সরকার অমসুং ইন্দস্ত্রীনা মতীক চাবা অশোইবা য়াওদ্রবা কোবিদ-১৯গী তিকা অমা অঙনবদা পুথোক্নবা কন্না হোৎনরি, অদুবু করম্বা মতমদা লোইগদগে হায়বদুদি তিকা পুথোকপদা চঙলিবা তোঙান-তোঙানবা মখলগী অরুবা লম্বীশিং অসি য়েংলগা হায়বদা অৱাবা অমা ওইরি।

সরকার অসিনা অৱাংবা থাক্কী নেসনেল এক্সপর্ত গ্রুপ অমা কোবিদ-১৯গী তিকা পুথোক্নবা হোৎনরিবা অসিবু য়েংশিন্নবগীদমক নিতি আয়োগকী মেম্বর অমসুং সেক্রেতরী হকশেল অমসুং য়াইফ-য়ুম্বাল মন্ত্রালয়না লোইননা লুচিংদুনা শেমখ্রে। অতোপ্পা শরুক য়ারিবা মীহুৎশিংনাঃ সেক্রেতরী এক্সতর্নেল এফিয়র্স মন্ত্রালয়, সেক্রেতরী, বাইওতেক্নোলোজী বিভাগ, সেক্রেতরী হেল্থ রিসর্চ, হেল্থ সর্বিসকী দিরেক্তর জেনরেল, হকশেল অমসুং য়াইফ-য়ুম্বাল মন্ত্রালয়, দিরেক্তর ওল ইন্দিয়া ইন্সতিত্যুৎ ওব মেদিকেল সাইন্স, হকশেল অমসুং য়াইফ-য়ুম্বাল মন্ত্রালয়, হেদ সি.ই.ও. ইন্দিয়ন কাউন্সিল ওব মেদিকেল রিসর্চ, দিরেক্তর জৱাহর্লাল নেহরু ইন্সতিত্যুৎ ওব পোসগ্রেজুএৎ মেদিকেল এজুকেসন অমসুং রিসর্চ (মেম্বর এন.তি.এ.জি.আই.) অমসুং রাজ্য অমসুং দি./ও. এক্সপেন্দিচরগী মীহুৎশিং য়াওরি। কম্মিতী অসিনা তিকা পীবা, চুন্না তিকা খনবা, লৈশিনবা, মরুওইবা কাংলুপ খন্দোকপা, পুথোক পুশিনঃ কোল্দ চেন রিক্বাইর্মেন্ত, শেল-থুম, অমসুং নেসনেল/ইন্তর্নেসনেল এক্বিতীদা লৈবা খুদোংচাদবশিং য়েংশিল্লি।

সেন্ত্রেল দ্রগ স্তেন্দার্দ কন্ত্রোল ওর্গানাইজেসন (সি.দি.এস.সি.ও.)না তেস্ত লাইসেন্স পর্মিসনশিং কোবিদ-১৯ তিকা প্রিক্লিনিকেল তেস্ত, একজামিনেসন অমসুং মখাগী ভারত্তা লৈবা মেন্যুফেকচররশিং অসি য়েংশিন্নবগীদমক অয়াবা পীখ্রে।

১. এম./এস. সেরম ইন্সতিত্যুৎ ওব ইন্দিয়া প্রাইবেৎ লিমিতেদ পুনে

২. এম./এস. কেদিলা হেল্থকেয়র লিমিতেদ অহেমদবাদ

৩. এম./এস. ভারত বাইওতেক ইন্তর্নেসনেল লিমিতেদ, হায়দেরবাদ

৪. বাইওলোজিকেল ই. লিমিতেদ, হায়দেরবাদ

৫. এম./এস. রিলাইএন্স লাইফ সাইন্স প্রাইবেৎ লিমিতেদ মুম্বাই

৬. এম./এস. ওরোবিন্দো ফার্মা লিমিতেদ, হায়দেরবাদ

৭. এম./এস. জেনোভা বাইওফার্মাস্যুতিকেল লিমিতেদ, পুনে

হকশেল রিসর্চকী বিভাগকী মখাদা লৈবা ওতোনোমস ওর্গানাইজেসন অমা ওইরিবা ইন্দিয়ন কাউন্সিল ওব মেদিকেল রিসর্চ (আই.সি.এম.আর.)না হায়খ্রে মদুদি মখাগী কম্পেনীশিং অসিনা ভারত্তা কোবিদ-১৯ তিকাগী ক্লিনিকেল ত্রাইএলশিং চত্থরিঃ

১) আই.সি.এম.আর.-নেসনেল ইন্সতিত্যুৎ ওব ভাইরোলোজী, পুনেনা পীবা ভাইরস আইসোলেৎ (এন.আই.ভি.-২০২০-৭৭০) শীজিন্নদুনা ভারত বাইওতেক ইন্তর্নেসনেল লিমিতেদ (বি.বি.আই.এল.)না সার্স-কোব-২গী ইনএক্তিব হোল ভাইরিওন কেন্দিদেৎ ভেক্সিন (বি.বি.ভি. ১৫২) পুথোকখি। ভেক্সিন কেন্দিদেৎ অসিগী মওং মতৌ অসি আই.সি.এম.আর.-এন.আই.ভি.না চেকশিন্না অমসুং তোলরেবিলিতী স্তদীশিং উচী, বোরা উচী অমসুং থেবগুম্বা অপীকপা শাশিংদা পাঙথোকখি। ক্লিনিকেল ত্রাইএল অসিগী ফিবম মখাদা থম্লিঃ

• ফেজ ১ ক্লিনিকেল ত্রাইএলশিং অসি অচৌবা শাশিংদা নৈনবগা লোইননা মপুং ফানা পাঙথোকখ্রে। ত্রাইএল অসিনা কেন্দিদেৎ ভেক্সিন অসিগী মতীক চানা অশোই অঙাম য়াওদবা উৎখি। ইম্যুনোলোজীগী তেস্তিংসু মখা তানা চত্থরি।
• ফেজ ২ ক্লিনিকেল ত্রাইএলসু চত্থরি।

২) কেদিলা হেল্থকেয়র লিমিতেদনা দি.এন.এ. ভেক্সিন (জাইকোব-দি) পুথোকখি। মসিগী প্রি-ক্লিনিকেল ত্রাইএল তোক্সিসিতী স্তদীজনা উচী, বোরা উচী, থেবগুম্বা অমসুং গিনিয়া পীগকুম্বা অপীকপা শাশিংদা পাঙথোকখি। কেদিলানা আই.সি.এম.আর.গা পুন্দুনা  পেরেলেল প্রি-ক্লিনিকেল স্তদীজ অচৌবা শাদা পাঙথোকমিন্নখি। ক্লিনিকেল ত্রাইএল অদুগী ফিবম মখাদা থম্লিঃ

• ফেজ ১ ক্লিনিকেল ত্রাইএল তৌখ্রে। ত্রাইএল অসিনা কেন্দিদেৎ ভেক্সিন অসি অকাইবা লৈরোই হায়বা উৎলে। ইম্যুনোলোজী তেস্তিং চত্থরি।
• ফেজ ২ ক্লিনিকেল ত্রাইএল চত্থরি।

৩) সেরম ইন্সতিত্যুৎ ওব ইন্দিয়া (এস.আই.আই.) অমসুং আই.সি.এম.আর.না পুন্দুনা গ্লোবেল ভেক্সিন কেন্দিদেৎ অনী ক্লিনিকেল দিবেলপমেন্ত তৌখি।

• সি.ঐচ.এ.দি.ও.এক্স.১-এস. হায়বসি য়ুনিবর্সিতী ওব ওক্সফর্দ/এস্ত্রা জেনেকানা পুথোকপা নোন রেপ্লিকেতিং ভাইরেল ভেক্তর ভেক্সিন অমনি। ভেক্সিন অসি ফেজ ৩ ক্লিনিকেল ত্রাইএল ব্রাজিলদা চত্থরি। ফেজ ২/৩ ব্রিদজিং স্তদীজনা আই.সি.এম.আর.না ক্লিনিকেল ত্রাইএল সাইৎ ১৪দা পাঙথোক্লি। আই.সি.এম.আর.- নেসনেল ইন্সতিত্যুৎ ফোর রিসর্চ ইন ত্যুবর্কুলোসিস (এন.আই.আর.তি.), চেন্নৈনা লুচিংবা ইন্সতিত্যুসন ওইরি।
• আই.সি.এম.আর. অমসুং এস.আই.আই.না য়ু.এস.এ.দা লৈবা নোভাভাক্সনা পুথোকপা গ্লাইকোপ্রোতিন সবয়ুনিৎ নেনোপার্তিকল এদজুবান্তেগী ক্লিনিকেল দিবেলপমেন্ত তৌনবা হোৎনরি। ত্রাইএলনা ওক্তোবরগী অনীশুবা তংখাই চল্লকপদা এস.আই.আই.না তিকা অসি পুথোক্লবা মতুংদা পাঙথোক্কনি। ত্রাইএল অসি আই.সি.এম.আর.-নেসনেল এদস রিসর্চ ইন্সতিত্যুৎ (এন.এ.আর.আই.), পুনেনা লুচিংলি।

বাইওতেক্নোলোজী বিভাগ (দি.বি.তি.)/সাইন্স অমসুং তেক্নোলোজী বিভাগনা পীরকপা পাউদমগী মতুং ইন্না, তোঙান-তোঙানবা দিবেলপমেন্তকী তাংকক্তা লৈরিবা ভেক্সিন কেন্দিদেৎ ৩০ রোম হেন্না শৌগত্তুনা লৈরি।

আই.সি.এম.আর.না ভেক্সিন দিবেলপমেন্তকা মরী লৈনবা তোঙান-তোঙানবা নৈনরোলগীদমক অমসুং অতোপ্পা থবক থৌরমশিংগীদমক লুপা করোর ২৫.০০ কাইথোকখ্রে।

সাইন্স অমসুং তেক্নোলোজী বিভাগকী মখাদা লৈবা স্তেত্যুতোরী বোর্দ অমা ওইরিবা সাইন্স অমসুং ইঞ্জিনীয়রিং রিসর্চ বোর্দ (এস.ই.আর.বি.)না হাই প্রাইওরিতী এরিয়াশিংদা কা হেন্না রিসর্চ তৌনবগীদমক কোবিদ-১৯গী মখাদা প্রোজেক্ত ৩ শৌগৎলি। মসিগীদমক কাইথোক্লবা চাদিংনা লুপা ২২,২৭,৫৭৯/-নি অমসুং কম্মিতেদ চাদিংনা লুপা ৩,২০,৭৮,১৬১/-নি।

বাইওতেক্নোলোজী বিভাগনা কেন্দিদেৎ ভেক্সিন শেমগৎনবগীদমক ইন্দস্ত্রী অমসুং একাদেমিয়াশিংদা অমসুং মরী লৈনবা রিসর্চ সোর্সশিংদা অপুনবা শেনফম লুপা করোর ৭৫কী ওইগদবা প্রোপোজেল ৮ শৌগৎলি।

হকশেল অমসুং য়াইফ-য়ুম্বাল মন্ত্রালয়গী রাজ্যগী মন্ত্রী শ্রী অশ্বিনি কুমার চৌবেনা ৱাফম অসি রাজ্য সভাদা ঙসি অইবা পাউখুম ওইনা পীখি।

*****