৈ পাল্লকপা মতমদা, কবি অসিনা হৈ অদু হেক্নিংখি.. অদুবু মহাক্না মহাক্কী ইন্সুলিন কাপ্পা অদু নিংশিংলকখি অমসুং নিংবা কাইনা মহাক্কী থোঙনাও অদু থিংজিনখি।

মসিগী ৱারি অসি হৌজিক হিংলিবা ঐখোয় ময়ামগী ৱারিনি। থবক-ইনখাং শুদবা অমসুং হকচাং শোক্কদবা চীঞ্জাকশিং চাবগী হৈনবীশিংনা মরম ওইদুনা ভারতমচা কয়া পুন্সি মহিংগা মরী লৈনবা লায়নাশিং হায়বদি দাইবেতিস, হায়পরতেন্সন অমসুং হকচাং নোইবা মায়োক্নরি।

মসিগী মতাংদা, অৱাং-নোংপোক্কী মীয়াম মহৌশাগা হরাওনা লৈমিন্নরি অমসুং মহৌশাদা ফংবা চীঞ্জাকশিং চারি অমসুং হকচাং ফবা পুন্সি মহিং অমগী লম্বী ভারতকী অতৈ মীয়ামদা তাক্লি। ঐখোয়গী লায়না ঙাকথোকপা ঙম্বগী শক্তি হেনগৎহন্নবা মহৌশাগা লোয়ন্না হিংনবা অমসুং অফবা চীঞ্জাক চানবা ঐখোয়গী অহল-লমনশিংনা তাক্লম্বশিং অদু কোবিদ-১৯ লাইচৎ লাকপদা শীজিন্নবা দরকার ওইরে।

ওর্গনিক লৌউগী মতাংদা অৱাং-নোংপোক্না লম্বী তাকপা অসিদসু ঐ হরাওই। ২০১৬দা সিক্কিম্না ভারতকী অহানবা ওর্গনিক রাজ্য ওইরে। ওর্গনিক লৌউ মখলদা হোঙদোকপা অসি হৌজিক তঙাইফদ্রবনি অমসুং হিরম অসিদা অতোপ্পা রাজ্যশিংসু মিৎয়েং চঙগদবনি।

লাইরিক অসিদা “দি বুরিয়েল” কৌবা শৈরেং অমা য়াওরি। মসিদা ইনাকখুনবা অমসুং মীয়াম্না ইকায়খুম্নবা মীওই অমা শিবা মতমদা মপান লৈবাক্তা লৈখিবা মহাক্কী ইমুং-মনুংগী মীওইশিংনা মরম ওইদুনা নৎত্রগা মখোয় থবক য়াম্না চিনবদগী অরোইবা মথৌ-মঙম পাংথোকপা থেংবগী থৌদোক উৎলি। শৈরেং অসি অসুম্না লোইশিল্লি-

“তশেংনা, অহল অদুনা লেপচগদবনি

মহাক শিনবগী চপ চাবা মতম অমা”

পরেংশিং অসিদা চহি কয়া কুইরবা ঐখোয়গী ইমুং-মনুংগী চৎনবীশিং তপ্ন-তপ্না কিন্থরকপগী ফিবম অদু ফোঙদোক্লি। খুন্নাই অমসুং শেন-থুমগী অহোঙবা, য়াংনা সহরশিং শেমগৎলকপা, মতমগী অনৌবা পুন্সি মহিং অমসুং নহারোলশিংনা হেন্না ফবা শীনফম থিবা চৎনখিবনা মরম ওইদুনা নমফুদা নাইতোম তারবা পুন্সি অমদা হিংবা অহল মশিং হেনগৎলকখি।  ‘কন্দোলেন্স’ কৌবা মহাক্কী শৈরেংদা কবি অসিনা রাজনিতিৱালাশিংনা মখোয়গী লুচিংবা শিবা মতমদা অৱাবা ফোঙদোকপা অমসুং মহাক্না থম্লম্বা চৌক্রি অদু মখোয়না মিতাবা অদু উৎলি।

শ্রী পিল্লাইগী অতোপ্পা শৈরেংশিংদা মহাক্না মমা, মমালোল অমসুং মমালৈবাক নুংশিজবা অদু উৎলি। মিজোরমগী রাজ ভাবন্দা লৈবা মতমদা, রাজ্য অদুগী মহৌশাগী ফজবনা মহাক শুমহৎখিবা মাল্লে।

তশেংনা অৱাং-নোংপোক লমদমদা, ফজরবা পাৎশিং, অশঙবা চীঙশিং, থেক্না-খোইনা চেনবা তুরেলশিং, অতাংবা পাম্বী অমসুং শা-উচেকশিং মরাংকাইনা লৈবা নেসনেল পার্কশিং লৈরি। লমদম অসিদা ফুরুপ ২২০ হেন্না লৈদুনা অমসুং মসিগা মান্নবা লোলশিং ঙাংনদুনা অৱাং-নোংপোক পুম্বা অসি খেন্নবা কয়া লৈরিবা ভারতকী কলচরগী তোখাইবা শক্তম অমা ওইরি। পুম্নমক অসিগী মথক্তা, মশিং য়াম্লবা পুৱারি অমসুং লাইনিংগী মফমশিং লৈদুনা লমদম অসিগী ইনাকখুল্লবা কলচর অমসুং স্পিরিতচুএল হেরিতেশিং উৎলি।

হায়রিবা শক্তমশিং অসিনা অৱাং-নোংপোক রাজ্যশিং অসি লমকোয়বা মীওই অমগী মতিক চারবা মফম অমনি। অদুবু মফম অসি মীয়াম্না খ্বাইদগী মশক খঙনদ্রিবা তুরিজমগী মফমশিং লৈবা লমদম অমনি। করিগুম্বা তুরিজমগী খুদোংচাবা মপুংফানা শীজিন্নরবদি অৱাং-নোংপোক্তা ইকো-তুরিজম অমসুং কলচরেল তুরিজম মপুং ওইনা চাউখৎকনি। কেন্দ্র অমসুং রাজ্য সরকারশিংনা চৎথোক-চৎশিন অমসুং তুরিজমগী মচাক-মথুমশিং শেমগৎনবা থবক পায়খৎলি।

চহি খুদিংগী ভারতমচা মিল্লিয়ন ২৬ মপান লৈবাকশিংদা কোয়বা চৎলি। কোবিদ-১৯ মতুংদা মখোয় অয়াম্বা লৈবাক মনুংদা কোয়বা পামগনি হায়না ঐনা খল্লি। হায়রিবা লৈবাক অসিগী লমকোয়বা মীওইশিং অসিগীদমক অৱাং-নোংপোক রাজ্যশিংনা মখোয়গী তুরিজম ফগৎনবা অচৌবা খুদোংচাবা লৈরে।

লমদম অসিগী তুরিজমগী খুদোংচাবশিং লৌনবা রাজ্যশিং সরকারশিং অমসুং কেন্দ্র সরকারদা ঐনা তকশিল্লি। অৱাং-নোংপোক লমদমদা কোয়বা চৎপশিংদা মতেং পাংনবা মখোয়না খন্নগদবনি।

লোইশিন্দ্রিঙৈ মমাঙদা, চাদা ৯১ হেন্না লাইরিক ময়েক চৎপগীদমক ঐনা মিজোরমগী মীয়াম থাগৎলি,লৈবাক অসিদা লাইরিক ময়েক খ্বাইদগী য়াম্না চৎপা রাজ্যশিংগী মনুংদা মিজোরম য়াওরি। ২০১১গী মীকোক থিবা মতুংইন্না, মিজোরমদা চাইল্দ সেক্স রেসিও খ্বাইদগী ৱাংদুনা নুপা ১০০০গী মনুংদা নুপী ৯৭১ লৈরি। হায়রিবশিং অসি থাগৎপা য়ারবা মাইপাকপশিংনি।

তুংদা নুংঙাই-য়াইফবা রাজ্য অমা ওইনবা ঐনা য়াইফ-পাউজেল পীজরি।

ফজরবা শৈরেংশিংগী লাইরিক অমা ইবগীদমক ঐনা রাজ্যপাল শ্রী পিল্লাই থাগৎচরি।

শৈরেং অমগী পরেং খর অসিগা লোয়ন্না ঐ লোইশিঞ্জরগে-

“কনাগুম্বা অমতা হন্থনা য়েংদনা ভারতমচা অমা ওইনা চাউথোকউ

ইমালৈবাক অমুক শেমগৎনবা থবক শুরসি

লৈবাক্না হান্না অমসুং ইশানা মথংদা হায়বা খোল্লাউ ইল্লসি

চহিচা অসি ভারতকী চহিচা ওইহল্লসি”

অদোমবু থাগৎচরি।

জয় হিন্দ!”

*****