নোর্থ-ইস্তর্ন কাউন্সিলগী চেয়রমেনসু ওইরিবা কেন্দ্রগী গৃহ মন্ত্রী শ্রী অমিৎ শাহনা হয়েং বর্চুএলগী খুত্থাংদা “অৱাং-নোংপোক লমদমশিংদা পন্থুংফম-২০২০”গী থৌরম শঙ্গাগনি। অৱাং-নোংপোক লমদমশিংদা পন্থুংফম হায়বা থৌরম অসি অৱাং-নোংপোক্কী লমদম চাউখৎপা মন্ত্রালয়গী চহিগী ওইনা পাঙথোকপা লমদম অসিবু লৈবাক্কী অতোপ্পা মফমশিংদা য়ৌহন্দুনা লৈবাক অসিগী অপুনববু হেন্না চেৎশিনহন্নবা থৌরম অমনি। কেন্দ্রগী রাজ্য মন্ত্রী (ইন্দিপেন্দেন্ত চার্জ), অৱাং-নোংপোক্কী লমদম চাউখৎপা (দোনের), এম.ও.এস. পি.এম.ও., পর্সোন্নেল, পব্লিক গ্রাইবেন্সস, পেন্সন, এতোমিক ইনর্জী অমসুং স্পেসকী মন্ত্রী দাঃ জিতেন্দ্র সিংহনা থৌরম অসিগী অথোইবা মীওই ওইগনি।

অৱাং-নোংপোক লমদমশিংদা পন্থুংফম-২০২০গী হীরমদি “নুংঙাইরবা অনৌবা পন্থুংফমশিং” ওইগনি অমসুং মসিনা তুরিজম সেক্তর অসিনা খোঙজেল য়াঙখৎলক্লিবা অসিগা লোয়ননা লমদম অসিগী লমকোয়বগী পন্থুংফমশিংনা মমিং চৎখৎলকপা অমসুং পুক্নিং চীংশিনবা হেনগৎলকপা অসিগী মতাংদা ৱারোল কয়া অমা ফোঙদোক্কনি। থৌরম অসিনা লম কোয়বগী মতাংদা অহেনবা মিৎয়েং চঙই অমসুং সেপ্তেম্বর ২৭, ২০২০দা মালেমগী লমকোয়বগী নুমিৎ তাশিল্লকপা অসিগা তান য়াম্না চান্নবসু ওইরি।

নুমিৎ ৪নি চত্থগদবা থৌরম অসিদা রাজ্যশিং অমসুং মফম অসিগী লমকোয়বগী মফম কয়া, রাজ্যশিংগী শক্নাইবা অমসুং মাই-পাক্লবা মীওইশিংগী ৱারোল, লমদমশিং অসিগী মমিং লৈরবা ওন্তোপ্রিনর কয়াগী শক-তাকপা অমসুং মফমশিং অসিগী খুৎ-শা হৈবা, নাৎকী ওইবা ফেশন অমসুং পোত্থোক কয়াগী মতাংদা ওদিও-বিজুএল প্রজেন্তেসন কয়া উৎকনি। মসিগা লোয়ননা থৌরম অসিদা রাজ্যশিং অসিগী মুখ্য মন্ত্রীশিং অমসুং তুরিজমগী মন্ত্রীশিংগী অখন্নবা ৱারোল কয়া পীবা অমসুং রাজ্য অমমমগী কলচরগী থৌওং কয়া লান্থোকপা অমসুং রাজ্য নিপান অসিগী নাৎকী থৌরমশিং অমতা ওইনা পুনশিন্দুনা লান্থোকপগী থৌওং কয়া অমসু য়াওগনি।

হন্দক্কী চয়োলগী অঙনবদা “অৱাং-নোংপোক লমদমশিংদা পন্থুংফম-২০২০” কুমহৈ অসিগী লোগো অমসুং ঈশৈ মীয়ামদা লান্থোকখিবদা দাঃ জিতেন্দ্র সিংহনা হায়খিবদা অৱাং-নোংপোক লমদমশিংদা পন্থুংফম হায়রিবা কুমহৈ অসিনা হৌখিবা চহি খরদা লৈবাক অসিগী তোঙান তোঙানবা মফমশিংদা য়ৌরি। ইং ২০১৯দা ভরানসিদগী নই-দিল্লীগী ইন্দিয়া গেৎকী লম্পাক্তা নত্ত্রগা চান্দিগরদা য়ৌদুনা কোয়খিবা অসু হন্দক্কী মতাং অসিদা মসিনা বর্চুএলগী খুত্থাংদা মশাগী লমদমদা য়ৌরগনি। মহাক্না কুমহৈ অসি লম-কোয়বা খক্তগী নত্তে, মসিদি মফম অসিগী অনৌবা অমসুং শিজিন্নদ্রিবা মতিক অসিগী কান্নবা লৌনবা লুপশিং অমসুং মরু ওইনা নহা ওইরিবা ওন্তোপ্রিনরশিংদা বার্তোন তৌবনি হায়না হায়খি।

দাঃ জিতেন্দ্র সিংহনা কোবিদ-১৯গী মতুংদদি অৱাং-নোংপোক্কী লমদম অসি ভারতকী ওইনা লম-কোয়বা অমসুং ললোন-ইতিক্কী পন্থুংফম অমা ওইরগনি অমসুং মসিগী থৌওং অসিনা প্রধান মন্ত্রীনা আত্মানির্ভর ভারতকী খোল্লাও লাওদুনা “ভোকেল ফোর লোকেল”দা মিৎয়েং চঙলিবা অসিদা মরু ওইনা তেংবাংবা থৌওং অমা ওইরগনি হায়না হায়খি।

“অৱাং-নোংপোক লমদমশিংদা পন্থুংফম-২০২০”গী থৌরম অসিনা মীয়াম্না মীরমদা চৎলুদনা ইশাগী লম-কোয়বগী পন্থুংফমশিং খঙদোকহন্নবা হোৎনবা থৌওং অমনি হায়না মহাক্না হায়খি। মন্ত্রীনা হায়খিবদা মীয়াম্না লোকেলগী মফমশিংদা চৎপা হায়বা ৱাশক অমা থমদুনা লোকেল তুরিজম অমসুং হোস্পিতালিতী খুমাং চাউখৎহন্নবা হোৎনগদবনি হায়খি। মসিদা নত্তনা অৱাং-নোংপোক্কী লমদমশিং অয়াম্বনা কোরোনা লৈতবা মফম ওইদুনা লাকখিবা অসিনা মালেম শিনবা থুংবগী ওইনা য়াম্না তেক্ত কায়দবা লম-কোয়বগী মফম অমা ওইরি।

তাং ৩০/৯/২০২০দা পাঙথোক্কদবা কুমহৈ অসিগী লোইশিনবগী থৌরমদা য়ুথ এফিয়র্স অমসুং স্পোর্তকী কেন্দ্র মন্ত্রী শ্রী কিরেন রিজিজুনা অথোয়বা মীথুং ওইগনি অমসুং ফুদ প্রোসেসিং ইন্দস্ত্রীগী কেন্দ্র মন্ত্রী শ্রী রামেশ্বর তেলিনা গেস্ত ওফ হোনর ওইগনি।

অৱাং-নোংপোক্কী মফমশিংদা অসিদা করি করি লৈবগেঃ

ইকো-তুরিজম- অৱাং-নোংপোক্কী মফমশিং অসিদা ৱাইল্দলাইফ সেংচুএরী/পার্ক, য়েংবা নুংঙাইবা মহৌশাগী ফজবা, ঈশিং-চাইবী, উমংনচিংবা কয়া লৈদুনা হকথেংনবা অমসুং নাকোইনবা মওংগী ইকো-তুরিজমগী খ্বাইদগী চান্নবা মফম্নি। মফমশিং অসিদা অতোপ্পা হীরমশিংগী মনুংদা রিভর রাফতিং তৌবা, তোঙান তোঙানবা থাক্কী চিঙ কাবা, হেং-গ্লাইদিংনচিংবা থৌওং কয়া লৈদুনা মপুং ফাবা এদভেঞ্চরগী মওং কয়া লৈ।

নাৎ- মসি য়াম্না মরু ওইবনি অমসুং মসিনা লমদম অসিদা হীরম অসিগা মরী লৈনবা খনগৎলবা লম-কোয়বশিংগী পুক্নিং চীংশিনবগী মতিক লৈ। তোঙান তোঙানবা অমসুং ইনাক খুল্লবা ত্রাইবেলগী নাৎ অমসুং চৎনবী অসিনা অৱাং-নোংপোক লমদম অসিবু অতোপ্পা ভারতকী মফমশিংদগী তোঙান্না তাহল্লিবনি। লমদম অসিগী রাজ্য ৮গী ফজরবা খুৎ-শা হৈবগী পোত্থোকশিংনসু তোঙান্নবা তাহল্লি। অতোপ্পা মফমশিংদা তৌদবগুম, লমদম অসিদদি খুৎ-শা হৈবগী থবক শুবা অসি নোঙমগী পুন্সিগী শরুক অমনি।  

লোকেলগী খুন্নাইশিংনা মখোয়গী চৎনবীগা লম-কোয়বগা পুন্সিনবা অসিসু লমদম অসিগী য়াম্না মরু ওইবা থৌওং অমনি।

চৎনবী- লমদম অসিদা চৎনবীগী থৌওংশিংদা য়ুম্ফম ওইবা লম-কোয়বগী থৌওং অসি য়াম্না হেনগৎলক্লি অমসুং মসিদা লম-কোয়বা লাকপা মীওইশিংনা মফম অসিগী পন্থুংফমশিং য়েংবতা নত্তনা মফম অসিগী চৎনবী কয়াগী শরুক য়াবা ফংহল্লি।

লাই-তিনগী মফমশিংদা চৎপা- মফম অসিদা লিরবা অমসুং মমিং লৈরবা ধর্মগী মফম কয়া অমা লৈ অমসুং লাই-খুরুম্বা লাকপা মীওইশিংগী নুংঙাইহন্নবা হায়দুনা নেস্নেল তুরিজম সর্কিৎকসু পুন্সিনহল্লি।

কারবার-  নীংথিরবা মহৌশাগী অকোয়বা অমসুং আউৎবাউন্দ ব্যুজিনেসকী মীফমশিংগী চৎনবী অমা লাক্লিবা অসি য়েংলদুনা এন.ই.আর. অসিনা ব্যুজিনেস তুরিজমগী লমদসু খুদোংচাবা কয়া অমা পীরি। লৈবাক মনুং অমসুং অতোপ্পা লৈবাকশিংগা শম্নবা নোংথক্কী লম্বী, থাক-ৱাংবা হোতেলশিং, কনবেন্সন সেন্তরশিং, রিজোর্ত্তা য়ুম্ফম ওইবা কনবেন্সন সেন্তরশিং কয়া লৈবা অসিনা সেক্তর অসিবু হেন্না পাক-চাউথোকহনবদা তেংবাংলি।

<><><><><>