চাউখৎ-থৌরাংগী থবকশিংদা শরুক য়ানবা অমসুং মখোয়গী থৌনাশিং অনৌবা অমসুং অমুক হিঙ্গৎলক্লবা ভারত অমা শেমগৎনবা অফবা থবকশিং, লৈবাক শেমগৎপগী থবকশিংদা শীজিনন্নবা ভারতকী উপ-রাস্ত্রপতি শ্রী এম.ভেনকাইয়া নাইদুনা ঙসি নহারোলশিংদা তকশিনখ্রে।

হায়দ্রবাদ য়ুনিভর্সিতদা ‘এমেনিতিস সেন্তর’ অমা শঙ্গাবা থৌরমদা শেঞ্জা-থুমজা, চাক লাম্বা, নৈহৎপা অমসুং হন্থনা য়েংবা লৈতবা অনৌবা ভারত অমা শেমগৎনবা অরানবা ৱাখল্লোন খন্দনবা, অচুম্বা মিৎয়েং য়েংনবা উপ-রাস্ত্রপতিনা নহারোলশিংদা পাউতাক পীখি।

উপ-রাস্ত্রপতিনা হায়খি লৈবাক অসি অরুবা ফিবম অমা মায়োক্নরি অমসুং খুদোংচাদবা কয়া থেংনরি। হিরম খুদিংমক্তা মপাঙ্গল কনবা ভারত শেমগৎনবা নহারোলনা মাঙজিল থাগদবনি।লাইরিক ময়েক চৎতবা, লায়নাশিং মুৎথৎনবা, লৌউ-শিংউগী খুদোংচাদবশিং কোকহন্নবা, মখল অমা হেক্তগী হন্থনা য়েংবা খুন্নাইগী ফত্তবশিং কোকহন্নবা, নুপীশিং ওৎপা অমসুং শেঞ্জা-থুমজা মুৎথৎনবা নহারোলশিংনা মাঙজিল থাগদবনি।

মহাক্না হায়খি নহারোলশিংনা চহি কয়া কুইরবা ভারতকী সভেত্যগী চৎনবীশিং অমসুং কলচর ইনগদবনি। করোনাভাইরসতগী হৌরগা অইং-অশাগী খল কাইরকপদগী থেংনরিবা খুদোংচাদবশিং কোকহন্নবা নহারোলশিংনা অনৌবা পাম্বৈশিং পুথোক্কদবনি। অফবা লাইরিক-লাইসু তাকপী-তম্বীবা অসিনা চাউখৎপা অমসুং মীওই কয়াগী পুন্সিদা অওনবা পুরক্নবা মরুওইবনি। ২১সুবা চহিচাগী শিংনরকপশিং মায়োক্নবা ঙম্নবা লাইরিক-লাইসু তাকপী-তম্বীবগী থবকশিংগী মাইওন হোঙগদবনি অদুবু ভারতকী চৎনবীশিং অমসুং কলচর ঙাক্কদবনি।

মহাক্না হায়খি মমিং লৈরবা মহৈলোয়শঙশিং হায়বদি তক্ষসিলা অমসুং নলান্দগুম্বদা মপান লৈবাকশিংগী মহৈরোয় কয়া তমদুনা থায়না মমাংঙৈদা ভারত মালেমগী মরুওইবা লাইরিক তম্ফম অমা ওইরমখি। খ্বাইদগী ফবা লাইরিক তম্ফম অমা ওইনবা হায়দ্রবাদ য়ুনিভর্সিতিগী ওজাশিং অমসুং মহৈরোয়শিংনা হোৎনগদবনি। মীয়ামগী তোঙান-তোঙানবা ৱাখল্লোনশিং লৈরি অদুবু মরুওইবা ৱাখল্লোনদি ‘লাইরিক-লাইসুগী লমদা খ্বাইদগী ফবা’ ওইগদবনি।

অৱাংবা থাক্কী মহৈলোয়শঙশিং খ্বাইদগী ফবা মফমশিং ওইনা শেমগৎনবা লনাই কাংবু য়াওনা মরী লৈনবশিংনা থবক পায়খৎনবা তকশিল্লদুনা শ্রী নাইদুনা হায়খি মালেমগী চৎনরিবা থাকশিং য়ৌনবা অফবা মগুন লৈবা লাইরিক-লাইসু তাকপী-তম্বীবগী থবক পায়খৎপা দরকার ওই।

মালেমগী মকোক থোঙবা মহৈলোয়শঙ ২০০গী মনুংদা ভারতকী অৱাংবা থাক্কী মহৈলোয়শঙ খর খক য়াওবা অসিদা মহাক্না নুংনাঙবা ফোঙদোকখি অমসুং হায়খি লৈবাক অসিদা হিরম কয়া তাকপী-তম্বীরিবা য়ুনিভর্সিতশিং ফিবম ফগৎহনগদবনি অমসুং খ্বাইদগী ফবশিংগী মরক্তা য়াওনা হোৎনগদবনি।

রেঙ্কিং হেন্না ফগৎলক্নবা, অৱাংবা থাক্কী মহৈলোয়শঙশিংনা অনৌবা থিজিনবা, রিছর্স ক্লস্তরশিং লিংখৎপা অমসুং খ্বাইদগী ফবা রিছর্স তৌবা মীওইশিংদা মতেং পাংনবা চৎনবী য়োকখৎনবগী অপাম্বা উপ-রাস্ত্রপতিনা থমখি।

মহাক্না হায়খি ভারত লৌশিং অমসুং অনৌবা পুথোকপগী মফম অমা ওইনা খুদোংচাবশিং লৈরি। অনৌবা পুথোকপা অমসুং ইন্তরপ্রাইজগী থবকশিং য়োকখৎনবা হায়দ্রবাদ য়ুনিভর্সিতিগুম্বা মহৈলোয়শঙশিংনা মরুওইবা থৌদাং অমা লৌগদবনি।

য়ুনিভর্সিতিশিং রিছর্সকী অফবা মফমশিং ওইনা শেমগৎনবা তকশিল্লদুনা মহাক্না হায়খি য়ুনিভর্সতিশিংনা ইন্দস্ত্রিগা অফবা মরী লৈনগদবনি। লৈবাক অসিগী রিছর্সকী থবকশিং য়েংশিন্নবা নেসনেল রিছর্স ফাউন্দেসন অমা লিংখৎনবা অনৌবা ইজুকেসন পোলিসিনা থৌরাং তৌরকপদা মহাক হরাওবা ফোঙদোকখি।

শ্রী নাইদুনা হায়খি নিংতম্বা চহি ৭৩ সুরবা ফাওবদা লৈবাক অসি হৌজিক ফাওবা চাদা ১০০ লাইরিক ময়েক চৎপা খুন্নাই অমা ওইদ্রি। লাইরিক ময়েক চৎপা হেনগৎহন্নবা অমসুং মপুংনা লাইরিক হৈবা খুন্নাই অমা ওইহন্নবা থবক পায়খৎনবা মরী লৈনবশিংদা মহাক্না তাকশিনখি।

অনৌবা ইজুকেসন পোলিসিনা মগুন লৈবা লাইরিক তম্বা ফংহন্নবা মিৎয়েং চঙবা খক নত্তনা, লমচৎ-শাজৎ শেমগৎনবা, সাইন্তিফিক ওইবা থৌনা লৈনবা, অনৌবা পুথোকপা য়োকখৎনবা অমসুং ২১সুবা চহিচাগী শিংনরকপশিং থেংন্নবা মহৈরোয়শিং থৌরাং তৌনবা মিৎয়েং চঙবদা শ্রী নাইদুনা হরাওবা ফোঙদোকখি। মহাক্না হায়খি এন.ই.পি অসি অপুনবনি অমসুং অফবনি।  

উপ-রাস্ত্রপতিনা হায়খি লাইচৎ থেংনবদা অতোপ্পা লৈবাকশিংগা চাংদম্নবদা ভারতনা ফিবম হেন্না ফরি অমসুং মহাক্কী পান্দমগা লোয়ন্না প্রধান মন্ত্রী শ্রী নরেন্দ্র মোদীনা লৈবাক অসি লমজিংলি। লাইচৎ অসি থেংন্নবা দোক্তরশিং, লৌমীশিং, সেকুরিতিগী মীওইশিং, সেনিতরিগী মীওইশিং, ভারত সরকার অমসুং রাজ্য সরকারশিংনা মশাগী ওইজবা থাদোক্তুনা পাংথোক্লিবা থবকশিং অসি মহাক্না থাগৎখি।

সরকারগী পাউতাকশিং ইন্নবা, থাপ্না লৈনবা নিয়মশিং ঙাক্নবা অমসুং মাক্স উপ্না মহাক্না মীয়ামদা তকশিনখি। মহাক্না হায়খি মখোয়গী খাংবা কনবা হেনগৎহন্দুনা তুংগী শিংনবশিং থেংন্নবা মীয়াম্না থৌরাং তৌগদবনি। য়োগা য়াওনা হকচাং শাজেল চাংনাইনা শান্ননবা অমসুং অফবা চীঞ্জাক চানবা অমসুং হকচাংদা মচি ওইদবা অচা-অথক চাদনবা মহাক্না নহারোলশিংদা পাউতাক পীখি।

থৌরম অদুদা তেলাঙ্গানাগী হোম মিনিস্তর শ্রী এম.দি. মহমদ অলি, য়ুনিভর্সিতিগী চান্সেল্লর শ্রী জজিস্ত এল. নরসিমহা রেদ্দি, ভাইস-চান্সেল্লর শ্রী পোদিলেঅপ্পা রাও, দিন(স্তূদেন্দ ৱেলফিয়র) দোক্তর বি.নগরজুনা, তোঙান-তোঙানবা স্কুলশিংগী দিনশিং, ওজাশিং, মহৈরোয়শিং, য়ুনিভর্সিতিগী স্তাফশিং অমসুং অতোপ্পা শক্নাইরবশিং শরুক য়াখি।

মখাগী অসি মপুংফাবা ৱারোলনি -

 “ইচলশিং অমসুং ইনাওশিং !

অহানবদা, ময়াম পুম্নমক্তা ঐনা ঐগী দিৱালিগী য়াইফ-পাউজেলশিং পীজরি!

হায়দ্রবাদ য়ুনিভর্সিতিগী পাক-চাউরবা কেম্পস অসিদা অনৌবা এমেনিতিস সেন্তর শঙ্গাবদা ঐ হরাওই।

সরকারনা শেন থাদবা মহৈলোয়শঙশিংগী কাংলুপকী মখাদা আই.আই.তি খর অমসুং ইন্দিয়ান ইন্সতিতুৎ ওফ সাইন্সকা লোয়ন্না হায়দ্রবাদ য়ুনিভর্সিতিনা খ্বাইদগী নৌবা অমসুং ইন্সতিতুৎ ওফ ইমিনেন্স ওইরকপা অসি চাউথোকচনিংঙাই ওইবা অমনি।

লৈবাক অসিগী অমসুং মালেমগী রেঙ্কিংশিংদা য়ুনিভর্সিতি অসি মকোক্তা লৈরকপদা ঐ হরাওই। হন্দক অতল রেঙ্কিং ফোর ইন্সতিতুসনেল ইন্নোবেসন এচিফমেন্তস(এরিয়া)দা আই.আই.তিশিং অমসুং আই.আই.এস.সিগা লোয়ন্না মকোক থোঙবা মহৈলোয়শঙ ১০গী মনুংদা য়ুনিভর্সিতি অসি য়াওরে।

ইসক্বার মিতর ৩২৬০গী অনৌবা এমেনিতস সেন্তর অসিদা দিন, স্তুদেন্তস ৱেলিফিয়ার, চীফ ৱার্দেন অমসুং চীফ প্রোক্তর অমসুং অতোপ্পশিং ওফিসশিং য়াওনা খুদোংচাবা কয়া লৈরে। অচা-অথক চাফম মফম অমা অমসুং এম্ফিথিয়েতর অমা য়াওরিবা অসিগী মথক্তা,  সেন্তর অসিদা মহৈরোয়শিং পুন্নবগী মফমসু লৈরে।

নুংশিরবা ইচলশিং অমসুং ইনাওশিং,

অফবা লাইরিক-লাইশু তম্বীবা অসি চাউখৎপা অমসুং মীওই কয়াগী পুন্সিদা অওনবা পুরক্নবা মরুওইবনি হায়বা ঐখোয়না খঙলে। লাইরিক-লাইশুনা লায়রবা অমসুং চারা হেনবা ঙাকথোক্নবা থৌনা মীয়ামদা পী অমসুং থোঙ মান্নবা অমসুং অপুনবা ওইনা চাউখৎমিন্নবা খুন্নাই অমা শেমগৎনবা খুদোংচাবশিং ফংহল্লি।

নিংতম্বা চহি ৭৩ সুরবা ফাওবদা লৈবাক অসি হৌজিক ফাওবা চাদা ১০০ লাইরিক ময়েক চৎপা ঙমদ্রি। লাইরিক ময়েক চৎপা হেনগৎহন্নবা অমসুং মপুংনা লাইরিক হৈবা খুন্নাই অমা ওইহন্নবা মরী লৈনবশিংনা থবক পায়খৎপা দরকার ওইরে। অদুবু মরুওইরিবদি, লাইরিক-লাইশু তম্বীবা অসিনা অফবা লমচৎ-শাজৎ শেমগৎনবা মিৎয়েং চঙবা অসিনি। লৈবাক্কী মপা অমা ওইনা মহাত্ম গান্ধীনা হায়খি: “লাইরিক তম্বা অসি ঐগী ওইনা হায়রবদা অঙাং অমসুং মীওই অমগী হকচাং, পুক্নিং অমসুং থৌনাগী খ্বাইদগী ফবা অদু ফুদোকহনবনি”।

লাইরিক-লাইশু তম্বীবগী থবকশিং অসিনা মীওইবা অমগী অচুম্বা ৱাখল্লোন, হকচাং, লিচৎ-শাজৎ, থৌনা, খুন্নাই অমসুং ফজবা অদু অচুম্বা মওংদা ফজনা শেমগৎকদবনি। অদুগা অতৈ থবকশিং অদু ঐখোয়গী চৎনবীশিং অমসুং কলচরগা চৎমিন্নগদবনি অমসুং লাইরিক তম্বা অসি ২১সুবা চহিচাগী শিংনরকপশিং থেংনবা ঙম্নবা অমুক হন্না মিৎয়েং চঙগদবনি।

ভারত সরকারনা হৌদোকখিবা নিউ ইজুকেসন পোলিসি(এন ই পি) অসিনা মগুন লৈবা লাইরিক তম্বা ফংহন্নবা মিৎয়েং চঙবা খক নত্তনা, লমচৎ-শাজৎ শেমগৎনবা, সাইন্তিফিক ওইবা থৌনা লৈনবা, অনৌবা পুথোকপা য়োকখৎনবা অমসুং ২১সুবা চহিচাগী শিংনরকপশিং থেংন্নবা মহৈরোয়শিং থৌরাং তৌনবা মিৎয়েং চঙবদা ঐ হরাওই।

ঐখোয়গী অৱাংবা থাক্কী মহৈলোয়শঙশিং অনৌবা থাকশিং য়ৌনবা অমসুং মালেমগী খ্বাইদগী ফবশিংগী মরক্তা য়াওনবা এন.ই.পিনা খুদোংচাবশিং পীরি। অদুবু খ্বাইদগী মরুওইবদি, অৱাংবা থাক্কী মহৈলোয়শঙশিং অফবা মফমশিং ওইহনবা অমসুং মালেমগী থাকশিংগা চাংদম্নবা য়াবা মগুন লৈবা লাইরিক তাকপী তম্বীবা অসিনি। মসি লনাই কাংবু য়াওনা মরী লৈনবশিংনা কন্না হোৎনরবা মতমদা থবক ওইনা পাংথোকপা ঙমগনি।

অনৌবা থবক পায়খৎপা, অনৌবা পুথোকপা অমসুং ইন্তরপ্রাইজগী থৌনা শেমগৎনবা অদোমগী য়ুনিভর্সিতি অসি য়াওনা য়ুনিভর্সিতিশিংনা মরুওইবা থৌদাং অমা লৌরবা মতমদা ভারত অসি লৌশিং অমসুং অনৌবা থবকশিংগী মফম অমা ওইবা ঙমগনি।  য়ুনিভর্সিতিশিং রিছর্সকী অফবা মফমশিং ওইনা শেমগৎপগী মথক্তা য়ুনিভর্সতিশিংনা ইন্দস্ত্রিগা অফবা মরী লৈনগদবনি। লৈবাক অসিগী রিছর্সকী থবকশিং য়েংশিন্নবা নেসনেল রিছর্স ফাউন্দেসন অমা লিংখৎনবা অনৌবা ইজুকেসন পোলিসিনা থৌরাং তৌরকপদা ঐ হরাওই।

লৈবাক্কী তুংগী ফিবম লেপ্পদা য়ুনিভর্সতিশিং অমসুং অৱাংবা থাক্কী মহৈলোয়শঙশিংগী অচৌবা থৌদাং অমা লৈ। অপুনবা মীশিংগী চাদা ৬৫ ঐখোয়গী নহারোলশিং ওইদুনা মীশিং য়াম্বগী খুদোংচাবা লৌনবা ঐখোয়না হোৎনবা দরকার ওই। থবক ফংনবা অমসুং মশাগী থবক পায়খৎচবা ঙম্নবা নহারোলশিং ত্রেনিং পীগদবনি অমসুং মসিনা ভারত অসি ত্রেনিং ফংলবা মীওইশিংগী মালেমগী মফম অমা ওইহনগদবনি।

২১শুবা চহিচাগী থবক ফংনবা লৌশিং পীনবা লৌশিংদা য়ুম্ফম ওইবা লাইরিক তাকপী-তম্বীবগী থবকশিংদা অনৌবা ইজুকেসন পোলিসিনা মিৎয়েং চঙবদা ঐ হরাওই। হৌজিক দরকার ওইরিবা অসি ভোকেসনেল অমসুং স্কিল কোর্সশিং পাকশন্না পায়খৎপা অমসুং মহৈরোয়শিংগী মরক্তা শেন তান্নবা লৌশিং লৈহনবা অসিনি।

দিজিতেল ইন্দিয়া থৌরাংগী শরুক অমা ওইনা, ওনলাইন্দা অনৌবা থৌরমশিং হৌদোক্তুনা অৱাংবা থাক্কী মহৈলোয়শঙশিংদা মিৎয়েং চঙদুনা ওনলাইন্দা লাইরিক তম্বা হেনগৎলকপা এন.ই.পিনা উরে।

লৈবাক অসিগী কাচিন-কোয়া খুদিংমক অমসুং মহৈরোয় খুদিংমক লাইরক তম্বা ফংনবা তেক্নোলোজি অসি তঙাইফদনা থাদোক্নবা য়াদ্রে অমসুং ক্লাসরুমশিংদা তেক্নোলোজি য়ৌহন্নবা এন.ই.পিনা মিৎয়েং চঙলিবা অসি তরাম্না ওক্লি।

নুংশিরবা ইচলশিং অমসুং ইনাওশিং,

অতৈ থবকশিংগুম, কোবিদ-১৯ লাইচৎ অসিনা মমাঙদা অমুক্তা ওইখিদ্রিবা মওংদা লাইরিক তম্বদা অকায়বা থোকহল্লে। লাইচৎ অসিনা ওজাশিং অমসুং মহৈরোয়শিং অনিমক্তা অনৌবা খুদোংচাদবশিং মায়োক্নহল্লে। ওনলাইন্দা লাইরিক তম্বা পাক-শন্না পাংথোক্নবা তাকপীবা অমসুং তম্বগী থবকশিং মতেং পাংনবা তেক্নোলোজি শীজিন্নবা অসি মরুওইবা অমনি।

মালেম শীনবা থুংনা মহৈলোয়শঙশিংনা ওনলাইন্দা তাকপীবা অমসুং তম্বগী থবকশিং পায়খৎলকপদগী, হায়দ্রবাদ য়ুনিভর্সিতিগুম্বা মহৈলোয়শঙশিংনা খ্বাইদগী ফবা থবকশিং নৈনবা অমসুং শীজিন্নবা দরকার ওইরে।

ৱাল্দ রেঙ্কিংদা ভারতকী অৱাংবা থাক্কী মহৈলোয়শঙ খর খক য়াওরকপা অসি নুঙনাংনিঙাই ওইবা ৱাফম অমনি-ক্বিউ.এস রেঙ্কিংগী মকোক ২০০গী মনুংদা আই.আই.তি বোম্বে অমসুং আই.আই.তি দিল্লি অমসুং আই.আই.এস.সি য়াওরে। লৈবাক অসিদা হিরম কয়াদা তাকপী-তম্বীরিবা য়ুনিভর্সিতশিং ফিবম ফগৎহনগদবনি অমসুং খ্বাইদগী ফবশিংগী মরক্তা য়াওনবা হোৎনগদবনি।

রেঙ্কিং হেন্না ফগৎলক্নবা, অৱাংবা থাক্কী মহৈলোয়শঙশিংনা অনৌবা থিজিনবগী থবকশিং পুক্নিং থৌগৎকদবনি অমসুং মকোক থোঙবা চেফোঙশিংদা মশিং য়াম্না ফোঙবা খক নত্তনা মগুন লৈনবা পেপরশিং ফোঙনবা মিৎয়েং চঙগদবনি।  

রিছর্স ক্লস্তরশিং লিংখৎনবা অমসুং অনৌবা রিছর্স প্রোজেকশিং শেন্থং পীনবা মরুওইবা থবক পায়খৎকদবনি। মসিগীদমক খ্বাইদগী ফবা রিছর্স তৌবা মীওইশিংদা মতেং পাংগদবনি।

নুংশিরবা ইচলশিং অমসুং ইনাওশিং,

পুংজা অসিদা দরকার ওইরিবা অসি নহারোলশিংগী থৌনা অফবা থবকশিং, লৈবাক শেমগৎনবা থবকশিংদা শীজিন্নবা অসিনি। নহারোলশিংদা পীবা ঐগী পাউতাক্তি চাউখৎপগী থবকশিংদা শরুক য়াবা অমসুং অরানবা ৱাখল থাদোকপা অসিনি।

লৈবাক অসি অরুবা ফিবম অমা ফাওদুনা চৎলি অমসুং ঐখোয়গী মাঙদা শিংনবা কয়া লৈরে। কোরোনা ভাইরসতগী হৌরগা অইং-অশাগী খল কায়রকপদগী থেংনরিবা খুদোংচাদবশিং থেংন্নবা নহারোলশিংনা অনৌবা পাম্বৈশিং পুথোক্কদবনি।

হিরম খুদিংমক্তা মপাঙ্গল কনবা ভারত ওইহন্নবা কাংলুপ খুদিংমক মরুওইনা নহারোলশিংনা মাংজিল থাবা মতম ওইরে। অনৌবা অমসুং নৌনা হিঙ্গৎলকপা ভারত অমা শেমগৎনবা লাইরিক ময়েক চৎতবা অমসুং লায়নাশিং মুৎথৎনবা, লৌউ-শিংউগী খুদোংচাদবশিং কোকহন্নবা, মখল অমা হেক্তগী হন্থনা য়েংবা খুন্নাইগী ফত্তবশিং কোকহন্নবা, নুপীশিং ওৎপা অমসুং শেঞ্জা-থুমজা মুৎথৎনবা মাংজিল থানবা ঐনা নহারোলশিংদা তকশিল্লি।  

লোইশিন্দ্রিঙৈ মমাংদা, ঐনা শ্বামি বিবেকানন্দগী ৱাহৈ খর নিংশিংবা পাম্মী, মহাক্না হায়রমখি:”ঐগী তুংগী থাজবা অসি নহারোলশিংগী লমচৎ-শাজৎ, লৌশিং, অতোপ্পশিংগী থবক পাংথোক্নবা খুদিংমক থাদোকপা অমসুং মরম ওকপা- মখোয় মশামক্কী অমসুং লৈবাক্কী অফবা থবক পাংথোকপদা লৈরে”।

লাক্লিবা চহিশিংদা য়ুনিভর্সিতি অসি অৱাংবা থাকশিং য়ৌরক্কনি অমসুং মিংচৎ কয়া পুরক্কনি হায়না ঐনা থাজবা থম্লি। ওজাশিং, স্তাফশিং অমসুং মহৈরোয় পুম্নমক্তা ঐগী য়াইফ-পাউজেল পীজরি।

জয় হিন্দ!”

*****