রেলৱেজ অমসুং কম্মর্স অমসুং ইন্দস্ত্রী মন্ত্রী শ্রী পিয়ুশ গোয়লনা ঙসি নেস্নেল স্তার্ত-অপ এৱার্দস ২০২০গী মকোক-মথঙ তাবশিং লাঊথোকখ্রে। বর্চুএলগী খুত্থাংদা পাঙথোকপা মনা পীবগী থৌরম অসি কম্মর্স অমসুং ইন্দস্ত্রীগী রাজ্য মন্ত্রী শ্রী সোম প্রকাশ য়াওনা পাঙথোকখিবনি।

দিপার্ত্মেন্ত ফোর প্রোমোসন ওফ ইন্দস্ত্রী অমসুং ইন্তর্নেল ত্রেদ (দি.পি.আই.আই.তি.)না নেস্নেল স্তার্ত-অপকী মনা অসি খুন্নাইদা মশক থোকপা কান্নবা পীবা ঙম্বগী থৌওং উবা ফংহন্দুনা মীওই কয়াদা থবক য়াম্না পীবা ঙম্বা নত্ত্রগা মরল মথুম শেম্বা ঙম্বা অনৌবা পোত্থোকশিং শাবা নত্ত্রগা ৱারোইশিন পীবা অমসুং থাক খায়বা য়াবা ইন্তর্প্রাইস শেম্বগী থৌওং পাঙথোক্লিবা মশক থোকপা স্তার্ত-অপ অমসুং ইকোসীস্তেম লৈহনবশিংবু মশক খঙদোক্তুনা অমসুং মসিগী মনা পীনবা হায়দুনা হৌদোকখিবনি। মাই পাকপগী চাং অসি শেল থাদরিবা মীওইশিংনা শেল-থুমগী ওইবা অতোঙবা ফংবতা নত্তনা খুন্নাইদা অফবা থৌওং পাঙথোকপগী মওং-মতৌদসু ওল্লি।

মনা অসিগী অহানবা থৌরমদা সেক্তর ১২গী মীওইশিংদগী এপ্লিকেসন কৌখি অমসুং মসিবু মখা তানা অপিকপা কাঙলুপ ৩৫দা অমুক খাইদোকখি। মসিগী সেক্তর ১২ অসিদিঃ লৌউ-শিংউবা, এজুকেসন, ইন্তর্প্রাইস তেক্নোলোজী, ইনর্জী, ফাইনান্স, চিঞ্জাক, হকশেল, ইন্দস্ত্রী ৪.০, স্পেস, সেক্যুরিতী, তুরিজম অমসুং অর্বান সর্ভিসনি। মসিগী মথক্তা খুঙ্গংগী মফমশিংদা অহোংবা পুরকপা ঙম্বা, নুপীনা লুচিংবা অমসুং মহৈ-মশিং তমফমগী কেম্পস্তা শেমখিবশিংগী মরক্তগী স্তার্ত-অপশিং অসি খনগদবনি।

রাজ্য ২৩ অমসুং য়ু.তি. ৪দগী অপুনবা ওইনা স্তার্ত-অপ ১৬৪১দগী এপ্লিকেসন লাকখি। মসিগী এপ্লিকেসনশিং অসিগী মনুংদা নুপীনা লুচিংবা ৬৫৪, মহৈ-মশিং তমফমগী কেম্পস্তা য়ূম্ফম ওইবা ১৬৫ অমসুং খুঙ্গংগী মফমশিংদা অহোংবা পুরকপা ঙম্বা স্তার্ত-অপ ৩৩১ য়াওরি।

এপ্লিকেন্ত খুদিংমক অসি অনৌবা থৌওং পাঙথোকপা, স্কেলেবিলিতী, শেন্মিৎলোন্দা চৈথেং পীবা, খুন্নাইদা চৈথেং পীবা, অকোয়বদা চৈথেং পীবা, হীরম অমগী মনুং চনবা অমসুং তোঙানবগী মওং চেনবগী পাক চাউরবা হীরম ৬কী মতুং ইন্না য়েংশিল্লি। তাঙ্কক অহুম থোক্না কুপ্না য়েংশিল্লবা তুংদা স্তার্ত-অপ ১৯৯ অসি জ্যুরীগী মাংদা পুথোক্নবা খনগৎখি। মসিগী মনুংদগী ১৯২না ইন্দস্ত্রী, ইনভেস্তর অমসুং সরকারগী অখঙ-অহৈশিং য়াওবা মীওই ১৫গী জ্যুরী পেনেলগী মমাংদা প্রজেন্তেসন পীখি।

মশক খঙলবা এন্তিতীশিংনা অসিগুম্বা শক-খঙবগী থৌওং অসিদগী কার্বার, শেল-থুম, খুৎশম্নবা অমসুং হৈ-শিংবশিংগী পুক্নিং চিংশিনবা ঙম্বতা নত্তনা অতোপ্পা এন্তিতীশিংগী তমজনিংঙাই ওইবা মওং অমা ওইবা ঙমহন্দুনা মখোয়শিংবু থবক নীংথিনা পাঙথোকহন্নবা অমসুং মখোয়গী সোসিও-ইকোনোমিক ইম্পেক্ত পীবা ঙম্বগী থৌদাংসু মশক খঙহনবা ঙমগনি।

এপ্লিকেন্ত ৩১দি ইনক্যুবেতরশিংদগী অমসুং ১০না এক্সেলরেতরশিংদগী লাকখি। ইনক্যুবেতর ৯ অমসুং এক্সেলরেতর ৫ অসি জ্যুরী পেনেলগী মমাংদা প্রজেন্তেসন পীনবগীদমক্তা তাঙ্কক অহুম থোক্না য়েংশিল্লবা মতুংদা খনখি। মখোয় খুদিংনা জ্যুরীগী মাংদা প্রজেন্তেসন পীখি।

নেস্নেল স্তার্ত-অপ এৱার্দস ২০২০গী মকোক-মথঙ তারবশিংগী অকুপ্পা মরোল অসি এনেক্সরদা পীরি।

মনা পীবগী থৌরম অদু মকোক-মথঙ তারবশিংগী অকুপ্পা মরোল য়াওদুনা খ্বাইদগী অহানবা নেস্নেল স্তার্ত-অপ এৱার্দসকী খোঙচৎকী ৱারোল কয়া য়াওবা নেস্নেল স্তার্ত-অপ এৱার্দস ২০২০গী ই.-রিপোর্ত অমা ফোঙবগী থৌরম্না মখা তাখি।

থৌরম অসিদা ‘স্তার্ত-অপ ইন্দিয়া শোকেস’ অমসুং ‘ব্লোকচেন বেজদ সর্তিফিকেৎ ভেরিফিকেসন সীস্তেম’সু লোঞ্চ তৌখি।

স্তার্ত-অপ ইন্দিয়া পোর্তেলগী শরুক অমা ওইরিবা ‘স্তার্ত-অপ শোকেস’ অসিনা লৈবাক অসিগী খ্বাইদগী অফবা থবক তৌগনি হায়না থাজবা স্তার্ত-অপশিং খন্দোকপগী ওনলাইনগী প্লেৎফোর্ম অমনি। মসিদা উৎকদৌরিবা স্তার্ত-অপশিং অসি তোঙান তোঙানবা সেক্তরশিং, অতৈ ময়াম অমগা লোয়ননা ফিন্তেক, এদ-তেক, সোসিএল ইম্পেক্ত, অসিদগী অখঙ-অহৈশিংনা হকথেংননা খনগনি। শোকেস অসিনা ইন্দস্ত্রী, শেল-থাদবশিং অমসুং পব্লিক ওথোরিতীশিংদা তুংদা খুৎশম্ননা চৎমিন্নবা য়াবা, শেল থাদবা য়াবা অমসুং পব্লিক প্রোক্যুরমেন্ত তৌবা য়াবা স্তার্ত-অপশিং থিবা অমসুং পাউ ফাওনবা ঙমহনবদা তেংবাংগনি।

‘ব্লোকচেন বেজদ সর্তিফিকেৎ ভেরিফিকেসন সীস্তেম’ অসিনা দি.পি.আই.আই.তি.না পীখিবা মশক খঙবগী শক্তাক চেশিংবু খুদক্তা অচুম অরান খঙহনবদা তেংবাংগনি। মসিগী থৌওং অসিদা স্তার্ত-অপ সর্তিফিকেৎশিংদা অহেনবা সেক্যুরিতীগী মরোল হাপচিনবগী অনৌবা থৌওং য়াওরি। মসিগী পথাপ অসি সরকারগী বিভাগশিং, পোৎ-লৈবগী এন্তিতীশিং, শেল-থাদবশিং অমসুং অতোপ্পা থর্দ পারতীশিংনা তোঙান তোঙানবা খুদোংচাবা কয়া ফংনবা শক-খঙল্বা স্তার্ত-অপশিংগী হৌজিক্কী ওইবা ফিভমশিংগী অচুম-অরান খঙদোক্নবা শিজিন্নবা য়াগনি।

মকোক তারবা মীওইশিংবু থাগৎপা ফোঙদোক্লদুনা রেলৱেজ অমসুং কম্মর্স অমসুং ইন্দস্ত্রী মন্ত্রী শ্রী পিয়ুশ গোয়লনা হায়খিবদা মসিগী মনা অসিনা নহা ওইরিবা ওন্তোপ্রিনরশিংদা পুক্নিং থৌগৎপগী ইথিল পীগনি অমসুং মসিনা মখোয়গী অনৌবা থৌওং পাঙথোকপগী ৱাখল্লোনবু অনৌবা থাক্তা পুদুনা চৎকনি হায়খি। মসিগী মনা অসি পাক চাউবগী মতাংদা অমসুং অনৌবা ৱাখল্লোন, থৌওং অমসুং থবক তৌবগী মওংবু শক-খঙবগী মতাংদা য়াম্না তোপ তোপ্পনি হায়খি। মসিনা অনৌবা ইকোসীস্তেম অমবু মশক খঙবা অমসুং হরাওবা ফোঙদোকপদা নত্তনা স্তার্ত-অপকী মীওইশিংবু অহেনবা মাই পাকপগী হীরমদা চঙশিনবা ঙমহনগনি হায়না মহাক্না হায়খি। মহাক্না হায়খিবদা মখোয়গী মরক্তগী খরা অমদি লাক্কদৌরিবা মতমগী য়ুনিকোর্ন ওইরগনি মমসুং মালেম পুম্বনা শক-খঙনগদবা ভারতকী মাই পাকপগী ৱারী ওইরগনি হায়খি। মসিনা স্তার্ত-অপশিংবু হেন্না পাক-চাউথোকহন্দুনা অনৌবা মফমশিং অমসুং মীয়াম কয়াদা কান্নহনবা ঙমগনি।

মন্ত্রীনা হায়খিবদা স্তার্ত-অপশিং অসিনা স্ত্রেতজিক সেক্তর কয়াদা মরু ওইবা থৌদাং কয়া লৌগনি হায়খি। অনৌবা তেক্নোলোজীশিং অসিনা শেন্মিৎলোন চাউখৎহনবদা তেংবাংগনি অমসুং মসিগী কান্নবা অসিবু মীপুম খুদুংদা ফংহনবা ঙমগনি হায়না মহাক্না হায়খি। তেক্নোলোজীনা লৈবাক অসিওগী মীপুম খুদিংদা স্কিল লৈহনবা অমসুং মগুন লৈহনবদা তেংবাংগনি। মহাক্না স্তার্ত-অপশিং অসিনা সরকারগী ই.-মার্কেৎপ্লেস্তা মিং চন্দুনা সরকারগী বিভাগশিং অমসুং অতোপ্পা কস্তমর কয়াদা মখোয়গী সেবা ফংহন্নবা ৱাফমসু থমখি। লৈবাক অসিগী মীয়াম্না থবক থীবগী মহুত্তা থবক পীবগী শক্তম অমা লৌরকপা অসিদা য়াম্না নুংঙাইবা ফাওই হায়না মহাক্না হায়খি। মহাক্না হায়খিবদা রাজ্য সরকারশিংনা ওন্তোপ্রিনরশিংদা কান্নবা অমসুং শেলগী তেংবাং কয়া পীদুনা মখোয়গী শাহৌ লৌবা ঙমজনবা থৌওং কয়া পীরি হায়না মহাক্না হায়খি। মহাক্না হায়খিবদা কোবিদ-১৯ অসি শিংনবা অমা ওইনা উবগী মহুত্তা খুদোংচাবা অমা ওইনা উবা ঙম্বা হোৎনৌ অমসুং মসিগী শিংনবা অসিগা থেংনরিবা মীওইশিংনা অনৌবা ৱাখল্লোন, থৌওং অমসুং নীংথিনা পাঙথোকপা থৌওংশিংদা মিৎয়েং চঙলগা থেংনরবদি কান্নবা মহৈ ফংগনি হায়না মহাক্না মখা তানা হায়খি।

থৌরম অসিদা ৱা ঙাংবদা কম্মর্স অমসুং ইন্দস্ত্রীগী রাজ্য মন্ত্রী শ্রী সোম প্রকাশনা হায়খিবদা ইং ২০১৬তা প্রধান মন্ত্রীনা হৌদোকখিবা স্তার্ত-অপ মিসন অসি লৈবাক অসিগী মফম খুদিংদা শন্দোক্তুনা য়ৌবা ঙম্লে হায়খি। লৈবাক অসিগী অপুনবা জিলা ৫৮৬কী মনুংদা স্তার্ত-অপ অমমমদি লৈরে। মখোয়শিং অসিনা থবক্কী খুদোংচাবা কয়া পীরি। সরকারনা পীরিবা কান্নবা অমসুং শেকগী তেংবাংশিং অসিনা মাই-পয়াক্নিংবা ওন্তোপ্রিনরশিংদা তেংবাংদুনা মখয়গী মহৈ-মশিংবু মীয়াম মাংদা পুথোকহনবা ঙমহল্লি হায়না মহাক্না হায়খি।

নেস্নেল স্তার্ত-অপ এৱার্দসকী পাউদমগী সোফৎ কোপীঃ

https://we.tl/t-9JSi29aCyg

মনা ফংলবশিংগী পরিং মফম অসিদা য়েংবীয়ু

শ্রী পিয়ুশ গোয়লগী ৱারোলগী লিঙ্ক : https://www.facebook.com/watch/live/?v=819462168878777&ref=watch_permalink

স্তার্ত-অপকী ভিদিওশিং য়েংবীয়ুঃ

https://twitter.com/pib_india/status/1313423358290083840?s=24

*****