কেন্দ্রগী মহৈ মশিং মন্ত্রী দোক্তর রমেশ পোখ্রিয়ালনা এন.আই.তি. অরুনাচল প্রদেশকী নৌনা শাবা মেকানিকেল ইঞ্জিনিয়রিং ব্লোক, বাইও-তেক্নোলোজী অমসুং কেমিকেল ইঞ্জিনিয়রিং ব্লোক অমদি অতৈ ফেসিলিতীশিং ভর্চুএল ওইনা শঙ্গাখ্রে‍। অরুনাচল প্রদেশ লৈঙাক্কী চীফ মিনিস্তর শ্রী পেমা খান্দু, নহারোলশিংগী থৌরম অমসুং শান্ন-খোৎনবগী রাজ্য মন্ত্রী (আই./সি.) অমদি মাইনোরিতী এফ্যার্সগী রাজ্য মন্ত্রী শ্রী কিরেন রিজিজু, অমদি অরুনাচল প্রদেশ লৈঙাক্কী মহৈ মশিং মন্ত্রী ই.আর. তবা তেদিরনে থৌরমদুদা শরুক য়াখি‍। এন.আই.তি. অরুনাচল প্রদেশকী দাইরেক্তর প্রোফেসর পিনাকেস্বর মহন্তসু থৌরমদুদা শরুক য়াখি‍।

থৌরমদুদা ৱা ঙাঙলদুনা শ্রী পোখ্রিয়ালনা এন.আই.তি. অরুনাচল প্রদেশনা অৱাং-নোংপোক লমদম পুম্বগী ওইনা লমজিং মৈরা ওইবা ঙমগনি, ইন্সতিত্যুৎ অসিগী পান্দমশিংগী মরক্তা অমা হায়রগদি লৈবাকসিগী মরুওইবা ইন্সতিত্যুৎশিংগীসু পান্দম অমা ওইরিবা “খুন্নাইগীদমক হেন্না ফবা মওংদা থৌগল তৌনবগীদমক লমদমসিগী, ভারতকী অমদি মালেমগী মথৌ তাবশিংদু খঙদোকপা” হায়বসিনি হায়না ফোঙদোকখি‍। ঐখোয়গী মহৈ মশিংগী ইন্সতিত্যুসনশিংনা মখোয়গী মহৈরোয়শিংগী ৱাখলদা সাইন্সকী লমদম খঙনিংবগী ইথিল পোকহন্দুনা ৱাখল-লৌশিংগী উপু অমা ওইনা মথৌ তৌগদবনি অমদি নহা ওইরিবা পুক্নিংশিংবু লাইরিক্কী ৱাংমদা ৱাখল খনবা তমবিগদবনি অমদি শিংনবা অমা হেক্তবু খুদোংচাবা অমা ওইনা লৌবা অমদি মখোয়বু মীওইবগী য়াইফনবগীদমক শীজিন্ননবা পুক্নিং থৌগৎপিগদবনি হায়বা ৱাফম শ্রী পোখ্রিয়ালনা থমখি‍।

হৌখিবা চহি খরসিদা এন.আই.তি. অরুনাচল প্রদেশনা মখোয়গী মহৈ মশিং অমদি থিজিন হুমজিনবগী থৌওং হেন্না ফগৎহল্লে অমদি নেসনেল ইন্সতিত্যুসনেল রেঙ্কিং ফ্রেমৱর্ক (এন.আই.আর.এফ?) ২০২০গী ইঞ্জিনিয়রিং কাঙলুপ্তা ২০০শুবা মফম কনবা অমদি লৈবাক্কী মরুওইবা ইন্সতিত্যুৎ, কেন্দ্রগী তাইবং মহৈকোলশিং অমদি সি.এফ.তি.আই.শিংগী কাঙলুপ মরক্কী এ.আর.আই.আই.এ. রেঙ্কিং ২০২০দা বেন্দ এ (১১শুবদগী ২৫শুবা ফাওবগী মরক্তা মফম কনবা) অসিনচিংবা মায়পাকপশিং ফংখ্রে‍। ফেকল্তী মেম্বরশিংগী মশিং য়াম্লবা পব্লিকেসনশিং অমদি পেতেন্তশিং অসিনা ইঞ্জিনিয়রিং, বেসিক সাইন্স অমদি হ্যুমেনিতীজকী লমদা ইন্সতিত্যুৎ অসিগী মহৈ মশিং অমদি থিজিন হুমজিনবগী লমদা হেন্না ফবা ফীভম পুরক্লিবা অসি উৎলি হায়না মহাক্না মখা তাখি‍।

মকোক থোংবা ইন্সতিত্যুৎ অসি ফেকল্তী মেম্বর ৫৩ অমদি অন্দর গ্রেজুএত, পোস্ত গ্রেজুএত অমসুং পি.ঐচ.দি. থাক্তা মহৈরোয় ৮০০ লোম লৈদুনা চলাইরি, অমদি হন্দক্তা পি.ঐচ.দি. থাক্তা মিং চনবগী চাং চাদা ৮০ হেনগৎলকপা থেংনখি অমদি মসিনা থিজিন হুমজিনবগী অমদি চাওখৎহনবগী থৌওংশিং শোয়দনা হেনগৎহল্লগনি হায়না মন্ত্রীনা পাউদমখি‍। নৌনা শঙ্গারিবা শঙশিং অসিনা মথৌ তৌবা হৌরকপগা লোয়ননা এন.আই.তি. অরুনাচল প্রদেশনা মশাগী লেঙদ্রবা কেম্পসতগী মথৌ তৌবা হৌরগনি হায়না মন্ত্রীনা থাজবা ফোঙদোকখি‍। অফবা ইন্সতিত্যুৎ খুদিংমক্না মখোয়গী তশেংবা পান্দম ফংনবগীদমক অমদি পায়খৎনবগীদমক মশাগী ওইবা লেঙদ্রবা কেম্পস অমা মথৌ তাই‍।

শরুক য়ারিবশিংগী মফমদা ৱা ঙাঙলদুনা শ্রী কিরেন রিজিজুনা এন.আই.তি. অরুনাচল প্রদেশবু অমদি অকক্ননা অসিগুম্লবা থাক ৱাংলবা ইন্সতিত্যুৎ অসিদা তম্লিবা লৈবাক শিনবা থুংবদগী মহৈরোয়শিংগী মফমদা হরাও তয়ামবা ফোঙদোকখি‍। শ্রী রিজিজুনা কেন্দ্রগী মহৈ মশিং মন্ত্রীবু মহৈরোয়শিংগী শাফবা ফীভম অমদি মহৈ মশিংগী য়াইফনবা ফীভম পীবিবগীদমক্তা অমদি এন.আই.তি. অরুনাচল প্রদেশপু শৌগৎপিবগীদমক্তা থাগৎপা ফোঙদোকখি‍। মহাক্না মহৈ মশিং মন্ত্রালয়বু প্রাইমারীদগী অৱাংবা থাক্কী মহৈ মশিংগী মওংদা হেন্না ফবা থৌওং পুরক্নবগীদমক নিউ এজুকেসন পোলিসী (এন.ই.পি.) পুথোরকপগীদমক্তা তৌবিমল খঙবা উৎখি‍। মহাক্না ইন্সতিত্যুৎ অদুবু হৌজিক ফাওবদা চঙশিল্লক্লিবা মখোয়গী খোঙফমগীদমক হরাও তয়ামবা ফোঙদোক্লদুনা মখোয়গী তুংগী লম্বীদা য়াইফবা ওইরসনু হায়না য়াইফ পাউজেল পীখি‍।

মেকানিকেল ইঞ্জিনিয়রিং ব্লোক অমদি বাইও-তেক্নোলোজী অমসুং কেমিকেল ইঞ্জিনিয়রিং ব্লোক লুপা করোর ১৭.৪০৫ চঙনা শাবা লোইশিনখি অমদি ব্লোক অমমমদা শাগৎলিবা মফমসি স্কোয়র মিতর ৭১৪৩নি‍। নৌনা শাবা ব্লোক অমমমসিদা মহৈরোয় ৩৬০ চনগদবা ক্লাস রুম ৭ (তরেৎ), ভর্চুএল ক্লাস রুমশিং য়াওবা লেবোরেতরী ৯ (মাপন), মীফম পাঙথোকফম কা ১ (অমা), অমদি ফেকল্তী কেবিন ২৭ (কুনতরেৎ) য়াওরি‍।

সেন্ত্রেল ইন্সত্রুমেন্তেসন ফেসিলিতী অমদি রিএক্সন ইঞ্জিনিয়রিং লেবোরেতরী মথঙশিৎনা লুপা করোর ০.৩৫ অমদি লুপা করোর ০.০৫ চঙনা ৱর্ল্দ বেঙ্ককী তি.ই.ক্যু.আই.পি.-৩গী শেন্থং মখাদা নৌনা শেমগৎখিবনি‍। লেবোরেতরী অনিমক্তা খ্বাইদগী ফবা থিজিন হুমজিনবগী অমদি তাথোক তাশিন তৌননবগী ফেসিলিতীশিং য়াওরি‍।

*****