দিবলপমেন্ত ওফ নোর্থ ইস্তর্ন রিজন(দোনর)গী রাজ্য মন্ত্রী(মনিংতম্বা), পি.এম.ও, পর্সোনেল, পব্লিক গ্রিভান্সেস, পেন্সন্স, এতোমিক ইনর্জি অমসুং স্পেসকী রাজ্য মন্ত্রী দোক্তর জিতেন্দ্র সিংহনা হায়খি হকচাংগী লায়না ঙাকথোকপা ঙম্বা হেনগৎহন্নবা অমসুং হকচাং ফবা পুন্সি মহিংগীদমক কোবিদনা মালেম শীনবা থুংনা য়োগা, অয়ুর্বেদ অমসুং নেচরোপেথি পাম্নহল্লে। ভর্চুএল ওইনা এসোকেমনা শীনবা মালেমগী অয়ুস মেলা হৌদোকপা ৱা ঙাংবদা মহাক্না হায়খি অলতরনেৎ মেদিসিনগী খ্বাইদগী ফবা লায়েং মখল খঙদোক্নবা হৌখিবা থা ৪-৫ অসিদা নোংচুপকী লৈবাকশিংনা ভারত্তা মাইওনশিল্লক্লে।

দোক্তর জিতেন্দ্র সিংহনা হায়খি হকশেলগী চেকশিন-থৌরাংদা অনৌবা ভারত অত্মনির্ভর ওইরগনি অমসুং মহৌশাদগী লৈরক্লবা লায়েং-কাংলোনশিংগী খুৎথাংদা লায়না ঙাকথোকপা ঙম্বগী শক্তি হেনগৎহন্নবা থবকশিং মালেমদা ফংহল্লগনি। অপুনবা অনা-লায়েংগী থবকশিংগী অফবশিং কোবিদনা অমুক নিংশিংহল্লে অমসুং দব্লিউ.ঐচ.ওগী অনা-লায়েংগী থবকশিংগী মনুংচন্না মসি মালেমগী মেদিকেলগী থবকশিংগী শরুক অমা ওইহনবা দরকার ওইরে।

দোক্তর জিতেন্দ্রনা হায়খি নরেন্দ্র মোদীনা ভারতকী প্রধান মন্ত্রী হেক ওইরকপদগী, মহাক্না মহৌশাগী ওইবা অনা-লায়েংগী থবকশিং অসি ময়াইদা পুখৎলকখি। মালেমগী য়োগা নুমিৎ পাংথোক্নবা য়ুনাইতেৎ নেসন্সতা অমত্তা ওইনা ৱারেপ অমা লৌনবা মোদীনা হোৎনবগী মহৈ ওইনা ভর্চুএল ওইনা মালেমগী য়ুমথোঙ শীনবা থুংনা য়োগা য়ৌরে। মমাংঙৈগী লায়েং-কাংলোনগী মরুওইবা অদু খঙবদগী, প্রধান মন্ত্রী মোদীনা অয়ুসকী তোখাইবা মিনিস্ত্রি অমা লিংখৎখি।

য়ুনিয়ন মিনিস্তরনা হায়খি হিমালয়দা লৈরিবা রাজ্যশিং অমসুং ভারতকী অৱাং-নোংপোক রাজ্যশিংদা য়াম্লবা হিদাক ওইনা শীজিন্নবা য়াবা পাম্বীশিং ফংলি অমসুং মরী লৈনবশিংগী মখোয় শীজিন্নগদবনি অমসুং হিদাক ওইনা শীজিন্নবা য়াবা পাম্বীশিং অদু মালেমগী থাক্তা পুখৎকদবনি।

দোক্তর জিতেন্দ্র সিংহনা ইন্দস্ত্রিগী খ্বাইদগী চাউবা লুপ এসোকেম(এসোসিএতেদ চেম্বরস ওফ কমর্স এন্দ ইন্দস্ত্রি ওফ ইন্দিয়া)গী প্রসিদেন্ত দোক্তর নিরঞ্জন হিরানন্দানি অমসুং এসোকেমগী জেনেরেল সেক্রেতরি দিপক সুদ মালেমগী অয়ুস মেলা শীনবগীদমক থাগৎখি অমসুং লাইচৎ মনুংদা ভর্চুএল ওইনা মেলা অসি তশেংনা মালেমগী থৌরম অমা ওইহন্নবা মখোয়দা তকশিনখি।

অয়ুস মিনিস্ত্রিগী সেক্রেতরি রাজেস কোতেচানা হায়খি অত্মনির্ভর ভারত মিসনগী মখাদা লুপা করোর ৪,০০০ চঙনা লম হেক্তর লাখ ১০দা হিদাক ওইনা শীজিন্নবা য়াবা পাম্বীশিং থানবা সরকারনা খন্নরি।

অচার্য়া বালকৃষ্ণনা হায়খি অয়ুর্বেদ মালেমগী থাক্ত পুখৎনবা পাতাঞ্জলিনা থবক কন্না পায়খৎলি অমসুং মরী লৈনবা পুম্নমক শৌগৎনবা ৱারেপ লৌরে।

থৌরম অদুদা দোক্তর জিতেন্দ্রনা হিদাক ওইনা শীজিন্নবা য়াবা পাম্বীশিংগী মতাংদা এসোকেম-নাবার্দ নোলেজ রিপোর্তসু ফোঙখি। গুজরাত্তা য়ৌসুফ সাইখকী কুদ্রাতি অয়ুর্বেদগী অনৌবা মেনুফেকচরিং য়ুনিৎ অমা ভর্চুএল ওইনা শঙ্গাখি।

বেঙ্গালুরুদা লৈবা দিম য়ুনিভর্সিতি, শ্বামি বিবেকানন্দা য়োগা অনুসানধানাসাশ্মথানা(এস-ব্যাসা)গী ফাউন্দর ভাইস চান্সেল্লর, অইবা, য়োগা থেরাপিস্ত, পন্দিৎ পদ্ম শ্রী ঐচ.আর নগেন্দ্র অমসুং সামি-সবিনসা গ্রুপকী ফাউন্দর চিয়রমেন দোক্তর মহমদ মজিদ, ইন্দস্ত্রগী লুচিংবশিং অমসুং তোঙান-তোঙানবা লৈবাকশিংগী মীওইশিং ৱেবিনার শরুক য়াখি।

*****