লৈবাকসিগী ঙাকশেল মন্ত্রী শ্রীমান রাজনাথ সিংহ জী, হিমাচল প্রদেশকী মুখ্য মন্ত্রী শ্রী জয়রাম থাকুর জী, কেন্দ্রগী মন্ত্রী মন্দলদা লৈবা ঐগী খোঙলোয় হিমাচলগী মপারি অনুরাগ থাকুর, হিমাচল লৈঙাক্কী মন্ত্রীশিং, অতৈ মীয়ামগী মীহুৎশিং, চীফ ওফ দিফেন্স স্তাফ জেনেরেল বিপিন রাৱত জী, আর্মী চীফ, ঙাকশেল মন্ত্রালয় বোর্দর রোদ ওর্গনাইজেসনগা মরী লৈনবা মরূপ পুম্নমক অমদি হিমাচল প্রদেশকী ঐগী ইচিন ইনাউশিং‍।

ঙসি অসি য়াম্নমক পুৱারী ওইরবা নুমিৎনি‍। ঙসি অতলজীগী মঙলান মঙফাওনবতা নত্তনা ঙসি হিমাচল প্রদেশকী মীয়াম করোর কয়ানা চহী কয়া ঙাইজরকপা অদসু লোইরে‍।

ঐনা ঙসি অতল তনেলবু মীয়ামদা খুৎশিন্নজবা ফংজবা অসি ঐগীদমক্তদি য়াম্না লাইবক ফবনি‍। হৌজিক রাজনথ সিংহজীনা হায়খিবগুম্না, ঐনা মফমসিদা লূপশিংগী থবক য়েংবা মতমদা, মফমসিগী চীং, মফমসিগী চীংশাং নাপোমশিংদা ঐনা কুইনা মতম কুইনা লৈরম্মী অদুগা অতলজীনা মনালিদা লাকপা মতমদা তোয়না মহাক্কী মনাক্তা ফমদুনা ৱারী ৱাতায় শান্নখি‍। অদুগা ঐ অমসুং ধুমলজীনা নোংমা চা থক্ন-থক্না ৱাফম অসি য়াম্না পুক্নীং চঙনা মাগী মমাঙদা পুথোক্লম্মী‍। অতলজীনা লুম্না লৌরদুনা মহাক্না মমীৎ লাওনা পাঙথোক্লদুনা ঐখোয়বু মুন্না য়েংদুনা ঐখোয়না হায়রিবদু তারম্মী‍। মহাক্না মঙক নোম্লদুনা য়ানিংবা উৎলম্মী‍। অদুগা ঐ অমসুং ধুমলজীনা মাগী মফমদা হৌদোক্লুবা ৱাফম অদুনা অতলজীগী মঙলান ওইখি, মহাক্কী লাইনীং ওইখি অমদি মহাক্না চপ য়ুংনা লেপখিবদুনা ঙসি ঐখোয়না মীৎমাঙদা উবা ফংলিবনি‍। মসিদা পুন্সিগী কয়াদা নুংঙাইবা মীৎকুপ অমা ওইরমগনি হায়বদু অদোম্না ৱাখলনা লামবা ফংলমগনি‍।

হৌজিক্তা মীনত খরগী মমাঙদা মুভি অমা ঐখোয়না য়েঙখ্রে অমদি ঐনা মদুদা পিকচর গেলরী অমা উখি – দি মেকিং ওফ অতল তনেল‍। অয়াম্বা মতমদা মীয়ামদা খুৎশিন্নবগী অরং অরাক মরক্তা মখোয়গী হোৎনজমলনা পুম্নমকসি ওইথোকপা ঙম্লিবা মখোয়শিংদুদি মনীংদা লৈথহৌই‍। কল্লবা পির পঞ্জালবু হুৎপগী লুরবা থবক অদু ঙসিদি মপুং ফারে‍। অসিগুম্লবা অচৌবা থবক অসিদা হুমাং শিন্থখিবা মখোয়গী মপুন্সিবু খুদোংথিবা মরক্তা থৌদাং য়াখিবা হোৎনবা কল্লবা নহাশিং, ইঞ্জিনিয়রশিং, শিন্মী ইচিন ইনাউ পুম্নমকপু ঐনা  ঙসি ইকোক নোন্না ইকায়খুম্নবা উৎচরি‍।

মরূপশিং, অতল তনেল অসি হিমাচল প্রদেশকী অচৌবা শরুক অমা ওইবতা নত্তনা য়ুনিয়ন তেরিতরী লেহ-লদাখকী লাইফলাইনসু ওইরগনি‍। হৌজিক্তি তশেংনা হায়রবদা হিমাচল প্রদেশগী অচৌবা শরুক অমগা লেহ-লদাখকী লেমহৌরিবা শরুকশিংগা মতম পুম্নমক্তা শম্নদুনা লৈরগনি, চাওখৎ লমজেলদা খুমাঙ চাওশিন্না চঙশিল্লগনি‍।

তনেল অসিনা মনালি অমসুং কেলোঙ্গগী মরক্কী অরাপ্পা পুং ৩-৪ হন্থরগনি‍। চীংদা পুং ৩-৪গী অরাপ্পা হন্থবগী ৱাহন্থোক করিনো হায়বসি চীংদা লৈরিবা ইচিন ইনাউশিংনা খঙগনি‍।

মরূপশিং, লেহ-লদাখকী লৌমীশিং, লৈকোল কোইরিবশিং, নহাশিংনা হৌজিক্তি লৈবাক্কী কোনুং দিল্লী অমদি অতৈ কৈথেলশিংদা মখোয়না লায়না য়ৌশিনবা ঙম্লগনি‍। মখোয়গী অৱাবসু হন্থরগনি‍। মসিদা নত্তনা তনেল অসিনা হিমাচল অমসুং ভারত্তগী হৌখিদুনা মালেম পুম্বদা অনৌবা লম্বী অমসুং অনৌবা মঙাল পীরিবা বুদ্ধগী চৎনবী অনিগী মরী অদু হেন্না মপাঙ্গল কনখৎহল্লগনি‍। মসিগীদমক হিমাচল অমসুং লেহ-লদাখকী মরূপ পুম্নমকপু য়াইফ-পাউজেল পীজরি‍।

মরূপশিং, অতল তনেলনা ভারতকী ঙমখৈগী ইনফ্রাস্ত্রকচরবুসু অনৌবা থৌনা অমা পীরগনি‍। মসি মালেমগী থাক্কী ঙমখৈগী কন্নেক্তিভিতীগী অহিংবা খুদম অমনি‍। হিমালয়গী শরুক অসি ওইরবসু, নোংচুপ ভারতকী লৈকঙলাগী পাক্লবা মফম ওইরবসু অদুগা খা অমসুং নোংপোক ভারতকী সমুদ্র খোঙবালগী মফম ওইরবসু হায়রিবশিং অসি লৈবাকসিগী ঙাকওএল অমসুং নুংঙাই য়াইফবগী অচৌবা পাম্বৈনি‍। মতম পুম্নমক্তা হায়রিবা লমশিং অসিদা চাওখৎপা পুরক্নবগীদমক মফমশিং অসিগী মচাক মথুমশিং ফগৎহন্নবা হায়জদুনা লাক্লি‍। অদুবু ঐখোয়গী মফমসিদদি মতম শাংনা ঙমখৈগা মরী লৈনবা ইনফ্রাস্ত্রকচরগী প্রোজেক্তশিংদি প্লান্নিংকী থাক্তদগী লান্থোকপা ঙমদনা লৈ‍ নৎত্রগা লান্থোরক্লবসু পন্দুনা লংফৈ চত্তুনা লৈবা ঙাক্তনি‍। অতল তনেলগী মতাঙদসু করিগুম্বদা অসিগুম্বা ফীভমসি লৈরবরা হায়না খনবা য়াওখি‍।

ইং ২০০২দা অতল জীনা হায়রিবা তনেল অসিগী এপ্রোচ রোদকী উরেপ উয়ুং তমখি‍। অতল গীগী লৈঙাক চৎখ্রবা মতুংদা থবক অসিবুসু কাউথোকখ্রে‍। লৈখিবা ফীভমদি ইং ২০১৩-১৪ ফাওবা তনেল অসিগী শুপ্নগী মিতর ১৩০০ হায়বদি কিলোমিতর অমগা খরখক্তমক থবক চঙশিনখি‍।

এক্সপর্তশিংনা হায়বদা মতম অদুদা লৈরমবা খোঙজেল অদুদা থবক চঙশিল্লবদি লৈনুংহুৎ অসি ২০৪০ ফাওবদগদি লোইশিনবা ঙম্বসু য়াই হায়রি‍। অদোমসু খন্দুনা য়েংবিয়ু, ঙসি অদোমগী চহী অদুদগী চহী ২০ অমা হাপচিনবিরো, মতমদুদা মীয়ামগী পুন্সিদা হায়রিবা চাওখৎপগী ফীভমসি লাক্লবদি অদোমগী মঙলান অদু মঙফাওনগদৌরিবরা‍।

চাওখৎপগী লম্বীদা খোঙজেল য়াঙনা মাঙদা চঙশিল্লবা মতমদা, লৈবাক মীয়ামগী পুক্নীংদা চাওখৎপগী অপামবা লৈরবদি খোঙজেলদি য়াঙখৎহনবা তাবনি‍। অতল তনেলগী থবক্তসু ২০১৪গী মতুংদা নীংথিনা খোঙজেল য়াঙনা চঙশিল্লকখি‍। বি.আর.ও.গী মাঙদা তারকপা খুদোংচাদবা ৱাফম পুম্নমক্কী ৱারোইশিন পুরকখি‍।

মদুগী মহৈনা মমাঙদা চহী অমদা মিতর ৩০০গী লৈনুংহুৎ শেম্লমবদু মদুগী খোঙজেল হেনগৎহন্দুনা চহীদা মিতর ১৪০০গী চাংদা খোঙজেল হেনগৎলকখি‍। শুপ্নতগী চহী ৬তা চহী ২৬কী থবক লোইশিনখি‍।

মরূপশিং, ইনফ্রাস্ত্রকচরগী অশুক মরুওইবা অমদি অচৌবা প্রোজেক্ত অসি শঙ্গাবা থেঙথবনা লৈবাক্কী ওইনা হীরম খুদিংমক্তা মাঙজবা ঙাক্তনি‍। মসিনা মীয়ামদা খুদোংচাবা ফংহনবদা থেঙথরকই, মদুগী চৈথেংনা লৈবাক্কী শেন্মিৎলোনদা খুদোংচাদবা মায়োক্নহল্লি‍।

ইং ২০০৫তা তনেল অসি চাউরাক্না লুপা করোর চামাপন মখায়রোম্না কোন্নগনি হায়না পানরম্মী অদুবু তোয়না মতম অসুম থেংথরকপনা ঙসিদি শেনফমসি শরুক অহুম হেন্না হায়বদি লুপা করোর ৩২০০গী হেন্না চঙলবা মতুংদা লোইশিনবা ঙম্লকখিবনি‍। করিগুম্বা চহী ২০ ফাওবা চঙলম্লবদি করি ফীভম ওইরমগদগে হায়বদু খন্দুনা য়েংবিয়ু‍।

মরূপশিং, কন্নেক্তিভিতীগা লৈবাক্কী চাওখৎপগা হকথেংননা মরী লৈনৈ‍। কন্নেক্তিভিতী হেন্না লৈরিমখৈ চাওখৎপসু হেন্না হেল্লক্কদৌরিবনি‍। মরুওইনা ঙমখৈগী মফমশিংদদি কন্নেক্তিভিতী হায়বসি লৈবাক্কী ঙাকশেলগী মরুওইবশিংগা হকথেংননা মরী লৈনৈ‍। অদুবু ৱাফমসিদা লূম্না লৌরিবা অমদি লূম্না লৌবগী মথৌ তাবা, রাজনিতীগী অচেৎপা খোঙফম মথৌ তারিবা অদু লাইবক থিবদি উবা ফংখিদে‍।

অতল তনেলগুম্না মশীং য়াম্লবা মরুওইবা প্রোজেক্তশিংগী মতাঙদসু অসিগুম্বা ফীভম লৈখি‍। লাল্লোং য়াৎপদা য়াম্না মরুওইরিবা লদাখকী দৌলত বেগ ওল্দি এয়র-স্ত্রিপ চহী ৪০-৫০ লোন্দুনা লৈরম্মী‍। করি খুদোংচাদবা লৈখিবগে, করমবা শাফু লৈখিবগে হায়বা ৱাফমসিদা ঐনা মচা খায়না নৈনবা পাম্মী‍। মসিগী মতাঙদা কয়া অমা হায়নখ্রে কয়া অমসু ইনখ্রে‍। অদুবু অচুমবা ৱাফমদি দৌলত বেগ ওল্দিগী এয়র-স্ত্রিপ অসি নোংথক লান্মীগী ফিরেপ্না মরম ওইরগা হাংদোরকখিবনি, মসিদা রাজনিতিগী ফিরেপ করিসু উবা ফংদে‍।

মরূপশিং, লাল্লোং য়াৎপদা অমদি কান্নবগী মীৎয়েঙদা য়াম্না মরুওইবা অদুবা উশিন্নদুনা থমখিবা অসিগুম্লবা প্রোজেক্ত দজন কয়া ঐনা মশীং থিবা ঙমগনি‍।

ঐ নীংশিংলি, চাউরাক্না চহী অনিমুক্কী মমাঙদা ঐনা অতলজীগী মপোন নুমিত্তা অসামদা চৎখি‍। মফমদুদা ভারতকী খ্বাইদগী শাংবা রেল রোদ থোং ‘বোগীবীল থোং’ লৈবাক্কী মফমদা কত্থোকপগী তাঞ্জা ঐঙোন্দা ফংখি‍। থোং অসি ঙসিদি অৱাং-নোংপোক অমদি অরুনাচল প্রদেশকী মরক্তা কন্নেক্তিভিতীগী অচৌবা পাম্বৈ অমা ওইরে বোগীবীল থোংগী থবকসু অতলজীগী লৈঙাক্কী মতমদা হৌখিবনি, অদুবু মহাক্কী লৈঙাক চৎখ্রবা মতুংদা থোং অসিগী থবক লেপখ্রে‍। ইং ২০১৪দা থবক অসিদসু খোঙজেল য়াঙখৎলকখি অমদি চহী মরিগী মনুংদা থোং অসিগী থবক লোইশিনখি‍।

অতল জীগা থোং অমগী মমীংগসু লোয়নরি – কোসি থোংজাউগা‍। বিহারগী মিথিলাঞ্চলগী শরুক অনি শম্নহল্লিবা কোসি থোংজাউ অসিগী উরেপ উয়ুং অতল জীনা তম্লমবনি‍। অদুবু থবক অসি হৌজিক পন্দুনা লৈরি‍।

২০১৪দা ঐখোয়না লৈঙাক্তা লাক্লবা মতুংদা ঐখোয়না কোসি থোংজাউগী থবকসু খোঙজেল য়াঙখৎহল্লে‍। হৌজিক্তগী নুমিৎ খরনিগী মমাঙদা কোসি থোংজাউবু মীয়ামদা খুৎশিন্নখ্রে‍।

মরূপশিং, লৈবাক্কী অয়ামবা শরুক্তা কন্নেক্তিভিতীগী অচৌ অচৌবা প্রোজেক্তশিংগী ফীভমসি ওইরি‍। অদুবু ফীভম অসি হোংলক্লি‍ অমদি খোঙজেল য়াঙনা হোংলক্লি‍। হৌখিবা চহী ৬সিদা মায়কৈ অসিদা কন্না হোৎনখি‍। মরুওইনা ঙমখৈগী ইনফ্রাস্ত্রকচর চাওখৎনবগীদমক অঙমবা পাঙ্গল থাদখি‍। 

হিমাচলগী মফমশিংদা হিমাচল ওইরবসু, জম্মু কাস্মির ওইরবসু কার্গিল-লেহ-লদাখ ওইরবসু, উত্তরাখন্দ ওইরবসু, সিক্কিম ওইরবসু, অরুনাচল প্রদেশ ওইরবসু প্রোজেক্ত দজন কয়া লোইশিনখ্রে অমদি প্রোজেক্ত কয়াদা খোঙজেল য়াঙনা থবক চঙশিল্লি‍। লমবী শেমবগী ওইরবসু, থোং শাবগী ওইরবসু, লৈনুংহুৎ শেমবগী থবক ওইরবসু লৈবাকসিদা খোঙজেল অসুক য়াম্না য়াঙনা থবক চঙশিনখিবা মমাঙদা লৈখিদ্রি‍।

মসিগী অচৌবা কান্নবা মীচম মীয়ামগা লোয়ননা ঐখোয়গী লান্মী ইচিন ইনাউশিংনসু ফংলি‍। নিংথমথাগী মতমদা মখোয়দা চাননবা য়ৌহনবদা ওইরবসু, মখোয়গী ঙাকশেলগা মরী লৈনবা মচাক মথুমশিং ওইরবসু মখোয়না লায়না পেত্রোলিং তৌবা ঙমহন্নবা লমবীশিংগী নেতৱর্ক শেম্লি‍।

মরূপশিং, লৈবাক্কী ঙাকশেলগী মথৌ তাবশিং, লৈবাক্কী ঙাকশেলগী থবক তৌরিবশিংগী মথৌ তাবশিং য়েংশিনবদা মখোয়গী ইন্তরেস্তশিং ফংহনবা হায়বসি লৈবাক্কী মরুওইবা ৱাফমশিংগী মরক্তা অমনি‍।

হিমাচলগী ইচিন ইনাউশিং ঙসিসু ৱন রেঙ্ক ৱন পেন্সনগী মতাঙদা মমাঙগী লৈঙাকশিংনা করি তৌরমবগে হায়বদু নীংশিংলমখিনি‍। চহী ৪০ চুপ্না ঐখোয়গী লান্মী ইচিন ইনাউশিংদা ৱাশকখক্তমক শক্তুনা লাকখিবনি‍। চেদা লুপা করোর ৫০০খক উৎলগা ৱন রেঙ্ক ৱন পেন্সন চৎনহনগনি হায়না মখোয়না হায়দুনা লাকখিবনি‍। অদুবু তৌবদি তৌখিদে‍। ঙসিদি ৱন রেঙ্ক ৱন পেন্সনকী কান্নবা লৈবাক্কী হান্নগী লান্মীশিংনা ফংলি‍। এরিয়র ওইনা কেন্দ্র লৈঙাক্না চাউরাক্না লুপা করোর লিশিং ১১ থবক্তগী পোত্থাখ্রবা লান্মীশিংদা ফংহনখ্রে‍।

হিমাচল প্রদেশকীসু চাউরাক্না লান্মী মরূপ লাখ অমরোম্না কান্নবা অসি ফংলি‍। ঐখোয়গী লৈঙাক্কী ৱাশক্তি ঐখোয়না লৌখিবা ফিরেপ ঐখোয়না থবক ওইনা পাঙথোক্তুনা উৎপনি‍। ঐখোয়গীদমক্তদি লৈবাক্কী ইন্তরেস্ততগী হেনবা, লৈবাক্কী ঙাকশেলদগী হেনবা অতৈ করিসু লৈতে‍। অদুবু লৈবাক অসিনা মতম শাংনা লৈবাক্কী ঙাকশেলগী ইন্তরেস্তপু কম্প্রোমাইজ তৌবা ফীভম অদু উবা ফংখি‍। লৈবাক্কী নোংথক্কী লান্মীনা অনৌবা ফাইতর প্লেন দিমান্দ তৌদুনা লাকখি‍। মখোয়না ফাইলগী মথক্তা ফাইল, ফাইলগী মথক্তা ফাইল তৌদুনা করিগুম্বদা ফাইল হাংদোক্তুনা করিগুম্বদা ফাইলগা শান্নদুনা লৈখি‍।

বোম তোপ ওইরবসু, অনৌবা মতমগী রাইফলশিং ওইরবসু, বুলেতপ্রুফ জেকেত ওইরবসু, শাথিনা ইংবা মফমদা শীজিন্নগদবা মচাকশিং অমদি অতৈ মচাক মথুম ওইরবসু পুম্নমক পন্দুনা লৈখি‍। ঐখোয়গী ওর্দিনান্স ফেক্তরীশিংগী থৌনানা অফ-অফবা কয়াগী ৱাখল চরাংনহল্লমবা মতম অমা লৈরম্মী‍। অদুবু লৈবাক্কী ওর্দিনান্স ফেক্তরীশিংবু মখোয়গী মশাগী ফীভমদা হুন্দোক্তুনা থম্লম্মী‍।

লৈবাকসিদা ইরমদমসিদা পুথোকচবা ফাইতর প্লেন, হেলিকোপ্তরগীদমক ঐচ.এ.এল.গুম্বা মালেমগী থাক্কী লূপ শেমখি, অদুম ওইনমক মদুবু মপাঙ্গল কনখৎহনবদা ৱাখল কয়া থাদখিদে‍। চহী কয়া লৈঙাক চুপ্লি পায়খিবা মীওইশিংগী মশাগী ওইজবনা ঐখোয়গী লান্মীগী মতিং কনখৎহনবদগী লেপ্তুনা থম্লমখি, মখোয়গী মাঙনবা ওইখি‍।

লৈবাকসিনা চাউথোকচরিবা তেজাস ফাইতর প্লেনসু মখোয়না উপুদা হাপচিন্দুনা থম্নবা হোৎনখি‍। মসিনি মখোয়গী অশেঙবা মশক, মসি মখোয়গী অশেঙবা মশক্তুনি‍।

মরূপশিং, ঙসিদি লৈবাকসিদা ফীভম অসি হোংলক্লে‍। লৈবাকসিদা মতমগা চুনবা লানগী খুৎলোয় শানবগীদমক, মেক ইন ইন্দিয়া খুৎলায় শানবগীদমক, চাউনা অহোংবা পুরকখ্রে‍। মতম শাংনা ঙাইরবগী তুংদা চীফ ওফ দিফেন্স স্তাফ ঐখোয়গী সিস্তেম অসিগী শরুক অমা ওইরে‍।

মসিনা লৈবাক্কী লান্মীশিংগী মথৌ তাবশিংগীদমক পোৎ লৈশিনবা অমদি পুথোকপা অনিমক্তা হেন্না ফবা ফীভম পুরক্লে‍। হৌজিক্তি মপান্দগী পুশিল্লকপা থিংখিবা মচাক মথুম কয়া লৈরে‍। হায়রিবা পোৎলমশিং অদু হৌজিক্তি ভারতকী ইন্দস্ত্রীশিংদগী লৈবা মতৌ তাহল্লে‍।

মরূপশিং, ভারতকী দিফেন্স ইন্দস্ত্রীদা মপানগী কম্পেনীশিং চঙশিল্লক্নবা, মপানগী তেক্নিকশিং চঙশিল্লকপা য়াননবা ভারতকী লূপশিংদা কান্নবা কয়া পীরি‍। ভারতকী মালেমগী ওইবা থৌদাং হোংলকপগী মতুং ইন্না ঐখোয়না খোঙজেল য়াঙনা ঐখোয়গী ইনফ্রাস্ত্রকচর, ঐখোয়গী শেন্মিৎলোন, ঐখোয়গী মতিং হেনগৎহনবা মথৌ তাই‍।

আত্মনিরভর ভারতকী থাজবা ঙসিদি মীচম মীয়ামগী ৱাখল্লোনগী শরুক অমা ওইরে‍। অতল তনেল হায়রিবা থাজবা অসিগী খুদম অমনি‍।

অমুক্কা হন্না ঐনা অদোম পুম্নমকপু হিমাচল প্রদেশ অমসুং লেহ-লদাখকী মরূপ লাখ কয়াবু য়াম্লবা য়াইফ-পাউজেল পীজরি‍।

হিমাচলদা ঐগী হক কয়া য়াম্না লৈবগে হায়বসিদি ঐনা হায়বা ঙমদে অদুবু হিমাচল প্রদেশনা ঐগী ইফমদদি হক লৈ‍। ঙসিগী থৌরম অসিদা মতম তেন্না ফংজরবসু ঐখোয়গী হিমাচলগী নুংশিবনা ঐঙোন্দা থৌরম অহুম শিন্দুনা শাফু কয়া পীরি‍। মসিগী মতুংদা থৌরম অনিদসু ঐনা মতম তেন্না ৱা ঙাঙলুগদৌরি‍। অমদি মসিনা মরম ওইরগা ঐনা মফমসিদা মচা খায়না হায়দ্রগসু ৱাফম খরা থৌরম অনিদা ঙাঙলুগদৌরি‍।

অদুবু ৱাফম খরদি ঐনা মফমসিদা শোয়দনা থম্লমবা পাম্মী‍। ঐনা ৱাফম অসি ভারত লৈঙাক্কী ঙাকশেল মন্ত্রালয়গীসুনি, মহৈ-মশিং মন্ত্রালয়গীসুনি অমদি বি.আর.ও.গীসু মরুওইবা ৱাফমনি – ৱাফম অমনা তনেলগী থবক অসি ইঞ্জিনিয়রিংগী মীৎয়েঙদা, থবক শুবগী চৎনবীদা তোপ তোপ্পা অমনি‍। মসিগী দিজাইনিং হৌখ্রবা মতুংদগী হৌখিবা চহী কয়াসিদা মতমদুদগী হৌরগা হৌজিকফাওবা চেদা ইবা হৌখি‍। করিগুম্বা মফম ১০০০-১৫০০দা অসিগুম্না শিন্দোক্লবদি শিন্মীসু ওইবা য়াগনি অমদি মকোক থোংবা মীশকসু ওইবা ঙমগনি‍। মখোয়না তৌরিবা থবক মখোয়দা ফাওরিবা ইথিল মখোয়গী মরোলদা ইশিনবিয়ু‍। করিগুম্বা মীওই ১৫০০গী হোৎনজমল পুম্নমক, করমদা মতমদা করি তৌখি, কমদৌনা তৌখি ইশিল্লবদি মীওইবগী হৌনলোনচৎকী মশক চপ চানা উৎপা দোকুমেন্তেসন অমা ওইগা ঙমগন‍ি‍। থবকশিং অদু তৌরিঙৈ মনুংদা মখোয়না খনখিবা ৱাখল, মখোয়না থেংনখিবা খুদোংচাদবা ফীভম থেংনবদা মখোয়দা করি ফাওখিবগে‍। ঐনা হায়রিবসি একাদমিক দোকুমেন্তেসনগী ৱাফম নত্তে, মীওইবগী মশক উৎপা অদুগুম্লবা দোকুমেন্তেসন অদুবুনি‍। শিন্মীশিংনা থবক শুখিবা মনুংদা চানবা চীঞ্জাম মতম খরা হৌরকখিদবা য়াওরমবা য়াই, মতমদুদা কমদৌনা থবক শুরমগনি, অসিগুম্বা ৱাফমশিং অসি য়াম্না মরু ওই‍। করিগুম্বদা পোৎলম খরা য়ৌহনগদবদা উন তাবনা মরম ওইরগা য়ৌহনবা ঙমদবা মতমদা থবক করম্না তৌরমগনি‍।

করিগুম্বদা ইঞ্জিনিয়র খরদা শীংনবা খরা থেংনরমবা য়াই, মদুদা কমদৌনা থবক তৌরমগনি‍। থাক খুদিংদা থমক তৌখিব য়ামদ্রবদা মীওই ১৫০০ রোম্না চেনা ৫, চেনা ৬, চেনা ১০দা মখোয়গী পুক্নীংগী ইথিল অদু ইবিয়ু হায়না ঐনা হায়নীংই‍। মখোয়শিং অদু খরা শেমদোক শেমগিন তৌরগা দোকুমেন্তেসন তৌনবা কনাগুম্বা মীওই অমদা থৌদাং শিন্নবিয়ু, মদু নমথোক্লুবগী মথৌ তাদে, দিজিতেল ওইনা পুথোক্লবসু অদুম য়াগনি‍।

অনিশুবা ৱাফম্না মহৈ মশিং মন্ত্রালয়দা হায়জনিংই মদুদি ঐখোয়গী লৈবাকসিদা লৈরিবা ইঞ্জিনিয়রিংগা মরী লৈনবা য়ুনিভর্সিতীশিংদা তম্লিবা অঙাঙশিংদা কেস স্তদী তৌননবা থবক পীবিয়ু‍। অদুগা চহী খুদিংগী য়ুনিভর্সিতী অমমমদগী অঙান মাপন-তরাগী বেচ মফমসিদা লাক্লগা কেস স্তদগী ৱাখল কমদৌনা লাকপগে, কমদৌনা শেমবগে, করমবা শীংনবশিং থেংনবগে, কমদৌনা পাম্বৈ পুথোকপগে অমদি মালেমগী খ্বাইদগী ৱাংবা খ্বাইদগী শাংবা মফমসিদা মালেমগী মমীং লৈরবা তনেল অসিগী ইঞ্জিনিয়রিংগী লৌশিং ঐখোয়গ অঙাঙশিংদা লৈহনবা মথৌ তাই‍।

মসিদসু নত্তনা মালেমগী ওইনা ঐনা পাম্বদি এম.ই.এ.গী মীওইশিংনা য়ুনিভর্সিতী খরবু পাউকৎ পীদুনা মফমদুগী য়ুনিভর্সিতীনা মফমসিদা কেস স্তদীগীদমক্তা লাকহন্দুনা প্রোজেক্ত অসিদা স্তদী তৌহন্নিংই‍। মালেমসিদা ঐখোয়গী অসিগুম্লবা থৌনা অসি শকখঙহনবা মথৌ তাই‍। মালেম্না ঐখোয়গী থৌনা অসিবু মশক খঙহনবা তাই‍। অৱাৎপা কয়া লৈজরবসু ঐখোয়গী মীরোন অসিগী নহাশিংনা অসিগুম্লবা অরুবা থবক অসি কমদৌনা পাঙথোকখিবগে  হায়বদু মালেমদা খঙহনবা মথৌ তাই‍।

অদুগা মরম অসিনা ঙাকশেল মন্ত্রালয়, মহৈ মশিং মন্ত্রালয়, এম.ই.এ., বি.আর.ও. পুম্নমক্না পুনশিন্দুনা মওং অমদা মসিবু তনেল হুৎপগী মহৈ মশিংগী শরুক অমা ওইহনবা ঐনা পাম্মী‍। মসিনা ঐখোয়বু মীরোল অমবু মপুং ফাহল্লবদি তনেল ইনফ্রাস্ত্রকচর শেমবতা নত্তনা মীওইবা খুন্নাইগীসু চাউনা কান্নবা ওইগনি‍। তনেল অসিনা ঐখোয়গী অথোইবা ইঞ্জিনিয়র পুথোকপগী থবক্তসু কান্নগদবা লমসিদসু থবক তৌহন্নিংই‍।

ঐনা অমুক্কা হন্না অদোম পুম্নমক্কী মফমদা য়াইফ-পাউজেল পীজরি‍। হন্না হন্না থাগৎচরি‍। অদুগা ঐনা থবক অসিবু মওং তানা পাঙথোকখিবা, মওং তানা মপুং ফাহনখিবা অমদি লৈবাক্কী মীংচৎ পুরকখিবা নহাশিংবু থাগৎপা ফোঙদোকচরি‍।

হন্ন হন্না থাগৎচরি‍ !!!

বি.আর.ও./এস.ঐচ./এন.এস.

*****