ঙাকশেল মন্ত্রালয়

রাজ্য সভাদা ঙাকশেল মন্ত্রী শ্রী রাজনাথ সিংহনা সেপ্তেম্বর ১৭তা পীখিবা ৱারোল

Posted On: 17 SEP 2020 1:28PM by PIB Imphal

"ইকাইখুম্নজরিবা চিয়রমেন,

১. ওগস্ত হাউজ অসিগী মীহুৎশিংগী মফমদা লদ্দাখ ঙমখৈদা হৌখিবা থা খরসিদা লৈখিবা ফিবমগী মতাংদা থমজপগে হায়না হৌগৎচবনি। ঐখোয়গী লৈবাক অসিবু শেমগৎনবা হোৎনবদা ইরৈচা মশীং থিঙমদনা থৱা কৎখ্রে। নীং তম্লবা ভারতকী আর্ম্দ ফোর্সেসনা ঐখোয়গী ঙমখৈ ঙাক্নবা হোৎনবদা খ্বাইদগী থাক ৱাংবা মওংদা থৱাই থাবদা চিংনবা লৈখিদ্রি। ঐখোয় পুম্নমক্না খঙনরে মদুদি, জুন ১৫, ২০২০দা কর্নেল সন্তোশ বাবু অমসুং ঐখোয়গী থৌনা ফরবা লান্মী ১৯না গলৱান তম্পাক্তা ঐখোয়গী ইমা লৈবাক ঙাক্নবগীদমক থৱাই থাখ্রে। ঐখোয়গী প্রধান মন্ত্রী শ্রী নরেন্দ্র মোদীজি মশামক্না লদ্দাখতা চত্তুনা ঐখোয়গী লান্মীশিংগী থৌনা হন্দনবা হোৎনখি। ঐহাকসু, মখোয়গা উন্নরবা মতুংদা থৌনা মশক খঙলকখি। হাউজ অসিনা গলৱান্দা থৱাই থাখিবা অথৌবা কুন্দা ইকাই খুম্নবা উত্তুনা সেসন হৌদ্রিঙৈদা মিনিৎ অনী তুমিন্না লেপখি।

২. ঐহাক্না চাইনাগা ঐখোয়গগী মরক্তা লৈরিবা ঙমখৈগী চয়েৎনবসিগী মতাংদা থম্নবা মতম খরা লৌজগে। হাউস অসিনসু খঙনরে মদুদি ভারৎ অমসুং চাইনা অনীনা ঙমখৈগী চয়েৎনবা লৈরিবসি লোইশিনবা মথৌ তারি। চাইনানা ভারত অমসুং চাইনাগী মরক্তা মহৌশাদগী লৈরকপা চৎনবী অমসুং মহৌশাগী এলাইনমেন্ত অসি য়াবা ঙমদে। ঐখোয়না থাজৈ মদুদি, এলাইন্মেন্ত অসি ত্রিতিস অমসুং য়ান-ৱারোল কয়াগা লোইননা পুৱারীদগী শীজিন্নরকপা মওং অমদি চহী চা কয়া নাকল অনীমক্না খঙনরক্লবা জিওগ্রাফিকেল প্রিন্সিপালশিংনা শেম্লকপনি। চাইনাগী ফিরেপতি, লৈবাক অনীগী মরক্তা লৈরিবা ঙমখৈগী শরুক অসি দিলিমিত তৌদে হায়বসিনি, মফম অসিদা মহৌশাগী কস্তমেরী লাইন অমা জুরিসদিক্সনগী ৱাংমদা লৈরিবসি মখোয়না পুৱারীদগী হৌনা শীজিন্নদুনা লাক্লি অমসুং নাকল অনীমক্কী ওইবা মহৌশাগী কস্তমেরী লাইনগী ৱাহন্থোক লৈ হায়বসিনি। লৈবাক অনী অসিনা ১৯৫০-৬০দা খন্ন-নৈনদুনা লাক্লি অদুবু হায়রিবা ময়াম অসিদা নাকল অনীমক্না য়ানবা য়াবা ৱারোইশিন অমত্তা পুরক্ত্রি।

৩. হাউস অসিনা খঙনরে মদুদি, চাইনানা মতম চুপ্পদা লদ্দাখকী য়ুনিয়ন তেরিতোরীদা লম স্ক্বার কিলোমিতর ৩৮,০০০ রোম খোপচিল্লি। মসিগী মথক্তা, হায়রিবা ১৯৬৩গী  সিনো-পাকিস্তান 'বাউন্দরী এগ্রীমেন্ত'কী মখাদা, পাকিস্তান্না পাকিস্তান ওকুপাইদ কাশ্মিরদগী চাইনাদা লম স্ক্বার কিলোমিতর ৫,১৮০ পীথোকখ্রে। চাইনানসু অরুনাচল প্রদেশকী ইন্দিয়া চাইনা ঙমখৈদা ভারতকী লম স্ক্বার কিলোমিতর ৯০,০০০ হেন্না মখোয়গীনি হায়রি।

৪. ভারত অমসুং চাইনা অনীমক্না হৌনবী মতুং ইন্না য়ানরে মদুদি ঙমখৈগী ৱাসি য়াম্না লুবা ইস্যু অমনি, মসিদা খাঙমিন্নবা অমসুং অচুম্বা অমসুং মরম চানা নাকল অনীমক্না য়ানবা পাম্বৈ অমা পুথোক্নবা শান্তিগী ৱারী কয়া চঙই। মরক্কী ওইনা, নাকল অনীমক্না য়ানরে মদুদি ঙমখৈগী লমদা শান্তি অমসুং মহৌশাগী ফিবমদা লাকহন্নবা হোৎনবা হায়বসি লৈবাক অনীগী মরক্তা লৈরিবা মরী অসি ফগৎনবা হোৎনবদা তঙাইফদবা অমা ওই।

৫. ঐহাক্না মসিমসু পন্নিংই মদুদি, ভারত অমসুং চাইনাগী মরক্তা নাকল অনীমক্না য়ানরবা লাইন ওব একচুএল কন্ত্রোল (এল.এ.সি.) ঙমখৈগী লমদা লৈতে অমসুং এল.এ.সি.গী অনীমক্না য়ানরবা ফিবম অমত্তা লৈত্রি। মরম অসিনা, ঙমখৈগী লমদা শান্তি অমসুং মহৌশাগী ফিবম কায়দনবগীদমক, মরুওইনা লাইন ওব একচুএল কন্ত্রোল (এল.এ.সি.), লৈবাক অনীনা মশীং থীঙমদনা য়ানৱারোল অমসুং চৎন-কাংলোন কয়া লেপ্নরি।

৬. য়ানৱারোল অসিগী মখাদা নাকল অনীমক্না এল.এ.সি.দা হৌজিক এল.এ.সি.দা লৈরিবা ফিবম অসিগা লোইননা ঙমখৈগী ৱাফমদা অকায়বা য়াওদনা শান্তি অমসুং মহৌশাগী ফিবমদা লৈহনবা। মপুং ওইনা য়েংবদা মরী অসি ১৯৮৮তগী হৌদুনা অফবা মওংদা লৈরক্লিবনি হায়বসিদা য়ানরিবনি। ভারতকী ফিরেপনা, ঙমখৈগী ৱারী শান-শান্ননা লৈবাক অনীগী মরী ফগৎনবা হোৎনবনি, ঙমখৈগী লমদা লৈবা এল.এ.সি.দা শান্তি অমসুং মহৌশাগী ফিবমদা অকায়বা পীরকপা হায়বসি লৈবাক  অনীগী ম্রক্তা লৈনরিবা অফবা মরী অসিদা চাউনা অকায়বা পীগনি।

৭. ১৯৯৩ অমসুং ১৯৯৬কী য়ানৱারোলগী মরুওইবা মশক অমদি, নাকল অনীমক্না মখোয়গী মিলিতরী ফোর্সশিং লাইন ওব একচুএল কন্ত্রোলদা মশীং য়ামদনা থম্নবা অসিনি। য়ানৱারোল অসিদা মসিমসু পল্লি মদুদি, ঙমখৈগী ৱারীগী অরোইবা পাম্বৈদি, নাকল অনীমক্না লাইন ওব একচুএল কন্ত্রোল অসি ইকাই খুম্নবা অমসুং ঙাক্না চৎপনি। মখাদা তানা য়ানৱারোল অসিদা, ভারত অমসুং চাইনানা লাইন ওব একচুএল কন্ত্রোল অসি নাকল অনীমক্কী য়ানবগী ফিবমদা থম্নবা হোৎনবনি। অসুম্না, ১৯৯০গী লোইরমদাইদিগীনা ২০০৩দা, নাকল অনীমক্না এল.এ.সি. শেংদোক্নবা অমসুং খঙদোক্নবা থবক লৌখৎখি। অদুবু মসিগী মতুন্দফা চাইনাগী নাকলনা এন.এ.সি.গী খঙদোক্নবগী থবক্তা শরুক য়ানিংবগী অপাম্বা উৎখিদে। মসিগী মরম্না, চাইনা অমসুং ভারতকী ৱাখলদা এল.এ.সি.গী লম খরা ননশিন্নদুনা লৈরি। মফমশিং অসিদা, অদুগা ঙমখৈগী লম খরদা, নাকল অনীমক্কী ত্রুপশিংনা লৈগদবা অমসুং মুক্নরকপা মতমদা ঙাকথোক্নবা তোঙান তোঙানবা য়ানৱারোল কয়া শেমখি।

৮. হৌজিক লৈরিবা ফিবম অসি ঐনা হাউসতা তমদ্রিঙৈদা, সরকার অসিনা সেন্ত্রেল আর্ম্দ পুলিস ফোর্সেস অমসুং আর্ম্দ ফোর্সেস অহুম য়াওনা তোঙান-তোঙানবা ইন্তেলিজেন্স এজেন্সীশিংদগী মচা তানা অমসুং মতম কয়া চুমদুনা লাক্লবা মেকানিজম পায়খৎলি। তেক্নিকেল অমসুং হ্যুমেন ইন্তেলিজেন্সনা লেপ্পা লৈতনা মতীক চানা পাউ লৌরি। হায়রিবসিসু আর্ম্দ ফোর্সেসশিংদা খঙহন্দুনা মখোয়না ৱারেপ লৌবদা নুংঙাইনবা হোৎনরি।

৯. হৌজিক্তি হাউসকী মফমদা হৌজিক লৈরিবা ফিবমগী মতাংদা অমুক থমজগে। এপ্রিলদগী হৌদুনা, ঐখোয়না চাইনাগী নাকলদগী নোংপোক থংবা লদ্দাখকী নাকলদা ত্রুপ অমসুং খুৎশু খুৎলাই পৈশিনবগী থবক তৌরে হায়বা পাউ ফংখি। মেগী অঙনবা শরুক্তা, চাইনাগী নাকলনা মহৌশাগী ফিবম, ঐখোয়গী মহৌশাগী পেত্রোলিং পেতর্ন্দা অকায়বা পীবা মওংদা গলৱান তম্পাক্তা থবক লৌখৎলকখি, মসিনা মুক্নবা ওইহল্লকখি। গ্রাউন্দ কম্মান্দরশিংনা লৈবাক অনীগী য়ানবা অমসুং চৎন-কাংলোনশিংগী মতুং ইন্না ফিবম অসিবু লাকশিনখ্রবসু, মেগী ময়াই থংবা শরুক্তা চাইনাগী নাকলদগী নোংচুপ থংবা এল.এ.সি.গী শরুক্তা আইন কাইনা থবক কয়া তৌরকখি। মসিদা, কোংকা লা, গোগ্রা অমসুং পাঙ্গোং পাৎকী অৱাং থংবা মপাল য়াওরি। হায়রিবা থবকশিং অসি ঙন্না খঙহৌখি অমসুং ঐখোয়গী আর্ম্দ ফোর্সেস্না মতীক চানা থবক লৌখৎখি।

১০. ঐখোয়না চাইনাগী নাকলদসু দিপ্লোমেতিক অমসুং মিলিতরী চেন্নেলগী মতেংনা চাইনানা অসিগুম্বা থবকশিং অসিনা মরম ওইদুনা য়ানদুনা লৈবা ৱাফমশিং থুগাইনবা হোৎনরে হায়না ফোংদোকখি। মসিসু কেতিগোরিকেল ওইনা য়াদে হায়না ফোংদোকখি।

১১. এল.এ.সি.দা লৈরিবা য়ানদবগী ফবম অসি হেনগৎলকপদগী, নাকল অনীমক্কী অকোক থোংবা কম্মান্দরশিংনা জুন ৬, ২০২০দা নাকল অনীমক য়ানদুনা হন্দোক্ননবা ৱাফম পুখৎনখি। নাকল অনীমক্না এল.এ.সি.না ঙাক্না চৎপা অমসুং য়ানদুনা লৈরবা ৱাফম থুগাইদনবা হোৎননবগীদমক পুখৎনখি। অদুবু, ৱাফম অসি চাইনাগী নাকলনা থুগাইরকপদগী জুন ১৫দা গলৱান তম্পাক্তা অকনবা মওংদা মুক্নখি। ঐখোয়গী মথৌনা লৈরবা লান্মীশিং মথৱাই থাখি অমসুং চাইনাগী নাকলদসু শোকপা পনবা নংহনখি।

১২. অসিগুম্বা থৌদোক্তা ঐখোয়গী আর্ম্দ ফোর্সনা পায়খৎখিবা থবকশিংনা তাক্লে মদুদি, মখোয়না শাউনিংঙাই ওইবা থৌদোক্তা "সায়ম" ঙাক্না চৎপা তারবসু, মখোয়না ভারতকী ঙমখৈদা শিংনবা লাকপা মতমদদি "শৌরিয়া"গী মশক লৌরি। ঐহাক্না হাউসতা খ্বাইদগী খুদোংথীনিংঙাই ওইবা ফিবমদা ঐখোয়বু অশোই অঙাম য়াওদনবা হোৎনবীরিবা  ঐখোয়গী লান্মীশিংগী থৌনাবু থাগৎপা ফোংদোকচরি।

১৩. ঐখোয়গী ঙমখৈ অসিবু ঐখোয়না ঙাক্নবা হোৎনরি হায়বসি ময়াম্না চিংননিংঙাই লৈতে, ভারতনা য়ুম্থংনবা লৈবাকশিংগা শান্তি লৈনা ইকাই খুম্ননা লৈমিন্নবদা থাজবা থম্মি। হৌজিক লৈরিবা ফিবম অসি লোইশিনবা পাম্বনা, ঐখোয়না চাইনাগা দিপ্লোমেতিক অমসুং মিলিতরীগী ওইবা থবকশিং লৌখৎনরি। খন্ন-নৈনবা অসিদা, ঐখোয়না মরুওইবা ৱাফম অমা চেৎনা ঙাক্লিঃ ১) নাকল অনীমক্না এল.এ.সি.বু চেৎনা ইকাই খুম্নগদবনি অমসুং ঙাক্কদবনি; ২) নাকল অনীমক্না য়ানবা ৱাফম ঙাক্না চৎকদবনি; ৩) য়ানখিবা ৱাফম খুদিংমক লৈবাক অনীনা ঙাক্কদবনি। চাইনাগী নাকলদগীসু ফিবম অসি থৌদাং লৈনা য়ানখিবা ৱাফমশিংগী মতুং ইন্না শান্তি ওইনা অমসুং মহৌশাগী পুন্সিদা হঞ্জিন্নবা হোৎনগদবনি। অদুবু চাইনাগী নাকলদগীদি মখোয়না ঙাংথোকখিবগা তৌথোক্লকপগা চান্নদ্রি। নিংশিংগদবা ৱাফম অমদি, খন্ন-নৈনবশিং পাঙথোকপা মতমদা, চাইনাগী নাকলনা নুংনাংনিংঙাই ওইবা মিলিতরীগী থবক থৌরম পাঙ্গোং পাৎকী খা থংবা নাকলদা ওগস্ত ২৯ অমসুং ৩০গী অহিংদা য়ানখিবা ৱাফম থুগাইনবা হোৎনরকখি। অদুবু হৌজিকফাওবদা, মতম চানা ঐখোয়গী লান্মীশিংনা এল.এ.সি.গী পরিংদা থবক লৌখৎহৌবনা অদুগুম্বা থবকশিং অদু মাই পাকহনবা ঙমহনখিদে।

১৪. থৌদোকশিং অসিদগী ময়েক শেংনা খঙলে মদুদি, চাইনাগী থবকশিং অসিনা ঐখোয়গী নাকল অনীগী মরক্তা লৈনরিবা য়ানবসি ইকাই খুম্নদে হায়বনি। চাইনানা ত্রুপ থাজিল্লকপা হায়বসি ১৯৯৩ অমসুং ১৯৯৬তা য়ানখিবা ৱাফমগী ৱাংমদনি। লাইন ওব কন্ত্রোল ইকাই খুম্নবা অমসুং ঙাক্না চৎপনা ১৯৯৩ অমসুং ১৯৯৬তা য়ানখিবা ঙমখৈদা শান্তি পুরক্নবগী অমত্তা ঙাইরবা পাম্বৈনি। ঐখোয়গী লান্মীশিংনা মসিবু ঙাক্না চৎচরবসু চাইনাগী লান্মীশিংনদি ইন্দ্রি। মখোয়গী থবকশিংনা মতম মতমগী মতুং ইন্না এল.এ.সি.দা মুক্নবগী থবক থোক্লি। ঐহাক্না মমাংদা পঞ্জখিবগুম্না, মুক্নবা থোকপা মতমদা লৌখৎকদবা থবকশিংসু য়ানৱারোলদা পল্লি। অদুবু হন্দক থোকখিবা থৌদোকশিংদদি, নাকল অনীমক্না অমত্তা ওইনা য়ানখিবা ৱাফমশিংনা চাইনাগী ফোর্সশিংনা থুগাইরি।

১৫. হৌজিক্কী ওইনদি, চাইনাগী নাকলনা এল.এ.সি.গী পরিংদা য়াম্লবা ত্রুপশিং অমসুং খুৎলাই কয়া পৈশিন্দুনা লৈরি। গোগ্রা, কোংকা লা অমসুং অৱাং অমসুং খা থংবা পাঙ্গোং পাৎকী মপান য়াওনা নোংপোক থংবা লদ্দাখতা মুক্নবগী থবক লৈরি। চাইনানা পায়খৎলক্লিবা থবকশিং অসিগী পাউখুম ওইনা, ঐখোয়গী লান্মীশিং মফমশিং অসিদা থাজিন্দুনা ঐখোয়গী ঙমখৈ মপুং ফানা ঙাক্নবা হোৎনরি। হাউস অসিনা ঐখোয়গী লান্মীশিংনা শীংনবা য়াবা থবকশিংদা মতম চুপ্পদা মথৌ পাঙথোক্কনি অমসুং ঐখোয়বু চাউথোকহনগনি হায়না থাজবা থমগদবনি। হায়রিবসি হৌজিকসু য়াম্না সেন্সিতিব ওইবা ওপরেসন চঙবা থবকনি হায়না লৌরি। মরম অসিনা, ঐহাক্না মীয়াম মাংদা অহেনবা পাউ পুথোকপা ঙম্লোইদৌরি অমসুং হাউস অসিনা হীরম অসিগী মতাংদা ৱাখল তাবীরমগনি হায়না থাজৈ।

১৬. কোবিদ-১৯গী মনুংদসু আই.তি.বি.পি. য়াওনা ঐখোয়গী আর্ম্দ ফোর্সশিং থুনা য়াংনা থাজিনখি। মখোয়না হোৎনরিবশিং অসিবুসু শিংথানিংঙাই ওই। হৌখিবা চহী খরসিদা সরকার অসিনসু ঙমখৈগী মফমশিংদা য়াম্না মরুওইবা থমদুনা ইনফ্রাস্ত্রকচর ফগৎনবা হোৎনরি। হাউস অসিনসু হৌখিবা চহী কয়া অসিদা, চাইনানা ঙমখৈগী লমশিংদা ইনফ্রাস্ত্রকচরগী থবকশিং পায়খৎখ্রে। অদুবু ঐখোয়গী সরকারনা অসিনা মমাংদা লৈরম্বা থাক্তগী শরুক অনী হেন্না বজেত্তা ঙমখৈগী লমশিংদা ইনফ্রস্ত্রকচর ফগৎনবা হোৎনখি। মসিগী মহৈনা, অহেনবা লম্বী অমসুং থোং ঙমখৈগী শরুক্তা শাগৎখ্রে। মসিনা লমদম অদুগী মীয়ামদা ফাওনহনবা য়াবদা নত্তনা ঐখোয়গী আর্ম্দ ফোর্সেসশিংনা মখোয়গী পোৎচৈ পুথোক পুশিন তৌবদা হেন্না খুদোংচাহল্লে অমসুং তঙাইদবা মতমদা ঙমখৈগী লমদা হেন্না মীকুপ নাহুমশিংনা লৈবা য়াহল্লে। লাক্কদবা চহীশিংদসু, সরকার অসিনা পান্দম অসি হেন্না ফংনবা হোৎনখিগনি। ঐখোয়না লৈবাক অসিগী ওইবা অচৌবা অমসুং অরুবা খোংথাং কয়া লৌখৎনবা হোৎনবদা কৈদৌনুংদা মনীংদা হল্লোই।

ইকাইখুম্নজরিবা চিয়রমেন,

১৭. ভারতনা হৌজিক লৈরিবা ঙমখৈগী ইস্যুশিং অসি শান্তি ওইনা অমসুং তান্নদুনা লোইশিন্নবা হোৎনখিগনি হায়না থমজরি। মসিগী পান্দম অসি ফংনবগীদমক্তনি, ঐহাক্না চাইনাগী কাউন্তর্পার্তকা সেপ্তেম্বর ৪দা মোস্কোদা উন্নখিবা অমসুং মহাক্কা লোইননা হৌজিক ওইরিবা ফিবমগী মতাংদা খন্নখিবসু। ঐহাক্না ময়েক শেংনা তমজরি মদুদি, চাইনাগী নাকলদগী ত্রুপ কয়া থাজিল্লকপা, অশাউবগী থবক পায়খৎলকপা অমসুং নাকল অনীনা য়ানখিবা ৱাফম থুগাইনবা পায়খৎলিবা থবকশিং অসি লৈবাক অনীনা য়ানখিবা ৱাফমশিং থুগাইবনি। ঐহাক্না মসিমসু ময়েক শেংনা থমজরি মদুদি, ইস্যু অসি ঐখোয়না শান্তি ওইনা লোইশিনবা পাম্মি অমসুং চাইনাগী নাকলদগীসু ঐখোয়গা পুন্না চৎমিন্নবা পাম্মি, মসিদা ঐখোয়না লৈবাক অসিগী অপুনবা অমসুং ভারতকী ঙমখৈ ঙাক্নবা হোৎনবদা চিংনবা অমত্তা লৈতে। ঐগী মরুপ, মপাল থৌরম পুবা মন্ত্রী শ্রী জয় শঙ্করনা চাইনা ফোরেন মন্ত্রীগা মোস্কোদা সেপ্তেম্বর ১০দা উন্নখি। মখোয় অনীমক্না করিগুম্বা চাইনাগী নাকলদগী থমোই শেংনা থবক্তা ওন্থোকপা তরবদি মপুং ফানা লান্মীশিং হন্দোক্নদুনা ঙমখৈদা শান্তি অমসুং মহৌশাগী ফিবমদা হঞ্জিনবা ঙমগদবা য়ানৱারোল অমা পুরকখি।

১৮. হাউসকী মীহুৎশিংনা খঙনরে মদুদি, মমাংদসু ঐখোয়না চাইনাগা লোন্নবা ঙমখৈগী লমদগী ঐখোয়গী লান্মীশিং মতম শাংনা লৌথোক্লুরে অমসুং মসিনা শান্তি পুরকখি। হন্দক্কী মতাং অসিদা লৈরিবা ফিবম অসি লান্মী মশীং অমসুং য়ানদবা মফম য়াম্বনা খরা খেন্নবা তারবসু, ঐখোয়না হৌজিক ওইরিবা ফিবম অসি শান্তি ওইনা লোইশিনখিবা পাম্মি।

হাউস অসিগী মতুং ইন্না, ঐহাক্না লৈবাক অসিগী মীওই করোর ১৩০দা থাজবা থমজরি মদুদি, ঐখোয়না লৈবাক মীয়ামগী পুক্নিং হন্থহল্লী। মসি ঐখোয়গী অচেৎপা ফিরেপনি।

১৯. ইকাইখুম্নজরিবা চিয়রমেন, হাউস অসিদা মমাংদগী চৎনদুনা লাকপা মশক অমখক লৈ মদুদি, করিগুম্বা লৈবাক অসিনা শিংনবা অমা থেংনবা মতমদা, হাউস অসিনা মতম চুপ্পদা অপুনবা পাঙ্গল উত্তুনা লাকখি অমসুং ঐখোয়গী আর্ম্দ ফোর্সেসশিংদা অপুনবা অমসুং থাজবা পীরখি। হাউস অসিনা ঙমখৈদা থাজিল্লিবা ঐখোয়গী লান্মীশিংগী হনবা লৈতবা থৌনা, গেলেন্ত্রী অমসুং মথৌনাদা থাজবা থমদুনা লাক্লি।

২০. সার, অদোমগী মফমদগী, ঐহাক্না লৈবাক অসিগী মীয়ামদা থমজরি মদুদি ঐখোয়গী আর্ম্দ ফোর্সেসকী ৱাখল অমসুং থৌনা অসি অদুক্কী মতী ৱাংই, অমসুং ঐখোয়গী লান্মীশিংনা মতম চুপ্পদা মখোয়গী মমাংদা লাকপা শীংনবা খুদিংমক থেংননবা লেপ্লি। হন্দক্কী মতাংদসু, ঐখোয়গী লান্মীশিংনা অশাউবগী মহুত্তা খাঙবা কনবা অমসুং থৌনা উৎলি। ঐখোয়না হায়নবা অমা লৈ – "সাহসে খলু শ্রী বস্তি" মসিনা হায়রি, "ঐখোয়গী থৌনাদা মায় পাকপা লৈ"। ঐখোয়গী লান্মীশিং অসি খাঙবা কনবা, থৌনা অমসুং কত্থোকপগী খুদমনি। সার, ঐখোয়গী প্রধান মন্ত্রীগী খোঙচৎ অদুনা উৎলে মদুদি, ঐখোয়গী কম্মান্দর অমসুং লান্মীশিংগা লোইননা ঐখোয়গী করোর ১৩০গী মীয়াম লেপ্লি। শাথীবা অইং অশাগী ফিবমদা মখোয়গীদমক অখন্নবা অরুম্বা ফি, অখন্নবা তেন্ত, অমসুং খুৎলাই মতীক চানা পীরি। সার, ঐখোয়গী লান্মীশিংগী থৌনা অসি য়াম্না ৱাংই। মখোয়দা ওক্সিজেন ফংদবনা অমসুং কা হেন্না ইংবনা চঙবা ঙমদ্রবা সাইচেন অমসুং কার্গিলগী অৱাংবা মফমদফাওবা চহী কয়া থবক তৌবগী পাঙ্গল লৈরি।

২১. ইকাইখুম্নজরিবা চিয়রমেন, ঐখোয়না লদ্দাখতা শিংনবা কয়া লৈরি, অদুবু ঐহাক্না থাজৈ মদুদি ঐখোয়গী লৈবাক অমসুং ঐখোয়গী থৌনা ফরবা লান্মীশিংনা শীংনবা খুদিংমক থেংনবা ঙম্বগী পাঙ্গল লৈ। ঐহাক্না হাউস অসিগী মীহুৎ খুদিংমক্কী মফমদা ঐখোয়গী আর্ম্দ ফোর্সকী থৌনা অসিবু ইকাই খুম্নবা উৎমিনসি। ঐখোয়গী থৌনা ফরবা লান্মীশিংগী অপুনবা অমসুং মপুং ফানা থাজবসি লৈবাক পুম্বদা খোন্থাং য়ৈদুনা লৈবদা নত্তনা, মালেম পুম্বা য়ৌগনি অমসুং ঐখোয়গী ফোর্সশিংদা অনৌবা থাজবা অমসুং থৌনা অমসুং লোইবা নাইদবা ইথিল পীগনি।

জয় হিন্দ।"

*****



(Release ID: 1655618) Visitor Counter : 189