হকশেল অমসুং য়াইফ য়ুম্বালগী কেন্দ্রগী মন্ত্রী দা. হর্শ বর্ধন্না হকশেল অমসুং য়াইফ য়ুম্বালগী রাজ্যগী মন্ত্রাই শ্রী অশ্বিনি কুমার চৌবে, মধ্য প্রদেশকী মুখ্য মন্ত্রী শ্রী শিবরাজ সিংহ চৌহানগা লোয়ননা শ্যাম শাহ গভর্নমেন্ত মেদিকেল কোলেজ, রেৱা, মধ্য প্রদেশকী সুপর স্পেসিএলিতী ব্লোক (এস.এস.বি.) দিজিতেল ওইনা শঙ্গাখ্রে।

ফমুং ২০০ থাবা সুপর স্পেসিএলিতী ব্লোক অসি ভারত সরকারগী প্রধান মন্ত্রী স্বাস্থ্যা সুরক্ষা য়োজনা (পি.এম.এস.এস.ৱাই.)গী মখাদা লুপা করোর ১৫০ থাদুনা শাখি।মসিদা ন্যুরোলোজী, ন্যুরোসর্জরী, নেপ্রোলোজী, য়ুরোলোজী, কারদিওলোজী, সি.তি.ভি.এস., নিওনেতোলোজী অমসুং পল্মোনরী মেদিসিনগী বিভাগশিং য়াওরি। এস.এস.বি. অসিদা মোদ্যুলর ওপরেসন থীএতর তরুক, সুপর স্পেসিএলিতী বেদ ২০০, আই.সি.য়ু. বেদ ৩০ অমসুং বেন্তিলেতর নিপান লৈগনি। ফেসিলিতী অসিদা পোস্ত গ্রেজ্যুৎ মহৈরোয় ১৪গী ত্রেনিং কেপাসিতীসু লৈগনি।

সুপর স্পেসিএলিতী ব্লোক অসি শঙ্গারদুনা দা হর্শ বর্ধন্না রেৱা অমসুং মধ্য প্রদেশকী মীয়ামদা নুংঙাইবা ফোঙদোকখি। মহাক্না হায়খি, “মসিনা ভারতপু মেদিকেল সর্ভিসশিংদা মরোমদোম লেপচবা ঙমহল্লগনি। এস.এস.বি. অসিনা ফেসিলিতীশিং অসি ফংনবা মমাংদা অতোপ্পা অচৌবা সহরশিংদা চৎলম্বা মীওইশিংদা খ্বাইদগী নৌবা তর্সরী হেল্থ ক্যের সর্ভিসেসশিং ফংহল্লগনি।”

কেন্দ্রগী হকশেল মন্ত্রীনা ২০০৩গী নীংখা তম্বা নুমিৎতা পীবা ৱারোলদা লৈখিদ্রবা প্রধান মন্ত্রী শ্রী অতল বিহারী বাচপয়ীনা প্রধান মন্ত্রী স্বাস্থ্যা সুরক্ষা য়োজনাগী মখাদা এম্সগুম্বা হোস্পিতাল তরুক লিংখৎনবা অপাম্বা ফোঙদোক্লম্বা অদু নীংশিংখি। দা হর্শ বর্ধন্না হায়খি, “অশানবা মীৎয়েং য়েংলিবা অমসুং খুমাং চাউশিনবা ঙম্লিবা প্রধান মন্ত্রী শ্রী নরেন্দ্র মোদীগী লুচিং মখাদা সরকার অসিনা রিজন পুম্নমক্তা অহোংবা মমলদা মেদিকেল ক্যের ফেসিলিতী ফংহন্নবা হোৎনরি। এম্সকী মশিং অসি ৬তগী ২২দা হেনগৎহনখ্রে অমরোমদা হৌজিক লৈরিবা অতোপ্পা ইন্সতিত্যুত ৭৫না এম্সগুম্না সর্ভিসশিং ফংহন্নবা অপগ্রেদ তৌরি।” মহাক্না হায়খি ২০১৯-২০দা পি.এম.এস.এস.ৱাই.গী ফেজ ৩গী মখাদা রাজগর, মন্দলা, নীমঞ্চ, মন্দসৌর, স্যোপুর, সিঙ্গরৌলি অমসুং মহেশ্বরগী জিলাশিংদা লৈরিবা মেদিকেল কোলেজশিং অসি ফগৎহন্নবা কেন্দ্র সরকারনা সেঙ্গসন তৌখ্রে হায়না মহাক্না ফোঙদোকখি।

কোবিদ-১৯গী মায়োক্তা ভারতনা লান্থেংনরিবা অসিগী মতাংদা ফোঙদোক্লদুনা দা.হর্শ বর্ধন্না আয় “হৌখিবা থা মাপল অসিদগী ভারতনা চোকথবা লৈতনা শন্দোক্কনবা লায়না অসি লান্থেংনরি। ভারতকী ফগৎলকপগী চাং অসি লেপ্পা লৈতনা হেনগৎলক্লিবা অমসুং লেপ্পা লৈতনা এক্তিব কেসশিং হন্থরকপা অসিনা কেন্দ্রনা লুচিংবা কোবিদ-১৯ লাকশিন্নবা লালোংশিং অসি মাই পাক্লে তাকই। ঐখোয়না তেস্ত তৌবগী কেপাসিতী অসি মাই পাক্না হেনগৎহন্দুনা অপুনবা তেস্ত তৌবগী চাংদা করোর ৮ হেনবা ঙমখ্রে। জানুৱারীদা লেব ১ লৈরম্বগী হৌজিক ঐখোয়গী লৈবাক পুম্বদা লেব ১৮৮৯ লৈরে। কোবিদ-১৯ লায়েংবদা অমসুং ভেক্সিন পুথোকপগী লমদা সাইন্তিফিক দিবেলপমেন্তশিংনা লৌরিবা থৌদাং অসিদা ঐহাক্না থাজবা থম্মি অমসুং ঐখোয়না কোবিদ-১৯ লান্থেংনরিবা অসিদা ভারতনা হেন্না মাই পাকপা পুরক্কনি”।

দা. হর্শ বর্ধন্না মীয়ামদা কোবিদকা চান্নবা লমচৎ শাজৎশিং ঙাক্না চৎনবা খংহনখ্রে। মহাক্না কোবিদ শন্দোকপা লাকশিন্নবা মীয়াম তিবা মফমদা মাস্কশিং/ফেস কভরশিং উপ্নবা, হেন্দ হাইজিন ঙক্না চৎনবা অমসুং লোক খুবা, হাকথী কনবদা চৎন-কাংলোন ঙক্না চৎপা অমসুং ফীজিকেল দিস্তেন্সনত্রগা গাজ অনিগী অরাপ্পা ঙাক্না চৎপা সোসিএল ভেক্সিনগী মতাংদা মীয়ামদা নৌহৌননা নিংশিংখি।

এস.ঐচ. শিবরাজ সিংহ চৌহান্না মধ্য প্রদেশতা হকশেলগী ইনফ্রাস্ত্রকচর মপাঙ্গল কনখৎহনবদা প্রোএ্তিব ওইনা থৌদাং লৌবগী কেন্দ্র সরকারবু থাগৎপা ফোঙদোকখি। মহাক্না হায় মসি মধ্য প্রদেশ অমসুং রেৱাগী মীয়ামগী চাঊথোকচনীংঙাই ওইরবা মীকুপনি। মসিনা লৈবাক অসিদা অফবা দোক্তর খক্তা পীবা নত্তনা অসিগুম্বা অৱাংবা মেদিকেল সর্ভিসশিংসু ফংহনগদবা মেদিকেল মহৈরোবশিংদা সুপর স্পিসিএলিতীগী ত্রেনিং হৌবা য়ারগনি। মসি লৈবাক অসিগী মেদিকেল সর্ভিসকী রেজনেল ইম্বেলেন্স চুমথোক্নবা মাইকৈদা চৎলিবা অহেনবা খোঙথাং অমা ওইরগনি। স্কিম অসিগী মনুংদা মতমচানা অনৌবা এস.এস.বি. শাবগী মরুওইবগী মতাংদা ফোঙদোক্লদুনা মহাক্না হায় শাহদোল দিবিজন, সাগর দিবিজনগুম্বা থংনবা মীয়াম অমসুং উত্তর প্রদেশকী থংনবা দিস্ত্রিক্তশিংগী মীয়াম্না অফবা মখলগী মেদিকেল সর্ভিসশিং ফংবা ঙম্লগনি”। 

হকশেল অমসুং য়াইফ য়ুম্বাল মন্ত্রালয়গী জোইন্ত সেক্রেতরী শ্রী সুনিল শর্ম, মেদিকেল এজুকেসনগী মন্ত্রী শ্রী বিশ্বাস সারঙ, মধ্য প্রদেশকী, গ্যাস ত্রেজেদী রিলিফ অমসুং রিহেবিলিতেসন, শ্রী রাজমনি পাতেল, মধ্য প্রদেশকী রাজ্য সভাগী মেম্বর, শ্রী জনার্দন মিশ্রা, রেৱাগী লোক সভাগী মেম্বরগা লোয়ননা সিনিয়র দিগনিতরীশিংনা থৌরম অদুদা শরুক য়াখি।

****