হকশেল অমসুং য়াইফ য়ুম্বালগী কেন্দ্র মন্ত্রী দাঃ হর্শ বর্ধন্না মহাক্কী চেয়রমেন ওইবগী থৌদাংগা লোয়ননা ভিদিও কনফরেন্সিংগী খুত্থাংদা ইন্দিয়ন রেদ ক্রোস সোসাইতী অমসুং সেন্ত জোহন’স এম্ব্যুলেন্সকী চহিগী ওইবা মীফমদা শরুক য়াখ্রে।

ভারতকী রাস্ত্রপতি অমসুং ইন্দিয়ন রেদ ক্রোস সাইসাইতী অমসুং সেন্ত জোহন এম্ব্যুলেন্স (ইন্দিয়া)গী প্রসিদেন্ত শ্রী রাম নাথ কোবিন্দজীদা মহাক্না আই.আর.সি.এস.তা লেপ্তনা শৌগৎপগীদমক থাগৎপা ফোঙদোক্লদুনা হায়খি, “আই.আর.সি.এস.তা অসিগুম্বা মখলগী ভর্চুএলগী খুথাংদা মীফম পাঙথোকপা অসি অহানবনি। অদুম ওইনমক ঐখোয় পুম্নমক্না খঙলিবগুম্না মসিগী চৎনবী অসি ঐখোয়গী পুন্সিগী ‘অনৌবা মহৌশা’নি। হৌজিক চৎলিবা কোবিদ-১৯গী লায়চৎ অসিনা ঐখোয় পুম্নমকপু অসিগুম্বা মওংদা হিংহল্লে”।

আই.আর.সি.এস.না মীওই কয়াগী পুন্সি কনবা অমসুং মীয়ামগী কাঙলুপ অচৌবশিংগী পুন্সিবু নুংঙাইহনবগী চহি ১০০শুরকপা অসিদা মসিগী মেম্বরশিংবু থাগৎপা ফোঙদোক্লদুনা মহাক্না মেম্বরশিংদা থা তরা চঙশিল্লক্লবা লায়চৎ অসিগী মতাংদা পুক্নিং চীংশিনখি। মহাক্না মখা তাবা ওইনা অসুম্না হায়খি, “ লৈবাক খুদিংমক্না মসিগী চৈথেং অসি মাগী মাগী ওইবা মওংদা হন্থহন্নবা হোৎনরি। ভারতকী ওইনসু কেন্দ্র সরকারনা য়াম্না ঙন্না থবক পায়খৎপা হৌখি অমসুং মদুদগী হৌনা লায়চৎ অসিগী মপুং ওইবা চৈথেংবু হন্থহন্নবা হায়দুনা খোঙথাং কয়া অমা পায়খত্তুনা লাক্লি”।

প্রধান মন্ত্রী শ্রী নরেন্দ্র মোদীজীবু মহাক্কী থৌনা ফনা লৈবাকপু লুচিংবা অমসুং লৈবাক অসিবু কোবিদকী লায়চৎ অসিদগী মাই পাক্না থোক্লকপা ঙম্নবা খোঙথাংশিংগী চুক্লি পায়রিবা অসিবু থাগৎপা ফোঙদোক্লদুনা মহাক্না ভারতকী থৌনা ফরবা কোরোনাগী লান্মীশিংনা তেংবাংখিবা কয়াগী মতাংদা মীয়ামদা নীংশিনহনখি। “ঐখোয়গী প্রধান মন্ত্রীনা হায়বগী মতুং ইন্না ভারতকী কোবিদ-১৯ থেংনবগী থৌওং অসি মীয়াম্না পাঙথোকপনি অমসুং মসিদা ঐখোয়গী কোরোনাগী লান্মীশিংনা ইথিল পীরি। ঐহাক্না মতাং অসিগী খুদোংচাবা লৌদুনা লৈবাক অসিগী কোরোনাগী লান্মীশিংবু ইকায় খুম্নবা উৎলি অমসুং মখোয়বু কোবিদ-১৯গী লায়োক্তা লান্থেংননবা পুক্নিং থৌগৎলিবা মখোয়গী ইমুং-মনুংগী মীওইশিংবুসু ঐহাক্না ইকায় খুম্নবা উৎলি। ঐখোয়না পুন্না হোৎনমিন্নবা অসিনা মীওই কয়া অমগী পুন্সি কনবা ঙম্লে। ঐখোয়না থৌওংশিং অসি লেপ্তনা পাঙথোকখিগনি অমসুং মীয়াম্বু ভাইরস অসিদগী ঙাকথোক্কনি”, হায়না মহাক্না হায়খি।

মহাক্না মখা তাবা ওইনা লায়না অসিবু লেপহনবা ঙম্বা অমসুং কোবিদকী মায়োক্তা পাঙথোক্লিবা জন আন্দোলনগী য়ুম্ফম ওইরবা মতিক মগুন লৈরবা সোসিএল বেক্সিনগী মতাংদা নীংথিনা তাকপা ওইনা অসুম্না ফোঙদোকখি, “ফুৎ ৬কী অরাপ্পা থম্বা, মরু ওইনা মীয়াম তিনবা মফমদা, অসিনা সরকারগী খ্বাইদগী পাম্বা পান্দম ওইরিবা মীওইবগী পুন্সিগা লোয়ননা পুন্সি মহিংসু কনবা ঙমগনি”।

আই.আর.সি.এস.না মখোয়গী ঈগী সেন্তরশিং অমসুং ঈগী সেবাশিংগী খুত্থাংদা লৌরিবা থৌদাংশিং অসিদা অপেনবা ফোঙদোক্লদুনা মহাক্না হায়খি, “আই.আর.সি.এস.না মখোয়গী ঈগী সেন্তরশিং অসিগী খুত্থাংদা মপান্দা থোক্লক্তুনা মীয়ামগী ওইনা ঈগী অমসুং ঈগা মরী লৈনবা হীরমশিংদা অৱাৎপা লৈতনবা থবক তৌখি। মশানা ঈ পীনিংবা মীওইশিংবু পুক্নিং থৌগৎপগী অনৌবা থৌওং পাঙথোকপগা লোয়ননা স্তাফ, মেনেজর অমসুং বলন্তিয়রশিংনা খোঙফম চেৎনা থবক তৌবশিং অসিনা লৈবাক শিনবা থুংনা ২৪x৭গী ওইবা ঈগী খুদোংচাবা পীবা ঙমহল্লি”। মহাক্না থালাসেমিয়া সেন্তর অমসুং এন.ঐচ.ক্যু.গী ব্লদ সেন্তরশিংদা ২৪x৭গী কন্ত্রোল রুম অমসুং রেদ ক্রোসনা শাবা অমসুং ঈগী তঙাই ফদবা লৈবা মীওইশিংনা ঈ শোইদনা ফংগনি থাজবা লৈদুনা ঈ য়ৌরক্ত্রিঙৈদা  অপাম্বা য়ুনিৎ কনশিনবা য়াহনবা মোবাইল এপ, “ই.-ব্লদ সর্বিস”কুম্বা অনৌবা থৌওং কয়া পুথোরকপগীদমক্তা মেম্বরশিংবু থাগৎপা ফোঙদোকখি।

ইন্দিয়ন রেদ ক্রোস অমসুং সেন্ত জোহন এম্ব্যুলেন্স অসি খুন্নাইদা য়ুমফম ওইবা ফর্স্ত-এদ পীবশিংনি হায়না পল্লদুনা মহাক্না লুপ অসিনা নোংচুপ বেঙ্গোল অমসুং ওরিশাদা হন্দক্তা থোকখিবা অমফান সাইক্লোন অমসুং অসম, বিহার অমসুং উত্তর প্রদেশকী ইচাউদা তেংবাংখিবগী থৌওংশিংবু থাগৎপা ফোঙদোকখি। “ইন্দিয়ন রেদ ক্রোস সোসাইতী অসিনা মখোয়গী বলন্তিয়রশিংবু ত্রেনিং তৌদুনা অমাঙ-অতা থোকপা মতমদা তেংবাংবা ঙম্নবা, তেংবাংবগী পোত্থোকশিং শেম-শাদুনা অমসুং মসিগী চৈথেং অসি হনথহন্নবা খঙফম থোকপা ৱাফমশিংগী মতাংদা তাকপী তম্বীবগী থৌওং কয়া পাঙথোক্তুনা শেম-শাদুনা লৈরি। সোসিএল ইমর্জেন্সী রেস্পোন্স বলন্তিয়র (এস.ই.আর.ভি.) প্রোজেক্ত অসি চাওথোকহন্দুনা লোকেলগী বলন্তিয়রশিংদা ফর্স্ত-এদ অমসুং দিজাজতর মেনেজেমেন্তকী মতাংদা তাকপী তম্বীরি”।

তেংবাংবগী পোত্থোকশিং অসি নেস্নেল হেদক্বার্তরগী রিজনেল ৱেয়র্সাউস্তা থম্বতা নত্তনা অমাঙ-অতা থোক্কনবা অমসুং ঈশিং-ইচাউ থোক্কনবা রাজ্যশিংগী ৱেয়র্সাউস্তসু থম্লি হায়না মন্ত্রীদা পাউদমখি।

মহারাস্ত্রাগী রাজ্যপাল শ্রী ভগৎ সিংহ কোশিয়ারী; হিমাচল প্রদেশকী রাজ্যপাল শ্রী বন্দারু দত্তাত্রেয়া; মনিপুরগী রাজ্যপাল শ্রীমতি নাজমা হেপ্তুল্লাহ; উত্তরাখন্দগী রাজ্যপাল শ্রীমতি বেবী রানী মৌরয়াসু মখোয়গী রাজ্যশিংগী রেদ ক্রোসকী প্রসিদেন্ত ওইনা থৌরম অদুদা শরুক য়াখি।

আই.আর.সি.এস.কী ভাইস চেয়রমেন শ্রী অভিনাশ রাই খন্না; আই.আর.সি.এস. অমসুং সেন্ত জোহন এম্ব্যুলেন্স (ইন্দিয়া)গী সেক্রেতরী জেনেরেল শ্রী আর.কে. জেন; কেন্দ্রগী হকশেলগী সেক্রেতরী শ্রী রাজেশ ভুশন অমসুং আই.আর.সি.এস.কী অতোপ্পা সেনিয়র ওফিসিএলশিংসু থৌরম অদুদা শরুক য়াখি।

****