য়ুনিয়ন স্পোর্তস মিনিস্তর শ্রী কিরেন রিজিজুনা ভারতকী নুপীগী অন্দর-১৭ ফুতবোল তিমগী মেম্বরশিংগা উনখ্রে অমসুং কোরোনাভাইরস লাইচৎনা মরম ওইদুনা চহি অসিগী নুপীগী অন্দর-১৭ ৱার্ল্দ কপ পাংথোকখিদ্রবা মতুংদা মখোয় থৌনা লৈনবা মখোয়গী পুক্নিং থৌগৎখি। লৈবাক অসিগী তোঙান-তোঙানবা মফমশিংদগী ভারতকী অন্দর-১৭ ফুতবোল তিমগী মেম্বরশিংগী ভর্চুএল ৱেবিনারদা শ্রী রিজিজু শরুক য়াখি, ৱেবিনার অদুদা আই.এ.এফ.এফ প্রসিদেন্ত প্রফুল পতেল; নুপীগী অন্দর-১৭ তিমগী হেদ কোচ থোমাস দেন্নরবি অমসুং সাইগী দিরেক্তর জেনেরেল(স্পোর্তস) সন্দিপ প্রধান্নসু শরুক য়াখি।

ভারতনা য়ুম্বু ওইদুনা চহি অসিদা নুপীগী অন্দর-১৭ ৱার্ল্দ কপ পাংথোক্কদবনি, অদুবু কোরোনাইভাইরস লাইচৎনা মরম ওইদুনা পাংথোকখিদ্রে অমসুং ২০২১গী ফেব্রুৱারি-মার্চতা পাংথোক্নবা মতম লেপ্লে। তুর্নামেন্ত অদু পাংথোকখিদ্রবসু ২০২২দা মথংগী ইদিসন ভারতনা য়ুম্বু ওইগনি। মসি ২০২২ ৱার্ল্দ কপ মমাঙদা চহি ১৭ হেল্লগদবা ফুতবোল শান্নরোয় খরগী নিংহন্নবা অমনি অমসুং মরম অদুনা তুর্নামেন্ত অসি শরুক য়াবা ফংলরোই, অদুবু ২০২২দা পাংথোক্কদৌরবা অন্দর-২০ ৱার্ল্দ কপ অমসুং অন্দর-২০ এ.এফ.সি এসিয়ান কপগী থৌরাং তৌনবা অমসুং থাজবা থম্নবা শ্রী রিজিজুনা মখোয়দা খঙহনখি।

শ্রী রিজিজুনা হায়খি অন্দর-১৭গী শান্নরোয়শিং নিংবা কাইরবসু মখোয়গী থৌনা অমসুং পাঙ্গল মাঙহল্লোইদবনি। মখোয় শান্নবা হৌবতা ঙাইরি অমসুং চহি অসিদা ৱার্ল্দ কপ পাংথোক্তবা অসি মখোয়গী মরাল নত্তে। ২০২২ ইদিসন্দা ভারতনা মখা তানা য়ুম্বু ওইবগীদমক ঐনা এ.আই.এফ.এফ থাগৎলি। অদুবু চহিনা মরম ওইদুনা হৌজিক্কী তিম অসিগী শান্নরোয় খর ২০২২ ৱার্ল্দ কপ শরুক য়াবা ফংলোইদবা অসিদা ঐ নুংঙাইতবা ফাওই । মখোয় অন্দর-২০ ৱার্ল্দ কপ শান্নবা ফংগদবা মরম্না মখোয়না থৱায় ৱানিংঙাই ওইদে অমসুং মখা তারকদপা সেনিয়র তিমদা য়াওবা ফংলগনি।  নুপীগী ফুতবোল তিম সেনিয়র ৱার্ল্দ কপগী অথুবদা ক্বালিফাই ওইরগনি হায়বগী থাজবা ঐনা থম্লি। ফুতবোল চাউখৎহন্নবা ভারতনা থবক খুদিংমক পায়খৎলে।

এ.আই.এফ.এফকী প্রসিদেন্ত প্রফুল পতেলনা হায়খি, চহি অসিদা ৱার্ল্দ কপ পাংথোক্তবা অসি নিংবা কাইবনি অমসুং ২০২২ ইদিসনগী থাজবা থম্লি অমসুং ২০২৬ এসিয়ান গেমস অমসুং ২০২৭ ৱার্ল্দ কপতা শান্নরোয়শিং ফজনা শান্নবা ঙম্নবা লম্বী অমা শেম্লে। চহি অসিদা ৱার্ল্দ কপ পাংথোক্তবা অসিদা নুঙনাংবা ফাওই অমসুং সরকারনা ঐখোয় মপুংফানা শৌগৎলি। ঐখোয়গী থাজবশিংগী ৱাংমদা শান্ননবা শান্নরোয়শিং থৌরাং তৌরি। নুপীমচাশিং থাজবা মাঙলোইদবনি অমসুং মখোয় শোইদনা খুদোংচাবা কয়া ফংগনি। অন্দর-১৭ তিমগী শান্নরোয় খর অন্দর-২০ তিমগীদা শরুক য়ানবা খুদোংচাবা অমা ফংলগনি। ঐখোয়গী মিৎয়েং শানবা পান্দমদি তিম অসিগী শান্নরোয় খর ২০২৬ এসিয়ান গেমস অমসুং ২০২৭ ৱার্ল্দ কপ মতমদা মখোয় মপুংফানা শান্নবা ঙম্লগনি। মতম কুইনা পাংথোক্কদবা লৈবাক মনুংগী কেম্পশিং পাংথোকপা হৌরগনি অমসুং মরুপ-মপাং ওইবা অমসুং লৈবাক মনুংগী চাংদম্নবশিং পাংথোক্কনি।

নুপীগী অন্দর-১৭ তিমগী হেদ কোচ থোমাস দেন্নরবিনা হায়খি মসি অঙকপা তিম অমনি অমসুং তুর্নামেন্ত অসিগীদমক মখোয় য়াম্না কন্না ত্রেনিং পাংথোকখি। কাংবু অসি তোঙান-তোঙানবা তুর্নামেন্তশিং অমসুং তুরশিংদা ফজনা শান্নখি অমসুং মার্চতা ঐখোয়না কেম্প লোইশিনবা মতমদা ফিবম য়াম্না ফগৎখি। অথুবদা কেম্পশিং হৌরগনি হায়বগী থাজবা ঐনা থম্লি অমসুং ২০২২ ৱার্ল্দ কপ মমাঙদা শান্নরোয়শিংনা মখোয়গী ফিবম খঙলগনি। ২০২২ ৱার্ল্দ কপতা ঐখোয় ইশাগী মফম অমা ঐখোয়না কনবা ঙমগনি হায়না ঐনা থাজবা থম্লি।

২০২০ ইদিসন পাংথোক্ত্রবসু মখোয় পুক্নিং থৌগৎপা অমসুং মহাক্কী মতম কাইথোকপগীদমক শান্নরোয়শিংনা য়ুনিয়ন স্পোর্তস মিনিস্তর থাগৎখি। গোলকিপ্পর অঞ্জালি বারকেনা হায়খি অন্দর-১৭ ৱার্ল্দ কপ পাংথোক্তবা অসিদা ঐ নিংবা কাইরে। ঐখোয় অন্দর-২০ এ.এফ.সি এসিয়ান কপকী ক্বালিফাই ওইগনি হায়বগী থাজবা থম্লি অমসুং ঐখোয়না ফজনা শান্ননবা ঐখোয় হোৎনগনি। ঐখোয়দা মহাক্কী লম্বী অদু তাকপগীদমক য়ুনিয়ন স্পোর্তস মিনিস্তর থাগৎলি। মিদফল্দর অভেকানা হায়খি ২০২০ ৱার্ল্দ কপ পাংথোক্তবা অসিদা ঐ নুংঙাইখিদে অদুবু  ২০২০ ৱার্ল্দ কপ শান্নগনি হায়বগী থাজবা ঐখোয়দা লৈরে। লোকদাউন মনুংদা ঐখোয়গী সপোর্ত স্তাফশিংনা ঐখোয় ফজনা য়েংশিনখি। ঐখোয়গী কোচশিং অমসুং ফিতনেস ত্রেন্নরশিংদা ঐখোয়গী রিপোর্তশিং ঐখোয়না চাংনাইনা থারি।  

*****