উত্তর প্রদেশ পুলিসনা ইরাই নুমিৎতা ২০২১দা হারিয়ানাগী পানচকুলাদা পাংথোক্কদবা খেলো ইন্দিয়া মশান্নশিংদা শরুক য়ান্নবা এপ্লিকেসন ফোর্ম লৌবগী অরানবা এদবর্তাইজ তৌদুনা সোসিএল মেদিয়াদা থাদোকপদা চেন্নবা মীওই অহুম ফারে অমসুং শান্নরোইশিং অসিদা মশান্নশিং অসিদা শরুক য়ানবগী লুপা ৬০০০ পীনবা হায়রমখি। হায়রিবা অসি স্পোর্ত ওথোরিতি ওফ ইন্দিয়ানা উত্তর প্রদেশ পুলিস্তা এফ.আর.আই. অমা থারকপদগী ফাখিবনি।

ফাখিবা মীওই অহুম অদুদি সঞ্জয় প্রতাপ সিংহ, অনুজ কুমার অমসুং রবিনি। সঞ্জয় অসি অগ্রাদগী হান্নগী কাবাদি শান্নরোইনি অমসুং মহাক্না খেলো ইন্দিয়া মশান্না অসি শরুক য়ান্নবগী শান্নরোইশিংগা পাউ ফাওন্নবা রুদ্রা প্রতাপ হায়বা মিং অসি শিজিন্নদুনা শাশিন্নবা আই.দি. শেম্লমখি। মরক অসিদা অনুজ অমসুং রবিনা য়ু.পি. ব্রানচকী কানারা বেঙ্ক অমসুং স্তেত বেঙ্ককী একাউম্ত নম্বর পীদুনা শান্নরোইশিংনা মদুদা পৈশাশিং অদু দিপোজিৎ তৌনবা হায়রমখি। হায়রিবা বেঙ্ক অনি অসিগী একাউন্তশিং অসি থিংজিন্দুনা থমখ্রে অমসুং একাউন্ত অনি অসিদা অপুনবা শান্নরোই কয়ানা পৈশা দিপোজিৎ তৌখিবগে হায়বা অসি খংদোক্নবা থি-হুম্বা চৎথরি।  

*****