হকশেল অমসুং য়াইফ য়ুম্বাল, সাইন্স অমসুং তেক্নোলোজী অমসুং আর্থ সাইন্সেসকী কেন্দ্র মন্ত্রী দাঃ হর্শ বর্ধন অমসুং রাজ্য মন্ত্রী (ইন্দিপেন্দেন্ত চার্জ), লেবর অমসুং ইমপ্লোয়মেন্তকী কেন্দ্র মন্ত্রী শ্রী সান্তোশ কুমার গাংৱারনা নিতি আয়োগকী মেম্বর (হেল্থ) দাঃ ভি.কে. পাউলগী মমাংদা বর্চুএলগী খুত্থাংদা “ইন্দস্ত্রীশিংগী থবক তৌফমদা কোবিদ-১৯দগী তেক্ত কায়দনা লৈনবা কাঙলোন” কৌবা চেফোঙ অমা ফোঙখ্রে।

চেফোঙ অসিবু ফোঙবদা হরাওবা ফোঙদোক্লদুনা দাঃ হর্শ বর্ধন্না হায়খি, “মসিগী কাঙলোনশিং অসি য়াম্না থাগৎনিংঙাইনি অমসুং মতম য়াম্না চাবা ওই। মসিনা ইন্দস্ত্রীগী থৌমীশিংগী য়াইফবদা তেংবাংগনি। মসিগী কাঙলোনশিং অসিনা থৌমীশিং অমসুং থবক পীবা মীওইশিংদা মশাগী থবক তৌফমশিংদা কোবিদ-১৯গী খুদোংথীবগী চাং খঙদোকপা অমসুং মসিগী মতুং ইন্না চেকশিন থৌরাং লৌখৎপদা তেংবাংগনি”। মসিগী কাঙলোনশিং অসিনা নিংশা হোনবগী হাইজিন, খুৎ তোয়না হাম্বা, সোসিএল দিস্তেন্সিং তৌবা অমসুং থবক তৌফমশিংবু তোয়না সেনিতাইজেসন তৌদুনা লায়না অসিবু থেংনবগী থৌওংদা য়ুম্ফম ওইদুনা থবক তৌফমশিং অসিবু তেক্ত কায়দনা লৈহন্নবা পাঙথোকপা য়াবা মরু ওইবা থবকশিংগী মরমদা পল্লি।

হকশেল মন্ত্রীনা মখা তানা অসুম্না হায়খি, “ভারত সরকারনা প্রধান মন্ত্রী শ্রী নরেন্দ্র মোদীগী লুচিং মখাদা থৌমীশিংগী য়াইফ য়ুম্বালগীদমক্তা থবক তৌনবা খোঙফম চেৎনা লৈরি। লৈবাক অসিনা শেন্মিৎলোনগী থবকশিং অমুক্কা হন্না হৌদোক্নবা হোৎনরিবা অসিদা মসিগী কাঙলোনশিং অসিগী ইন্দস্ত্রীগী মনুংদা ইনবা অসি য়াম্না তঙাই ফদবনি। সাইন্তিফিক ওইবা মওংদা ঙাকথোকপা, চেকশিনবা অমসুং ৱাখল চুম্না লৈবা অসিনা ঐখোয়না কোবিদকা লান্থেংনবদা তেংবাংগনি। মসিগী কাঙলোনশিং অসিনা কোবিদ-১৯ নারকপা য়াবা তোঙান তোঙানবা থবকশিংগা মরী লৈনবা খুদোংথিবা কয়া অমগী ফিভম য়েংশিনবা, থাক-খায়বা অমসুং হন্থহনবদা তেংবাংদুনা মসিদগী ঙাকথোক্নবা থৌরাং য়াৎপা ঙমহনগনি”।

ভারতনা কোবিদ-১৯গা লেন্থেংনরিবা অসিদা দাঃ হর্শ বর্ধন্না অসুম্না হায়খি, “কোবিদকা মরী লৈনবা হীরম খুদিংদা ভারতনা অতোপ্পা চাউখৎপা লৈবাকশিংদগী হেন্না নীংথিজনা থেংনরি। নাবা ফবগী চাং লেপ্তনা হেনগৎলকপা অমসুং মী শিবগী চাং লেপ্তনা হন্থরক্লিবা অসিনা রাজ্য অমসুং য়ু.তি.শিংনা ইন্দনা চৎলিবা কোবিদ-১৯ লাকশিনবগী থৌওংশিং অসি মাই পাক্লে হায়বা তাক্লি। মসিগী মহৈ অসি লৈবাক অসিগী মীয়াম অমসুং লুপশিংনা পুন্না হোৎনমিন্নরিবা অসিনা ফংহনবনি”। মহাক্না কোবিদকী অনাবশিংদা তেংবাংবগী মরু ওইবা থৌদাং লৌরিবা ই.এস.আই.সি.গী হোস্পিতালশিংসু থাগৎপা ফোঙদোকখি।

দাঃ হর্শ বর্ধন্না মীয়ামদা কোবিদকা চান্নবা থৌওংশিং ইনবীয়ু হায়খি। লায়চৎ অসি থেংনবা ঙম্নবা বেক্সিন অমস পুথোরক্ত্রিবা ফাওবদি মাস্ক/ফেস কবর উপ্পা, খুত-হাম্বা অমসুং ফিজিকেল দিস্তেন্সিংগী কাঙলুনবা ইনবগী মওং ওইরিবা ঐখোয়গী খুন্নাইগী বেক্সিন অসিবু ইন্দুনা চৎনবা অমুক্কা হন্না ৱাফম কয়া ফোঙদোকখি।

শ্রী সান্তোশ কুমার গাংৱারনা হায়খি, “মসিগী ইন্দস্ত্রীগী থৌমীশিংবু তেক্ত কায়দনা থম্নবা কাঙলোনশিং অসিনা মীয়ামগী পুক্নিং থৌগৎকনি। হৌজিক থেংনরিবা ইরাং অসিগী মতাংদা ৱাখলবু নীংথিনা শেম-শাদুনা লৈবা অমসুং কোবিদকা চান্নবা থৌওংশিং ইন্দুনা চৎপা হায়বসি য়াম্না মরু ওইবনি”।

দাঃ পাউলনা হায়খিবদা মসিগী কাঙলোন অসিনা ইন্দস্ত্রীগী থৌমীশিংগী তেক্ত কায়দবগী মতাংদা লমজিং মৈরা ওইগনি হায়খি। কোবিদকা চান্নবা থৌওং ইলহন্নবা পান্দম থম্লিবা মীওইশিংদা মসিগী কাঙলোনশিং অসি পাক-শন্না য়ৌহনগদবনি হায়না মহাক্না মখা তানা হায়খি।

লেবর অমসুং ইমপ্লোয়মেন্তকী সেক্রেতরী শ্রী হীরালাল সমারিয়া; ই.এস.আই.সি.গী দাইরেক্তর জেনেরেল শ্রীমতি অনুরধা প্রসাদ; হেল্থ সর্বিসকী দাইরেক্তর জেনেরেল দাঃ সুনিল কুমার অমসুং এম.ও.ঐচ.এফ.দবল্যু.গী এদিস্নেল সেক্রেতরী মিস আর্তি অহুজাসু থৌরম অদুদা শরুক য়াখি।

****