তোকিও ওলেম্পিক্স অমসুং পেরালেম্পিক্সশিংদা মিৎয়েং থমদুনা, নবেম্বর ১দগী লৈবাক শীনবা থুংনা লৈরিবা সাই ত্রেনিং সেন্তরশিংদা শান্ন-খোৎনবগী থবকশিং মখা চৎথরগনি।

কোবিদ-১৯গী ফিবম য়েংলগা অমসুং শান্নরোয়শিং ভাইরসতগী ঙাকথোক্নবা, মখোয়গী ত্রেনিং সেন্তরশিংদা লাক্নবা এন.সি.ও.ইশিং/সাই ত্রেনিং সেন্তরশিংগী শান্নরোয়শিংগী চৎথোক-চৎশিনগী থৌরাং তৌনবা স্পোর্তস ওথোরিতি ওফ ইন্দিয়ানা ৱারেপ লৌরে। চহি অসিগী মার্চ থাদা খঙহৌদনা লাকপা কোরোনাভাইরসকী ফিবম্না মরম ওইদুনা শান্নরোয়শিং ময়ুমদা থাখিবদগী থবক অসি পায়খৎলকপনি। কিলোমিতর ৫০০ হেন্না থাপ্পা মফমদগী লাক্কদবা শান্নরোয়শিংদা এয়র তিকেৎ পীনবা অমসুং কিলোমিতর ৫০০গী মখাদা লৈবা মফমদগী লাক্কদবশিংনা থার্দ এ.সিগী ত্রেন তিকেৎ পীবা হায়না সাইনা ৱারেপ লৌরে।

সাই সেন্তরশিংদা ত্রেনিং মখা চৎথনবা বাইও-ববল শেম্নবা, এন.সি.ও.ইশিং/সাই ত্রেনিং সেন্তরশিংদা কোচশিং অমসুং অতৈ স্তাফশিং লৈফম পীনবা সাইনা ৱারেপ লৌরে। রিগুলার অমসুং কন্ত্রেক স্তাফশিং সরকারনা শেন পুথোক্লগা লৈফম পীগনি।

সাই সেন্তরশিংদা লাক্ত্রিঙৈ মমাং অমসুং লৈরবা মতুংদা ইনগদবা সাই এস.ও.পিশিংগী মতাংদা শান্নরোয়শিং অমসুং মখোয়গী মমা-মপাশিংদা সাই ওথোরিতিনা খঙহনখ্রে। করিগুম্বা শান্নরোয়শিংনা মখোয়গী ইমুং-মনুংগী মীওইশিংগা দিৱালি পাংথোকপা পাম্লবদি শান্নরোয়শিংনা দিৱালি মতুংদা সাই সেন্তরশিংদা লাকপা য়াগনি, মখোয়না বাইও-ববল মনুংদা হেক লৈখিবগা মপান্দা চৎথোক্লবদি মখোয়গী হকশেল খুদোংথিনিংঙাই ওইগনি।

চহি অসিগী মার্চগী অঙনবা শরুক্তা কোরোনাভাইরস লাইচৎ লাকপদগী অমসুং সরকারগী পাউতাকশিং য়েংলগা, সাইনা চেকশিন-থৌরাংশিং লৌখৎখি অমসুং রিজনেল সেন্তরশিংগী লুচিংবশিংদা পাউতাকশিং পীখি; মার্চ ১৭দগী এন.সি.ও.ইশিং অমসুং সাই ত্রেনিং সেন্তরশিংদা খুদক্তা ত্রেনিং খুদিংমক লেপখি অমসুং শান্নরোয়শিংদা খুদোংচাদবা থোক্তনবা হোস্তেলশিং মার্চ ২০ ফাওবা হাংখি। কিলোমিতর ৪০০ হেন্না লাপ্পা মফমদা লৈবা শান্নরোয়শিং মথক্তা হল্লক্নবা অমসুং কিলোমিতর ৪০০গী মনুংদা লৈবশিংনা এ.সি ৩-তয়র ত্রেন্দা লাকহন্নবা খুদোংচাবশিং পীনবা মরী লৈনবা সাই সেন্তরশিংগী রিজনেল দিরেক্তরশিংদা খঙহনখ্রে।

****