সাইন্স অমসুং তেক্নোলোজী, হকশেল অমসুং য়াইফ-য়ুম্বাল অমসুং আর্থ সাইন্সেসকী মন্ত্রী দা. হর্শ বর্ধন্না ঙসি সি.এস.আই.আর.না ইন্দস্ত্রী, অতোপ্পা সরকারগী বিভাগশিং অমসুং মন্ত্রালয়শিংগা খুৎশম্নদুনা পাঙথোকপা মশিং য়াম্লবা কোবিদ-১৯গী ক্লিনিকেল ত্রাইএলশিংগী মরমদা অকুপ্পা ইপাউ পীরিবা ৱেবসাইৎ অমা হৌদোকখ্রে।

ক্যুর্দ নত্রগা সি.এস.আই.আর. অসর্দ রিপর্পোজ দ্রগস, কৌবা ৱেবসাইৎ অসিনা হৌজিক চত্থরিবা ত্রাইএলশিংগী স্তেজ, চুংশিন্নরিবা ইন্সতিত্যুসনশিং অমসুং ত্রাইএলশিং অসিদা মখোয়না লৌরিবা থৌরাং অমসুং অতোপ্পা অকুপ্পা মরোলশিং য়াওবা লোয়ননা দ্রগশিং, দাইগ্নোস্তিকশিং অমসুং দিভাইসশিংগী ই-পাউ ফংহল্লি। সাইৎ অসি https://www.iiim.res.in/cured/ নত্ত্রগা http://db.iiim.res.in/ct/index.php দা চংবা য়াগনি।

হৌজিক কোবিদ-১৯গী মায়োক্তা লান্থেংনরিবা অসিদা সি.এস.আই.আর.না মাং থাদুনা হোৎনরিবশিং অমসুং ক্লিনিকেল ত্রাইএলশিং হেন্না মরু ওইনা লৌরিবা, মখোয়গী রিগুলেতরী এপ্রুবেলগীদমক দেতা জেনরেৎ তৌরিবা অমসুং কৈথেলদা দ্রগশিং অমসুং দাইগ্নোস্তিকশিং পুথোকপদা মতেং পাংলিবা অসি মন্ত্রীনা থাগৎখি। মহাক্না রিপর্পোজ দ্রগশিং শীজিন্নবগী খোঙথাং অমসুং অনৌবা প্রোসেসশিং অমসুং ইন্দস্ত্রীদা শিন্নবগী খুত্থাংদা কোবিদ-১৯ দ্রগশিং সিন্থেসাইজ তৌরিবা অসিবু থাগৎখি।

সি.এস.আই.আর.না কোবিদ-১৯বু লায়েংবা ঙম্নবা এন্তি-ভাইরেলশিং লোয়ননা হোস্ত-দিরেক্তেদ থেরাপীশীংগী মখল কয়াগী অপুনবা ক্লিনিকেল ত্রাইএলশিং পাঙথোক্লি। সি.এস.আই.আর.না আয়ুশ মন্ত্রালয়গা লোয়ননা আয়ুশ দ্রগশিংগী ক্লিনিকেল ত্রাইএলশিংসু পাঙথোক্লি অমসুং তোঙান তোঙানবা পাম্বীদা বেজ তৌবা কম্পাউন্দশিং অমসুং কম্বিনেসনশিংদা য়ুম্ফম ওইবা আয়ুশ প্রোফাইলেক্তিক্স অমসুং থেরাপিয়োতিক্সকী খুদোংথিবা থোক্তনবা অমসুং কান্নবা ফংনবা ত্রাইএলশিং চত্থখ্রে ; ৱিথেনিয়া সোম্নিফেরা, তিনোস্পোরা কোর্দিফোলিয়া + পাইপর লোঙ্গম (কম্বিনেসন্দা), গ্লাইসিরাইজা গ্লেব্রা, তিনোস্পোরা কোর্দিফোলিয়া  অমসুং অধাতোদা ভসিকা (তোঙান তোঙাননা অমসুং কম্বিনেসন্দা) অমসুং আয়ুশ-৬৪ ফোর্ম্যুলেসন য়াওনা ক্লিনিকেল ত্রাইএলশিং অসি খুদোংথিবা থোক্তনবা অমসুং কান্নবা ফংনবা চত্থরি।

কেদিলাগা লোয়ননা চুংশিন্নদুনা কোবিদ-১৯গী মায়োক্তা চত্থরিবা সি.এস.আই.আর.গী মরু ওইবা ত্রাইএল অসি সেপসিবেক (এম.দবল্যু.) না ওইরি। কোবিদ-১৯গী ফীভম লুনা নারিবা মীওইশিংদা মাই পাক্না ফেস ২ ক্লিনিকেল ত্রাইএল পাঙথোকপা লোইখ্রে, অমসুং হেন্না চাউবা ফেস ৩ ত্রাইএল চত্থনবা শেম-শারে। মখা তানা, সন ফার্মা অমসুং দি.বি.তি.গা লোয়ননা কোবিদ-১৯ নাবা মীওইশিংগী ফাইতোফার্মাকোতিকেল এ.ক্যু.সি.ঐচ.কী ফেস ২ ত্রাইএল চত্থরি।

রিপর্পোজ দ্রগশিং অমসুং বেক্সিনশিংগী ক্লিনিকেল ত্রাইএলশিংগী মথক্তা সি.এস.আই.আর.না দাইগ্নোস্তিক্স অমসুং দিভাইসশিংগী ক্লিনেল ত্রাইএলশিংসু পাংথোক্লি।   

সাইন্তিস্তশিংনা হৌজিক ফাওবগী ওইনা দ্রগশিং অমসুং বেক্সিনশিং পুথোক্নবা থবক পাইখৎলবসু করিগুম্বা ঐখোয়না কোবিদ-১৯ অসি মাইথীবা পীসি হায়রবদি সোসিএল দিস্তেন্সিং থম্বা, মাস্কশিং উপ্পা অমসুং অতোপ্পা চেকশিন থৌরাংশিং লৌখৎপা তঙাই ফদে অমসুং মপুংফানা ঙাক্না চৎপা মথৌ তাই হায়না দা. হর্শ বর্ধন্না ফোঙদোকখি।

দা. শেখর সি. মান্দে, সেক্রেতরী, দি.এস.আই.আর অমসুং দি.জি.- সি.এস.আই.আর., দা. রঞ্জনা অগর্ৱাল, দিরেক্তর এন.আই.এস.তি.এ.দি.এস. অমসুং দা. গীতা বানি রায়সম, সিনিয়র প্রিন্সিপল সাইন্সিস্ত এন্দ হেদ, সাইন্স কম্ম্যুনিকেসন এন্দ দিসসিমিনেসন দিরেক্তোরেৎ সি.এস.আই.আর. ঐচ. ক্যু.না থৌরম অদুদা শরুক য়াখি। সি.এস.আই.আর.গী দিরেক্তরশিং, দিপার্তমেন্তকী হেদশিং অমসুং ক্লিনিকেল ত্রাইএলশিংদা থৌদাং লৌরিবা সাইন্তিস্তশিংনা ভর্চ্যুএল ওইনা থৌরম অদু শরুক য়াখি।   

*****