ঙসি ৱার্ল্দ বেঙ্ক-আই.এম.এফ চহিগী মীফমদা হেল্থ অমসুং ফেমিলি ৱেলফিয়ারগী য়ুনিয়ন মিনিস্তর দোক্তর হর্স ভরধন্না ভর্চুএল ওইনা ৱা ঙাংখ্রে। মীফম অদুগী পান্দমদি “পুম্নমক্কীদমক মীওইবগী লৌশিং শীজিন্নদুনা খা এসিয়াগী চহিচা মনিংতমহনবা’ অমসুং “কোবিদ-১৯ তিকা অমসুং মরুওইবা অনা-লায়েংগী থবকশিংদা শেন থাদবা” হায়বা অসিনি।

লাইচৎ মনুংদা ভারতকী থৌদাংগী মতাংদা দোক্তর হর্স ভরধন্না হায়খি ভারতনা থবক পায়খৎপদা মী খুদিংমক কোনশিনবা অসিনা হৌজিক লাইচৎ লাকশিনবদা ঐখোয় লমজিংলি। কোবিদ লাইচৎনা অকাই-অতোই থোকহল্লে অদুবু হেন্না অৱাবা খাংবা ঙম্বা অমসুং তুংগীদমক থৌরাং তৌনবগী অনৌবা পারা অমা ঐখোয়দা তম্বীরে।মরী লৈনবশিংনা হোৎনবদগী হায়রিবা থবকশিং অসি পাংথোকপা ঙম্বনি। মালেমগী লাইচৎ অসিনা পীরিবা চৈথেং থেংন্নবা খুন্নাই অমসুং সরকারনা কন্না হোৎনবদগী ভারতনা অকনবা মওংদা থৌনা লৈনা থবক পায়খৎপনি।

ভারতনা কোবিদ-১৯ লাকশিনবদা লনাই কাংবুনা পায়খৎলিবা থবকশিং থাগৎলদুনা মহাক্না হায়খি লনাই ওইনা থবক পায়খৎলিবশিংগী অনৌবা থবকশিং, থবক ঙম্বা অমসুং খাংবা কনবা অসিনা কোবিদ থেংনবদা য়াম্না চাউনা মতেং পাংলি। মরাং কাইনা ফংহন্নবা পি.পি.ইশিং, এন-৯৫ মাক্সশিং, ওক্সিজেন, ভেন্তিলেতরশিং অমসুং তেস্ত তৌনবা খুৎলায়শিং জেত অমগী খোঙজেলদা পুথোক্লে। ২০২০গী মার্চ থাদা লেব অমা খক লৈরম্বদগী ঙসি ফাওবদা লেব ২০০০ রোম লৈদুনা মেদিকেলগী মচাক-মথুমশিং য়াংনা হেনগৎলকপা উরে, লেবশিংগী মনুংদা তঙ্খাই অমদি লনাইগীনি। আই.সি.য়ুগী খুদোংচাবশিং অমসুং আইসোলেসন সেন্তরশিংগী তঙ্খাই অমা লনাই কাংবুগীনি।

মহাক্না হায়খি লাইচৎ অসিনা মরম ওইদুনা মালেম্না মমাংদা অমুক্তা থেংনখিদ্রিবা খুদোংচাদবশিং মায়োক্নবা মরম্না, কোবিদ লাকশিন্নবা থবক খুদিংমক্তা ভারতনা ভর্চুএল ওইনা ইনফোর্মেসন তেক্নোলোজি শীজিন্নরি, খুদোংথিনিংঙাই ওইবা মফমশিংদা থিজিন্নবা অমসুং মশক খঙদোক্নবা অমসুং খোঙ্গুল লিনবা তেক্নোলোজি ইতিহাস অমসুং অরোগ্যাসেতু এপ্প শীজিন্নরে। তেস্ত তৌনবা আর.তি-পি.সি.আর এপ্প, মিং চল্লবা অনাবশিংগী ই-পাউ লৌনবা এপ্প অমসুং খুদিংমক পুনশিল্লবা অমতা ওইরবা কোবিদ পোর্তেল শীজিন্নরে।

মহাক্না মখা তানা হায়খি হৌজিক ভারতমচা মিল্লিয়ন ১৭০ হেনবনা অরোগ্যাসেতু এপ্প শীজিন্নদুনা মসি মালেমদা খ্বাইদগী য়াম্না লৌথবা এপ্প অমা ওইরে। কোবিদ-১৯ নত্তবা অনা-লায়েংগী থবকশিং পাংথোক্নবা ৱেবতা য়ুম্ফম ওইবা তেলি-কন্সলতেসনগী থবক হৌরে। হৌজিক ফাওবদা তেলি-কন্সলতেসন মিল্লিয়ন ০.৬০ হেন্না পাংথোকখ্রে অমসুং মীওই কয়া শরুক য়ারক্লি।

লাইচৎশিং থেংন্নবা ভারতনা থৌরাং তৌরিবশিং অমসুং মীয়ামদা মমল হোংবা অনা-লায়েংগী থবকশিং ফংহন্নবা পায়খৎলিবা থবকশিংগী মতাংদা য়ুনিয়ন হেল্থ মিনিস্তরনা হায়খি অত্মনির্ভর ভারত অভিয়ান(মশাগী ওক্নবা পুথোকচবা ভারত শেমগৎনবা থবক)গী মখাদা ভারতকী জি.দি.পিগী চাদা ১০ গা মান্নবা য়ু.এস দোল্লর বিল্লিয়ন ২৭২গী অখন্নবা শেন-থুমগী থৌরাং অমা ঐখোয়না পায়খৎলে। মসিদা তুংদা লাক্কদবা লাইচৎশিং থেংন্নবা ভারতনা থৌরাং তৌনবা মীয়ামগী হকশেলগী থবকশিংদা শেন থাদবা হেনগৎহন্নবা অমসুং হকশেলগী থবকশিং অওনবা পুরক্নবা শরুক অমা য়াওরি।

মহাক্না হায়খি মমল হোংবা তিকা ফংহনবা অমসুং তিকা অদু মীচং-মীখাই নাইদনা য়েন্থোক্নবা হোৎনবা অসি হৌজিক কোবিদ-১৯গী থিজিল্লিবা অসিগী পান্দমনি। হৌজিক ভারতকী ফার্মা কম্পেনি অহুম মপান লৈবাকশিংগী/লৈবাক মনুংগী রিছর্স ইন্সতিতুৎশিংগা পুন্না থবক তৌমিন্নদুনা তিকাগী চাংয়েং কন্না চৎথরি।

মহাক্না মখা তানা হায়খি মাংজৌন্না ঐখোয় তিকা থাবগী অকনবা থবক পায়খৎতুনা লৈবা অসি তশেংনা ভারতকী অচৌবা খুদোংচাবনি। হৌজিক ঐখোয়না মালেমদা খ্বাইদগী চাউবা তিকা থাবগী থবক পায়খৎলি, চহি অমদা নৌনা পোকপা অঙাং মিল্লিয়ন ২৭ তিকা থানবা পান্দম থম্লি। ঐখোয়গী মী খুদিংমক তিকা থানবা থবক্কী মখাদা তিকা পুথোক্নবা, থম্নবা অমসুং য়েন্থোক্নবগী ঐখোয়গী মতিক চারবা মচাক-মথুমশিং লৈরে, চহি অমদা ঐখোয়না চাউরাক্না অঙাংশিংদা দোজ মিল্লিন ৬০০ রোম কাপ্লি/পীথক্লি।

পোলিও মুৎথৎনবা ঐখোয়না মাইপাক্লবা থবকশিং লৈরে অমসুং অঙাং মিল্লিয়ন ৩৩০ রোম কোনশিন্দুনা হন্দক মালেমদা খ্বাইদগী চাউবা মিজল-রুবেল্লা কেম্পেন পাংথোকখ্রে। মতম চানা মশক খঙদোক্লবা মরুওইবা কাংলুপশিংদা কোবিদ-১৯ তিকা থানবা লৈবাক্কী পান্দম অসি থবক ওইনা ফজনা পাংথোক্নবা তিকা থাবগী থবকশিংদা ঐখোয়গী হায়রিবা লৌশিং অমসুং খ্বাইদগী ফবা থবকশিং অমসুং অকনবা ঐখোয়গী অনা-লায়েংগী থবকশিং অমসুং অকনবা আই.তিগী ঙাক্লৌশিং শীজিন্নগনি। তিকা য়েন্থোকপগী থবকশিংদা ভারত সরকারনা আই.তি প্লেতফোর্ম ই-ভিন(ইলেকত্রোনিক ভেকসিন ইন্তিলিজেন্ত নেতৱার্ক)শীজিন্নগনি।

দোক্তর হর্স ভরধন্না হায়খি মী খুদিংমক তিকা থানবা ভারত সরকারনা থিজিনবা অমসুং শুংবগী লমদা মরুওইবা মিৎয়েং চংলি। ঐখোয়গী প্রধান মন্ত্রীগী লমজিং মখাদা ঐখোয়না তিকাগা মরী লৈনবা থবকশিং পাংথোক্নবা নেসনেল এক্সপার্ত গ্রুপ অমা লিংখৎলে অমসুং খুঙ্গং অমসুং মনুং হুঞ্জিনবা মফমশিংদা তিকা ফংহন্নবা অনৌবা থৌরাংশিং পুথোক্লি। ভারতকী ৱারি অসি মতম পুম্নমক্তা পুক্নিং থৌগৎনিঙাই ওইরি অমসুং হৌখিবা চহি ২০ অসিদা ঐখোয়গী মীয়ামগী হকশেলগী ফিবম ফগৎনবা ঐখোয়না অচৌবা থবক কয়া পায়খৎলে। হৌজিক মরুওইনা মালেম পুম্বদা খ্বাইদগী য়াম্না তিকা পুথোক্তুনা কোবিদ-১৯ থেংন্নবা ভারতনা মরুওইবা থৌদাং লৌগনি।

****