রেস্তলর বাজরাং পুনিয়া য়ু.এস.এদা থা অমগী ত্রেনিং কেম্প পাংথোকপা অয়াবা পীরে। ২০২০গী নবেম্বর ২৬দা পাংথোকখিবা মিসন ওলেম্পিক সেলগী ৫০সুবা মীফমদা ৱারেপ অসি লৌখিবনি। কেম্প অসি ২০২০গী দিসেম্বর ৪দগী ২০২১গী জনুৱারি ৩ ফাওবা য়ু.এস.এগী মিচিগানদা লৈবা ক্লিপ কিন রেস্তলিং ক্লবতা লুপা ১৪ রোম চঙনা পাংথোক্কনি।

কোরোনা ভাইরস লোকদাউন মতুংদা ত্রেনিং কেম্পশিংদা অমুক হন্না ত্রেনিং চৎথবা হৌরবা মতুংদা সাই সোনেপত্তা ত্রেনিং পাংথোক্লিবা বাজরাংনা মহাক্কী কোচ ইমজারিওস বেন্তিনিদিস অমসুং ফিজিও ধনঞ্জয়গা লোয়ন্না য়ু.এস.এদা চৎকনি। ত্রেনিং কেম্প অদুদা মহাক্না, অনিরক ওলেম্পিক চেম্পিয়ন ওইরবা হেদ কোচ সেরগৈ বেলোগ্লাজোভকী মখাদা মালেমগী মমিং লৈরবা রেস্তলরশিংগা লোয়ন্না ত্রেনিং পাংথোক্কনি।

২০১৯ ৱার্ল্দ চেম্পিয়নসিপতা কোতা অমা ফংলবা মতুংদা বাজরাং তোকিও ওলেম্পিক্কীদমক মমাংদা ক্বালিফাই ওইখ্রবনি।

*****