কেন্দ্রগী রেলৱে অমসুং কম্মর্স অমসুং ইন্দস্ত্রী মন্ত্রী শ্রী পিয়ুশ গোয়ালনা ঙসি প্রগতি মৈদান, দিল্লীদা মালেমগী থাক্তা লৈবা ইন্তিগ্রেতেদ একজিবিসন-কম-কনভেন্সন সেন্তর (আই.ই.সি.সি.) অমা ওইনবগীদমক নৌনা শেমগৎ শাগৎলিবশিংগী খুমাং চাউশিনবশিং য়েংশিনখি হাউশিং অমসুং অর্বান এফিয়র্স মন্ত্রী শ্রী ঐচ.এস. পুরি, প্রধান মন্ত্রীগী প্রিন্সিপাল এদভাইজর, শ্রী পি.কে. সিনহা, কম্মর্স অমসুং ইন্দস্ত্রী, আই.তি.পি.ও., এন.বি.সি.সি.দগী মকোক থোংবা ওফিসরশিং অমসুং থবক অসিদা শরুক য়ারিবা এজেন্সীশিংনা ভর্চুএল মীফম অসিদা শরুক য়াখি।

শেমগৎ শাগৎলিবা থবক অসিগী হৌজিক ওইরিবা ফিবমগী প্রজেন্তেসন অমসুং ভিদিও কয়া কুপ্না য়েংলবা মতুংদা শ্রী গোয়ালনা মরুওইবা থবক কয়া নিংথিনা খুমাং চাউশিল্লিবদু উবদা অপেনবা ফোংদোকখি। লোকদাউন অমসুং মসিনা মরম ওইদুনা লেবরশিংনা ময়ুমদা হন্নখিবনা মমাংদা খুদোংচাদবা কয়া থোকহল্লুরবা শাগৎপগী থবকশিং জুন থাদগী খোঙজেল অমুক হল্লক্তুনা মখা তানা লেপতনা পায়খৎলি। হৌজিক মফম অসিদা শিন্মী ৪৮০০লোম থবক শুরি। বিল্দিং অয়াম্বা মার্চ ২০২১ ফাওবদা লোইশিল্লবা য়াই। বিল্দিং অসিবু খুৎশিন্নবগী থবকসু তাংকক নাইনা অথুবদা হৌরবা য়ারি, অমসুং মপুং ফানা লোইরবা প্রোজেক্তনা ওক্তোবর ২০২১ ফাওবদা খুৎশিন্নরবা য়ারি। মফম অসিদা অন্দর্পাস ৬ অমসুং মরুওইবা তন্নেল অমা লৈদুনা লমদম অসিদা গারীগী চৎথোক চৎশিন্দা অকায়বা লৈহল্লোই। এ.সি. সিস্তেম অসিসু কোবিদ-১৯দগী শাফগদবা মওংনি, মসিদা মৈ চাং নাইনা ফংহনগনি, বিল্দিংশিং অসি অয়ু-অরাক য়াওরোই অমসুং ইরম নালাগী পথাপ অসিনা ফিবম অমত্তদা মফম অসিদা ঈশিং তুংশিন্দুনা লৈহল্লোই। আত্মনির্ভর অভিয়ানগী শরুক অমা ওইনা, প্রোজেক্ত অসিগীদমক মপাল লৈবাক্তগী পুশিল্লকপা পোৎলমশিং তপ্না-তপ্না হন্থরক্লি, অমসুং হৌজিক্কী ওইনা মসিনা প্রোজেক্তকী অচঙবা শেনফমগী চাদা ৯.৫৫তমক ওইরি।

প্রগতি মৈদানবু অনৌবা, হৌজিক-কালগী ওইবা মালেমগী কনফরেন্স অমসুং একজিবিসনশিং পাংথোকপা য়াবা সেন্তর অমা ওইনা নৌনা শেমজিনবা অসিদা মীওই ৭,০০০ হেন্না ফম্বা য়াবা অনৌবা কনভেন্সন সেন্তর অমা শেম্বা য়াওরি। ভারতনা ২০২২দা জি-২০ সম্মিৎকী মপু ওইরবা য়ারি, অমসুং হায়রিবসি মরুওইবা মফমসি মসিগী আই.ই.সি.সি. অসিনা ওইগদৌরি।

******