দি.ও.পি.তি. (দিপার্তমেন্ত ওফ পর্সোন্নেল অমসুং ত্রেনিং)না সরকারগী থৌমীশিংগী ওইনা জম্মু অমসুং কশ্মির, অৱাং-নোংপোক্কী মফমশিং অমসুং অন্দমান অমসুং নিকোবর ইথৎশিংদা চৎপগী লিব ত্রাবেল কন্সেসন (এল.তি.সি.)গী খুদোংচাবশিংদা কোম্থোকপগী ৱারোল অমা থোকখ্রে। কেন্দ্রগী রাজ্য মন্ত্রী (ইন্দিপেন্দেন্ত চার্জ), অৱাং নোংপোক লমদম চাউখৎপা (দোনের), এম.ও.এস. পি.এম.ও., পর্সোন্নেল, পব্লিক গ্রাইবেন্স, পেন্সন্স, এতোমিক ইনর্জী অমসুং স্পেসকী কেন্দ্র মন্ত্রী দাঃ জিতেন্দ্র সিংহনা মসিগী কোম্থোকপশিং অসি সেপ্তেম্বর ২৫, ২০২২ ফাওবা শাংদোকখ্রে হায়খি।

ৱারোল অসিগী মতুং তারকপা ওইনা থৌওং ওইনা দাঃ জিতেন্দ্র সিংহনা হায়খিবদা অয়াবা পীরবা সরকারগী থৌমী অমনা ময়ুমগী মফমদা চৎনবা এল.তি.সি.গী মহুত্তা জম্মু অমসুং কশ্মির, অৱাং-নোংপোক্কী মফমশিং অমসুং অন্দমান অমসুং নিকোবর ইথৎশিংদা চৎপগী এল.তি.সি. লৌবা য়াগনি হায়খ্রে।

মসিগী মথক্তা অয়াবা পীদবা সরকারগী থৌমীশিংদা নোঙথক্কী লম্বীদা জম্মু অমসুং কশ্মির, লদাখ, অৱাং-নোংপোক্কী মফমশিং অমসুং অন্দমান অমসুং নিকোবর ইথৎশিংদা চৎপগী খুদোংচাবসু ফংগনি হায়খি। মখা তানা নুংঙাইহন্না হায়দুনা হায়রিবা মফমশিং অসিদা চৎপদা লায়নবা হায়দুনা মফমশিং অসিদা লন্নাইগী এয়রলাইনগী খুত্থাংদা চৎপগী অয়াবসু পীখ্রে। মমাংদদি সরকারগী থৌমী অমনা মফমশিং অসিদা সরকারনা মপু ওইবা এয়র ইন্দিয়া খক্তদা চৎপগী অয়াবা লৈরম্বনি হায়না মহাক্না মখা তানা হায়খি।

সেন্ত্রেল সিবিল সর্বিস (এল.তি.সি.) রুলস ১৯৮৮দা কোমথোক্লিবা অসিগী মতুং ইন্না সরকারগী থৌমীশিংদা নোঙথক্কী লম্বীদা জম্মু অমসুং কশ্মির, লদাখ, অৱাং-নোংপোক্কী মফমশিং অমসুং অন্দমান অমসুং নিকোবর ইথৎশিংদা চৎপগী খুদোংচাবা পীবগী স্কিম অসি সেপ্তেম্বর ২৫, ২০২২ ফাওবা চহি অনি শাংদোকখ্রে।

থৌওং অসিবু সরকারগী থৌমীশিংগী ওইবা য়াম্না কান্নবা খুদোংচাবা অমনি হায়রদুনা দাঃ জিতেন্দ্র সিংহনা হায়খিবদা মতিক চাবা সরকারগী থৌমীশিংনা জম্মু অমসুং কশ্মির নত্ত্রগা অৱাং-নোংপোক্কী মফমশিংদা চৎপগী এল.তি.সি. অসি চহি ৪গী মনুংদা মখোয়গী ময়ুমদা চৎপগী এল.তি.সি.গা ওন্নবা য়াগনি হায়খি। অদুবু মশাগী ময়ুম অমসুং থবক্কী মফম চপ মান্নবশিংগী ওইনদি মসিগী ওন্থোকপগী থৌওং অসিগী অয়াবা পীরোই। মহাক্না হায়খিবদা নোঙথক্কী লম্বীদা চৎপগী অয়াবা পীদবা থৌমীশিং অসিসু স্কিম অসিগী কাঙলোনগী মখাদা এল.তি.সি.-৮০ স্কিমগী খ্বাইদগী ৱাংবা অকক্নবা ভরাগী চাংগী মতুং ইন্না এয়রলাইন অমা হেক্তদা ইকোনোমী ক্লাস্তা চৎপদি য়াগনি।

দাঃ জিতেন্দ্র সিংহনা হায়খিবদা ইং ২০১৪দগী মোদী সরকারনা চুক্লি হেক পায়খিবদগী প্রধান মন্ত্রী শ্রী নরেন্দ্র মোদীনা অরাপ্পদা অমসুং চত্থোক-চৎশিন তৌবা নুংঙাইতবা মফমদা লৈবশিংদা অহেনবা মিৎয়েং চংবগী পাউতাক্কী মতুং ইন্না মসিগী মফমশিং অসিদা হিংবা নুংঙাইবা অমসুং লৈঙাকপা নুংঙাইবদা চঙবা খুদিংমক পাঙথোক্কদবনি হায়খ্রবনি হায়খি।

<><><><><>