সাই লখনৌদা ওক্তোবর ১০দগী ভারতকী নুপীশিংগী রেস্তলিং তিমগী নেসনেল কেম্প হৌখ্রে। চহি অসিগী মার্চ থাদগী কোরোনাভাইরস লোকদাউন থম্লকপদগী নুপী রেস্তলরশিংগী ত্রেনিং কেম্প পাংথোকপা মসিনা অহানবনি।শান্নরোয়শিং লখনৌদা থুংলখ্রে অমসুং মখোয় লনাই ওইনা ত্রেনিং হৌদ্রিঙৈ মমাংদা নুমিৎ ৭গী ক্বারেনতাইন পাংথোক্কনি। কেম্পে অসি ওক্তোবর ১০দগী দিশেম্বর ৩১ ফাওবা পাংথোক্কদবনি অমসুং রেস্তলর ১৬ অমসুং স্তাফ ৪ শরুক য়াগনি। সাই লখনৌদা কেম্প শরুক য়ারিবশিং লৈগনি।

কোবিদ-১৯ শন্দোরকপদগী ঙাকথোক্নবা পান্দমদা ত্রেনিং য়াওগদবা রেস্তলরশিং, থবক মতেং পাংলিবা স্তাফশিং অমসুং ওফিসতা লাকপা মীওইশিং তোখাইনা থম্নবা শান্নরোয়শিংগীদমক বাইও-ববল অমা শেমগৎনবা সাই লখনৌ কেম্পসতা অকনবা চেকশিন-থৌরাংশিং পায়খৎলে। মসিগী থবক অসি গ্রিন জোন, য়েল্লো জোন অমসুং রেদ জোন হায়না মচু অমগী কোদ শেমদুনা পায়খৎলে। অশোই-অঙাম থোক্তনবা চৎন-পথাপশিং ঙাক্নবা, ওফিসতা লাকপা মীওই খুদিংমক লাইওংশিং উৎপরা হায়না য়েংগনি।

ভারতকী নুপীগী রেস্তলিং তিমগী চীফ কোচ, কুলদিপ মালিক্না হায়খি রেস্তলিং ভারত্তা মরুওইবা মশান্না অমনি। কোরোনাভাইরসকী চেকশিন-থৌরাংশিনা মরম ওইদুনা, ত্রেনিংগী অহানবা চয়োলদা ঐখোয়না থাপ্না লৈনগনি অমসুং তুংদা ঐখোয়না চাং নাইনা ত্রেনিং পাংথোক্কনি। নোংমাইজিং ফাওবদা, কেম্পরশিংগী কোবিদ রিপোর্তশিং ফংলগনি অমসুং নেগেতিপ ওইগনি হায়বগী থাজবা লৈরি, মরম অদুনা চাং নাইনা ত্রেনিং পাংথোক্নবা থৌরাং পুম্নমক ফজনা শীনগনি হায়বগী থাজবা ঐখোয়দা লৈরি। দিশেম্বরদা পাংথোক্কদৌরিবা ৱার্ল্দ চেম্পিয়নসিপতা ভারতনা মেদল য়াম্না ফংগনি হায়বগী থাজবা থম্লি। 

খুদোংচাবশিং পীদুনা চেকশিন-থৌরাং পায়খৎতুনা মমিং লৈরিবা হোস্তেলদা কেম্পরশিংগী লৈফম পীরে। শান্নরোয়শিংগী হকচাং শাগৎপগী চাং অমসুং ওক্সিজেনগী চাং লেপ্তনা ওল্লি।

ৱার্ল্দ চেম্পিয়নসিপ ২০১৮গী ব্রোঞ্জ মেদল ফংলবী অমসুং ২০১৯গী অর্জুন এৱার্দ ফংলবী পুজা ধান্দানা হায়খি কাদা পীরিবা খুদোংচাবশিং য়াম্না ফৈ অমসুং ঐখোয়দা খুদিংমক ফংহল্লে। ঐখোয় নেসনেল কেম্পরশিংনি হায়বা ঐখোয়দা তশেংনা ফাওরে। ঐখোয়গী চানা মথেলশিংগী মতাংদা ঐখোয়দা নুমিৎ খুদিংগী অয়ুক্তা পাউ খঙহল্লে, খুদিংমক য়াম্না মওং তারে অমসুং মতিক চারে অমসুং মফম অসিগী চীঞ্জাকশিং য়াম্না ফৈ। হৌজিক পীরিবা খুদোংচাবশিং অসিগা লোয়ন্না ঐখোয় অপেনবা পোক্লে অমসুং ঐখোয়গী খ্বাইদগী ফবা থাক্তা শান্নবা পুক্নিং থৌগৎলে।

শম্নদনা শান্নরোইশিং অমসুং স্তাফশিংদা অচা-অথকশিং য়ৌহন্নবা কেম্পসতা চীঞ্জাকশিং নিংথিনা পুথোক-পুনশিন তৌরে।গ্রিন জোনদা চঙগদবা মীওই খুদিংমক কোবিদ তেস্ত তৌরে। চাক-ইন্সাং থোঙবা অমসুং পুথোক-পুনশিন তৌবদা য়াওরিবা মীওই খুদিংমক কেম্পস মনুংদা লৈরি।

নুপীগী কেজি ৫তদা বিনেস ফোগাতনা নুপীগী রেস্তলিংদা ভারতনা হৌজিক ফাওবদা ওলেম্পিক্কী কোতা অমা ফংলে। মথং চহিদা পাংথোক্কদৌরিবা ক্বালিফিকেসন তুর্নামেন্তশিং হায়বদি এসিয়ান ক্বালিফিকেসন তুর্নামেন্ত অমসুং ৱার্ল্দ ক্বালিফিকেসন তুর্নামেন্তদা লেমহৌরিবা নুপীগী রেস্তলিংগী কোতা মঙাদা ওলেম্পিক্কী কোতা অমা ফংনবা ভারতকী খুদোংচাবা অমা ফংলগনি।

*****