নেস্নেল জল জীবন মিসন্না ইলেক্ত্রোনিক্স অমসুং ইনফোর্মেসন তেক্নোলোজীগী মন্ত্রালয়গা (এম.ই.আই.তি.ৱাই) খুৎশম্নদুনা খুঙ্গংগী থাক্তা শিজিন্ননবা অনৌবা, মোদ্যুলার ওইবা অমসুং কোস্ত-ইফেক্তিব ওইবা ৱারোইশিন পুথোক্তুনা ‘স্মার্ত ৱাতর সপ্লাই মীজর্মেন্ত অমসুং মোনিতরিং সীস্তেম’ অমা শেম্নবা আই.সি.তি. গ্রান্দ চেলেঞ্জ অমা হৌদোকখ্রে। মসিদা য়াওবগী চে-থারকপগী অরোইবা তারিখ অসি ওক্তোবর ১২, ২০২০নি। মসিগী ওইনা ভারতকী তোঙান-তোঙানবা স্তার্ত-অপ, এম.এস.এম.ই., ভারতকী কম্পেনীশিং, ভারতকী এল.এল.পি.শিংদগী অপুনবা ৱাহৌদোক ২১৩ লাকখি অমসুং এম.ই.আই.তি.ৱাই.না খনগৎলবা জ্যুরী কম্মিত্তী অমনা য়েংশিল্লবা মতুংদা মতিক চাবা ৱাহৌদোকশিং খনগনি। মসিগী মিৎয়েং চাউবা মিসন অসিনা ইনফ্রাস্ত্রকচর খক্তা শেম্বগী মহুত্তা মসিনা পীগদৌরিবা সেবাদা ওইনা মিৎয়েং চঙই। মসিগী তেক্নোলোজীগী ওইবা চাংয়েংনবা মখল অসিনা খুঙ্গংগী মফমশিংদা তুং কোইনা চৎকদবা ঈশিং পীবগী পথাপ অমা লৈহনবগী অচৌবা খুদোংচাবা অমা পীগনি।

মসিগী অচৌবা চাঙয়েংনবা অসিনা ভারতকী মতিক লৈবা আই.ও.তি. ইকোসীস্তেমগী কান্নবা লৌদুনা খুঙ্গংগী মফমশিংদা ঈশিং পীবগী থৌওং অসিগী চাং ওনবা অমসুং য়েংশিনবা স্মার্ত ৱাতর সপ্লাই ইকোসীস্তেম অমা শেমগনি। মসিগী চাংয়েংনবা অসিনা জল জীবন মিসনগী পান্দম অসিগা মরী লৈননা থবক তৌবগী খুদোংচাবা পীগনি অমসুং লৈবাক অসিগী খুঙ্গংগী ইমুং খুদিংদা মথৌ তৌবা তোতি পাইপকী খুত্থাংদা থক্নবা ঈশিং ফংহনবগী থৌওং পাঙথোকহনগনি।

মসিগী চাউরবা চাংয়েংনবা অসিনা ৱাখল পুথোকপগী থাক, প্রোতোতাইপ শেম্বগী থাক, থবক ওইনা শিজিন্নহনবা হৌবগী থাক কয়াদা ঙাক্লৌ পীগনি। মসিগী চাংয়েং ওইনা পাঙথোকপা অহানবা থৌওংশিং অসি খুঙ্গং ১০০দা পাঙথোক্কনি। খ্বাইদগী ফজবা ৱারোইশিন পুথোকপদা লুপা লাখ ৫০গী শেলগী মনা পীগনি অমসুং অনিশুবা তাবা অদুদা লুপা লাখ ২০গী শেলগী মনা পীগনি। মাই-পাকপা থৌওং পুথোকপশিংদা এম.ই.আই.তি.ৱাই.না শৌগৎপা ইনক্যুবেতরশিংদা ৱারোইশিন অসি মখা তানা শেমদোক্নবা থবক তৌবগী খুদোংচাবা পীগনি। মসিনা আত্মানির্ভ্র ভারত, দিজিতেল ইন্দিয়া অমসুং মেক ইন ইন্দিয়াগীগুম্বা খোঙথাংশিংগী ৱাখল্লোন অমসুং থবক-থৌরমশিংদা শাফু পীগনি।

কেন্দ্র সরকারগী ফ্লেগশিপ প্রোগ্রাম অমা ওইরিবা জল জীবন মিসন (জে.জে.এম.) অসি রাজ্যশিংগা খুৎশম্নদুনা ইং ২০২৪গী মনুংদা খুঙ্গংগী ইমুং খুদিংদা মথৌ তৌবা তোতি ঈশিং কন্নেক্সন (এফ.ঐচ.তি.সি.) ফংহনবগী পান্দমগা লোয়ননা পাঙথোকপনি। প্রোগ্রাম অসিনা মতম শাংনা য়ূম্থোং খুদিংগী থাক্তা সেবা ফংহনবগী, হায়বদি মতিক চাবা চাং অমসুং মগুন লৈবা ঈশিং পীবা, থৌওংদা মিৎয়েং চঙলি। মসিনা মরম ওইদুনা প্রোগ্রাম অসিবু পথাপ নাইনা য়েংশিনবা অমসুং সেবাশিং অসিগী মগুন লৈহন্নবা সর্বিস দেলিবরী দেতা মথন্নতা খঙবা ঙম্নবা মতমগা চানবা তেক্নোলোজী শিজিন্নবগী তঙাই ফদবা অমা লৈহল্লি। ঈশিং পীবগী ইনফ্রাস্ত্রকচরশিং দিজিতাইজ তৌবা অসিনা লৈবাক অসিনা থেংনরিবা খ্বাইদগী চাউবা শিংনবা খরগী ৱারোইশিন পুরকপা ঙম্বগী মতিক লৈ। অদুগা হেন্না মরু ওইবদি, মসিনা তুংদা থেংনরক্কদবা শিংনবা কয়া খঙদোকপা ঙমহন্দুনা ৱারোইশিন পুরকপদসু তেংবাংগনি।

*****