কোরোনাভাইরসনা মরম ওইদুনা লৈবাক শীনবা থুংনা থমখিবা লোকদাউন্না মরম ওইদুনা ত্রেনিং লেপলুরবা মতুংদা নেতাজি সুভাস সাউথর্ন সেন্তর, বেঙ্গালুরু থাদোকলুরবা ভারতকী নুপা অমসুং নুপীগী হোক্কী তিমশিং মখোয় ত্রেনিং অমুক মখা চৎথরে। অথুবদা মখোয় অমুক হন্না ফিবম ফগৎলক্কনি হায়না শান্নরোইশিংনা থাজবা থম্লি অমসুং সেন্তরদা পায়খৎলিবা চেকশিন-থৌরাংশিংদা অপেনবা পোকখি।

কোবিদ পোজিতিপ ওইবদগী পোথারুরবা মতুংদা কেপ্তেন মনপ্রিৎ সিংহ য়াওনা শান্নরোই ৬ মখোয়গী কেম্পতা থুংখ্রে। সাই সেন্তর অমসুং ইম্পেনেল হোস্পিতালদা মখোয় মতেং পাংখি অমসুং চেকশিন্না শেন্নখি অমসুং হৌজিক ত্রেনিং অমুক হন্না শরুক য়ারে। মানপ্রিৎনা হায়খি, “ঐ পোজিতিপ ওইখি অমসুং ঐ ত্রেনিং অমুক শরুক য়াবা মতমদা, ঐখোয় তপ্না তপ্না শান্নবা হৌরে। ঐখোয় তপ্না তপ্না মপুংফারক্নবা কোচশিংনা থৌরাং অমা পায়খৎলে অমসুং অমুক হন্না শান্নবা হৌরকপদা ঐ হরাওই”। মখা তানা লাইচৎ শন্দোরকপা থিংনবা সাই সেন্তরদা অকনবা থবকশিং পায়খৎলে অমসুং মখোয়গী ক্বারেনতাইন মনুংদা লাকপা শান্নরোইশিং তেস্ত তৌরে।

ভারতকী নুপাগী হেদ কোচ গ্রহাম রৈদনা হায়খি থাপ্না লৈনদুনা মশিং য়ামদবা শান্নরোইশিং স্কিল ত্রেনিং পাংথোক্নবা মিৎয়েং থম্লে। তোঙান-তোঙানবা মশান্নশিংদা সাইগী এস.ও.পিশিং ঙাক্না শান্নরোইশিং কোবিদ মমাংগী থাকশিং অদু য়ৌবা ঙম্নবা ঐখোয়না তপ্না তপ্না ত্রেনিংগী চাং হেনগৎহনবা ঙম্লগনি। হৌজিক পাংথোক্লিবা অসি অশোক-অপন হন্থহন্নবা অমসুং কান্নবা য়াম্না ফংনবা তপ্না অমসুং অখন্নবা মওংদা পাংথোকপা ত্রেনিংনি।

সাই বেঙ্গলোর সেন্তরদা মখোয়গীদমক পায়খৎলিবা চেকশিন-থৌরাংশিং অদুদা শান্নরোইশিং হরাওখি। ভারতকী নুপীগী হোক্কী কেপ্তেন রানি রামপালনা হায়খি মতম কুইরবগী মতুংদা ঐখোয় ত্রেনিং হৌবদা হরাওই অমসুং ঐখোয়না মমাংদা পাংথোকখিবা মওংদা ঐখোয় ত্রেনিং পাংথোকপা য়াহনবদা ঐখোয় তপ্না ঐখোয়গী হকচাং হান্নগী থাক্তা হল্লক্লে। মসিগা লোয়ন্না, ঐখোয়না চেকশিন থৌরাংগী চৎন-পথাপশিং ঙাক্লি অমসুং মথংগী থা খরদা ঐখোয় হান্নগী ফিবমদা হল্লক্লগনি হায়না ঐখোয় থাজবা লৈরে। তাঞ্জা অসিদা,চৎন-পথাপশিং ইনদুনা ঐখোয় ইশামক অশোই-অঙাম থোকহন্দবা অসি য়াম্না মরুওই।

ভারতকী নুপা অমসুং নুপীগী হোক্কী তিম অনিমক ওলেম্পিক্কী ক্বালিফাই ওইরে।

*****