ਕੇਂਦਰੀ ਵਾਤਾਵਰਣ , ਵਣ ਤੇ ਜਲਵਾਯੂ ਪਰਿਵਰਤਨ ਮੰਤਰੀ ਸ਼੍ਰੀ ਪ੍ਰਕਾਸ਼ ਜਾਵਡੇਕਰ ਨੇ ਅੱਜ ਉੱਤਰੀ ਭਾਰਤ ਤੇ ਵਿਸ਼ੇਸ਼ ਤੌਰ ਤੇ ਦਿੱਲੀ ਐੱਨ ਸੀ ਆਰ ਖੇਤਰ ਵਿੱਚ ਪਿਛਲੇ ਕਈ ਸਾਲਾਂ ਤੋਂ ਸਰਦੀਆਂ ਵਿੱਚ ਲਗਾਤਾਰ ਵਾਤਾਵਰਣ ਚਿੰਤਾ ਬਾਰੇ ਇੱਕ ਜਾਇਜ਼ਾ ਮੀਟਿੰਗ ਦੀ ਪ੍ਰਧਾਨਗੀ ਕੀਤੀ । ਇਸ ਮੀਟਿੰਗ ਵਿੱਚ 5 ਸੂਬੇ ਦਿੱਲੀ , ਉੱਤਰ ਪ੍ਰਦੇਸ਼ , ਹਰਿਆਣਾ , ਰਾਜਸਥਾਨ ਤੇ ਪੰਜਾਬ ਸ਼ਾਮਲ ਹੋਏ ।
90 ਮਿੰਟ ਚੱਲੀ ਮੀਟਿੰਗ ਤੋਂ ਬਾਅਦ ਇੱਕ  ਪ੍ਰੈਸ ਬ੍ਰੀਫਿੰਗ ਵਿੱਚ ਸ਼੍ਰੀ ਪ੍ਰਕਾਸ਼ ਜਾਵਡੇਕਰ ਨੇ ਕਿਹਾ ਕਿ ਇਸ ਮੁੱਦੇ ਨਾਲ ਨਜਿੱਠਣ ਲਈ ਮੀਟਿੰਗ ਲਾਹੇਵੰਦ ਸੀ ਅਤੇ ਹਵਾ ਪ੍ਰਦੂਸ਼ਣ ਤੇ ਕਾਬੂ ਪਾਉਣ ਲਈ ਕੇਂਦਰ ਅਤੇ ਸੂਬਾ ਸਰਕਾਰਾਂ ਨੇ ਕਾਫੀ ਕੰਮ ਕੀਤਾ ਹੈ ਅਤੇ ਹਵਾ ਪ੍ਰਦੂਸ਼ਣ ਤੇ ਕਾਬੂ ਪਾਉਣ ਲਈ ਹੋਰ ਕੀਤੇ ਕੰਮਾਂ ਨੂੰ ਲਾਗੂ ਕੀਤਾ ਜਾਵੇਗਾ , ਪਰ ਬਹੁਤ ਕੁੱਛ ਕਰਨ ਦੀ ਲੋੜ ਹੈ ।
ਪਰਾਲੀ ਸਾੜਨ ਕਾਰਨ ਪੈਦਾ ਹੋਣ ਵਾਲੇ ਹਵਾ ਪ੍ਰਦੂਸ਼ਣ ਤੇ ਕਾਬੂ ਪਾਉਣ ਦੇ ਯਤਨਾਂ ਬਾਰੇ ਮੰਤਰੀ ਨੇ ਦੱਸਿਆ ਕਿ ਸਰਕਾਰ ਨੇ ਪਰਾਲੀ ਪ੍ਰਬੰਧਨ ਲਈ ਸੂਬਿਆਂ ਨੂੰ 1,700 ਕਰੋੜ ਰੁਪਏ ਦਾ ਫੰਡ ਅਲਾਟ ਕੀਤਾ ਹੈ । ਇਸ ਵੇਲੇ ਪਰਾਲੀ ਲਈ ਕੋਆਪ੍ਰੇਟਿਵਸ ਨੂੰ 80% ਸਬਸਿਡੀ ਅਤੇ ਵਿਅਕਤੀਆਂ ਨੂੰ ਮਸ਼ੀਨਰੀ ਲਈ 50% ਸਬਸਿਡੀ ਮੁਹੱਈਆ ਕੀਤੀ ਜਾ ਰਹੀ ਹੈ ਤਾਂ ਜੋ ਪਰਾਲੀ ਕਾਰਨ ਪੈਦਾ ਹੋਣ ਵਾਲੇ ਪ੍ਰਦੂਸ਼ਣ ਤੇ ਕਾਬੂ ਪਾਇਆ ਜਾ ਸਕੇ । ਮੰਤਰੀ ਨੇ ਕਿਹਾ ਯੂਪੀ , ਹਰਿਆਣਾ ਅਤੇ ਰਾਜਸਥਾਨ ਵਿੱਚ ਹਾਟ ਸਪਾਟ ਦੀ ਪਛਾਣ ਕਰ ਲਈ ਗਈ ਹੈ ਅਤੇ ਸੂਬਾ ਸਰਕਾਰਾਂ ਨੂੰ ਇਸ ਵੱਲ ਵਧੇਰੇ ਧਿਆਨ ਦੇਣ ਲਈ ਨਿਰਦੇਸ਼ ਦਿੱਤੇ ਗਏ ਹਨ । ਸੂਬਾ ਕਾਰਜ ਯੋਜਨਾਵਾਂ ਬਣ ਗਈਆਂ ਹਨ , ਵਿਚਾਰ ਵਟਾਂਦਰਾ ਕੀਤਾ ਗਿਆ ਹੈ ਅਤੇ ਇਹਨਾਂ ਨੂੰ ਲਾਗੂ ਕੀਤਾ ਜਾਵੇਗਾ । ਕੇਂਦਰੀ ਮੰਤਰੀ ਨੇ ਜ਼ੋਰ ਦੇ ਕੇ ਕਿਹਾ ਕਿ ਦਿੱਲੀ ਸਰਕਾਰ ਨੂੰ ਦਿੱਲੀ ਵਿਚਲੇ 13 ਹਾਟ ਸਪਾਟਸ ਤੇ ਵਧੇਰੇ ਕੰਮ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ , ਤਾਂ ਜੋ ਰਾਜਧਾਨੀ ਵਿੱਚ ਹਵਾ ਪ੍ਰਦੂਸ਼ਣ ਘਟਾਇਆ ਜਾ ਸਕੇ । ਸੀ ਪੀ ਸੀ ਬੀ ਦੀਆਂ 25 ਟੀਮਾਂ ਦਿੱਲੀ ਐੱਨ ਸੀ ਆਰ ਖੇਤਰ ਵਿੱਚ ਇਸ ਸਾਲ ਉਚਿੱਤ ਕਾਰਵਾਈ ਲਈ ਤਾਇਨਾਤ ਕੀਤੀਆਂ ਗਈਆਂ ਹਨ ।
ਉਹਨਾਂ ਹੋਰ ਕਿਹਾ ਕਿ ਪੂਸਾ ਮਾਈਕ੍ਰੋਬੀਅਲ ਡੀ ਕੰਪੋਜ਼ਰ ਕੈਪਸੂਲ ਦਾ ਤਜ਼ਰਬਾ ਦਿੱਲੀ ਐੱਨ ਸੀ ਆਰ ਵਿੱਚ ਕੀਤਾ ਜਾ ਰਿਹਾ ਹੈ ਅਤੇ ਉਹਨਾਂ ਦੱਸਿਆ ਕਿ ਉੱਤਰ ਪ੍ਰਦੇਸ਼ ਵੀ ਇਸ ਸਾਲ 10,000 ਹੈਕਟੇਅਰ ਵਿੱਚ ਇਸ ਤਕਨਾਲੋਜੀ ਦੀ ਵਰਤੋਂ ਕਰੇਗਾ ਅਤੇ ਦਿੱਲੀ ਇਸ ਨੂੰ 800 ਹੈਕਟੇਅਰ ਵਿੱਚ ਵਰਤੇਗਾ । ਇਹ ਜਾਣਕਾਰੀ ਮੀਟਿੰਗ ਦੌਰਾਨ ਇਹਨਾਂ ਸੂਬਿਆਂ ਦੇ ਵਾਤਾਵਰਣ ਮੰਤਰੀਆਂ ਨੇ ਦਿੱਤੀ ਹੈ । ਕੇਂਦਰੀ ਮੰਤਰੀ ਪ੍ਰਕਾਸ਼ ਜਾਵਡੇਕਰ ਨੇ ਬਾਇਓ ਡੀ ਕੰਪੋਜ਼ਰਸ , ਬਾਇਓ ਸੀ ਐੱਨ ਜੀ ਅਤੇ ਬਾਇਓ ਪਾਵਰ ਦੀ ਵਰਤੋਂ ਕਰਕੇ ਹਵਾ ਪ੍ਰਦੂਸ਼ਣ ਨੂੰ ਘੱਟ ਕਰਨ ਅਤੇ ਇਸ ਦੇ ਮਾੜੇ ਅਸਰ ਦਾ ਮਹੱਤਵ ਵੀ ਦੱਸਿਆ । ਮੰਤਰੀ ਨੇ ਜ਼ੋਰ ਦੇ ਕੇ ਕਿਹਾ ਕਿ ਪਰਾਲੀ ਸਾੜਨ ਤੋਂ ਇਲਾਵਾ ਹੋਰ ਕਈ ਕਾਰਨ ਨੇ ਜਿਸ ਨਾਲ ਹਵਾ ਪ੍ਰਦੂਸ਼ਨ ਹੁੰਦਾ ਹੈ । ਇਹਨਾਂ ਵਿੱਚ ਇਮਾਰਤਾਂ ਦੇ ਨਿਰਮਾਣ ਅਤੇ ਢਾਉਣ ਵੇਲੇ ਪੈਦਾ ਹੋਣ ਵਾਲਾ ਕੱਚਰਾ , ਕੱਚਰੇ ਦਾ ਮਾੜਾ ਪ੍ਰਬੰਧਨ , ਕੱਚੀਆਂ ਸੜਕਾਂ ਅਤੇ ਧੂੜ ਪ੍ਰਬੰਧਨ , ਬਾਇਓਮਾਸ ਸਾੜਨਾ ਵੀ ਸ਼ਾਮਲ ਹੈ । ਅੱਜ ਸੂਬਿਆਂ ਨੇ ਪ੍ਰਦੂਸ਼ਣ ਖਿਲਾਫ ਲੜਾਈ ਲਈ ਬਣਾਈਆਂ ਯੋਜਨਾਵਾਂ ਸਾਂਝੀਆਂ ਕੀਤੀਆਂ ਅਤੇ ਕੇਂਦਰ ਨੇ ਪ੍ਰਦੂਸ਼ਣ ਤੇ ਕਾਬੂ ਪਾਉਣ ਲਈ ਕੁਝ ਹੋਰ ਕਦਮ ਚੁੱਕਣ ਦੀ ਸਲਾਹ ਦਿੱਤੀ ਹੈ । ਮੰਤਰੀ ਨੇ ਦੱਸਿਆ ਕਿ ਕੇਂਦਰ ਵੱਲੋਂ ਕਈ ਉਪਾਅ ਕੀਤੇ ਗਏ ਹਨ , ਜਿਵੇਂ ਬੀ ਐੱਸ 6 ਨਿਯਮਾਂ ਨੂੰ ਲਾਗੂ ਕਰਨਾ , ਬਦਰਪੁਰ ਅਤੇ ਸੋਨੀਪਤ ਵਿਚਲੇ ਬਿਜਲੀ ਘਰਾਂ ਨੂੰ ਬੰਦ ਕਰਨਾ ਸ਼ਾਮਲ ਹੈ । ਉਹਨਾਂ ਕਿਹਾ ਕਿ ਉੱਤਰੀ ਤੇ ਪੱਛਮੀ ਪੈਰੀਫੇਰੇਲ ਐਕਸਪ੍ਰੈਸ ਵੇਅਜ਼ ਨੇ ਦਿੱਲੀ ਵਿੱਚ ਵਾਹਨਾਂ ਕਰਕੇ ਹੋਣ ਵਾਲੇ ਹਵਾ ਪ੍ਰਦੂਸ਼ਣ ਨੂੰ ਕਾਫੀ ਹੱਦ ਤੱਕ ਘਟਾਇਆ ਹੈ ਅਤੇ ਤਕਰੀਬਨ ਦਿੱਲੀ ਤੋਂ 60,000 ਵਾਹਨਾਂ ਨੂੰ ਦਿੱਲੀ ਦੇ ਬਾਹਰੋਂ ਬਾਹਰ ਕੱਢਿਆ ਗਿਆ ਹੈ , ਜਿਹੜੀਆਂ ਪਹਿਲਾਂ ਦਿੱਲੀ ਦੇ ਵਿੱਚ ਦੀ ਜਾਂਦੀਆਂ ਸਨ । ਖ਼ਤਮ ਕਰਦਿਆਂ ਹੋਇਆਂ ਮੰਤਰੀ ਨੇ ਸੂਬਾ ਸਰਕਾਰਾਂ ਦੇ ਨਾਲ ਨਾਲ ਲੋਕਾਂ ਨੂੰ ਹਵਾ ਪ੍ਰਦੂਸ਼ਣ ਘੱਟ ਕਰਨ ਲਈ ਸਾਕਰਾਤਮਕ ਉਪਾਵਾਂ ਦਾ ਯੋਗਦਾਨ ਪਾਉਣ ਲਈ ਅਪੀਲ ਕੀਤੀ ਅਤੇ ਦੱਸਿਆ ਕਿ ਕੇਂਦਰ ਪ੍ਰਦੂਸ਼ਨ ਕੰਟਰੋਲ ਬੋਰਡ ਇਹਨਾਂ ਸੂਬਿਆਂ ਨਾਲ ਰੋਜ਼ਾਨਾ ਦੇ ਅਧਾਰ ਤੇ ਪ੍ਰਦੂਸ਼ਣ ਪੱਧਰ ਮੋਨੀਟਰ ਕਰਨ ਲਈ ਕੰਮ ਕਰੇਗਾ ।
 

ਜੀ ਕੇ