উপ-রাস্ত্রপতিগী ইন্তরভেন্সনগী মতুং ইন্না সেন্তরনা ইলুরুদা অথুবা মতমদা মেদিকেল এক্সপর্ত তীমশিং থাগদৌরি

হৌখিবা নুমিৎ খরনি অসিদা লাইয়োং খঙদনা নারকপা অঙাংশিং হোস্পিতেলাইজ তৌরকখিবা অসিদা ঙসি উপ- রাস্ত্রপতি শ্রী এম ভেনকাইহ নাইদুনা কেন্দ্রগী হকশেলগী মন্ত্রী শ্রী হার্শ বর্ধনগা ৱারি শান্নরবা মতুংদা আন্ধ্র প্রদেশকী ইলুরুদা মীওই অহুম্না শাবা মেদিকেল এক্সপর্তশিংগী তীম অমা কেন্দ্রনা থারগনি৷

অঙাং ৩০০ হেন্না নারে হায়বা রিপোর্ত অসি ফংবদগী ফর্স্তহেন্দগীদমক উপ-রাস্ত্রপতি অসিনা অহানবদা জিলা অসিগী কল্লেক্তর অসিগা ৱারি শান্নখ্রে৷ মতুং তারকপদা মহাক্না মঙ্গলাগিরিদা লৈরিবা এ.আই.আই.এম.এস.কী দাইরেক্তর অমসুং দিল্লীদা লৈরিবা এ.আই.আই.এম.এস.কী দাইরেক্তরগা ৱারি শান্নখি অমসুং অঙাংশিং অসিগী ঈগী সেম্পলশিং অদু দিল্লীদা থাখ্রে হায়না ফোংদোকরকখি৷

মতুং তারকপদা উপ-রাস্ত্রপতি অসিনা শ্রী হার্শ বর্ধনগা ৱারি শান্নখ্রে অমসুং শোকহল্লিবা অঙাংশিং অসি লাইয়েংবদা পাংবা য়াবা মতেং পুম্নমক পাংনবা মঙোন্দা হায়জখ্রে৷ লেব রিপোর্তশিং অসি ফংলবা মতমদা লাইনা অসিগী হৌরকফম অদু থিগৎনবা লৌখৎপা য়াবা খোংথাং পুম্নমক লৌখৎলগনি হায়না মন্ত্রী অদুনা মঙোন্দা থাজবা পীরকখ্রে৷

ঈগী সেম্পলশিং অসিগী রিপোর্তশিং অসি ফংলবা মতমদা লাইনা অসি লাইয়েং চৎথবা হৌরগনি হায়না কেন্দ্রগী হকশেল মন্ত্রী অমসুং এ.আই.আই.এম.এস.কী দাইরেক্তর অদুনা উপ-রাস্ত্রপতিদা থাজবা পীরকখ্রে৷

অঙাংশিংগী মরক্তা লাইয়োং খঙদনা নাহল্লক্লিবা লাইনা অসিগী মরমশিং অদু খঙদোক্নবা তঙাই ফদবা খোঙথাং পুম্নমক লৌখৎলে হায়না জিলা অদুগী কল্লেক্তর রেবু মুত্যলা রাজুনা উপ-রাস্ত্রপতিদা ফোংদোরকখ্রে৷ য়ুমথোং খুদিং চংদুনা সর্ভে অমা পাংথোকখ্রে অমসুং গুন্তর অমসুং কৃস্ন জিলাশিং অসিদগী মেদিকেল তীমশিং থাদুনা মথৌ তৌহনখ্রে৷

অঙাংশিং অসি হৈনিংদবা, চোকথগনবা, কোক চিকপা অমসুং ওবা য়াওবা লাইয়োংশিং উৎলকই হায়না রিপোর্ত তৌরকখ্রে৷

ঙরাং থোকখিবা থৌদোক অসিগী মতাংদা এ.আই.আই.এম.এস.তগী পোইজন কন্ত্রোল তীম অমগা ইলুরুগী দোক্তরশিং অসিগা ৱারি শান্নদুনা খন্না নৈনখ্রে হায়না উপ রাস্ত্রপতি অসিদা ফোংদোরকখ্রে৷

জিলা অসিগী হৌজিক থোকহল্লিবা ইপিদেমিওলোজিকেল অমসুং ক্লিনিকেল দাতা অসি য়েংলগা মখাগী সেন্ত্রেল তীম মেম্বরশিং অসি থারগনি হায়না কেন্দ্রগী হকশেল মন্ত্রালয়না ফোংদোরকখ্রে:

১. এ.আই.আই.এম.এস.তগী এসোসিয়েত প্রোফেসর(ইমর্জেন্সী মেদিসিন) দা. জমশেদ নায়র,

২. এন.আই.ভি. পুনেগী ভাইরোলোজিস্ত দা. অবিনাশ দিওশতৱর

৩. দিল্লীগী এন.সি.দি.সি.দগী পি.ঐচ. এক্সপর্ত দি.ৱাই. দাইরেক্তর দা. সনকেৎ কুলকার্নি

*****