২০২২ ফাওবদা খুঙ্গংগী য়ুমথোঙ পুম্নমক তোতি ঈশিং ফংহন্নবা পঞ্জাবনা পান্দম থম্লে। ২০২০-২১দা য়ুমথোঙ লাখ ৭.৬০ তোতি শম্নবা রাজ্য অসিনা থৌরাং তৌরে। জল জিবন মিসনগী মখাদা, মরুওইনা নুপীশিং অমসুং অঙাংশিং য়াওনা খুঞ্জাশিংগী পুন্সি মহিং ফগৎহন্নবা অমসুং মখোয়না হেন্না ফবা পুন্সি অমা ফংহন্নবা রাজ্য অসিনা থবক পায়খৎলি।

রাজ্যশিংগা পুন্না থবক তৌমিন্নদুনা পায়খৎলিবা কেন্দ্র সরকারগী মাংজিল থাবা থৌরম, জল জিবন মিসন(জে জে এম)না ২০২৪ ফাওবদা খুঙ্গংগী য়ুম খুদিং ফঙ্কসনেল হাওসহোল্দ তেপ কন্নেক্সন(এফ ঐচ তি সি)পীনবা পান্দম থম্লি। মিসন অসিনা খুঙ্গংগী য়ুমথোং খুদিংমক নোংমদা মীওই অমদা ঈশিং লিতর ৫৫ ফংহনগনি অমসুং হায়রিবা ঈশিংগী চাং অসি চাংনাইনা অমসুং মতম শাংনা ফংহনগনি।

হোসিয়াপুর জিলাগী কান্দি এরিয়াদা তাখনি খুঙ্গংদা ‘তাখনি এস.ভি.এস’ স্কিমদা য়ুম্ফম ওইবা অফবা সিঙ্গল ভিলেজ স্কিম অমা লৈরে। লৈনুংগী ঈশিং চিংখৎপা সিঙ্গল ভিলেজ স্কিম অসি ২০২০গী জুনদগী থবক হৌখি অমসুং স্কুলশিং অমসুং অঙ্গনৱাদিশিং য়াওনা খুঙ্গং অদুগী য়ুমথোঙ ১৬৫দা তোতি ঈশিং ফংহনখি। স্কিম অসিগী মরুওইবা শক্তম অমদি, অৱাংবা মফমদা লৈবা চাউরাক্না য়ুমথোঙ ৪০ রোম অকনবা পম্প শীজিন্নদুনা ঈশিং চিংখৎতুনা ঈশিং ফংহনবা অসিনি। স্কিম অসিগী খুৎথাংদা চহি ৪০গী মনুংদা অৱাংবা মফমদা লৈবা য়ুমথোঙশিং থক্নবা ঈশিং মতিক চানা ফংলে। অফবা ঈশিং মশক খঙদোক্নবা চাংয়েং তৌনবা খুৎলায়শিং শীজিন্নদুনা মফম অদুগী ঈশিং চাংয়েং তৌখ্রে। জি.পি ৱাতর এন্দ সেনিতেসন কম্মিতি(জি পি দব্লিউ এস সি)মপুং ফানা থবক পাংথোক্ল অমসুং স্কিম অসি য়েংশিল্লে। ঈশিং পীনবা হোৎনবদা থা অমদা চঙবা শেনফম কোন্ননবা য়ুমথোঙ খুদিংমক্তগী থা অমদা লুপা ১৫০ জি.পি.দব্লিউ.এস.সিনা লৌরি। স্কিম অসি তুংকোইনা হিংনবা, খুঙ্গংগী মচাক-মথুমশিং শেমগৎনবা অমসুং শেন্ননবা মীয়াম্না থৌদাং লৌবা অসি জল জিবন মিসনগী থৱায়নি।

জল জিবন মিসনগী চৎন-কাংলোনশিং ইন্দুনা সিঙ্গল ৱাতর ভিলেজ ৱাতর সপ্লাই স্কিম অমা মীয়াম শরুক য়াদুনা থবক পায়খৎপা অমসুং ঈশিং ফংহনবা অমসুং শেন্নবগী অফবা খুদম অমা তানা অমসুং নৌলাখা খুঙ্গংশিংনা ওইরে। চহি ৫গী মমাঙদা জি.পি.দব্লিউ.এস.সি শেমখি অমসুং মসি থবক ফজনা পাংথোক্লি। স্কিম অনিমক্তা জি.পি.দব্লিউ.এস.সিতা নুপী চাদা ৫০ হেন্না য়াওরি অমসুং খুঙ্গং চাউখৎনবা থবকশিংদা খুঞ্জাশিং থৱায় য়াওনা শরুক য়ারি।

২৪x৭ ঈশিং ফংহনবা খুঙ্গংগী ঈশিং পীনবা স্কিম দিজাইন তৌবনি। লৈনুংদগী ঈশিং চিংখৎলগা মথক্তা লৈবা তেঙ্ক অমদা থাজিনখি। লেভেল সেন্সিং তেক্নোলোজি শীজিন্নদুনা পম্পশিং মশা মথন্থ থবক পাংথোকচবনি। পম্পনা ঈশিং চিংবা অমসুং লেপ্পা মথক্তা লৈরিবা তেঙ্কতা য়াওরিবা লেভেল সেন্সরনা শেন্নৈ, মরম অদুনা মসিদা মী অমা শেন্নবগী মথৌ তাহন্দ্রে। মসিগী দরকার ওইবা মীওই অদু অতোপ্পা থবকশিং হায়বদি মিতর পাবা, খজনা খোমগৎপা অমসুং মীয়ামগী খুদোংচাদবশিং কোকহন্নবা থবকশিংদা শীজিন্নরে।

হায়রিবা খুঙ্গং অনি অসিগী ঈশিং পীনবা থবকশিং অসি লনাই য়ুমথোঙ অমগী য়ুম মথক্তা লৈবা তেঙ্ক য়ৌবা ঙম্নবা মথক্তা তেঙ্ক থমদুনা ঈশিং পীবগী থবক পাংথোক্লি, মসিনা খুঙ্গংগী খ্বাইদগী থাপ্পা মফমদা লৈবা য়ুমথোঙদা ঈশিং ফংহন্নবা অকনবা প্রেসর পীখি। ঈশিং পাথোক্তুনা মাঙবা হন্থহন্নবা য়ুম মথক্তা লৈবা তেঙ্ক খুদিংমক্তা ফ্লোত ভেল্ব অমা হাপ্লে। লোয়ননা নুমিৎ চুপ্পা ঈশিং ফংনবা য়ুম মথক্তা লৈবা তেঙ্ক অদুগা ইমুংগী তোতি কোঞ্জিলগা শম্নরে অমসুং খ্বাইদগী লাপ্পা য়ুমথক্কী তেঙ্ক ফাওবা ঈশিং ফংহন্নবা প্রেসর পীরে।

থক্নবা ঈশিং পীরিবা প্রোজেকশিংগীদমক মীয়ামদগী খাজনা লৌনবা থৌশিল অমা পঞ্জাবতা চৎনরে অমসুং গ্রাম পঞ্চায়তনা মসি খোমগৎলে। থৌশিল অমা ওইনা, মীয়ামদগী শেন খোমজিল্লবা অমসুং জি.পি.দব্লিউ.এস.সিগী বেঙ্ক একাউন্তদা থমজিল্লবা মতুংদা অনৌবা ঈশিং পীনবা থবকশিং পায়খৎলে। মসিগী মরুওইবা মরমদি মীয়ামদা ৱাতর সপ্লাই স্কিমশিংগী মপু ওইবগী ৱাখল পোকহন্নবা অমসুং চাওথোকচবা ফাওহন্নবা হোৎনবনি।

জি.পি.দব্লিউ.এস.সিগী খুৎথাংদা স্কিমশিং মথৌ পাংথোকপা অমসুং শেন্নবগী থবকশিংদা পঞ্জাবতা খুঙ্গংশিংগী মীয়াম থৱায় য়াওনা শরুক য়ারে। খুঙ্গং ১২,০৩০গী মনুংদা খুঙ্গং ৭,৮৭১গী মাংজৌননা জি.পি.দব্লিউ.এস.সিশিং শেমখ্রে।

পঞ্জাবগী খুঙ্গংশিংগী য়ুমথোঙ অয়াম্বা ৱাতর মিতরশিং পাল্লে। খুঙ্গং খরদা ৱাতর মিতর য়েংলগা ঈশিংগী খজনা লৌরে। অদুবু খুঙ্গং অয়াম্বদা হৌজিক মাংজৌন্না য়ানরবা শেনফম অমা খজনা ওইনা লৌরি। জি.পি.দব্লিউ.এস.সিশিংগী মখাদা লৈবা  ঈশিং পীনবা স্কিমশিং শেন-থুমগী ফিবম ফরি অমসুং য়ুমথোঙশিংদগী খোমগৎলকপা খজনা অদুনা ঈশিং পীবদা চঙবা শেনফমশিং ওইনা শীজিন্নরে। ঈশিং মাঙহনবা হন্থহন্নবা ভোলুম্মেত্রিক তরিফতা অখন্নবা থবক পায়খৎনবা রাজ্য অসিনা থৌরাং তৌরে, মসিনা ঈশিং মাঙহনবা হন্থহনবদা মতেং পাংগনি।

পঞ্জাবগী খুঙ্গংশিং অসিগী মাইপাকপগী ৱারিশিং অসিনা সরকারগী থবকশিং মাইপাক্না পায়খৎপদা মীয়াম শরুক য়াবগী থৌদাং অদু উৎলে।

***