ভারতকী জুদো তীমদগী শান্নরোই মঙানা হঙ্গেরীগী বুদাপেস্ততা থা অসিগী ২৩দগী ২৬ ফাওবদা পাঙথোক্কদৌরিবা ইন্তর্নেস্নেল জুদো ফেদেরেসন (আই.জে.এফ.)গী থৌরম অমা ওইবা গ্রান্দ স্লাম ২০২০ কম্পিতিসন অসিদা শরুক য়াগদৌরি। মসিগীদমক্তা অচঙবা শেনফম খুদিংমক সরকারনা পুথোক্কদৌরি।

নুপী অনি অমসুং নুপা শান্নরোই অহুম ওইরিবা জুদোকা মঙা অসিনা কম্পিতিসন অসিগীদমক্তা থা অসিগী ১৯দা ভারত থাদোক্কনি। মখোয়না হঙ্গেরীদা য়ৌবা মতমদা মীওইগী অমমমগী ওইনা য়ামদ্রবদা কোবিদ-১৯ নেগেতিব মেদিকেল সর্তিফিকেৎ (মফম অসিদা য়ৌদ্রিঙৈগী নুমিৎ ৫নিগী মমাংদা পুং ৪৮ কান্নরগা পাঙথোকপা পি.সি.আর. তেস্ত) ২ তঙাই ফদনা পীগদবনি।

নুপীগী কাঙবু অদুদা চহি ২৫ শুরবী মনিপুরদগী সুশিলা দেবী (কিলো ৪৮) অমসুং চহি ২২ শুরবী দিল্লীগী তুলিকা মান (কিলো ৭৮) য়াওরি। নুপাগী কাঙবুদা চহি ২৮ শুরবা হান্নগী ওলিম্পিয়ন  অবতার সিং (কিলো ১০০), পঞ্জাবতগী চহি ২২ শুরবা তি.ও.পি.এস. দিবেলপমেন্তেল গ্রুপকী শান্নরোই জসলীন সিংহ সাইনি (কিলো ৬৬) অমসুং চহি ২৪ শুরবা বিজয় য়াদব (কিলো ৬০) য়াওরি। হঙ্গেরীদা পাঙথোক্কদৌরিবা কম্পিতিসন অপুনবা অসিগী ওইনা কোচ জিৱন শর্মনা শান্নরোই মঙা অসিগা লোয়নদুনা চৎকনি।

 “ঐহাক্কী পান্দমদি ভারতকী ওইনা ওলিম্পিক্তা মেদল অমা লৌবনি অমসুং মসিদা ঐহাক্না মাই পাক্কনি হায়বগী য়াম্না থাজবা লৈ মরমদি ঐহাক্না মসিগীদমক্তা য়াম্না কন্না হোৎনরক্লি। ঐহাক্না সরকারনা তেংবাংবীবা অসিগীদমক্তসু সরকারবু থাগৎচরি। ঐখোয়না য়াম্না কন্না হোৎনরবসু সরকারনা করিমত্তা শৌগৎপীদ্রগদি ঐখোয়না করিসু তৌবা ঙম্লোই। মরম অদুনা সরকারনা ঐখোয়গী খোঙচৎ অসিগী অচঙবা শেনফম পুথোকপীবা অসিদা সরকারবু য়াম্না থাগৎচরি”, হায়না জসলীন্না ফোঙদোকখি।

মখোয়শিং অসি মখোয়না লৈরিবা মালেমগী মকোক-মথংগী থাক্তা য়ুম্ফম ওইদুনা খনবনি অমসুং মথংগী চহিদা য়ৈথোকখ্রবা তোক্যো ওলিম্পিক্স গেমসতা শরুক য়াবা ফংবগী চাং য়াম্না ৱাংনা লৈরি। মখোয়শিং অসি সেনিয়র নেস্নেল রেঙ্কিং চেম্পিয়নশিপ্তা খ্বাইদগী ফবা শান্নরোইশিংনি। নুপীশিংগী ওইনা সুশিলা দেবীনা খ্বাইদগী ৱাংবা ওইনা ৪১গী থাক্তা লৈ অমসুং অপুনবা ওলিম্পিক পোইন্ত ৮৩৩ লৈ অমসুং জসলীন্না নুপাশিংগী মরক্তা খ্বাইদগী ৱাংবা ওইনা ৫৬কী থাক্তা লৈ অমসুং অপুনবা ওলিম্পিক পোইন্ত ৮৫৪ লৈ।

হঙ্গেরীগী বুদাপেস্ততা পাঙথোক্কদৌরিবা আই.জে.এফ.কী থৌরম অসিদা লৈবাক ৮১গী শান্নরোই ৬৪৫না চাংয়েংনগনি।

*******