ঙসি য়ুনিয়ন মিনিস্তর দোক্তর জিতেন্দ্রনা হায়খি অনৌবা লৌউ-শিংউগী আইনশিংগী মখাদা এক্তকী মতুংইন্না কন্ত্রেক এগ্রিমেন্তশিং থম্নবা অসি লমগা নত্তে মহৈ—মরোংশিংগনি, মরম অদুনা লৌমীশিংনা অতোপ্পশিং লান্না থাজরোইদবনি।

মোদী সরকারনা পুথোকপা লৌমীশিংগী আইনশিং শৌগৎতুনা অমসুং কংগ্রেস দলনা লান্না পাউ শন্দোক্লিবা অসিগী মায়োক্তা মহাক্কী লোক সভা কেন্দ্রদা খোঙজং অমা হৌদোকখিবগা লোয়ন্না দোক্তর জিতেন্দ্রনা দলগী থৌমীশিং, সরপঞ্চশিং অমসুং ঙমখৈদা লৈবা খুঙ্গংশিং অমসুং কাথুৱা অমসুং উধমপুর জিলাশিংগী খুঙ্গংশিংগী বি.দি.সি চিয়রমেনশিংদা ৱা ঙাংখি।

দোক্তর জিতেন্দ্রনা হায়খি লৌমীশিংনা অপেনবা পোকপা অমসুং চিংনবা অমতা লৈতবা মতম অসিদা, লৌউ-শিংউগী লৌশিং অমতা লৈতবা রাজনিতিগী ইথিল চংবা কাংবু খরনা লৌমীশিং লান্না লমজিংদুনা মসি ৱাথোক অমা ওইহন্নবা হোৎনখি।আইন অসি ভারতকী লৌমীশিং অমসুং মীচমশিং য়াইফনবনি, মরম অদুনা ৱাখল মান্নবা মীওইশিং থোরক্কদবনি অমসুং মশাগীতা খনবশিংনা হৌদোক্লিবা অরানবা খোঙজং অমসুং অরান ই-পাউ পীবা অসি মুৎথৎকদবনি।

মহাক্না হায়খি বিল অসিনা লৌমীশিংগী লম য়োনবা, লিজ নৎত্রগা মোর্গেজ অথিংবা থম্লিবা অসিদা শেঞ্জাউ পায়বা খরনা লৌমীশিংগী লম লৌশিনগদৌরে হায়না করিগী মরাল শিরিবনো?এগ্রিমেন্ত অসি মহৈ-মরোংশিংগীনি অমসুং লমগী নত্তে হায়বা বিল অসিনা ময়েক শেংনা তাক্লে।

দোক্তর জিতেন্দ্রনা হায়খি লৌমীশিংগা কন্ত্রেক এগ্রিমেন্ত লৈনরিবা অসি অরেপ্পা মমল ফংনবনি। মসি খক নত্তনা, অনৌবা এক্ত অসিনা লৌমীশিংনা অপাম্বা মতমদা চৈরাক অমতা লৈতনা কন্ত্রেক তোক্নবগী খুদোংচাবশিং পীরি।

মহাক্না হায়খি আইনশিংদা য়াওদবা ৱাখলনা শাগৎপা ৱাফমশিং ওপোজিসন্না পুখৎলক্লি। মতমগী মতুংইন্না এম.এস.পিগী খুদোংচাবশিং তোকপা য়াই হায়না পল্লি অদুবু কংগ্রেস দল অমসুং অতোপ্পশিংনা চমচরবা লৌমীশিংগী পুক্নিংদা অকিবা ফাওহন্নবা হোৎনরি।

মহাক্না হায়খি দলগী মরুপ-মপাংশিংনা খুঙ্গং খুদিংমক্কী লৌমীশিং উনগদবনি অমসুং অচৌবা লৌতুনবা অসিগী মতাংদা লৌমীশিংদা খঙহনগদবনি। প্রধান মন্ত্রী নরেন্দ্র মোদীনা হৌদোক্লিবা য়াম্লবা য়াইফ-থৌরাংগী কান্নবশিং লৌমীশিংদা ফংহনগদবনি।

*****