হকশেল অমসুং য়াইফ য়ুম্বালগী কেন্দ্র মন্ত্রী দোক্তর হর্শ বর্ধন্না নোংমাইজিং ৱারী ৱাতাইগী মঙাশুবা তাঙ্কক্তা মহাক্কী সোসিএল মিদিয়া ইন্তরেক্তরশিংনা হংলকপা ৱাহং কয়াগী পাউখুম পীখ্রে‍। কোবিদকা মরী লৈনবা তোকঙাশিং অমসুং লান্না খন্নবা ৱাফমশিং কক্লদুনা, হকশেল মন্ত্রী অদুনা কোবিদ লান্থেংনবদা অয়ুর্বেদকী থৌদাং, রিইনফেক্সনগী মতাঙদা আই.সি.এম.আর.না থিজিনগদৌরিবা, ভেক্সিন পীবগী খন্দোক্নবা মচাকশিং অমসুং মীয়াম্না তোয়না হায়নরিবা কোবিদ ভেক্সিনগী মতাঙদা মরুওইবা পাউদম কয়া মচা খায়না পীখি‍। দিল্লীগী চান্দনি চৌকতা মহাক্কী কেন্দ্রগী মীয়াম্না থেংনরিবা খুদোংচাদবা ফীভমশিং তারুবদা মদুগী পাউখুম ওইনা মহাক্না মহাক্কী কন্তেক্ত দিতেল মীয়ামগী ফম্বাক অদুদা পীরদুনা মহাক্কী কেন্দ্রদা মীয়াম্না থেংনরিবা খুদোংচাদবা ফীভম পুম্নমক লূম্না লৌদুনা কোকহনগনি হায়না থাজবা পীখি‍।

মীয়ামবু মী য়াম্না তিনবা মফমশিংদগী লাপ্না লৈনবা চেকশিনৱা থম্লদুনা অমদি চেকশিন থৌরাং লৌখৎপগী মতাঙদা লৈঙাক্না পীরিবা চৎন-কাঙলোনশিং মওং চুম্না ইন্ননবা খঙহল্লদুনা দোক্তর হর্শ বর্ধন্না মীয়ামদা লাক্কদৌরিবা কুমহৈশিং মেলা অমদি পন্দলশিংদা থোক্তুনা পাঙথোকপগী মহুত্তা য়ুম-য়ুমদা মখোয়গী নক্ন-চান্নবশিংগা লোয়ননা পাঙথোকমিন্ননবা হায়খি‍। কোবিদকী মায়োক্তা লান্থেংনবনা খ্বাইদগী মাঙজিন থাবা থৌদাংনি হায়না মীয়ামদা নীংশিংলদুনা মহাক্না লৈবাকসিগী হকশেলগী মন্ত্রী অমা ওইবগী থৌদাংদি মহীক অসিবু হন্থহন্দুনা তৌবা য়াবা তৌদুনা মী শিবা হন্থহনবনি‍। “ভগৱত গীতানা লান্মী ফুরুপকীদমক লান তৌবগী অয়াবা পীরি‍। মরম অসিনা অদোমগী লাইনীংদা অদোম্না থাজবা উৎনবগীদমক মী য়াম্না পুনশিল্লুবগী মথৌ তাদে‍। করিগুম্বা ঐখোয়না মসি তৌরবদি ঐখোয় অচৌবা খুদোংথিবা অমগী মায়কৈদা চঙশিনখিবা য়াই‍। ইবুংঙো কৃষ্ণনা নহাক্কী পান্দম.. ঐগী পান্দম অমদি ঐখোয়গী পান্দমদা পুক্নীং চঙউ হায়না তাকপিরম্মী‍‍। ঐখোয়গী পান্দমদি মহীক অসিবু লোইশিন্দুনা মীওইবা খুন্নাইবু কনবা হায়বসিনি‍। মসিনা ঐখোয়গী লাইনীংনি‍। মসিনা মালেম পুমবগী লাইনীংনি‍।”

মহাক্না মখা তাখিবদা, “তোপ তোপ্পা ফীভমদা তোঙানবা পাউখুম/থৌওং মথৌ তাই‍। লাইনীং নৎত্রগা লাই অমত্তনা নহাক্না কুমহৈ অমবু নিন-খোঙদুনা পাঙথোক্কদবনি, পন্দলদা অমদি লাইশঙদা অমদি মোস্ক্সতা চৎকদবনি হায়বা লৈতে‍।” মহাক্না লৈবাক মীয়ামদা প্রধান মন্ত্রী শ্রী নরেন্দ্র মোদী জীনা লাইচৎ অসি মখা তানা শন্দোরক্তনবা ৱাশক্নবা অমদি লৈবাক পুম্বগী মীয়ামদা খঙহনবগী কেম্পেন অসিদা শরুক য়ানবা অমদি থা অনিসিদা (নিংথমথা য়াওনা) পাঙথোক্কদৌরিবা ‘জন অন্দোলন’ অসিদা শরুক য়ানবা হায়রিবসিদা য়াওশিন্নবা ৱাফম থমখি‍। নোভেল কোরোনাভারস অসি নিংসা হোনবগা মরী লৈনবা মহীক অমা ওইবনা অমদি নিংসা হোনবগা মরী লৈনবা মহীক অসি অইংবা ঈশিং নুংশিৎকী ফীভমদা শন্দোকপা হেনবনা নীংথমথা মনুংদা শন্দোকপগী চাং হেল্লকপগী ওইথোকপা লৈ হায়না দোক্তর হর্শ বর্ধন্না ফোঙদোকখি‍। “মহীক অসি অইংবা ঈশিং-নুংশিৎ অমদি ঈশিং মনিলগী চাং নেমবা ফীভমদা হেন্না মপাঙ্গল কল্লি হায়বা খঙনরে‍। মীৎয়েঙ অসিদা, ভারতকী ওইনা নিংথমথাগী মতমদা নোভেল কোরোনাভাইরস শন্দোরকপগী চাং হেনগৎলক্কনি হায়বসি অরানবা ওইরোই,” হায়না মহাক্না হায়খি‍। মাস্ক/মাখুম উপ্পা, মরুওইনা মীয়াম তিনবা মফমদা, চাং নাইনা খুৎ-শা হামবা অমদি নিংসা হোনবগী মওং মতৌ ইনবা হায়রিবা কোবিদকা চুনবা লমচৎ অসি ঙাক্না চৎপনা লায়না অসি শন্দোরকপা লাকশিনবদা মতেং ওইগনি হায়না মহাক্না অচেৎপা ৱাফম থমখি‍।

দোক্তর হর্শ বর্ধন্না তেল্লবা মতমগী মনুংদা ফেলুদা তেস্ত শীজিন্নবা হৌনবগী নুংঙাইরবা পাউ তমখি‍। ইন্সতিত্যুৎ ওফ জিনোমিক্স এন্দ ইন্তিগ্রেতিব বাইওলোজী (আই.জি.আই.বি.)দা অমদি লনাই লেবশিংদা অনাবা মীওই ২০০০দা চত্থখিবা ত্রাইএল মনুংদা ফংখিবা চাংয়েংদা য়ুম্ফম ওইরগা চাংয়েং অসি চাদা ৯৬কী সেন্সিতিভিতী অমসুং চাদা ৯৮গী স্পেসিফিসিতী লৈ হায়বা উৎলি‍। মসি হৌজিক আই.সি.এম.আর.গী চাদা ৯৫ সেন্সিতিভিতী অমদি চাদা ৯৯ স্পেসিফিসিতী লৈবা আর.তি.-পি.সি.আর.গী ক্রাইতেরিয়াগা য়েংনবদা চৎনবা য়াবা ওইরি‍ হায়না মহাক্না হায়খি‍। সার্স-কোভ-২ খঙদোক্নবা চাংয়েং তৌনবা ফেলুদা পেপর স্ত্রিপ অসি সি.এস.আই.আর.-আই.জি.আই.বি.না পুথোকপনি অমদি কম্মর্সিএল ওইনা পুথোক্নবগীদমক দ্রগ এন্দ কন্ত্রোলর জেনেরেল ওফ ইন্দিয়ানা অয়াবা পীরে‍ হায়না মহাক্না মখা তাখি‍। কিত অসি দিমার্তমেন্ত ওফ এতোমিক ইনর্জী’স নেসনেল সেন্তর ফোর বাইওলোজিকেল সাইন্সেস, বেঙ্গলোরনা হান্ননা অয়াবা পীখ্রবনি‍। “মসি ফংগদবা চপ চাবা তাং অমা ঐনা পীবা ঙমদ্রবসু, ঐখোয়না মসি লাক্কদৌরিবা চয়োল খরসিদা ফংগনি হায়না লৌবা য়ারে”, হায়না মহাক্না হায়খি‍।

মীয়াম পুম্বদা হেন্না লুম্না লৌবা তার্গেত গ্রুপ খন্দোক্তুনা কোবিদ-১৯ ভেক্সিন শীজিন্নবা হৌনবগী লৈঙাক্না কমদৌনা থৌরাং তৌরিবগে হায়বা ৱাফমগী মতাঙদা, হৌরকপা মতমদা কোবিদ-১৯ ভেক্সিন অসি অকক্নবা মশীংদা ফংগনি হায়না পানরি হায়না মহাক্না শেংদোকখি‍। “ভারতকুম্বা অচৌবা লৈবাক অমদা, ভেক্সিন পীবগী ৱাফমসি এক্সপোজরগী খুদোংথিবা লৈবা, তোঙান তোঙানবা মীওই কাঙলুপশিংগী মরক্তা কোমোর্বিদিতী লৈবা, কোবিদ কেসশিংগী মরক্তা লৈরিবা শিবগী চাং, অমদি অতৈ মরম কয়াদা য়ুম্ফম ওইরগা প্রাইওরিতাইজ তৌবা য়াম্না মরুওই,” হায়না মহাক্না হায়খি‍। ভারত্তা তোঙান তোঙানবা মখলগী ভেক্সিনশিং ফংলবা য়াই অমদি মখোয়শিং অদুদগী খরনা অক্নবা চহী কাঙলূপ অমদা চুনবা য়াই অদুগা খরা অমনা চুনদবসু য়াই হায়বা ৱাফম লৈরি‍।

থৌরাং অসিদা খ্বাইদগী মরুওইবা মচাক্তি কোল্দ চেন অমসুং অতৈ পুথোক পুশিনগী ৱাফমনি মরমদি ভেক্সিন অসি খ্বাইদগী কাচিন ফাওবা য়ৌহনবদা অশোয়বা অমত্তা লৈহন্দনবা চপ চাবা থৌরাং লৌখৎপা মথৌ তাই হায়বা ৱাফম থম্লদুনা, দোক্তর হর্শ বর্ধন্না ভেক্সিন কাপনিংদবগী মরমশিং খঙদোক্তুনা মদুশিংদু মরম চানা ৱাখৈ পুরক্নবা মীয়াম্দা মমুৎ তানা খঙহন্নবগীদমক মীয়ামদা ৱাখল তাহনবগী অচৌবা থৌরাং অমা মথৌ তাগনি‍। শেন্মিৎলোনগী য়েংলগা লৈঙাক অসিনা নহা ওইরিবা অমদি ৱর্কিং ক্লাসকী মীওইশিংবু কোবিদ-১৯গী ভেক্সিনগীদমক হেন্না লূম্না লৌরি হায়বা তোকঙা অসিবু অ্ররানবনি হায়রদুনা, দোক্তর হর্শ বর্ধন্না হায়খিবদা, “ “কোবিদ-১৯ ভেক্সিনগীদমক হেন্না লুম্না লৌগদবা কাঙলুপশিং ৱাফম অনিদা: শিন্ফমগী খুদোংথিবা অমদি ইনফেক্সন এক্সপোজরগী খুদোংথিবা লৈবা, অমসুং শাথিবা লায়না নারকপা য়াবা অমদি মী শিবগী চাং হেল্লকপা য়াবগী খুদোংথিবা লৈবা, অসিদা য়ুম্ফম ওইগনি‍।”

দোক্তর অমা ওইবগী মতৌ উৎলদুনা, মহাক্না রেসপোন্দেন্ত অমদা ফেজ ১ চাংয়েং অসি পোত্থোক অসি শাফবা ওইরবরা হায়বদু খঙদোক্নবা পাঙথোকপনি; ফেজ ২ চাংয়েংনা মরুওইবা ৱাফমদা মহীক ঙাকথোকপা ঙম্বগী চাং অমদি মখা তারকপদা শাফবা ফীভম ওন্ননবা পাঙথোকপনি; ফেজ ৩ ক্লিনিকেল চাংয়েংদা শাফবা ফীভম অমদি মহীক ঙাকথোকপা ঙম্বগী চাং মখা তারকপা ওইনা ওল্লি, অমদি মরুওইবা ৱাফম ওইনা ক্লিনিকেল ত্রাইএল অসিদা মসিগী মতিং ওল্লি হায়না শন্দোক্না তাকখি‍।

ভারত্তা কোবিদ ভেক্সিন অথু অকাইগী ওইনা শীজিন্নবা য়াহনবগী মতাঙদা মন্ত্রীনা ৱাফম অসি হৌজিক খন্নরি হায়না হায়খি‍। “অনাবা মীওই শাফনা থম্নবগীদমক অথু অকাইগী ওইনা ভেক্সিন শীজিন্নবা য়াহনবগী ৱাফমসি মতিক চাবা সেফতী অমদি এফিকেসী দেতা চঙই‍। মখা তারকপা থৌরাং পুথোরক্লিবা দেতাগী মখা পোনগনি,” হায়না মহাক্না ফোঙদোকখি‍।

হৌজিক ভারত্তা চাংয়েং চত্থরিবা কোবিদ-১৯ ভেক্সিনশিং অসি দোজ ২ অমসুং দোজ ৩গী ভেক্সিনশিংনি হায়না মহাক্না পাউদমখি‍। সিরুম ইন্সতিত্যুৎ ওফ ইন্দিয়া অমসুং ভারত বাইওতেক্কী ভেক্সিনশিং দোজ ২ মথৌ তাই অদুগা কেদিলা হেল্থকেয়রগী ভেক্সিননা দোজ ৩ মথৌ তাই‍। প্রিক্লিনিকেল থাক্তা লৈরিবা অ্রতৈ ভেক্সিনশিংগীদমক্তদি দোজকী চাংয়েং চত্থরি, হায়না মহাক্না ফোঙদোকখি‍।

কোবিদ ভেক্সিনগীদমক অতৈ অনৌবা কেন্দিদেতশিং লৌশিনবগী মথৌ তাবগী মতাঙদা মহাক্না হায়খিবদা, “ভারতকী য়াম্লবা মীশিং অসি য়েংলগা, লৈবাক পুম্বা ভেক্সিন কাপথোকপগী মথৌ তাগদবা ফীভমদা ভেক্সিন অমা নৎত্রগা ভেক্সিন পুথোকপা অমখক্তনা ফংহনবা ঙম্লোই‍। মরম অসিনা ভারতকী মীয়ামদা ফংহনবা য়াগদবগী মতুং ইন্না লৈবাকসিদা তোঙান তোঙানবা কোবিদ-১৯ ভেক্সিনশিং পুথোরকপগী ওইথোকপা য়াবশিং য়েংশিন্নবা ঐখোয়না শেম শারি‍।” লাইচৎ মনুংসিদা পব্লিক-প্রাইভেত পার্ত্নরসিপকী মতাঙদা মহাক্কী ওইবা ৱাখল্লোন ফোঙদোক্লদুনা, দোক্তর হর্শ বর্ধন্না হৌজিক ওইরিবা ফীভমসিদা ভারতকী মীয়ামদা মশীং য়াম্না ভেক্সিন কাপথোকপা ঙম্নবগীদমক মশিং য়াম্লবা ভেক্সিন পার্ত্নরশিং মথৌ তাগনি অমদি অকক্নবা কম্পেনী অমদগী ভেক্সিন অমতমক শীজিন্নববু অখুবা মীৎয়েঙদা য়েংলোইদবনি‍ হায়না মখা তাখি‍।

মন্ত্রী অদুনা মীয়ামদা হকশেল অমসুং শাফগদবা ফীভমগা মরী লৈনবা ৱাফম অমত্তা মদুগী অচুম চুমদা হান্না থিজিন্দনা শেয়র তৌদনবা ৱাফম থমখি‍। ঐখোয়না অনৌবা কোরোনাভাইরস অসিগী মরমদা হেন্না খঙলকপা অমদি ভেক্সিন কেন্দিদেত কয়া অমা মখোয়গী ফেজ ২ অমসুং ফেজ ৩গী চাংয়েংশিং হৌরকপগা লোয়ননা মশাগীতা খনবা মীওইশিংনা শেম শাদুনা পুথোকপা অরানবা অমদি চুমদবা পাউ কয়ানা সোসিএল মিদিয়াদা থোরকপা হায়বসি শোয়দ্রবনি‍। ইনফোর্মেসন অমসুং ব্রোদকাস্তিং মন্ত্রালয়গী মখাদা লৈবা প্রেস ইনফোর্মেসন ব্যুরো (পি.আই.বি.)গী কোবিদ-১৯ ফেক্ত চেক য়ুনিৎনা সোসিএল মিদিয়া ফম্পাকশিংদা অরানবা পাউ চাং নাইনা য়েংশিল্লি হায়না হায়রদুনা মহাক্না মহাক্কী তুং ইনবশিংবু অসিগুম্বা অরানবা পাউশিং পি.আই.বি.গী ফেক্ত চেক য়ুনিত্তা পাউ পীননবা হায়খি‍।

অমুক হন্না নারকপগী কেসশিংগী মতাঙদা দোক্তর হর্শ বর্ধন্না তোঙান তোঙানবা স্তেতশিংদা মচী মচীদা অমুক হন্না নারকপগী পাউ লৈজরবসু আই.সি.এম.আর.গী দেতাবেজ নীংথিনা নৈনবদা হায়রিবা কেসশিং অসিগী অয়াম্বা শরুক্তি অমুক হন্না নারকপনি হায়না লান্না ক্লাসিফাই তৌবা ওইরম্মী‍। অমুক হন্না নারকপনি হায়না লান্না পানশিনবা অমদি তশেং তশেংনা হন্না নারকপগী মরক্তা লৈরিবা খেন্নবা খঙদোকপা য়াম্না মরুওই হায়না মহাক্না মখা তাখি‍। “তশেংনা হন্না নারকপা হায়বসিদি মপুং ফানা নাবা ফখ্রবা মীওই অমবু মহাক্কী হকচাঙদা মান্নবা নৎত্রগা খেন্নবা স্ত্রেনগী ভাইরস নৌনা চঙদুনা নাহল্লকপা অদু ওইগনি‍। আই.সি.এম.আর.না হন্না নারকপা কেসশিংগী তশেং তশেংবা পোৎলুম খঙদোক্নবা থিজিনবগী থবক অমা পায়খৎকদৌরি‍। মদুগী মহৈ চয়োল খরগী মনুংদা মীয়ামদা ফংহল্লক্কনি,” হায়না মহাক্না ফোঙদোকখি‍।

লাইচৎ মনুংসিদা দোক্তরশিং লৈখিদবদা থেংনবা মহাক্কী অৱাবা অদু ফোঙদোক্লদুনা দোক্তর হর্শ বর্ধন্না হকশেলগী লমদা থবক তৌরিবশিংগী মরক্তা কোবিদ-১৯ লৌনরকপা থিংননবা লৌখৎলিবা খোঙথাঙশিংগী মতাঙদা শুগায়না পাউদমখি‍। কোবিদ-১৯ কেসশিং শেন্নরিবা হকশেলগী লমদা থবক তৌরিবা মীওইশিংবু ঙাকথোক্নবা অমদি মাঙজৌনবা লায়েংগীদমক স্তেতশিংদা পি.পি.ই. কিত, এন-৯৫ মাস্ক অমসুং ঐচ.সি.ক্যু. মপুং ফানা পীরি‍। এইমস, দিল্লীনা স্তেত লেভেল সেন্তর্স ওফ এক্সেলেন্সশিংগী চাং নাইনা ৱেবিনার কয়া পাঙথোক্তুনা শন্দোরকপা, ঙাকথোকপা অমদি কন্ত্রোল তৌবগা মরী লৈনবা চৎন-কাঙলোনশিং খঙহল্লি‍। শন্দোরকপা, ঙাকথোকপা অমদি কন্ত্রোল তৌবগী থৌওংশিংগা মরী লৈনবা ৱাফমশিংগী ত্রেনিং মোদ্যুলশিং হকশেল অমসুং য়াইফ-য়ুম্বাল মন্ত্রালয়গী ৱেবসাইত অমসুং আই.গি.ও.তি.-দীক্সা ফম্পাক্তা ফংহল্লে‍। হেল্থ ফেসিলিতীশিং অমসুং ফীল্দদা কোবিদ অমসুং নন-কোবিদ মফমশিংদা থবক তৌরিবা হকশেলগী থৌমীশিংনা পর্সোনেল প্রোতেক্সন ইকুইপমেন্ত মওং চুম্না মরম চানা শীজিন্নবা চৎন-কাঙলোনসু হকশেল মন্ত্রালয়না থোকখ্রে হায়না মহাক্না মখা তাখি‍।

ঐখোয়গী কোরোনা লান্মীশিংগী চেকশিন থৌরাং মতিং চানা লৌখৎনবগীদমক্তা মহাক্না স্তেত হকশেল মন্ত্রীশিং অমসুং অতৈ হকশেলগী ওফিসিএলশিংগা পাউ হেক হেক ফাওনরি হায়নসু মন্ত্রীনা পাউদমখি‍।

আইসোলেসনদা লৈরিবা মীওইশিংগী মেদিকেল এতেন্সনগী কোলশিংগী পাউখুম পীরদুনা, দোক্তর হর্শ বর্ধন্না লাইচৎ মনুংসিদা অনাবা মীওইশিংদা লৈঙাক্না অচুম্বা লায়েং পীবা ঙমহনতা নত্তনা তমথিরবা মহী অসি শন্দোরকপা লাকশিনবদা মতেং ওইরিবা ভারতকী তেলিমেদিসিন সর্ভিস অসি মীয়াম্না পাম্না শীজিন্নবা হেনগৎলকপদা অপেনবা ফোঙদোকখি‍। হায়রিবা অনৌবা অমদি পুক্নিং থৌগৎনিংঙাই ওইবা ফীভম অসিগী মতাঙদা খন্নরদুনা মহাক্না হায়খিবদা, “ইসঞ্জীবানিদা তোঙান তোঙানবা স্তেত লৈঙাকশিংগী হকশেল লোয়শঙশিংগী প্রাক্তিস্নর ১২,০০০ হেন্না য়াওরি অমদি মখোয়গী সর্ভিসশিং লৈবাকসিগী স্তেত ২৬কী দিস্ত্রিক্ত ৫১০দগী মীয়াম্না শীজিন্নরি‍। ফম্পাক অসিদা অহানবা কন্সল্তেসন লাখ ১ য়ৌবদা থা ৩লোম চঙখি অদুগা অকোনবা কন্সল্তেসন লাখ ১দি শুপ্নতগী চয়োল ৩গী মনুংদা তৌদুনা চাউনা মায় পাক্লি‍।”

নোংমাইজীং ৱারী ৱাতাই মনুংদা, দোক্তর হর্শ বর্ধন্না অহানবা তাঙ্কক্তা ভারত লৈঙাক্না কোবিদ-১৯ লাইচৎ থেংননবগীদমক্তা স্তেত অমসুং য়ু.তি.শিংদা লুপা করোর ৩০০০ থাদোকখি‍। স্তেত/য়ু.তি. অহুম নত্তনা অতৈ অয়াম্বনা মখোয়দী পীখিবা শেন্ফম পুম্নমক শীজিন্নখ্রে: মহারাস্ত্রনা হায়রিবা শেন্ফম অসিগী চাদা ৪২.৫ খক্তমক শীজিন্নখ্রে অমদি চান্দিগরনা চাদা ৪৭.৮ অমদি দিল্লীনা চাদা ৭৫.৪ শীজিন্নদুনা মতুং ইল্লি হায়না মহাক্না ফোঙদোকখি‍।

কোবিদ-১৯ লায়েংবদা অয়ুস ফোর্মুলেসনগী কান্নবগী মতাঙদা ঙাঙনরিবা ৱাফমশিংগী পাউখুম পীরদুনা দোক্তর হর্শ বর্ধন্না সেলুতোজিনেসিসকী ৱাখল্লোনগী মতাঙদা অমদি হায়রিবা ফোর্মুলেসন অসিনা কমদৌনা অনাবা মীওইশিং মপুং ফানা ফগৎলকপদা পান্দম থম্বগে হায়বগী মতাঙদা শন্দোক্না তাকখি‍। মনুং হঞ্জিনবা স্তদী ওফ লিতরেচর অমসুং সিলিকো স্তদী, এক্সপরিমেন্তেল স্তদী অমসুং ক্লিনিকেল স্তদীশিংদগী ফংবা সাইন্তিফিক ওইবা খুদম চাংদমশিংগী মতাঙদা পল্লদুনা মহাক্না হায়খিবদা, “নিংথৌখোঙলি, অশ্বগন্ধ, নিংথৌখোংলি অমসুং উচিথিগী পুনশিনবা অমসুং অয়ুস ৬৪দা ইম্ম্যুনো-মোদুলেতরী, এন্তি-ভাইরেল, এন্তিপাইরেতিক অমসুং এন্তি-ইনফ্লেমেতরী মচাকশিং য়াওই হায়বা উৎপা থিজিনবা মশীং খঙদনা লৈরি‍। মসি শীজিন্নবনা কোবিদ-১৯ মহীক্কা য়াম্না চুশিন্নবা ফীভমসু ইন-সিলিকো স্তদীশিংদা থেংনখ্রে।” পনখ্রিবা হিদাকশিং অসিনা প্রোফাইলেক্সিস, সেকেন্দরী প্রিভেন্সন অমসুং কোবিদ-১৯না শোকহল্লবা কেসশিং মেনেজ তৌবদা পীরিবা শাফম য়েংশিন্নবা সাইন্তিফিক স্তদীশিং লৈঙাক্না শেমখিবা ইন্তরদিসিপ্লিনরী তাস্ক ফোর্সকী রিকমেন্দেসনগী মতুং ইন্না হৌখ্রে হায়না মহাক্না পাউদমখি‍।

চ্যৱনপ্রাসকী কান্নবশিং নীংশিংলদুনা, দোক্তর হর্শ বর্ধন্না অকক্নবা মতম খরা চ্যৱনপ্রাস চাং নাইনা চাবা মীওইশিংদা মখোয়গী অপুনবা হকশেলগী ফীভম ফগৎলি অমদি লায়না ঙাকথোকপা ঙম্বগী পাঙ্গল হেনগৎহল্লি হায়না ক্লিনিকেল স্তদীশিংদগী ফংবা পাউশিংনা উৎলি অমদি চিনিনা মসিগী মরুওইবা মচাক অমা ওইবা মরম্না শীজিন্নরিবা মীওইশিংনা কৈথেলদগী চিনি য়াওদবা মখল থিবা য়াই‍ হায়না হায়খি‍।

‘সন্দে সমবাদ’কী মঙাশুবা তাঙ্কক য়েংনবগীদমক মখাদা পীরিবা লিঙ্কশিং অসিদা নম্বীয়ু:

ত্বীত্তর: https://twitter.com/drharshvardhan/status/1315196225805717505?s=20

ফেসবুক: https://www.facebook.com/watch/?v=1045439492574995

য়ুত্যুব: https://www.youtube.com/watch?v=V8M-ujWIqoA

দি.এচ.ভি. এপ: http://app.drharshvardhan.com/download

****