ঙসি দিরেক্তর জেনেরেলস ওফ পুলিস/ইন্সপেক্তর জেনেরেলস ওফ পুলিসকী ৫৫সুবা চহিগী মীফম হৌদোকপদা য়ুনিয়ন হোম মিনিস্তর শ্রী অমিত সাহ ৱা ঙাংখ্রে। মীফম অদুদা তোঙান-তোঙানবা সেন্ত্রেল পেরা মিলিতরি ফোর্সশিংগী লুচিংবশিং অমসুং রাজ্যশিংগী পুলিসকী দিরেক্তর জেনেরেলশিং অমসুং পুলিসকী ইন্সপেক্তর জেনেরেলশিং ভর্চুএল ওইনা শরুক য়াখি। ইন্তিলিজেন্স বিউরোনা ভর্চুএল ওইনা মীফম পাংথোকপা অসি হন্দক্কী অসিনা অহানবনি। থৱায় কৎখ্রবা পুলিসশিং ইকায়খুম্নবা উৎলদুনা য়ুনিয়ন হোম মিনিস্তরনা মনা ফংলবা ৫০দা ইন্দিয়ান পুলিস মেদল পীখ্রে অমসুং মখোয়গী মাইপাকশিংগীদমক মখোয় থাগৎখ্রে।

মহাক্কী হৌদোকপগী ৱারোলদা, লৈবাক্কী ঙাক-শেনগী থৌশিল অমসুং অৱাবা তারকপা মতমদা মাঙজিল থাবা লান্মীশিং ওইনা পুলিসকী থৌদাংগী পল্লদুনা শ্রী অমিত সাহনা হায়খি তেরোরিজমগী মায়োক্তা তুমিন্না খাংদুনা লৈথোক্লোইদবনি। মীয়াম অশোই-অঙাম থোক্তনবা অমসুং ইকায়খুম্নবা ঙাক্নবা অমসুং অৱাবা তারকপা মতমদা থেংন্নবা পুলিসকী তৌবা ঙম্বা হেনগৎহনবা অসি য়াম্না মরুওই। লৈবাক্কী ঙাক-শেনগী থবকশিংদা সেকুরিতি এজেন্সিশিং পুন্না থবক তৌমিন্নগদবনি অমসুং ভারত চাউখৎলবা অমসুং অশোই-অঙাম থোক্তবা লৈবাক অমা ওইহন্নবা পান্দম ফংনবা হোৎনগদবনি।

তুংদা মীফম অদু ভর্চুএল ওইনা প্রধান মন্ত্রী শ্রী নরেন্দ্র মোদী শরুক য়াখি অমসুং মমাঙগী মীফমদা লৌখিবা ৱারেপশিং থবক ওইনা পাংথোকপা অদু হন্না য়েংশিনখি। লৈবাক মনুংগী ঙাক-শেনগী ওইরিবা ফিবম হন্না য়েংশিনবগী পাউদম অমা প্রধান মন্ত্রী অমসুং য়ুনিয়ন হোম মিনিস্তরদা থমখি অমসুং মীয়াম হেন্না নুংঙাঁইগদবা থবকশিংগা লোয়ন্না ঙাক-শেনগী ফিবম ফগৎহন্নবা খন্নখি।

এল.দব্লিউ.ই মায়োক্নরিবা মফমদা সেকুরিতি ফোর্সশিংনা পায়খৎলিবা থবকশিং খন্নখি অমসুং এল.দব্লিউ.ইনা শোকহল্লবা মফমশিংদা ঙাক-শেনগী ফিবম ফগৎহন্নবসু মীফম অদুদা খন্নখি। এল.দব্লিউ.ইনা থোকহনবা অৱাবশিং লাকশিন্নবা রাজ্যশিংগা পুন্না থবক তৌমিন্নবা তকশিনখি। কোবিদ-১৯ লাইচৎ মনুংদা পুলিসগী থৌদাং খন্নখ্রে অমসুং অশোই-অঙাম থোক্তনবা পুলিসনা চৎন-পথাপশিং ঙাকপগী মতাংসু খন্নখ্রে। তোঙান-তোঙানবা মখলগী অৱা-অনা তারকপা ফিবমশিং লাকশিন্নবা এস.ও.পি শেম্নবা ৱাফম খন্নখি।

*****