কৈথেলদা তিল্হৌ মমল ৱাংলিবা অসিদা মীয়াম্না থেংনরিবা খুদোংচাদবশিংগী য়েংলগা লৌউ-শিংউ অমসুং লৌমীশিংগী য়াইফ-থৌরাং লোয়শঙনা মপান্দগী পুশিল্লকপা তিল্হৌশিংদা প্লান্ত ক্বারেন্তিন ওর্দর, ২০০৩গী মতুং ইন্না ফ্যুমিগেসন তৌবগী ফীভম অমদি ফাইতোসেনিতরী সর্তিফিকেতকী মতাঙদা চঙবা অহেনবা দিক্লারেসনগী ৱাফমদা কোমথোক্লিবা অদু জনুৱারী ৩১, ২০২১ ফাওবা শাংদোক্নবা ফিরেপ লৌরে‍। কোমথোক্লিবা অসি অকক্নবা ফীভম খরদনি‍।

মপান্দগী পুশিল্লকপা ভারতকী হিথাংফমদা ফ্যুমিগেসন তৌদনা অমদি পি.এস.সি.দা পীবা এন্দোর্সমেন্ত য়াওদবা তিল্হৌগী মপোৎশিং এক্রেদিতেদ ত্রীতমেন্ত প্রোভাইদর অমগী খুত্থাঙদা ইম্পোর্তর অদুনা ফ্যুমিগেত তৌগদবনি‍। মপোৎ অদু ক্বারেন্তিন ওফিসিএলশিংনা নীংথিনা য়েংশিনগনি অমদি তিন-কাঙ অমদি ভারত্তা নুংনাংনিংঙাই ওইবা লাইনাশিং য়াওদ্রবা মতমদতা থাদোক্কনি‍। অদুগা অপৎ অপুম য়াওবা থেংনরবদি হায়রিবা কন্তেনর অদু রিজেক্ত তৌদুনা অমুক হলহনখিগনি‍। মখোক অমসুং মরুগী নেমাতোদ নৎত্রগা তিল্হৌগী হন থেংনরবদি, হায়রিবশিং অদু ফ্যুমিগেত তৌদুনা মাঙহনগনি অমদি মপোৎ অদু অহেনবা য়েংশিনবগী শেন্ফম লৌদনা থাদোক্কনি‍।

তিল্হৌ অদু চানবখক্কী ওইনা শীজিন্নগনি অমদি থানবগী শীজিন্নরোই হায়বগী অন্দরতেকিং অমা ইম্পোর্তর অদুদগী লৌগদবনি হায়না কন্দিসন অদুনা হায়রি‍। মসিগী মথক্তা, অসিগুম্বা তিল্হৌ মপোৎশিং অসি পি.ক্যু. ওর্দর, ২০০৩গী মখাদা পুশিল্লকপগী ফীভম ইন্দবগী অহেনবা য়েংশিনবগী শেন্ফম শরুক মরী লৌরমবা অদুসু লৌরোই‍।

*****