দিফেন্সকী লমদা থবক তৌরিবা মীওইশিংগীদমক ইন্দিয়ান ইন্সতিতুৎ ওফ মাস কম্মুনিকেসন(আই আই এম সি)না শীনবা মেদিয়া কম্মুনিকেসন কোর্স লোইশিনবগী থৌরমদা দিফেন্সকী রাজ্য মন্ত্রী শ্রীপদা নাইকনা হায়খি ভারতকী মায়োক্তা লৈবা শক্তিশিং থেংনবদা মেদিয়ানা অচৌবা থৌদাং অমা লৌরি। ঐখোয়গী লৈবাক্কী মায়োক্তা লৈবা শক্তিশিংনা ঐখোয়গী মেদিয়া লান্না শীজিন্নবা থিংবা অসি পাউমীশিং য়াওনা ঐখোয় খুদিংমক্কী দাইত্বনি। শগোলশেন নুমিৎতা পাংথোকখিবা থৌরম অদুদা আই.আই.এম.সিগী দিরেক্তর জেনেরেল প্রোফেসার সঞ্জয় দ্বিবেদি, এদিসনেল দিরেক্তর(এদমিনিস্ত্রেসন) শ্রী কে. সতিস নম্বোদিরিপাদ অমসুং এদিসনেল দিরেক্তর(ত্রেনিং) শ্রীমতি মামতা ভর্মাসু শরুক য়াখি।

থৌরমগী চীফ গেস্ত ওইনা শরুক য়াখিবা শ্রী নাইকনা হায়খি শেমজিন-শাজিনবা পাউশিং অমসুং খৎন-চৈনবা থোকহনবা য়াবা পাউশিং মশিং হেনগৎলকপগী চৎনবী অমা লাকপা অসিদা মী খুদিংমক মেদিয়াগী মরমদা খঙহনবা দরকার ওইরে। অনৌবা মেদিয়াগী মতম অসিদা, ই-পাউ পীরিবা মীওইশিং খক্তা মেদিয়াগী মরমদা খঙবা নত্তনা, খুন্নাইগী কাংলুপ খুদিংমক খঙবা দরকার ওইরে। হৌজিক মী খুদিংমক মখুত্তা স্মার্দফোন অমমম পায়নরবা মতম অসিদা, মেদিয়া লান্না শীজিন্নবা অঙকপা ফংনা হেনগৎলে অমসুং মসি মেদিয়া করিনো হায়বা খঙহন্দুনা লাকশিনবা ঙমগনি।

মিনিস্তরনা মখা তানা হায়খি মেদিয়া করিনো হায়বা খঙহনবা অসিনা ঙসি ঐখোয়না মালেমদা উরিবা সাইকোলোজিগী লান অসি মায়োক্নবদা ঐখোয়গী মতেং পাংগনি। ভারতকী মায়োক্তা লৈবা শক্তিশিংনা খুৎলায় অমা ওইনা শীজিন্নরিবা সাইকোলোজিগী লান অসিদগী ঐখোয় মিকুপ-নাহুম শিংনা লৈগদবনি। মসিগী মথক্তা, লৈবাক অসি অমসুং লৈবাক্কী মীয়াম য়াইফনবগীদমক মেদিয়াগী তৌবা ঙম্বশিং কমদৌনা শীজিন্নগদগে হায়বা ঐখোয়না তমগদবনি।

শ্রী নাইকনা হায়খি ভারতকী লান্মীশিংগী থৌনা, কৎথোকপা অমসুং মথৌদা পুক্নিং চঙবা অসি লাম্বা লৈতে। অদুবু হৌজিক লৈবাক অসিদা মখোয়গী মিংচৎ থিহন্নবা নুমিৎ চুপ্পা শেন্নদুনা লৈবা মীওইশিং লৈরি। অচুম্বা মেদিয়াগী থবকশিং পায়খৎতুনা অমসুং তোঙান-তোঙানবা মেদিয়াগী প্লেতফোর্মশিং মওং তানা শীজিন্নদুনা ঐখোয়গী দিফেন্স ফোর্সশিংগী মায়োক্তা তমথিবা খোঙজং চঙশিল্লিবশিং ঐখোয়না থেংনবা ঙমগনি।

আই.আই.এম.সিগী দিরেক্তর জেনেরেল প্রোফেসার সঞ্জয় দ্বিবেদিনা হায়খি হৌজিক মালেম অসি কোরোনা লাইচৎ মায়োক্নরি। কোরোনাগী মতম অসিদা ৱাহৈ অমা য়াম্না মমিং চৎলে অমসুং মসিনা থোকহনবশিং উরে। ৱাহৈ অদুদি ‘ইনফোদেমিক’ হায়বনি। মসিগী তার্ম অসিনা হায়রিবদি ই-পাউ কাহেন্না ফংবা অদুনি। ই-পাউ কা হেন্না ফংবা মতমদা, করম্বা পাউ থাজগনি অমসুং করম্বনা থাজরোই হায়বদা খুদোংচাদবা থোকহল্লি, অসিগুম্বা ফিবম অসিনা খন্নবা অমা দরকার ওইহল্লে। খন্নবা অসিগী মমিং মেদিয়া অমসুং পাউ করিনো হায়বা খঙহনবা অসিনা ওইরে।

মহাক্না হায়খি শেমজিন-শাজিনবা পাউ অসি মশামক অচৌবা ললোন-ইতিক্কী থবক অমা ওইরক্লে অমসুং দিজিতেল মেদিয়ানা মসিদা ইথিল পীরি। অসিগুম্বা ফিবম অসিদা মেদিয়া করিনো হায়বগী মতাংদা ৱাখল তাহনবা দরকার ওইরে। মসিগী প্রোগ্রাম অসি আই.আই.এম.সিদা কোর্স কোওর্দিনেতর অমা ওইনা লৈরিবা বিসনুপ্রিয়া পান্দেনা পাংথোকপনি।

আই.আই.এম.সিনা চহি খুদিংগী মেদিয়াগী অমসুং দিফেন্সকী মীওইশিংগী অতেনবা মতমগী কোর্সশিং পাংথোক্লি। হায়রিবা কোর্সশিং অসিদা কেপ্তেন্দগী হৌরগা ব্রিগেদিয়ার থাক ফাওবগী ওফিসারশিং শরুক য়ারি। কোরোনা লাইচৎনা মরম ওইদুনা, চহি অসিদা অহানবা ওইনা মসিগী ত্রেনিং অসি ওনলাইন্দা পাংথোক্লে। চহি অসিদা মিলিতরি ওফিসারশিংদা ফোক মেদিয়াদগী হৌরগা অনৌবা মেদিয়া অমসুং অনৌবা ই-পাউ পীনবগী তেক্নিকশিং খঙহনখ্রে। মসিগী মথক্তা, কমদৌনা লান্মী অমসুং মেদিয়াগী মরক্তা মরী ফগৎহনগদগে হায়বগী মতাংদা ওফিসারশিংদা ত্রেনিং পীখি।

*****